سقوط مدرسه شيكاغو..

أستمتع جدا بحالة الذعر التى تجتاح أمريكا والعالم الرأسمالى تلك اﻷيام..أزمة اﻷئتمان..سقوط مدوى بلا رحمه لمدرسه شيكاغو..ومقولات الرأسماليه هى أفضل نظام أقتصادى فى التاريخ..تاريخ أيه..؟؟

مالتاريخ أنتهى..!! كما بشر دعاة الرأسماليه المنطلقه من كل القيود..الرأسماليه المتوحشه طبعه امريكا..ولكن التاريخ لاينتهى..أتخيل عمنا "كارل ماركس " يضحك حتى تدمع عيناه على منظر "بوش" البائس فى خطابه اليأس اﻷسبوع الماضى للأمه..يشحذ من الكونجرس فلوس -بسيطه حسبه ٧٠٠مليار دولار بس- ﻷنقاذ شركات اﻷئتمان والتسليف وأعادة التأمين من اﻷفلاس..نفس الشركات والبنوك التى رفضت وحتى أشهر قليله أى نوع من القيود على حركتها..

أيه الموضوع

ببساطه هرم ضخم من الشركات وعمليات أقراض وأعادة أقراض بين بنوك ومؤسسات واقف على رأسه..ورأسه هنا هى سوق العقار اﻷمريكى..الركن اﻷساسى فى الحلم اﻷمريكى البيت أياه..جنينه أماميه وأخرى خلفيه وياحبذا لو بها حمام سباحه..وجراج يسع سيارتان على اﻷقل..تشترى بيت بالكريدت..تدفع أقساط شهريه بفائده مركبه..مثلا أشتريت بيت بمائه ألف دولار بفائده ٧% على ٢٥ سنه تجد أنك دفعت فى النهايه تمن المنزل عده مرات..قيمه القرض باﻷضافه للفائده وخدمه الدين..ولكنك ساكن فى البيت وقيمته فى تصاعد لديناميكيه سوق العقار..والقسط الذى تدفعه يشكل نسبه معقوله من دخلك والمفروض أنك حتشتغل على طول..أى هزه فى تلك السلسه المنطقيه يؤدى لمأساه شخصيه..لو فقدت عملك..لو مات عائل اﻷسره أو حدث طلاق..هنا يدخل التأمين كعنصر أساسى فى المعادله..تأمين على المنزل وتأمين على الرهنيه وتأمين على الحياه..ألخ ألخ يعنى المواطن اﻷمريكى من الطبقه المتوسطه العريضه يعمل كالحمار لسداد أقساط البيت والسياره والتأمين ..ألخ

المفروض أن البنوك أو شركات اﻷقراض تكون دقيقه فى أعطاء تلك القروض..الفتره اﻷخيره أصاب الجميع حالة خبل لاتخفى عن العين..شركات المقاولات تبنى بوتيره متسارعه..أفراد دخولهم غير مضمونه بسبب تدنى تعليمهم مثلا أو أنتفاء مهارات عمل متميزه لديهم -أنا أصف الحاله وليس معنى ذلك موافقتى عليها فأنا يسارى..ماشى-أشتروا منازل غاليه وأخدوا قروض أكبر من قدرتهم على الوفاء بها..أعتمادا على تدنى أسعار الفائده..واﻷمل فى بقائها كما هى..وتوقع زياده سعر المنازل بأستمرار..مما يعنى أرتفاع قيمه العقار وقدره المالك على إعادة اﻷستدانه بضمان قيمه منزله المرتفع التمن

عشرات اﻷلوف بل الملايين من نفس السيناريو..الشركات الصغيره تعطى اﻷئتمان..وتبيع المنازل لأفراد..ومن ناحيه أخرى تبيع عمليه اﻷئتمان كلها لبنوك وشركات أعاده اﻷئتمان

يعنى

أنا بعت عشره منازل الواحد بميت ألف المبلغ اﻷجمالى مليون دولار..فى ظرف ٢٥ سنه أسترد من الملاك مش مليون دولار بس ﻷ بالفائده المركبه حأجمع خمسه- سته مليون..أستثمار هايل..طبعا..دخل فيه الجميع

تيجى شركه أكبر شويه تشترى منك مش البيوت ﻷ الديون اللى على البيوت وأنت تاخد حسنتك..وتقوم تلك الشركه بأعادة بيع نفس الدين ده لشركه أو بنك أخر..فى عمليه ملخيطه قايمه على التوقع بأستمرار الحال..وعمليات مصرفيه شديدة التجريد ﻷخفاء حقيقه بسيطه..لايوجد مايٌباع ولامايٌشترى..كله ف الهوا

وفجأتم باعم

أبتدت أسعار العقار تتوقف عن اﻷرتفاع ثم بدأت فى الهبوط..والناس مش قادره تدفع الأقساط لزياده البطاله وأرتفاع تكاليف المعيشه..وبالتالى مش قادرين يعيدوا أقتراض أموال بضمان منازلهم لتدنى أسعارها..الزياده ف العرض لابد تواكبها أنخفاض فى السعر..وماحدش بيشترى منازل ..خلاص اللى أشترى أشترى هى فته...أبتدا من كام شهر ناس ماتدفعش وتسيب منازلها..والشركات الصغيره اللى أقرضتهم فى اﻷول أحتاست عندى بيت فاضى وعليه رهنيه وماحدش بيشترى..فلوس واقفه..أبتدوا يستلقوا من الشركات اﻷكبر..بعد شويه اﻷزمه أترحلت لمستوى أعلى..وبدء تأثير الدومنو..فى أسابيع..لدرجه أنى فعلا مش مصدق أنهار سوق العقار والهرم الواقف على رأسه..اﻷرقام تقول أنه شهريا اﻷن أكثر من عشرة ألاف بيت أمريكى بيعلن أصحابهم عدم القدره على دفع القسط الشهرى..وبالتالى تنزل أسعار البيوت أكتر..ويعجز أخرون عن الدفع..دائره جهنميه..ضربت اﻷقتصاد اﻷمريكى..وشفت بوش

بيشحت ياولداه

عدة ملاحظات حول الموضوع.

...اﻷزمه لسه فى أولها وستسمر لفتره طووويله قادمه ربما عده سنوات

اﻷزمه بدأت تضرب أماكن أخرى من العالم..من شهور أنهار سوق العقار فى أسبانيا..من أسبوع أيرلندا وقبلها الدنمارك دخلوا فى حالة كساد أقتصادى..الناتج القومى تقلص بحوالى ١%

أمريكا ستحاول تصدير أزمتها للعالم..

وبالتالى السؤال مانصيب المحروسه من هذه اﻷزمه..

المرعب لى شخصيا الفوضى الفظيعه فى سوق العقار المصرى..

وان كانت المشكله ليست فى اﻷئتمان العقارى ذلك لايمثل نسبه تذكر من مجمل السوق..المشكله هى تأكل قيمه مدخرات وثروات المصريين التى حولوها الى شقق مغلقه فى الرحاب ومدينتى وشاليهات مهجوره ع الساحل الشمالى..وضاع العمر ياولدى..

كما تنباء وزير الماليه اﻷلمانى المنطقى أن يعقب تلك اﻷزمه العارمه تغيرات جيوبولوتيكيه والا تصبح أمريكا المركز المالى الوحيد..وأن ندخل الى تعدد المراكز الماليه..أوربا..الخليج..الصين

اﻷمبراطوريه لازال لها أسنان..

واﻷغلب أنها ستستعمل تلك اﻷسنان..مالايدركه العديد أن أمريكا تستقبل رؤوس أموال أكتر بكتير مما تصدر..وذلك من ضمن عوامل اﻷزمه..تدفقات ماليه لابد من أستثمارها.

.رأس المال جبان كما يقال يهرب حيث اﻷمان..أو يهرب من الفوضى..اﻷمبراطوريه اﻷمريكيه تعيش على الفوضى المحكومه

أظن أنها ستلجئ لذلك أستراتيجيا

المنطقه المؤهله لذلك هى شرقنا التعيس..وبالذات الخليج..حيث تتدفق مليارات الدولارات يوميا..

سيناريو بسيط.

.توتير المنطقه ولو حتى بحرب مع أيران..أوربا تقلق على مصادر الطاقه..ويرتفع سعر البترول المدفوع بالدولار اﻷمريكى..وتهرب رؤوس اﻷموال الخليجيه الى اﻵمان اﻷمريكى..ويزيد الطلب على الدولار اﻷمريكى لدفع الفاتوره المتزايده لبرميل البترول..وكله سعيد وكله مبسوط

أسرائيل..!! الشيطان الذى نحافظ كلنا عليه وكلٌ لسبب ما..دورها أيه؟؟ربما تبدء هى ببتسخين المنطقه جوله أخرى مع حزب الله أو ضربه لمنشأت أيران النوويه

.والله أعلم

*&*&*&*&*&*&*&*&*&

بس يرضك مش قادر أنسى منظر بوش وهو بيشحت فلوس م الكونجرس

وهع هع هع

المارش المصرى

يحكى أنه والعهده على الراوى- وهو هنا عمنا "هيكل" أطال الله عمره..أنه فى بدايه الحرب العالميه اﻷولى أنحاز العرب للحلفاء ضد المحور..فأرسلت اﻷمبراطوريه البريطانيه بوفد خرج من القاهره الى جده للقاء الشريف حيسن والتفاوض معه..من حكاوى التاريخ الصغيره أن الشريف حسين أكرم الوفد أخر كرم..وفى محاولة منه ﻷبهار الوفد كان هناك أستعراض عسكرى

من ضمن مظاهره فرقه موسيقات عسكريه

بدأت العزف والسير فى نفس الوقت كعادة الموسيقات العسكربه..البعض كان يرتدى الزى العسكرى العتمانى والبعض أزياء بدويه ومابينهما من خليط ف الملابس

.البعض سار بخطوه منتظمه والبعض مشى على مزاجه

ناش شمال وناس يمين وأخرين وقفوا فى أماكنهم

ووسط هذه الفوضى أستطاع أعضاء الوفد البريطانى ألتقاط المارش العسكرى

المعزوف.

.كانت الفرقه تعزف "ألمانيا فوق الجميع"....بعدها ولسنوات طويله كان هناك تعبير يستعمله موظفى وزاره المستعمرات ثم وزاره الخاجيه البريطانيه.

مصطلح "المارش العربى" حين الحديث عن الشرق اﻷوسط العربى...بعد زيارتى اﻷخيره للقاهره أستقر فى عقلى مصطلح "المارش المصرى" حين الحديث عن المحروسه...

حوارات كويله لاتنتهى ألا لتبدء مع طوب اﻷرض..أصدقاء العمر القدامى..أصدقاء جدد أتعرف عليهم للمره اﻷولى..ناس ماعرفهاش ولن أراها تانيه..زباين مقاهى وسط البلد ومصر الجديده وكافيهات الزمالك المتميزه..سائقى التاكسى..أقارب وأولاد عمومه لم أرهم من

سنوات..أبناء أبناء عمومتى من طلبه ثانوى وجامعه

رجال أعمال وناس شيك تسكن الماربنا البوابه خمسه وسته وماأدراك بوابه خمسه

..موظفى شركات وحكومه

ماشفتش حد ممكن أرغى معاه ولو فى طابور السجل المدنى -وتلك روايه أخرى- ولم أفعل..

من سنوات اﻷبنودى قال

أحنا شعبين..شعبين..شعبين

شوف اﻷول فين والتانى فين؟

وآدى الخط مابين اﻷتنين بيفوت

.ألخ ألخ

أظن اﻷبنودى أخطاء فى العدد المحروسه يسكنها اليوم عدة شعوب وكلا يسير فى أتجاه...ولايجمعهم سوى الجيره فى المكان...التمايز الطبقى الموجود فى أى مجتمع تحول فى المحروسه إلى أنفصال طبقى..الطبقات المختلفه فى مصر تدور فى مدارات مختلفه لاتتماس ولا تتقارب..وداخل كل طبقه مدارات فرعيه

الحاصل..أنه لايمكن التعميم فى أى شئ..مهما حاولت..والحاصل أن المجتمع ككل لايتحرك

فى أتجاه محدد والحاصل أن هذا الوضع مرشح بأمتياز للدوام ولفتره طوووويله قادمه

*************

وبالتداعى كده طقت فى نافوخى فكره غريبه وجوديه مبسطه

..أنه مادام اﻷمر كذلك فكل شئ صح

..هناك حريه كامله فى اﻷختيار.

.تقدر فى المحروسه أن تفعل ماتريد وتنحاز الى أى شئ وماحدش يقدر يقولك أنك غلطان..فالعمل الجاد يساوى الهمبكه..واللاعمل يعادل اﻷجاده..تداخلت اﻷمور حتى أصبحت لاتعرف من هو حاميها ومن حراميها..

يحكم المحروسه مجموعه من اللصوص..ويعارضهم مجموعه من اﻷفاقين..أو اللصوص فى أنتظار الدور.

وبالتالى أنت حر تماما فى اﻷختيار..شريطه أن تتحمل نتيجه أختيارك فى مجتمع هلامى لاتدرى ماذا سيكون الحال عليه غدا...هل هناك جانب أيجابى لتلك الحريه الشامله الكامله..ربما؟؟

الشاعر

فانتازيا

الشاعر المسكين

الشاعر الذى تحدث فى قصيدته،

عن جنيه ينزف دماُ فوق مانشيت

(اﻷنتعاش اﻷقتصادى) !!

.. عن فتاه فجرت خصرها

عند الحاجز

وأخرى تفجر خصرها فى اﻷغانى

عن المحمومين بالسؤال :

أفائده البنوك حرام أم حلال؟!

بينما اللصوص يعبرون فى هدوء

بأموال المحمومين!!

الشاعر المسكين

قاده حظه العاثر, لطاوله ,وناقدين ,

تحدثا عن الفانتازيا

وشعرنه التفاصيل

تحدثا عن أسطره الواقع وأبتسما..

ثم صفق الحضور الهزيل

ياللشاعر المسكين

على منصور

***********

.على منصور..زميل الدراسه فى صيدله القاهره كان يصغرنى بسنه أو أثنتان..يجلس معنا ويقرء لنا قصيده عن الوجوه المتعبه فى قطارت الضواحى.

.أبو أحمد كان أقربنا أليه فمجدى شاعر هو اﻵخر رغم ندره أنتاجه.

أخر مره رأيته ربما كان فى عام ٨٠ أو ٨١ أخبرنا أنه يعمل ويحٌضر للماجستير ولاينام تقريبا

.بعدها بدأت تغريبتى الطويله ولم أره

.."فى هجمتى العنتريه على "المدبولى" وجدت مجموعه شعريه له بعنوان "الشيخ

.أختطفتها بحب..واليوم قرأتها وأعدت أرتشافها ببطء عدة مرات.

****************************

كلمه ضاله

الكلمات أيضا,

قد تضل طريقها إلى المعنى

ياأصدقاء

- فاليسوعيون -مثلا-

أتباع

يسوع

كيف يكون (اللوطيون), إذن

الذين لم يتبعوا لوطا؟!

ثم...

.ماذا كان يسمى اللواط

من قبل لوط؟!

كم أنت ضاله

فى كل شئ

أيتها الكلمه

يوليو ٢٠٠٤

************************ .

أذكر حوار جرى بيننا على أحد سلالم الكليه حول روايه "الدار الكبيره" للأديب

الجزائرى "محمد ديب"-وإن كنت لاأذكر من منا دل اﻵخر عليها- يومها قال لى أنه لم يقرء وصف للفقر..كما قرءه فى تلك الروايه..ولم يقرء وصف للجوع كما وصفه محمد ديب

..فأعدت قراءه الروايه كلها ليلتها..

على منصور أنسان رقيق من أشد من عرفت رقة وهدوء..كنا نصخب ونرغى ونسب ونلعن

..................... وهو.

********************************

كأنها سياج

حزينٌ جدا، هذا الرجل،

.أما التلفاز

..حزين.

. وساكت

(كانوا يدلون بأصواتهم،فى الصناديق،وهويتفرح عليهم)

ود لو جرب شعوراً مثل هذا

،قبل أن يموت

كأنها مزهريات،هذه الصناديق

كأنها حدائق

كأنها أراجيح أطفال

بمرحون فى الجوار

كأنها عربات رضع.

.تدفعها أمهات فرحات فى الطرقات

كأنها شمعه

..تعد المساء لصديقين يبوحان بأسرار

!!كأنها موسيقى حنون،

تهدهد قلب شاعرة نرويجيه.

.وهى فى غمرة الكتابه!!

كأنها سياج..

يحرس الوطن فى الليل،

الحقول،

والمصانع،

والجامعات

..وخلايا النحل التى تطن حول الصناديق!

يوليو ٢٠٠٤

تحياتى ياعلى يامنصور وخالص مودتى

الحزن مرض مزمن يعرفه المثقف عندما يصطدم وعيه بشروط التاريخ

ويتحول الحزن الى أكتئاب عندما يفحص المثقف تلك الشروط فيدرك أستحالتها أو أرتفاع ثمنها

..الغضب هو البديل الوحيد للعمل

واﻷحباط الخطوه التاليه للغضب حين يجد المثقف مجتمعه يسير بخطى واسعه عكس اﻷتجاه

ماالعمل..؟؟؟؟

رحت وجيت..ومابينهما 1

كان اﻷتفاق أن نلتقى فى باريس

أن أتخلف فى عاصمة النور عدة أيام ﻷلتقى بصديقان عزيزان..اﻷول لم يستطع الحصول على فيزا ﻷن السفاره الفرنسيه فى القاهره تطلب مقابله شخصيه وعدد محدود المسموح لهم بالدخول لجنه السفاره يوميا..ورغم أنه رجل أعمال محترم وباسبوره مرصع بتأشيرات كوريا واليابان ودول أوربيه أحرى..جاء موعده أخر أغسطس ولم تفلح الوسايط أو المعارف فى زحزحه الموعد..اﻷخر يعمل فى جنوب أوربا مستشار معمارى مهم..ولكنه تأخر ف التقديم لطلب اﻷجازه ولم يستطع الحضور..من ناحيتى لم أرغب فى البقاء بالقاهره ومواعيد عملى والطيران حتمت الذهاب الى باريس فى الموعد المقرر ١٨ أغسطس بالساعه.

صدام الحضارات المسنمر..بين حضاره "أنت مش عارف أما مين"و"حاأجى أن شاء الله..بس أنت روح اﻷول"..من ناحيه..وحضارة..النظام والدقه والنخطيط..من ناحيه أخرى..هذا الصدام.. أوصلنى لباريس صباح اﻷتنين وحيدا..مبتسما..ليلقفنى أحد مسئولى الجمارك فى مطار شارل ديجول..

لاأدرى أن

كان شكلى المثير للريبه جارا ورائى حقيبتان منتفختان وقادم من القاهره..أم الصدفه واﻷختيار العشوائى..أم بركه دعا الوالدين..هى السبب

وكان تفتيش لكل حقائبى بأدب وجديه ودقه..فتح الشنطه اﻷولى فلفحته نسايم القاهره

كل ملابسى الداخليه بعرقها وسخامها وقمصانى المهببه وعدد من التى-شيرت" تحولت ألوانها الى درجات الرمادى..مكدسه بها..مافيش لاوقت ولاقدره على غسيل الملابس..أرميها فى الشنطه الكبيره وخلاص..وفى القلب من أكداس العرق حقيبه بها شيشه هديه لصديق كندى عمل لفتره طويله فى قوات حفظ "السلام" بالبوسنه وسوريا ومصر وذهب لأفغانستان..ونفسه ف شيشه بلدى ومعسل تفاح..طوال الوقت والحوار دائر بيننا..سألنى بالتفصيل عن كل شئ..بأدب وحزم.

.تشقق وجهه عن أبنسامه حين عثر على بعض الكتب مدسوسه فى الحقيبه..تأمل العنوان لحظه فسألته أن كان يقرء العربيه..فهز رأسه..أدركت أنه مغاربى مهاجر الجيل الثانى أو الثالث..ماشى..بقيه التفتيش كان نكته..كام باكو معسل السلوم على تفاح..والمزيد من الكتب فالمزيد من الكتب..وشيشه أخرى صغيره مدندشه هديه للديكور لصديقه أخرى..أزدادت دهشته حين عثر على علبه سيجار كوبى فاخر..ولكنه لملم الحقائب وتركنى أخرج.

.تأشيرة الدخول حصلت عليه ف ٥ ثوان هو الوقت الذى أستغرقه ضابط الجوازات لتأمل صورتى والعثور على صفحه لوضع الختم

الله يجازيك يارامز ياشرقاوى..ألتقيته فى القاهره ولمده ٥ ساعات نشيش ونتحدث..أحضرت له كتاب كان طلبه منى..وأهديته روايه أخترتها بخبث..فرد الهديه بمجموعه كتب على ذوقه..قرأت منها بالقاهره "فاصل للدهشه" روايه لمحمد الفخرانى..و"الفاعل" لحمدى أبو جليٌل..أصابتنى اﻷولى بالفزع وليس الدهشه..رامز وعدنى بلقاء ثانى لم يحدث..وباﻷعمال الكامله ليحى الطاهر عبدالله..ولم يأتنى بها..المهم يوم اﻷحد قبل سفرى هرولت على المدبولى لشرائها فقد طلبها منى الصديق العزيز د.وليد..ووقعت ف أيد بياع أبن جنيه..خرجت من المكتبه بحوالى العشرين كتاب معظمها روايات للشباب وبعض الكتب التى أدرك أنها ولوله وعويل عن أحوال المحروسه..عادى جدا..!! وعشره جنيه هى كل مابقى معى للتاكسى حتى المنزل..

وهى الكتب التى دسستها فى أركان حقائبى وحقيبه الضهر..وأدهشت أخونا بتاع الجمرك فى مطار شارل ديجول..

النكته أنى كنت أدور فى شوارع باريس وأجلس على مقاهيها أو اركب مترو أنفاقها وأنا أتصفح كتاب أسامه غريب..مصر ليست أمى

فرصه..أعمل هذه اﻷيام فى صيدليه صغيره بدلا من صديق مسافر فى إجازه صيفيه..هدوء جميل أتاح لى وقت لابأس به فقمت بغزوه عنتريه على القسم العربى بالمكتبه المركزيه..وحملت عده روايات..

لاأحتمل قراءه غير الروايات ويكفينى ماأراه على النت من هبش وطعن وكر وفر

مافيش دماغ لمعارك دون كيخوتيه مطبوعه..وتحليلات لأصول المؤامرات الوهميه..وتلفيق التاريخ..وتبرير هزائم يستحق المسئولين عنها الموت ضربا باﻷحذيه..وتمجيد "أبطال" مكانهم الوحيد عنابر السجون أو اﻷمراض العقليه

وكله يصب فى خانه مسح عقل اﻷمه أن كان لازال بها ذرة عقل

.وعلى خلفيه من موسيقى هادئه بدأت بروايه "جارسيا ماركيز" اﻷخيره مترجمه للعربيه

ذاكرة غانياتى الحزينات"..بعد حوالى فصل واحد..أصابتنى الترجمه الرديئه بالفزع..الروايه مفككه جدا..وتفتقد الحس الساخر المطبوعه به أعمال ماركيز..فكان لابد من العوده تانيه لمكتبه الحى تلك المره ﻷقرأها مترجمه الى اﻷنجليزيه..الكبير كبير..روايه قصيره جدا..ممتعه جدا..ولاتخلو من لمسات عبقريه بفرشاة فنان متمكن لرسم الوضع السياسى-اﻷجتماعى فى كولومبيا..بدون زعيق ولاصريخ.

.وأمتدادا لجو ماركيز..أصطحبت معى ترجمته الذاتيه -المزينه بأهداء من زوجتى العاشقه ﻷدب أمريكا اللاتينيه ومجنونه بماركيز-أستمتع بالقفز بين فصولها..أتابع ماركيز وهو يغترف من قصه حياته وحياة عائلته أهم أعماله من الحب فى زمن الكوليرا الى لاأحد يراسل الكولونيل..

عزمى بشاره المثقف ال...اﻷيه..أقول فلسطينى..أم أسرائيلى..؟؟ بدأت فى قرأة روايته "حب في منطقة الظل"..ولم أستطع أكمالها بعد مائه صفحه توقفت..هى أمتداد بدون شك لكتابة أميل حبيبى وأسلوبه الساخر فى سعيد أبى النحس المتشائل..ورغم أعجابى الشديد بروايه حبيبى حين قرأتها ﻷول مره من سنواااات طويله..تلك المره جرعه السخريه أصابتى بغصه فتوقفت..هل هو تغير ف المزاج..؟؟ ملل من أعادة نفس الكلام..؟؟ عدم موافقه على أن يكون جل عمل مثقف مثل بشاره هو السخريه ولو كانت سوداء ومكتوبه بأتقان..لاأدرى..

المهم عدت بسلام بعد يومين من القرف الحقيقى والمزاج العطن الى أصحابنا..

محمد البساطى بيوت وراء اﻷشجار

...أبراهيم أصلان شئ من هذا القبيل و عصافير النيل.

.والجميل خيرى شلبى عدل المسامير.

ولسه أسبوع ف الهنا ده صيدليه هاديه وقت للقراءه على خلفيه موسيقيه من محطه كلاسيك خفيفه

********************

أحمد شقير فى مدونته عرض تقرير جاد عن المدونات المصريه حاولت الدخول له عن طريق اللينك الموضوعه وفشلت..رغم صدوره عن مركز دراسات مجلس الوزراء..؟؟!!؟؟ولكن اﻷرقام التى عرضها تستدعى التفكير..مائه وستون ألف مدونه..عدد محترم..وبالتالى لايمكن الحديث عن المدونون كده بالجمله..فالمنطقى ألا يتفق ١٠٠ ألف شخص على شئ تقريبا

ويكون الهدف اﻷساسى المنطقى من هذا الكم هو التعارف والحوار..

السؤال اﻷن هل يحدث هذا..؟؟؟ تعارف أكيد..حوار مشكوك فيه..المدونات والنت عموما هى أمتداد لما هو موجود..فإذا كان الواقع بائس أمتداده أيضا بالحتم بائس..

أنا حظى كان هايل..من النت تعرفت على مجموعه من أفضل الناس..الطريف أن كلهم يعيشون خارج مصر..؟؟اﻷرقام تقول أن ٢٠% من المدونات لمصريين يعيشون خارج مصر..بعض من عرفت أستطعنا دفع الصداقه خطوه للأمام بالتحادث تليفونيا أو بالماسنجر..وهذا هو مكسبى اﻷهم من العمليه التدوينيه برمتها..

طبعا اﻷمر لم يخلو من الوقوع فى براثن أشاوس التدوين..مناضلى الكيبورد..ومثقفى ملخصات ويكبيديا..وشفت المدونون اﻷقفيه..

فى النهايه هل التدوين والنشاط النتى بمجمله ظاهره إبجابيه..أم سلبيه..بجد لاأدرى..؟؟.

. هناك أراء تميل ألى أنه سلبى وتأكيد ﻷنعدام الحركه ف الواقع المعاش..,أخرين يرون أنه النشاط الوحيد المتاح..وكلام عن تدخل حكومى..ومحاولات لخنق حتى الفضاء السيبرى

ملحوظه بناء على الدراسه فأن "أهم ثلاث شخصيات دينية كانت نبي الله محمد صلى الله عليه وسلم ، ونبي الله عيسى عليه السلام ، وعمرو خالد على الترتيب..." !!!!!!!!!!!!!!!وعجبى

**********************

كيلو الثانويه العامه بكام ياعم الله لايسئيك..؟؟

..أحدى قريباتنا تقضى الصيف معنا لحضور معسكر صيفى وتعلم اللغه اﻷنجليزيه..أبنه أحد أعز الناس لدى.

.تانيه ثانوى..طالبه فى أحدى مدارس الراهبات الفرنسيه العتيقه.

.سألتها عن مصاريف المدرسه قالت أنها لاتعلم..!! ولكن دروس تانيه ثانوى الخصوصيه تراوحت مابين ٤٥٠٠ جنيه لكورس الكيميا..و ٣٥ لحصه اللغه العربيه الواحده (أحتاجت حوالى ٢٠ حصه) ومابينهما فيزيا ..رياضيات وخلافه..دروس فى كل المواد عدا الفرنسيه لغه الحديث بالمنزل.

.قالت لى مبتسمه..مدرس الكيميا يمطتى جاجوار ..ومسيو اللغه العربيه عنده هامر.

.مجموعها ٩٤% رياضيات وهلكت نفسها عياط طول الليل..لم تهدء ألا حين قال لها أبوها -واحد من أعز أصدقائى- أن المجاميع السنه دى زفت!!!!

.. ولسه السنه الجايه كمان.

.ألا ياعم هو كيلو الثانويه العامه بكام النهادره..؟؟؟!!!!؟؟؟؟

من أهم الكتب اللى قرأتها أيام الشباب كان كتاب "ستار الفقر"للأقتصادى الباكستانى "محبوب الحق " وكان له تقديم محترم من عمنا د.إسماعيل صبرى عبدالله..

الكتاب ببساطه بيقول

أن محاولات التنميه المعتمده على قوى السوق فقط وبدون تخطيط مركزى أدت ألى أزدياد الفقر النسيى والمطلق فى باكستان .. والثراء من ناحيه أخرى وإزدياد تركز الثروه فى المجتمع..ثم تحول ذلك التركز فى الثروه إلى قوه ونفوذ سياسى وبالتالى تحولت القرارات السياسيه الى خدمه تلك الطبقه الضيقه من الأثرياء......

وأن الأفضل هو الهجوم المباشر على الفقر عن طريق توفير الحاجات الأساسية للفقراء بدلاً من انتظار توفير ذلك عن طريق رفع معدل النمو الاقتصادى. ومن ثم فإنه بدلاً من أن يكون النمو الاقتصادى سبباً لتوفير الحاجات الأساسية فى المدى الطويل يكون النمو الاقتصادى نتيجة أو تابعاً، أى يتحقق النمو الاقتصادى بعد القضاء على الفقر بتوفير الحاجات الأساسية.

ويبررذلك بان توفير تلك الحاجات من تعليم وصحة سيقود الى زيادة انتاجية الفرد ومن ثم مستوى الدخل الذى يحصل عليه بما يحقق النمو فى البلاد. وفى هذا الإطار جادل بأنه يجب النظر الى تحقيق الحاجات الأساسية على انه الهدف الأساسى للتنمية والذى سيترتب عليه زيادة الدخل وتحسن مستوى المعيشة.

.... كما ذكرا صراحة ان الصحة والتعليم هما من اهم محددات انتاجية العمل ومن ثم الدخل

الطريف إنى عرضت الكتاب ده على مجموعه رفاق تلك اﻷيام من اليسارين..فأزاحوه جانبا وأعترضوا على إنى أضيع وقتى فى قراءه أقتصاد برجوازى..!! محبوب الحق عمل بعدها فى اﻷمم المتحده وأستطاع تطوير مقياس مركب هو مقياس النمو البشرى لترتيب بلاد العالم ومجتمعاته المختلفه بناء على

التعليم واﻷميه..الصحه وتوقع العمر..والدخل القومى مقسما على تعداد السكان..

وأصبح هذا المقياس أكتر المؤشرات أعتمادا لقياس مدى تطور المجتمعات..

أوم آآآيه ...خير اللهم أجعله خير ﻷنى غاوى قرف وأدور ع الهم بلمبه جاز..كل الخواجات بتوع اﻷمم المتحده مابطلعوا تقريرهم السنوى ده أطل عليه وأشوف أخر أخبار المحروسه..

ولله الحمد من يوم ماسمعت عنه وأحنا ف النازل

..أخر تقرير عام ٢٠٠٧ أعتمادا على أرقام ٢٠٠٥ أحتلت جمهوريه مصر العربيه المركز اﻷثنى عشر..بعد المائه..

متأخره مركز واحد فقط عن العام السابق.

..أتحدى أى واحد أو واحده فى هذه اللحظه لو أستطاع تعداد ١١١ دوله بدون النظر الى اﻷطلس..كلهم سابقينا..إسرائيل المزعومه المركز ٢٣..كوبا المركز ٥١ وكانت الخمسين السنه اللى فاتت..بركاتك ياعم "راؤل

هو أنا بس مش مفقوع ألا ﻷن أيسلندا طلعت اﻷولى هذا العام

..فيها أيه حته التلج دى..ولاحاجه..لازراعه ولابترول ولايحزنون

..أيرلندا ف المركز الخامس

مع أنه حسب معلوماتى من ٢٥-٣٠ سنه أيرلندا تلك كانت أفقر دوله أوروبيه..ومستويات المعبشه فيها تقارب دول

العالم التالت

***********************

وبالمره بقى -وأهو كله حرق دم - تقرير آخر عن المساواه -أو عدم المساواه- بين الجنسين لعام ٢٠٠٧

بنات ونساء المحروسه أحتلوا بلا فخر المركز المائه وعشرون مقارنه بالمركز ١٠٩ لعام ٢٠٠٦.

..السنه دى أضافوا ١٣ دوله ومجتمع فتقهقرنا من المركز ١٠٩ العام السابق من الى المركز ١٢٠ لهذا العام

....وكما يقول أهلنا فى المغرب العربى

الله غالب

**************************

تحدبث

...عشان تكمل وتحلو كمان وكمان

..البوست ده عند شقير

..السعاده مش بالمال ولابالعيال.

.رتيوا الشعوب على أساس أحساسهم بالسعاده كنتيجه لمقياسين

الحرية في أن تعيش كيفما تريد

، والرضا بما تعيشه

.وبناء عليه المصريون أحتلوا المركز السادس والسبعون عالميا.

.والخامس عربيا أو ماقبل اﻷخير بعدنا العراق.

أمال النكت والقهقه والضحك ده كله نتيجه أيه؟؟؟؟؟.

التلوث ف القاهره..وتانى

الله غالب

**************************
يوم الروع اﻷعظم

..حين ينشق القمر

..وتنهد الجبال

..ويسمح الرب - اﻵله لكل منا البشر الفانون أن ينقذ شئ واحد فقط من هذه الدنيا

يومها سأجرى هاربا من الجحيم ..عاريا..حاملا معى علبه بها ١٠ ديسكات

تحتوى على سيمفونيات القطب اﻷعظم فان لودفيج بيتهوفن التسعه

عزف أوركسترا برلين الفيلهارمونى بقيادة العارف بالله هربرت فون كارايان

سؤال هى النطق اﻷصح كارايان أم كاراجان...سمعت النطقين ولاأدرى أيهما الصح

..السؤال موجه ﻷصدقائنا ذوى الثقافه اﻷلمانيه

أشتريتهم منذ أسابيع وأستمع لهم طوال الوقت من يومها متنقلا من الحركه الرابعه ف السابعه للأولى ف التالته

للكوراليه..وأنام على الحركه التانيه ف السادسه..

كلما أستمعت ﻷعمال بيتهوفن تجتاحنى موجه من الحنين والنوستالجيا

أيام الجمعه البرنامج التانى عمنا الدكتور حسين فوزى شرح وتحليل بصوته المميز ولغته العربيه الراقيه وهو يحشر فى دماغنا مصطلحات الموسيقى العالميه كونشيرتو..سوناتا..ألات النفخ الخشبيه..

والراديو العتيق لا أف أم ولايحزنون وأنا ألتصق به مستمعا بأهتمام شديد

..د.حسين فوزى مولع ببيتهوفن

..وكنت أحس بأستمتاعه وهو يقدم لنا أعمال العبقرى..

الخامسه أجمل عمل موسيقى هنا الحركه اﻷولى لاحظ تركيز المايسترو العبقرى

وهنا الحركه الرابعه والكوراليه للتاسعه أكمل عمل موسيقى أنتجه اﻷنسان.

ملحوظتان حول التاسعه

..اﻷولى المناقشه الحاده جدا حول العمل والثقافه عموما الموجوده فى الكومنت على يوتيوب

والتانيه

Bassbariton/Bass: Walter Berry

اللى بيفتتح الكوراليه... أيه الصوت الفخم ده وهو يملئ القاعه

Happy Canada Day

Canada Day
أو العيد القومى لكندا..أجازه..الصبح نطلع على البرلمان نتفرج على عرض

Royal Canadian Mounted Police

RCMP أختصارا

..عرض شيق بالأحصنه..ناكل هوت دوج ونتمشى شويه وسط البلد وسط الزحمه حوالين البرلمان نتفرج على عروض مجانيه.. ونرجع..

بالليل كالعاده نتعشى عند بعض اﻷصدقاء من بيتهم ممكن نتفرج على اﻷلعاب الناريه الجميله التى تبدء الساعه ١٠ مساء..

فيه حفلة منوعات تقام قبل اﻷلعاب الناريه دى ساره حاتحضرها هى وأصدقائها..خلاص كبرنا مابنروحش مع بابا وماما

وبكره شعل عادى

...بس خلاص ده أحتفال العيد القومى لكندا

..حاجه خيبانه خالص

..والله أقترحت عليهم مجموعه أقترحات لتحسين اﻷحتفال

..."شويه أعانى وطنيه "الكنديين أهما".. مثلا أو "كندا هى أمى"..

ولازم وهالبت نعرض فيلم وطنى

ونسميه

Return My Heart

ولابد واحد دمه تقيل يقول لواحد دمه أتقل

You are from the librals Ya Johen

"أنت من اﻷحرار ياجون

كده يبقى اليوم الوطنى له طعم

..وياسلام لو السبد رئيس الوزراء " ستيفن هاربر" يفتتح مشروع صرف صحى فى مدينه "هارير" الصناعيه ونلم له عيال المدارس ندى كل واحد ساندوتش هامبورجر وعلبه بيبس على عمال غزل مونتريال ونظرف كل واحد خمسه دولار وبقفوا يهتفوا

With Blood With "sole" ...we will continu

وسيده كندا اﻷولى مدام "هاربر" تروح تفتتح مكتبه "ماما بيرجيبت" -والله ماأعرف أسمها أيه..

وتطلع ف التلبفزيون تسلم على عيال نضبفه كده ومربربه بتاكل مربه وزبده كل يوم عشان نحسن صوره كندا ف العالم.

.مثلا يعنى..

طبعا كل مقترحاتى أترفضت مع تحذير حاد والنبى أتلهى على عينك..

لأ بجد..مافيش أغانى وطنيه كنديه..عملت

جوجول تقريبا ماطلعش حاجه..لكن

وجدت دى تلخيص للوضع الكندى..

الطريف أنها أعلان بيره

هع هع هع

****************************

كنت بأسمع موسيقى كلاسيك النهارده الصبح

ساره" سألتنى سمعت "بول بوتس"..!!

مبن ده زعيم الخمير الحمر فى كمبوديا ف السبعينيات؟؟

ﻷ يابابى بول بوتس اللى كسب

Britains Got Talent

..طرقعت ع الكى بورد..وقالت لى

أسمع ده..ياخبر أسود منقط بأسود..الراجل بيغنى

Nessun Dorma

واحده من أصعب مايغنيه أى تينور

..بفاروتى بيغنبها هنا..عجبنى بول بوتس جدا..موهبه

بدون أى تدريب منظم..وبعدها أنطلق زى الصاروخ

*************

Again.... Happy Canada Day

and let's

DANCE

ياااه الثانويه العامه

..فاكر أنا المصيبه دى من حوالى......والا بلاش خللى الطابق مستور..

كنت فى مدرسه الطبرى بميدان الحجاز مصر الجديده..وكنا أيامها حوالى ١٠ زملاء نسكن فى نفس الشارع وكلنا بالثانويه العامه..التنافس على أشده مين يجيب أعلى مجموع ويخش أجدع كليه

..وبالرغم من التنافس كنا نذاكر سوبا..

مصطفى كان أفضلنا ف الرياضيات..أنا تخصص أحياء وكيمياء..محمد أفضلنا ..بتاع كله..وآخرين..

اﻷسابيع اﻷخيره من العام الدراسى نذهب للمدرسه برضك لحضور حصص بعينها..حيث يقوم المدرسين يالمراجعه..

أستاذ أسكندر أجدع مدرس فيزياء ف الدنيا..سربع الحركه ذو نشاط لايفتر رغم بدانته المفرطه..كانت أنقضاضته على تلميذ سرحان بسؤال تطلق موجه من الضحك..

أستاذ مصطفى كمال مدرس اللغه العربيه الشاعر الرقيق وألقاءه المتميز للشعر..

وعمنا اﻷستاذ كمال بطرس..الوسيم كنا نطلق عليه كمبل لشده شبهه بالممثل الذى يقوم بدور ريتشارد كمبل فى الهارب..وأفضل من يشرح تفاضل وتكامل..

رحم الله من مات منهم وبارك للأحياء..وجازاهم عنا خير..

كنا نسهر طول الليل أنا ومصطفى نذاكر..وعلى قرب الفجر نخرج للتمشيه فى شوارع مصرالحديده الهادئه..وينضم لنا ما تيسر من الزملاء..بعضنا كان بدء التدخين وأهى فرصه ينفخ شويه.وبعضنا بشتكى من صعويه ماده معينه..

وبعضنا عينه على نور البلكونه فى شقه بعينها تسكنها جاره يخفق القلب حين تأتى ذكراها..

عبد الحليم حافظ سنتها غنى رساله من تحت الماء كنا نسمعها كل ليله تقريبا..

الست الساعه خمسه فى محطه أم كلثوم..

.قبل اﻷمتحانات بأسابيع أٌصيب محمد بألتهاب كبد وبائى وأعتذر عن اﻷمتحانات..

العبدلله جاب أعلى مجموع ف الحته ٨٢% بحالهم..ودخلت بيهم صيدله القاهره..مصطفى ٨٠% فنيه عسكريه..إيهاب ٧٨% أسنان القاهره..٧٥-٧٨% من نصيب تلاته أربعه دخلوا كلهم هندسه عين شمس...حاجه كده أيام

الرخص..محمد دخل طب السنه التاليه ب٨٨%..وده كان ريكورد أيامها

أأأأأأأأأأأأيه بقى اللى بيحصل الأيام دى

الصديق العزبز د.ياسر ثابت لخص الموضوع..

وبدقه شديده أستطاع ربط أحداث الثانويه العامه بالوضع العام المتردى فى البلد كلها

وعليه العوض ومنه العوض.

.....................

ومادمنا زرنا مدونه الدكتور ياسر..

لابد من التنويه بما يقدمه فيها من عرض للأعمال الروائيه للأديبات العرب

الصوت النسائى فى مضمار الروايه..عرض الدكتور ياسر لبس فقط نقدا أدبيا بل هناك تحليل أجتماعى وتاريخى يعطى مايكتبه صفه أعمق من مجرد النقد اﻷدبى وتصل لمرحله التأريخ

أنا شخصيا أسمى د.ياسر جبرتى العصر..

ولفت نظرى بشده عرضه لكتابات الروائيات السعوديات..هنا..وهنا

وبناء عليه أول ماوجدت روايه أسمها "سعوديات" لساره العلى -كاتبه سعوديه- فى المكتبه العامه هنا حتى أختطفتها وقريتها فى ساعات

أنا عملت بالسعوديه لسنوات..وطبيعه عملى جعلتنى أحتك بطبيات سعوديات من مختلف التخصصات وبصراحه شديده تلك النساء رغم كل القمع والضغط الرهيب الواقع عليهم..من أفضل النساء العرب..ولو هناك أمل فى التغير بتلك الصحراء سيكون بفضل تلك البنات

واتاحت لى الفرص مقابلتهم فى أوربا وأمريكا كدارسات أو زائرات ولم تتغير نظرتى لهم بالعكس..

يالمناسبه الطبيبه التى أجرت العمليه القيصريه لزوجتى هنا فى أوتاوا وشرفنا بعدها اﻷخ فارس..طبيبه سعودبه من أسره محترمه هناك..وعندنا صوره لها مع فارس وأم فارس بعد العمليه بساعات حين أتت للأطمئنان عليهم..وفى الصوره تراها تحمل فارس برقه وتنظر له بحب شديد

.المهم الروايه نفسها أقل من المتوسط..تشبه المسلسلات المصريه..ولكن بها لمحات ولحظات جيده..وأنتقاد للوضع السياسى واﻷجتماعى بالمملكه سريع وحاد..وطيعا لايمكن الوصول للكمال من المره اﻷولى..فتلك اﻷديبات -حسب

معلوماتى-هم الجيل اﻷول من الكاتبات السعوديات..ويجب محاسابتهم فقط بناء على هذا

.....................

ومادام الكلام وصل لحد اﻷخ فارس..أسمع دى

..أشاهد معه مباريات البطوله اﻷوربيه وأتعمد تشجيع الفريق اﻷخر

..يشجع هولندا أشجع روسيا.

.بهتف ﻷسبانيا أصرخ إيطاااليا.

.ومعانا فشار وكوكاكولا..وأم فارس تبص لنا وتضرب كف بكف..أقولها هكذا ربانى أبى..وهكذا أربى أبنى.

..

وبيب بيب زماااالك

************

المهم ماأعرفش إذا كان حد منكم لقط أن مشجعى الكوره الأوربيين بيهتفوا لفرقهم على نغمه مارش النصر ف أوبرا

عايده..دعبست لقيته هنا..أصبر شويه لغايه اللحن اﻷساسى للأبواق النحاسيه

..فيردى ده عبقرى

معلهش..فيه مقطوعه مشهوره جدا لفيردى

"LA FORZA DEL DESTINO"

OVERTURE

ماأقدرش أفتكر اﻷسطى فيردى ألا

وتنط المقطوعه دى لدماغى..

على فكره البوستر العربى اللى أعلن عن أوبرا عايده

فى مصر أيام الخديو أسماعيل حطوا أمام أسم فيردى لقب أسطى

*************

دى بقى لرفاق البيره الهانيكن والستلا

...والنبيذ بأنواعه

وتشيرز

اﻷسبوع الماضى تعرضت الصيدليه التى أعمل بها يومها لحادث سطو مسلح..؟؟

هو مش مسلح أوى يعنى كان معاه سلاح أبيض اللى أحنا بنسمبه سنجه أو ماشتى بلغة الفرنجه..

شاب حوالى ٢٥ سنه ومغطى راسه بطاقيه وشادد مندبل على نص وشه حاجه هولبود خالص..خبط بالسنجه على الكاونتر وصرخ أدونى كل اﻷوكسى اللى عندكم

أوكسى هم أختصار لكلمة..

Oxycodon

مخدر قوى بيستعمل فى حالات اﻷم الشدبده وبعد الجراحات ..

من أسابيع هناك موجه سطو على الصيدليات الصغيره

أحدى الزميلات أصابتها حالة فزع شديده وأعطت الحرامى كل مالديها من أوكسى الشرطه قدرت تمنها فى الشارع بتلاتين ألف دولار

كنت الراجل الوحيد بالصيدليه كل من يعمل معى يومها من الجنس اللطيف..باﻷضافه لزبونتان

أبتدا الصريخ وهذا أسؤ رد فعل..اللص ممكن يتخض ويضرب حد بالسنجه وتبقى مصيبه مالهاش لزمه

..بهدوء شديد طلبت من الجميع الهدوء

وسألته تانى عاوز أبه..!! بدون أى حده ف الصوت

أوكسى وألا..؟؟

طبعا بعيدا عن العنتريه وأفلام فريد شوقى وبروس لى مددت يدى أخذت علبه من الرف وألقيتها أليه لقفها وطلع يجرى

..جرى قفلت الباب منعت أى حد يخرج وواحده م البنات طلبت البوليس

..الحكايه دى حصلت عز الضهر..يعنى واد فاقد ممكن يعمل أى حاجه..

طبعا ف دقايق البوليس كان جه..بس على مين..زاغ أبن الحراميه

الطريف أننا ف الصيدلبه توقعا لشئ من هذا القبيل حضرنا علبه أوكسى فاضيه وميبناها دوا تانى

Domperidone

حاينشف ربق دين أمه لو أخده..هع هع

**********

من فتره أشدت بروابه

De Niro's Game

لكاتب كندى من أصول لبنانيه "راوى حاج" عن الحرب اﻷهلبه اللبنانيه وأعتقد أن بها جزء كبير ترجمه ذاتيه للمؤلف ذاته

..بها فصل شديد اﻷمتاع يحكى عن كلاب الشوارع أثناء الحرب

وكبف أن بعضها كلاب أصيله أقتناها أصحابها من باب التفاخر والتظاهر اﻷجتماعى ثم تركوها لمصيرها وهربوا من البلاد..

تحولت الى عصابات تقطع الطربق وتهاجم الناس حتى أضطرت المليشيات فى بيروت الشرقيه ﻷعلان الحرب عليها..فى صوره شديده السخربه شديده اﻷمتاع

..الروايه فازت بجائزه أدبيه محترمه "جائزة دبلن اﻷدبيه" لهذا العام.

..الله ماأحنا بنفهم أهو بالصلاة ع النبى

حاج رفض وصفه بالكاتب اللبنانى وأصر على أنه كندى..وأشاد بما قدمته له كندا من حريه وفرصه للكتابه

.......

شوف أبن الكلب الخاين..وينك وينك لحد بصدق والا حاجه.....هع هع هع تانى

********************

وبمناسبة الروابات..أنهيت من ساعات روابه مشهد عابر للكاتب السورى فواز حداد أول مره أقرء له.

.الروابه عباره عن مجموعه قصص متلاحقه عن أفراد رجال ونساء ف المجتمع السورى يريط الجميع خيط بسيط ولكن الكاتب من خلال تلك الحكاوى يكشف الحاله الشديده التردى التى وصل لها المجتع السورى

فشل على كافة المستويات..فساد للأذان..صراع بين حرامية الحزب وأجهزة اﻷمن..الدعاره بكافه أشكالها أخفها أفسادا دعاره الجسد..

الروابه خليط من كوابيس كافكا وسخريه ماركبز وخفه دم شامى لاحل لها واللهجه السوريه الشديده الجمال وبالذات الشتائم وسب الدبن.

.أفتح أى صفحه وأقرء

"...ولايخفاكم أبها الرفاق الحزبيون اﻷفاضل أن "فالح" يقتنى وبسكل علنى ثلاث صاحبات يوزع أوقاته بينهن....."

الكلام عن أحد شخصبات الروايه ضابط مخابرات مهم

"...بعد سنوات عندما سيروى المسئول الحزبى هذه الحادثه سيعقب عليها بأنها كانت من تلك المحاولات المبكره

لضرب الحزب باﻷستعانه يمثقفين ليبرالين جواسيس..."

طبعا هذا المثقف راح ف الكازوزه

"...لم بكن التراخى الشاعرى الثابت للسفن المتهاديه سوى السطح البارد البادى للأعين, بخفى تحته الحجم الحقبقى لنشاط شبكات الضالعون فبها والمستفيدون منها كسبوا من وراء عملياتهم المريبه وتواطؤهم مع المخلصين الجمركيين ثروات تقدر يالملاببن...."

الكلام عن أحدى موانى سوربا

الروابه بمكن ترجمتها الى اللهجه المصربه فتنطبق على المحروسه

أو ألى اللهجه الجزائيه قتركب تمام على بلد المليون شهيد فطيس

..وأن شاء الله الى اللهجه الفلسطينيه فتمشى مع أحداث الدوله الفتيه

وهع ..هع.. هع تالت مره

************

الجمعه آخر النهار..راجع البيت توقفت ..خرجت من السياره..أشاهد منظر الغروب الجميل

..من أيام والدنيا تمطر والجو مش ظريف

اليوم الوضع مختلف..السماء صحو..اولايوجد مطر أو سحاب..الشمس تعزف سيمفونيه جميله من درجات اللون الأحمر والبرتقالى فى الأفق وهى تغرب خلف مرتفعات الجانب اﻷخر من النهر

نهر أوتاوا... نهر عريض متدفق أتذكر النيل كلما رآيته..كنت أقف فى بارك جميل يمتد بحذاء النهر...الجو جميل منعش نسمه بارده تهب من الشرق..وعلى بعد خطوات وقف رجل ومرأه عجوزان..يتأملان المنظر هما كمان

..حملت النسمه صوته وهو يقول لها بدفء أحبك..وهى ترد علبه برقه أشد وأنا أيضا أحبك..

.ألتفت وجدتها تسند راسها على كتفه.

..الله..أحسست بأنتعاشه جميله..وأزداد المنظر جمالا ورونق

دى بقى من غير هع

على رأى الصديقه حفصه

هى الدنيا ضلمه كده ليه..؟!؟

النهارده كنت شغال ف صيدليه هاااديه تماما وﻷنى نسيت الروايه اللى بأقراها اليومين دول ف البيت فضلت ألف على

الشبكه العنكبوتيه مدونه تشيلنى ومدونه تحطنى

ومن البديل للمصرى اليوم للدستور للأهالى للكرامه

..ياقلبى لاتحزن

..دى مش بلد دى منطقه كوارث..أيه الضلمه دى..؟؟

************************************

وزاره الخارجيه الكنديه بتحذر المسافرات الى مصر من التورط مع أو الزواج من رجال مصريين.

!!!!!.شوف العنصريه ياأخى

شوف بيقولوا أيه

Women, particularly foreign women, are frequently subject to

unpleasant male attention, sexual harassment, and verbal abuse. This often takes the form of staring, inappropriate remarks, catcalls, and touching. The Department publishes a booklet entitled Her Own Way: A Woman’s Guide to Safe and Successful Travel. Its prime objective is to inform Canadian women and encourage them to travel safely.

هى الخيبه لما تحط بتحط بالويبه على الكل

..الصديقه أبومينتركس كاتبه عن الموضوع ده

وتذكرت أنى قرأت من فتره فى مدونه إن المصريين من أكتر الناس بحثا فى جوجول عن كلمه جنس بالعربى وسكس

باﻷنجليزى

...دعبست شويتين لفايه مالقيت التدوينه عند أحمد فى أٌحد

..حط المعلومتين كده جنب بعض

..تعرف أن فيه حاجه غلط خاااااالص

****************************

حاولت أقرا أى حاجه ماعرفتش..

شيشت وحرقت صدرى شويتين حلوين

..ورجعت لفيت شويه فى التلفزيون لقيتهم عارضين

الطيب والشرس والقيبح

...يااااااااااه

تنحت أمام التلفاز..أستمتع بموسيقى

Ennio Morricone

...

وذكريات أفلام الويسترن القديمه

..

دى كمان حلوه آوى

وملعون أبو الدنيا

فى النصف اﻷول من القرن العشرين أنتهجت كندا سياسه لدمج السكان اﻷصليين (الهنود!!) فى المجتمع الكندى..على كافه المستويات..كان من ضمنها أجبار أطفال أهل البلد اﻷصليين على اﻷلتحاق بمدارس داخليه صارمة النظام حيث ممنوع عليهم التحدث بالغاتهم اﻷصليه ومجبرين على تعلم اﻷنجليزيه أو الفرنسيه مع التركيز على تحقير ثقافتهم اﻷصليه رغم ثرائها وألتصاقها بالبيئه والواقع الطبيعى المحيط بهؤلاء الأفراد..

وكان هناك العديد من التجاوزات فى تطبيق تلك السياسه من أنتزاع اﻷطفال من بيئتهم اﻷصليه وأهلهم وترحيلهم لما يشبه السجون..والمعامله القاسيه..والتى وصلت الى حد اﻷيذاء الجسدى وحتى اﻷعتداء الجنسى أحيانا

اليوم فى مشهد تاريخى لكندا قدم رئيس الوزراء الكندى ستيفن هاربر أعتذار رسمى من الشعب والحكومه الكنديين ﻷهل البلد اﻷصليين

..وأنضم له فى هذا اﻷعتذار رؤساء كافه اﻷحزاب من المعارضه الرسميه وغيرها

المشهد كله كان عاطفى ومشحون..بكى فيه رئيس حزب اليسار..وبعض أعضاء البرلمان وكان على الهوا مباشره..

والخبر اﻷول فى كافه النشرات اﻷخباريه باﻷنجليزيه والفرنسيه..وتم التركيز على ضروره أحترام الثقافات والعادات المختلفه ومبدء مساواة كافه عناصر وأعراق المجتمع الكندى..

من شهور قدم رئيس وزراء أستراليا أعتذار مماثل لسكان البلد اﻷصليين

..بعض من التغطيه اﻷخباريه

كورة قدم

فارس أبنى -١١سنه- غاوى كرة قدم..وأحنا بنشجعه..من ناحيه ﻷن الرياضه مهمه..ومن ناحيه أخرى ممكن أجادته لكره القدم تساعده على دخول كليه كويسه فى جامعه محترمه سواء هنا أو فى أمريكا..يلعب فى فريق المدينه -أورلينز - التى نسكنها وأسم فريقها الكوبرا(!!) المهم فى مجموعته السنيه ضموه للفريق التانى مش اﻷول..وده للسنه التانيه رغم أجادته للعب..أختيارهم للفريق اﻷول كان على أساس الحجم وليس أجادة لعب كرة القدم..وهنا التأثر بلعبه الهوكى واضح..ﻷن هوكى التلج يعتمد على التلاحم والضرب..وبالتالى الحجم مهم جداً..

الويك أند دى السيد فارس وفريقه من اﻷطفال ضئيلى الحجم أثبتوا خطاء تلك الفكره

..المدينه نظمت دوره توازى البطوله اﻷوربيه..ودعوا فريق كوبرا٢ (فريق فارس) كمالة عدد..كل فريق أخد أسم دوله..

والكوبرا أتنين طلعوا البرتغال

..السبت صباحا

الساعه ٨ حفل اﻷفتتاح..طابور عرض للفرق..ومشوا اﻷولاد خلف أعلام الدول التى يمثلوها..وحصر سفير سويسرا وزوجته وسفير النمسا وألقوا كلمه بالظبط زى البطوله الكبيره

..ولعبوا اﻷولاد بنفس ترتيب المجموعات

البرتغال التى يمثلها فارس وزملائه لعبت ضد تركيا التشيك وسويسرا..وكلهم فرق أولى واﻷولاد أجسامهم وأطوالهم فعلا أكبر من عيالنا..بس كرة القدم مافيهاش حجم..تعتمد على المهاره..

وقد كان

تعادلوا مع تركيا بدون أهداف..أخدوا شويه ثقه فى نفسهم هزموا التشيك ٢ /صفر..زادت الثقه سحقوا سويسرا ٥ /صفر..وسط دهشة كل منظمى الدوره ﻷن فريق الكوبرا ٢ كان فعلا كمالة عدد

تميز فى فريقهم..حارس المرمى "برادلى" ولد مدهش بارد كالتلج وتوافقه العضلى العصبى مدهش..أمسك كرات بالنسبه لسنه فعلا مش ممكن

..ومهاجم أسمه "نك" أشقر وشعره طويل يطير ورائه حين يركض كالفرس..

وواد أسمر كده شعره مفلفل بيلعب ف الوسط..غاوى ترقيص ونط من ع الكوره وتمريراته فعلا متقنه جدا بالنسبه لسنه وكانت السبب فى أحراز ٤أهداف على اﻷقل فى اليوم اﻷول.

.وأسمه "فارس"..بصراحه الواد بيلعب حلو..ولفت نظر مش بس أولياء اﻷمور وأيضا مدرب الكوبرا١..وعاوز يضمه هو وبرادلى حارس المرمى لفريقه..بس أحنا سألنا فارس وقال ﻷ عاوز يكمل مع أصحابه الصيف ده وبعدين نشوف..

الجو كان حار جدا أمس وأتلطعنا ف الشمس طول اليوم..العبد لله بيحلق بالموس زى يول براينر وسمعه..حاجه نيولوك خالص..القرعه بقت لون فانلة اﻷهلى وحاسس بصهد طالع منها..

الدوره نظمها متطوعين من اﻷلف للياء..التمويل جاء من مجلس المدينه وتبرعات اﻷعمال المحليه..شركات المقاولات..والسوبر ماركت الكبيره ومعارض السيارات ألخ ألخ..ظريف جدا تجد أولاد فى سن ١٧-١٨ سنه بينظموا المرور..ويلموا الفارغ من علب المشروبات ..ويبيعوا هوت دوج وبيبسى..وينضفوا الملاعب بعد كل مباراه..الدوره نفسها أقيمت خارج المدينه شويه فى بارك مهوله بها يجى ١٠ ملاعب كوره..وصاله مغلقه..وحمامات سباحه..كله ببلاش أو رسوم رمزيه جدا ١٠دولار أشتراك حمام السباحه طول الصيف..

اليوم اﻷحد

أوقعهم حظهم مع أفضل فريق فى أوتاوا كلها..والمرشح للبطوله..أحنا بنتكلم عن عيال ١١-١٢ سنه بس..

ولسه اﻷسبوع

الماضى فايز على فريق الكوبرا١ بسته أهداف..الولاد فعلا راحوا النهارده خايفين
قبل المباراه وقفت أتكلم مع معظمهم..وأشجعهم وحكيت لهم عن مباراة الجزائر وألمانيا..ومباراة مصر وهولندا..

وقلت لفارس ماتخافش أعمل اللى عليك..و يافارس اللاعب المحترف بيقدر يثبت نفسه أكتر أمام الفريق اﻷقوى مش اﻷضعف..ورغم أنهم أنهزموا ٢/ صفر أنما لعبوا مباراه هايله..والجحش الصغير أبنى عمل مجهود جميل..وشويه لمحات جميله..وطلعوا من البطوله بس أثبتوا أن الحجم مش مهم فى كرة القدم..أولياء اﻷمور حاجه أخر مسخره..صريخ وهتاف وتشجيع..وعارفين أسماء اﻷولاد واحد واحد..وتسمعهم بيصرخوا

Go Fares ..Go..Good Fares..what a boy!!

أفرح بيه.

.بعد المباراه..أحد اﻷباء عزمنا كلنا نروح على حمام السباحه عندهم عشان اﻷولاد يبلبطوا ف الميه..

وقد كان من الساعه ١١صباحا لحد ٣بعد الضهر الولاد هات ياصريخ وتهريج..وأولياء اﻷمور اللى جاب هوت دوج واللى جاب مشروبات..أحنا جبنا بيتزا وقلبت "بول بارتى".

.تجمع غريب..أنا مصرى وزوجتى جزائريه مفرنسه..معانا أيرانى وزوجته مغربيه..كندى فرنسى وزوجته كمبوديه..زوج كندى وأبنهم المتٌبنى من جواتيمالا..واللى ظابط ف الجيش الكندى وخدم ف الجولان والسودان وأفغانستان..واللى بيشتغل ف الخارجيه..واللى مديره فى منظمه غير حكوميه تعمل أساسا فى أفريقيا المتكلمه بالفرنسيه..وطبعا يمكن تخيل الحوارات كان شكلها أيه.

.الكنديين فعلا شعب طيب جدا ومؤدب جدا يجمعوا بين بساطة اﻷمريكان وأدب اﻷنجليز وثقافه الفرنسين خلطه جميله
على فكره كره القدم لعبه حديثه جدا فى كندا

..أنا أول ماجئت فى ١٩٩٤أقمنا فى مونتريال وأتعرفت على مجموعه مصريين وكنا نتنادى لمباريات كره القدم مع فرق من بلاد أخرى كما يتنادى العرب للحرب

..تليفون من أشرف ويصا صديقى العزيز

..خالد عندنا ماتش مع الفريق الجزايرى ماتيجى

..ياعم أن ماليش ف الكوره

..ياعنى أنا اللى ليا تعال بس أهو نضحك شويه

طبعا لالياقه ولاهباب ولاتدريب..والشيشه قاطعه نفسنا..مره نتعادل ومره نتغلب خمسه سته..ومن الملعب على مقهى أم كلثوم فى سان لوران نكمل ضحك

..النهارده..اﻷطفال اللى مسجله فى كره القدم فى مقاطعه أونتاريو عددهم زاد عن اﻷولاد المسجله هوكى وﻷول مره فى تاريخ البلد..أديهم ١٠-١٢سنه وشوف حايعملوا أيه..وبالذات البيزنس دخل فى الموضوع

..والشئ بالشئ يذكر

..مبروك الزمالك بل ريقنا أأأخيييراااا بالكاس..أحمدك يارب..بعد ماطلعنا من هدومنا..واﻷصابات بالضغط والسكر والفالج..والبرى برى أصبحت سمه كل الزمالكاويه يااااساااتر.

.بس سؤال والنبى.

. أيه العك والتعريص والتفويت اللى حصل فى أخر أسبوعين ف الدورى ده..المقاولين واﻷلمونيوم..حسبه ملخبطه كده مافهمتهاش بس واضح أنه -آسف ﻷستعمال اللفظ-التعريص كان على أشده.

.ونعم اﻷخلاق الرياضيه..بس عموما هو البلد فيها أيه عدل ياعنى..؟؟؟

..أستر يارب

الخبر ده أصابنى بالفزع..رغم توقعى من فتره لشئ من هذا القبيل..نتيجه أستقراء اﻷحداث ومساراتها..وليس من باب التنباء أو أنه مكشوف عنى الحجاب.. أسلحه كاتمه للصوت وهجوم فى منتصف النهار فى فى منطقه مزدحمه مثل شارع نصوح بالزيتون والذى أعرفه تمام المعرفه يفتح الباب أمام أحتمالات مرعبه..أستر يارب

مشاهد ملخبطه

مشهد كندى

يوم الخميس أول خروج لى من المنزل..متؤكاً على عصاى نزلت وسط البلد قاصدا المكتبه المركزيه لوجود قسم عربى بها لايأس به على اﻷطلاق..طبعا الركن بالسياره مشكله..وجدت مركن مخصص للمعاقين..ولكن النظام هنا يحتم أن يكون معك تصريح رسمى للسماح لك بالركن..وأنا ممعايش طبعا..بالصدفه وجدت أحد رجال المرور..نزلت م السياره توجهت إليه وشرحت له أنه لايوجد معى تصريح ولكن لاأستطيع الركن بعيد..وخاصه أنى أتؤكاْ كما ترى على عصا بعد جراحه الركبه..ببساطه شديده سألنى حتغيب مده طويله..أبدا يمكن نصف ساعه..أخرج ستكير أصفر من جيبه وقال لى مبتسما ساعه ولايهمك خد راحتك ولطعه على زجاج السياره اﻷمامى..وأنا داخل المكتبه كانت تسبقنى فتاه فى عمر أبنتى..فتحت الباب وهى تدخل لمحتنى خلفها ظلت ممسكه به حتى دلفت منه شكرتها مبتسما..أجابتنى

You are most wellcome

..ببطء وصلت القسم العربى..وجدت سيده بشعر قصير ونظاره طبيه تدعبس ف الكتب..لسه منشكح من الموقفين اللى فاتوا أبتسمت لها هازاُ رأسى راحت لاويه بوزها وبصت للناحيه التانيه..أفتكرت أنا ف القسم العربى.

*****************

مشهد سوريالى

اﻷخوه اللبناينين أتصلحوا على بعض..وفين ف الدوحه على بعد مرمى حجر من مركز القياده الرئيسى للقوات اﻷمريكيه ف

المنتأه كلها..وكله رجع متحين ومحمل دولارات ودراهم وريالات..والتعلب فات فات..هع..هع..هع

*****************

مشهد منزلى

يوم الجمعه مرابط بالمنزل ألتهمت رواية "قصه حب مجوسيه" لعبد الرحمن منيف..أحدى الكتب التى أستعرتها..فى ساعات قليله..ولكنها لم تدخل مزاجى على اﻷطلاق..مع أن للكاتب روايتان عظمه.."اﻷشجار وأغتيال مرزوق"و"شرق المتوسط"..وأنا أكن أحترام شديد لمنيف..فهو مثال المثقف العربى الذى يدفع تمن أرائه نفيا ومطارده..

وفجأه قفزت برشاقه الفيل وسرعه السلحفاه..وبدأت النبش فى صناديق الكتب المخزنه فى غرفه الكرار بالمنزل..كنت أنبش كالمحموم حتى وجدتها..

. "البيضاء" لعمنا يوسف أدريس..

أجمل قصه حب قرأتها على اﻷطلاق..ربما ﻷنى قرأتها ﻷول مره و أنا أعيش قصه حب الجامعه..وأعيش فى جو السياسه..ربما لقدرة أدريس الفذه على وصف المشاعر..وأعطائها صوت وكلمات..ربما ﻷن نقد أدريس لليسار المصرى يتطابق مع رؤيتى.

.ربما.

ولكنى أحتضنتها وببطء وكأنى أرتشفها أعدت قراءتها للمره لاأدرى الكام بقيه الجمعه

*************************************

مشهد مالوش معنى

..وطبعا لازم يكون من المحروسه..أتحاد المدونين المصريين..من مدونه المشاغب المحترف باشمهندز رامز..ساعتان يامواطن وأنا أطلع من لينك أدخل على لينك..وأقراء وأطس وشى بشويه ميه ساقعه..وحبه أضحك وحبه أعيط..وحتى وقتنا هذا مش عارف الموضوع جد والا هزار..بس أحتمال كبير أنها سبوبه رزق.. ليه..؟؟ اﻷمريكان ناويين يرشوا رشه جريئه على المدونين..وبالتالى اللى حايلحق يقفل له دكان ويلطع عليها يافطه حاياخد السبوبه الدولاريه دى..وأهو رزق الهبل على المجانين

.................

.ولكن و بصراحه أنا لاأفترض حسن النيه عادة.

.وأظن سوء الظن من حسن الفطن دائما.

.واللى أتلسع من الشوربه ينفخ ف اﻷيس كريم.

.فياخوفى ياصاحبى لتكون دى تمهيد لما يشبه "أدارة عموم الزير"..وعشان ماتدون وتفش خلقك بكلمتين زى دول ماحدش يقراهم..تحتاج ترخيص م الشئون اﻷجتماعيه ووزاره البيئه وهيئه اﻷثار ولابد من موافقه الكنيسه على البوست لو مسلم واﻷزهر عليها لو مسيحى ولا هى بالعكس..مش مهم!!

وكده وبدون عنف ولاوجع دماغ وجمعيات حقوق أنسان ومراسلين بلا حدود نسك عل الموضوع تماما

نسك على موضوع التدوين وصداعه..واللى جاى من ورا المدونين.

.وأحتمال تطلع فتوى بتحريمه كما أفتوا بتحريم اﻷضراب..

هو مش برضك الستات لزمن يدخلوا النت ومعهاهم محرم..والا أنا غلطان

واللى مزنوق ف

كلمتين واقفين ف حلقه يفك عن نفسه ف الحمام.

.وأهو الكلام يبقى ع الريحه حتى

*******************************

المشهد اﻷخير