RCMP أختصارا
..عرض شيق بالأحصنه..ناكل هوت دوج ونتمشى شويه وسط البلد وسط الزحمه حوالين البرلمان نتفرج على عروض مجانيه.. ونرجع..
بالليل كالعاده نتعشى عند بعض اﻷصدقاء من بيتهم ممكن نتفرج على اﻷلعاب الناريه الجميله التى تبدء الساعه ١٠ مساء..
فيه حفلة منوعات تقام قبل اﻷلعاب الناريه دى ساره حاتحضرها هى وأصدقائها..خلاص كبرنا مابنروحش مع بابا وماما
وبكره شعل عادى
...بس خلاص ده أحتفال العيد القومى لكندا
..حاجه خيبانه خالص
..والله أقترحت عليهم مجموعه أقترحات لتحسين اﻷحتفال
..."شويه أعانى وطنيه "الكنديين أهما".. مثلا أو "كندا هى أمى"..
ولازم وهالبت نعرض فيلم وطنى
ونسميه
Return My Heart
ولابد واحد دمه تقيل يقول لواحد دمه أتقل
You are from the librals Ya Johen
"أنت من اﻷحرار ياجون
كده يبقى اليوم الوطنى له طعم
..وياسلام لو السبد رئيس الوزراء " ستيفن هاربر" يفتتح مشروع صرف صحى فى مدينه "هارير" الصناعيه ونلم له عيال المدارس ندى كل واحد ساندوتش هامبورجر وعلبه بيبس على عمال غزل مونتريال ونظرف كل واحد خمسه دولار وبقفوا يهتفوا
With Blood With "sole" ...we will continu
وسيده كندا اﻷولى مدام "هاربر" تروح تفتتح مكتبه "ماما بيرجيبت" -والله ماأعرف أسمها أيه..
وتطلع ف التلبفزيون تسلم على عيال نضبفه كده ومربربه بتاكل مربه وزبده كل يوم عشان نحسن صوره كندا ف العالم.
.مثلا يعنى..
طبعا كل مقترحاتى أترفضت مع تحذير حاد والنبى أتلهى على عينك..
لأ بجد..مافيش أغانى وطنيه كنديه..عملت
جوجول تقريبا ماطلعش حاجه..لكن
الطريف أنها أعلان بيره
هع هع هع
****************************
كنت بأسمع موسيقى كلاسيك النهارده الصبح
ساره" سألتنى سمعت "بول بوتس"..!!
مبن ده زعيم الخمير الحمر فى كمبوديا ف السبعينيات؟؟
ﻷ يابابى بول بوتس اللى كسب
Britains Got Talent
..طرقعت ع الكى بورد..وقالت لى
أسمع ده..ياخبر أسود منقط بأسود..الراجل بيغنى
واحده من أصعب مايغنيه أى تينور
..بفاروتى بيغنبها هنا..عجبنى بول بوتس جدا..موهبه
بدون أى تدريب منظم..وبعدها أنطلق زى الصاروخ
*************
Again.... Happy Canada Day
and let's
27 comments:
انت بتتريق يا استاذنا؟؟
وعموما اكيد من محبه .. ولا غلطانه
خالي المهاجر يحمل باسبورين مصري وكندي
في المطار اسرته مراته وبنته بيقفوا في طابور الاجانب
وهو بيقف في طابور المصريين الاطول!!
لانه بيحب يستعمل الباسبور المصري وسط تأففهم من انتظاره
تفتكر البلد دي ممكن تتحب بمساوئها قبل حسناتها
والجيل اللي زي حضرتك لو بيحبها وبيعشق ترابها وبيدون بلغتها
وبيتواصل مع ناسها ولاده ها يكونوا زيه؟ ولا الجيل التاني ولاءه للوطن الجديد
تحياتي
كل سنه وكندا بخير
دول ناس جهله يا عم مش بيدو للعيد الوطنى حقه معندهمش ولاء زينا
تحياتى لساره على زوقها العالى غريبه مع انها فى عالم متخلف مش بيقدرو قيمة العيد الوطنى ولا الادمين الى عيشين فى الوطن
انا ليه عندك سؤال ممزوج بعتاب
يا ابو فارس هو برده مش فارس الصغير ليه ابو فارس مش ابو ساره مثلا دى من ضمن العقد والاذدواجيه الشرقيه لازم تلقب باسم الذكر ولى العهد
بحيك على غزارة انتاجك كل ما امر هنا اقرا واقول اعلق بعدين ارجع اعلق الاقى جديد
تحياتى وشرفنا عندنا شاى وقهوه واغانى وطنيه هتعجبك
بنت القمر
طبعا بأتريق..وبأتريق أوى..أوى..كمان..اﻷغانى الوطنيه والمناسيات الوطنيه والعروض العسكريه والخطب الحماسيه دليل على فاشيه النظام الحاكم..وأحتياجه للبروبحاندا عشان يفضل ف الحكم..ويصى على التاريخ الحديث كده..أجدع أغانى وطنيه ودعايه كانت ف المانيا النازيه..روسيا الستالينيه..عراق صدام..وسوريا..ومصر من ناصر وأنت جايه..
أمريكا لما زادت النعره القوميه فيها بعد أحداث سبتمبر فيه مثقفين أمريكان أنزعجوا من الظاهره دى
..والله أنا كنت فى فرنسا مره١٤ يوليو العيد القومى..
ولولا العرض العسكرى ماكنتش عرفت أنه اليوم القومى..
أنا بأدخل مصر حاليا بالباسبور الكندى ومش حاتفرق معايا ١٠-١٥ دقيقه ف المطار..بس ﻷنى عادة أتوقف فى أوربا أثناء القدوم أو العوده أحيانا لبضعه أيام وحدت أنه أكثر عمليه أخد فيزا لمصر على الباسبور الكندى وأستعمله طوال الرحله..وبالذات أننا ياستى معافين من التسجيل ف مكتب الجوازات..!!
حكايه ولاء الحيل التانى دى فيها كلام..
الدراسات اﻷجتماعيه بتقول حاجه غريبه حدا..الجيل اﻷول زى حالاتى..يتكلم اللغه ويأكل الطعام ويسمع الموسيقى من البلاد القادم منها
الجيل التانى زى أولادى يحاول اﻷندماح فى مجتمع المهجر بأى شكل
الجيل التالت يبحث عن جذوره ويستعيد ثقافته
..غريبه مش كده..
الطريف أنى وجدت تطبيق فعلى لها هنا فى أبناء الجيل التالت من فلسطينين ولبنانين من العرب بالذات..المصريين لسه شويه..ماشفتش جيل تالت مننا ف المهجر..تحياتى ومودتى..خالد
فارس هو أصغر واحد..فيه مرام اﻷكبر وساره بعدها ثم ف اﻵخر فارس.
.أبوفارس كنيتى أطلقها عليا أصدقائى من المشرق العربى وبالذات العراقيين تحببا وتبسطا
وعجبتنى ﻷنها ذكرتنى بحكايه طريفه..
أبويا -رحمه الله- أسمانى خالد حتى تكون كنيته أبو خالد زى جمال عبد الناصر..ﻷننا شراقوه واﻷهل عندنا يطلق عليهم أسماء أكبر أبنائهم الذكور..فأمى فى قريتنا بالشرقيه كانت ولازالت أم خالد..وزوجتى المفرنسه أسمها فى جلسات اﻷصدقاء العرب هنا أم فارس..ظلم للأنثى..طبعا ظلم فادح..وتحقير..وألغاء لوجودها حتى..ولكن لو تلاحظى أنا أتكلم عن ساره أكتر بكتير ممنا أتكلم عن فارس..ﻷنه يادوب ترك الطفوله ودخل فى مرحلة الصبا..وبدأت مؤخرا ف التواصل معه..مرام وساره اكبر وبيننا حوارات ونقاشات وصداقه عميقه..حقيقيه..أبو فارس أو أبو مرام..فعلا ماتفرقش معايا..المهم أكون أكون وبحق أبا لمرام وساره كما أنا أبا لفارس..تغير العادات والتقاليد صعب وبتاخد وقت..ولكن ممكن تغيير الأفعال والجوهر..بدون صدم الناس اللى حواليك والتصادم معهم..على فكره أنت حاتخللينى أحاول مناقشه الموضوع ده ف بوست قادم شاكر على التفاعل..تحياتى وخالص مودتى..خالد
ايه ده هي كندا برج السرطان؟؟
و انا اقول البلد فالحة و ماشية فل الفل ليه
يا سيدي العزيز
السرطانيين كلهم ناجحين و متفوقين على اقرانهم في كل شئ
هع هع هع
انت برجك ايه بقى؟
التعليق اللى قبل ده ردا على الصديق الشاعره الرقيق أشراقات
**************
..حفصه
أنا ياستى برج الجدى..مواليد ١٦ يناير نفس برج عبد الناصر..وف الزودياك الصينى أنا قرد..!! تصدقى وتأمنى بالله..كنت ف مونتريال أدرس لغه فرنسيه مع مهاجرين من أنحاء الدنيا..وكالعاده وﻷنى غاوى أتعرف على البشر اللى حوللى..ضربت صداقه مع الكل..من ضمنهم سيده صينيه..طبيبه..ومعها أيضا ماجستير كيميا حيويه..وكانت متطوعه تساعدنى أيام تحضيرى للمعادله..المهم مره وبدون أى سابق أنذار قالت لى
I think you'r a monkey!!!!
وقبل ماخبطها بوكس على أساس أنها أهانتنى..شرحت لى كيف عرفت أنى" قرد" بصى هنا
http://www.c-c-c.org/chineseculture/zodiac/Monkey.htm
تفهمى قصدى..تحياتى ومودتى..خالد
أنا فطست على روحي من الضحك يا خالد.. بحاول أتخيل شكل هاربر و هو بيفتتح مشروع صرف صحي..ولا شكل الكنديين و هما بيهتفوا بالروح بالدم نفديك يا هاربر.. مهزلة!
أما عن موضوع الدراسات الإجتماعية ده.. أنا بصراحة مش عارفة اللي زي حالاتي بقى يكون إيه.. أنا أصلي متجنبة العرب اللي هنا تماماً و خصوصاً المصريين.. بقالي سنين لا بكلمهم ولا بشوفهم ولا لي دعوة بيهم خالص و مش عايزة يكون لي دعوة بيهم من أصله. مش عارفة إذا كانت بنتي هتحاول تتقرب من المصريين اللي هنا ولا هتعمل زي ما أنا بعمل و تعتبرهم مش موجودين من أصله. المقصود بإنه يحاول الاندماج في مجتمع المهجر بأي شكل.. إنه بيحاول يندمج مع المجتمع الكندي ولا القصد إيه؟
أنا الصراحة ناوية أعلم بنتي العربي و عايزاها تعرف عن مصر.. انما أنا مش مستريحة لموضوع انها تحاول تندمج مع مصريين.. عشان تحجر الفكر اللي منتشر اليومين دول. زوجي لا يمانع إطلاقاً تعلمها العربي و عن مصر انما هو كذلك مش عايزها تندمج معاهم عشان خايف لا فكرها يتشوه و تبص لنفسها على انها حتة لحمة لا راحت ولا جت و ثقتها في نفسها تضعف لما المصريين يفهموها انها عشان بنت تبقى ناقصة و إن الراجل أحسن منها لمجرد إنه اتولد بعضو ذكر.
بما إن إنت عندك بنات (ربنا يخليهملك) أكيد إنت مريت بالتجربة..
any tips would be greatly appreciated...
الصديقه العزيزه واندر
..أولا أنا شاكر جدا على المجامله الرقيقه ف مدونتك..أنا والله أسعد بالتعرف عليكى..
فيه هناك أضافه أرجو أن تقرئيها..
طب ماحدش قال رأيه ف موضوع الفيلم الوطنى الكبير
Return My Heart
..وعبارته الخالد
أنت م اﻷحرار ياجون..؟؟
أيه مش كوبس ينفع نعرضه ونقرف بيه الكنديين كل كندا داى والا أيه..؟؟
المهم..
بالنسبه للدراسات اﻷجتماعيه دى زى كل الدراسات اﻷنسانيه تفتقر لدقة الفيزياء والكيمياء..فهى تقريبيه لحد كبير..
أنا شخصيا علاقتى بالمصريين هنا محدوده جدا..
العائلات المصريه..
الرجال المصريين لقائى معهم عاده على المقهى حيث ندبح بعض مناقشات ومحادلات..
من أيام السعوديه غضبت منى المصريات ﻷنى خائن ومتزوج من غير مصريه..
وبالتالى قلت لهن ف ستين سلامه..
ودائره اﻷصدقاء أنتقلت الى فرنسيين بلجيك لبنانيين..
وتصدقى سعوديين..
وبالذات عائله سعوديه الرجل وزوجته خريحى الجامعه اﻷمريكيه بيروت..
ناس فى منتهى التفتح ..
باﻷضافه لحفنه من المصريين المتزوجين من أجنبيات..كما أشرت عندك
..هنا..
نفس الوضع..بس اﻷختيار أوسع
امس كندا داى كنا عند أصدقاء من الجزائر..بالتحديد من بربر الجزائر..
٣ عائلات..حفنه دكتوراهات ف البيولوجى من أسكتلندا..اﻷقتصاد السياسى من فرنسا..طبيبه تخصص أطفال من فرنسا..ألخ ألخ..ووجدت بالتجربه أن المجموعه دى..بربر الجزائر ذوى التعليم السوبر من أكثر الناس تفتحا..يمكن التعامل معهم بسهوله..لدرجه أنى أشتركت فى الجمعيه الثقافيه بتاعتهم الموجوده هنا..وكنت الوحيد "اﻷجنبى" وقبلونى بسهوله وترحاب..!!!
مشكلة محاولة تعليم اﻷطفال اللغه هنا..انك شئت أم أبيت ستتسرب المفاهيم الثقافيه مع اللغه..ماهو مافيش لغه معلقه كدا ف الهوا..والله مستعده لهذا حطيها ف مدرسه عربى..مش مستعده ورافضه تلك المفاهيم -سواء عندك بنت أو ولد- بناقص اللغه من المدرسه شويه مجهود ممكن تتعلم ف البيت..وهذا مافعلته شخصبا..أرجو أن أكون أجبت ولو بأختصار..تحياتى وخالص مودتى..خالد
خالد..
أنا لما قلت أعلمها العربي كان أصدي طبعاً في البيت..بس هل إنت لقيت صعوبة في تعليم أولادك العربي؟ أصل هنا مفيش كتب في المكتبات الخاصة.. والموجود في المكتبات العامة محدود جداً.. عندنا هنا في مدرسة عربي إبتدائي بس.. و لما رحت أشوفها صدمت صدمة مفيش بعدها.. لقيت البنات اللي داخلين كلهم محجبات.. أنا بتكلم عن بنات في سن الثامنة والتاسعة يعني لسة حتى موصلوش سن البلوغ. فطبعاً كان واضح المدرسة بتعلم مش عربي انما دين كمان بالأخص و انها للمسلمين فقط. و أنا مش ناوية أعلم بنتي العنصرية من دلوقتي. أنا قلقي نابع من إن لو هي اتعلمت عربي هتقدر تتعامل مع العرب و بالتالي تتعرض للفكر المتحجر زي ما أنا بسميه. و رغم كدة أنا بردو شايفة إن أعلمها عربي عشان تقدر حتى تتفاهم مع جدها و جدتها.. ولا نعزل على أوتاوا عندكم ولا إيه؟
بالنسبة لموضوع الفيلم بتاعك.. أنا شايفة إن مش كفاية.. احنا عايزين نفقع الكنديين أغاني زي يا نخلتين في العلالي.. أو أحلف بسماها و بترابها.. إيه رأيك.. ولا كدة تبقى وسعت حبتين؟
أنا من عشاق عبدالحليم. مش أحسن من شعبولا بتاع الايام دي؟
The video of "I Am Canadian" is one of my favourites, but this one takes the cake, only because I'm a sci-fi geek:
http://www.youtube.com/watch?v=h1CwZgb_iAI
بلدنا عالسكه بتغسل شعرها
جانا نهار ماعرفش يدفع مهرها
ياهلرتى الليل الحزين ابو النجوم الدبلانين يقدر ينسينا الهوا
ابو نسمه بترد الحنين
ابدا بلدنا للنهار بتحب موال النهار
اما يعدى فى الدروب ويغنى قدان كل دار
كل سنه وانت طيب ياشرقاوى
أبو أحمد اﻷبنودى هنا بيعدد ..دى مش أغنيه وطنيه من بتوع اليومين دول..سمعت والله أعلم أن كان فيه كلام حول منعها لما فهم النظام المقصود..والا أيه
وكل سنه وأنا وأنت طيبين..ونرجع نحلم تانى ونغنى بجد مش تهريج...
..تحياتى.. خالد
ﻷ والنبى ياواندر ياعزيزتى
كده تبقى وسعت..وبالذات واضح أن الناس زعلت من البوست ده وأخدوه على غير ماقصدت تماما..
*********
الفكره ببساطه أن المجتمعات الناجحه مش محتاجه أغانى وطنيه ولا أستعراضات ولا اﻷوهام اللى تحولت لدينا فى مصر الى بديل للعمل والأنتاج والتفكير..المشكله أننا كمصريين عندنا أحساس عميق بالتفرد والتفوق على العالم كله..والنقطه دى لايختلف عليها أثنان..رغم أن الواقع المادى الملموس يصفعنا كل يوم مائه قفا.. واحد منهم فقط كفيل بأقاقتنا من وهم "مصر أم الدنيا" اللى مش عارفين نتخلص منه..وأصبح تبرير فشلنا فن فى حد ذاته..مع أن نظره واحده على تقرير اﻷمم المتحده لمؤشر التطور البشرى
Human Development Index
يقضى على كل حجه تفتقت عنها التبريريه المصريه فى أنصع صورها..
وبرجاء مراجعه ماأقوله هنا
http://en.wikipedia.org/wiki/List_of_countries_by_Human_Development_Index#High
لما تكون أيسلندا هى اﻷولى لعام ٢٠٠٧ حد والنبى ربنا يفتح عليه ويقول لى أيسلندا دى فيها أيه لابترول ولازراعه ولا تعدين ولاحاجه خالص..ياعم ده من اﻷسم أرض التلج..أيرلندا ف المركز الخامس ومعلوماتى تقول أنها من ٢٥-٣٠ سنه كانت أفقر دوله أوربيه ومستويات المعبشه فيها تقارب دول العالم التالت..تلاجه تانيه أسمها فنلندا سابقه أمريكا..فيها أيه البلدان دى غير بشر..ناس عاوزه تشتغل وتنتج وواخده المسائل جد..واحد كده يشاورلى على حاجه واحده جد ف مصر..أحنا عندنا خلل بنيوى محترم..يمنع أى حركه فى اﻷتجاه الصحيح..مصر مش بس دوله فقيره..مصر دوله مصممه تفضل فقيره...والمصريين مش ناويين يغيروا الوضع ده ومنتظرين أنه يتغير لوحده بقدره قادر..وده بصراحه اللى فاقع مرارتى وكل الغدد المتجه للهرمونات عندى...واضح الكلام والا لسه..تحياتى وخالص تقديرى للجميع.....خالد
صديقى وحبيبى خالد
انا كنت يوم الأحد اللى فات فى النادى ايمان أخت قوت اللى انت قابلتها عندنا ابنها رامى اتعرف على بنت امريكانيه ابوها وأمها من أصل مصرى وكانت بتعرفنا عليها هى وأمها المهم اتقابلنا فى النادى وقعدنا نرغى الأم صحفيه والبنت بتعمل دراسات عن الشرق الأوسط طبعا ثقافه الأم والبنت حاجه تفرح وقعدنا ندردش كنت سعيد بالجلسه جدا الى ان وصل الحديث الى تلك المنطقه التى طرقتها معلقه عندك فلم أحتمل مش عارف ياخالد انا عارف انت بتحب البلد دى اد ايه عارف ومتأكد من ده بس انت بتنتقد فى كلامك جزء مهم من الشخصيه المصريه هو النزعه الاحتفاليه ودى موجوده عندنا من ايام الفراعنه
الاحتفاليه بالموت الاحتفاليه بالفرح الاحتفاليه فى الموالد الحتفاليه بكاس افريقيا احنا شعب احتفالى بس ياخالد برغم كل مايقال وما يستطيع ان نقوله من هنا لبكره فنحن لسنا امه همجيه
الظروف اللى بنمر بيها دى ظروف طارئه فى عمر الشعوب الخمسين سنه اللى فاتت عملت قشره خفيفه على وجوهنا لكننا سنعود سيعود الشعب لاحتفالياته الحقيقيه سيعود يسخر من آلامه وحكامه والحاجات كلها هتبقى حقيقيه وبجد مش حاجات شبه الحاجات
حكومه بجد
احزاب بجد
شغل بجد
احتفاليه بجد
بحلم
معلش ياخالد
سيبنى احلم
واحلم معايا
تعالى نحلم بجد
تحياتى
مجدى..
والله العظيم أنت قلت بالظبط اللى بأفكر فيه..
فيه لحظات حتى ف عز الضلمه دى لازم تخليك تقف وتفكر
..وتسأل نفسك..
الشعب ده فيه تحضر طبيعى
..أقولك مثلا
أنا كنت موجود بالقاهره لحظه نقل تمثال رمسيس..سيبك من الحكومه..أنا شفت بعينى ناس عاديه جدا وفقيره حدا واﻷحتمال اﻷغلب غير متعلمه..طالعه تودع رمسيس أو تستقبله بمنتهى الجديه واﻷحترام..والله واحد منهم قاللى "طبعا ده ملك معدى من هنا..!!!!".
.شفت بعينى يامجدى..سائق أتوبيس نقل عام وقف اﻷتوبيس وزمر تحيه لنجيب محفوظ بعد جايزه نوبل..وكافه ركاب اﻷتوبيس الغلابه جدا طلعوا يهللوا ويصقفوا من شبابيك اﻷتوبيس..وأﻷمر لم يخللوا من زغروده.
.طب ده محفوظ أى حد يمكن يكون سمع عنه أو شاف فيلم من قصصه حتى.
.اﻷحتفال الشعبى د.أحمد زويل نعد نوبل ف الكيميا..أنا شخصيا لاأفهم أضافته عنا..الناس فرحت بيه بشكل غير مسبوق لاأظن أى فائز بنويل ف الكيميا أو الفيزيا الناس بتزفه ف الشوارع
..دى لحظات تخللينى أقف وأفكر
..بس مش قادر ماأغضبش يامجدى..
أنا مش حزين ولا مكتئب أنا فعلا غضبان..من المصريين لامن مبارك ولا أمريكا ولاأسرائيل غضبان من المصريين
..وغضبان من نفسى من ضمنهم
..وفى النهايه أحب أسمع
مصر ياأمه للشيخ أمام
..تحياتى ياصديق العمر..ولسه عندنا القدره على الحلم...خالد
Abu Faris..
I was not aware that some readers were offended by your post. I wasn't one of them I assure you. My last comment was an attempt at a joke. I hope it wasn't misunderstood.
I thought your post was very well written and articulate, and at the very least an expression of freedom of speech. People who took offense to it should re-examine their ideology.
As for the Human Development Index, I am in the process of writing something about that. Although I am quite certain many people will disagree with my theory.
Anyway, good post, good writing, and remember, you can't please everyone.
Wandering Scarab..
I'm sure you got the point..Problem is Egyptians now are so sensetive to any criticism where ever it comes from..Just like exposed nerve..and immediatley get defensive..and start shooting back..Even the famous Egyptian sense of humor is disappearing..Sad really sad
انا رجعت قرات البوست مرتين كمان
و مش عارفة بجد ايه اللي يزعل فيه؟؟
يعني حاولت ادور على حاجة تضايق اي جنسية او اي عرق ملقيتش
هل فايتني شئ؟؟
مساء الفل د. خالد؛ أبو فارس
كاتنا نيلة في حظنا الهباب ؛ كنت جيت أخذت لي كنزة كوكاكولا وفرخة و سَقْفْتْ حتي أخر نفس في رأتاي وصدري وهتفت بالروح والبطيخ والكانتلوب والفراولة نفديك ياصاحب العزبة ...فين الكوكاكولا ....مُش كنت تقول بدري شوية.. مالناش في اليب نصيب ... المهم تكون تمتعت اليوم الاجازة ولقاء الاصحاب
تحيات إسكندراني في بلاد الله الواسعة
حفصه..
والله ولاأنا فاهم..أحساس
أنى stepped on someone's foot
مجرد إحساس..والا أنا اللى مش فاهم..تحياتى
**********
أسكندرانى.
.ملحوقه ياعم السنه الجايه أعمل حسابك تيجى على أول يوليو..ونطلع أنا وأنت نسترزق ونبيع الهوا ونهتف ﻷى حد بيوزع بيبس..تحياتى ياباشمهندس وخالص مودتى..خالد
خالد..
بمناسبة موضوع التنمية والدين إلي كنت بتكلم عنه، بص كدة على اللينك دة.. أنا يا عم هجيب مرارة ستبن أحسن شكل مرارتي مش هتستحمل..
http://www.alarabiya.net/articles/2008/07/02/52445.html
مثل وجبة دسمة تجمع بين الفكر والموسيقى والاجتماع، كنت ألتهم تدوينتك التي تقارن بين واقع بلاد عرفت قيمة التنمية البشرية، وبين حاضر بلدٍ نحبه ولذا نحزن على ما وصل إليه من تدهور
لا أعرف كيف أشكرك على هذا التقدير، الذي أعتز به فوق تصورك، فأنت قارىء ممتاز، يحاول دائماً فهم ما بين السطور ويدرك مغزى الاهتمام مثلاً بأديبات هنا وهناك يحاولن كسر الحصار الذي فرضته عليهن تقاليد القبيلة
لا تتخيل كم تأثرت بهذه البادرة الكريمة التي فاجأتني بصدقها وعمقها
شكراً لك يا د. خالد
أبوفارس الجميل ..
بما أن شهر يوليو هو شهر إحتفالات الإستقلال .. كندا أولا ثم أمريكا وثالث الأثافي وطن الأحرار مصر يوم 23 يوليو حينما عبرت تكتلات الرعاع الاحرار شارع شريف وصولا لقصر عابدين علشان يشوفوا مين اللي حيلحق يقعد ع الكرسي ..
وبعدين يوم كندا ده مضروب واستقلال بليلة .. أخر تحكم للبرلمان الانجليزي كان سنة 1982 ، وطبعا زي ما أنت خابر اسقلال مصر برضه زي طبق العاشوراء لأن معاهدة 1936 ألزمت قوات الانجليز بوجودها فقط في منطقة القناة ..فحكاية الجلاء دي فرقعة بمب أكتر منها استقلال واستهبال.
وبعدين ياراجل ياطيب انت عايز تشوه تاريخ كندا اللي معندهاش تاريخ أصلا .. رد كلبي ياجوني ماينفعش بالكندي .. أولا معندهمش بأف زي عم شكري سرحان ، وكمان معندهمش لطزانة زي الاخ كمال يس اللي لبسه عفريت الصول عبناصر من ساعة الفيلم .. وأحمد علام يجيبوه منين وأبوك إتشل ياعلي ..عارف حكاية الفيلم ده كانت مدخل لترييف المدينة وزحف العشائرية علي المجتمع المدني ماقبل الانقلاب اليوليوي .. فالظابط ابن الجنايني هو صاحب الاخلاق واللي هينضف الوزارة .. هما دول بتوع أخلاق القرية وثوابت الامة وعاداتنا وخرياتنا والهطل ده .. وأزنابهم هما اللي خاربين كل شىء في مصر دلوقتي .. يعني هم آخر نفايات تحلل الدولة المصرية .. علشان نبتدي علي نضافة.
علي فكرة
FORZA DEL DESTINO
هي من أحلي وأجمل ماكتب فيردي .. عارف دي كانت موسيقي تصويرية لفيلم إيه ؟؟ أمير الانتقام .. تحفة بركات الخالدة ومن أقرب وأحب الافلام الصرية لقلبي.
لازم تسمعها من توسكانيني .. حاجة تانية خالص. السي دي هيوصلك وفيه نسخة توسكانيني ونسخة كاراجان
HE DOES NOT MISS ONE CUE ..
صباح الاجازة والصواريخ النارية والبيرة المتلجة
لو يسمحلي ابو فارس
طبيب نفسي احييك و اصقفلك على تحليلك الرائع و البسيط لمجمل احداث ثورة يوليو "المجيدة" كما علمونا
انا حاولت اعلق عند حضرتك بس لقيت انه مافيش مجال للتعليق ابدا
على العموم كنت احب اتواصل معاك بشان موضوع معين و ده ايميلي
dorybettyx@yahoo.com
تحياتي و شكرا
د.ياسر
أنا الواجب أشكرك ﻷنك تفتح نوافذ نطل منها على عوالم أخرى..وتأخذبأيدينا فى رحلات كل منها أجمل مما تليها..
رحله فى تاريخ مصر المديد
ورحله فى عوالم كتابات مجهوله لى..
ونبضات من روحك وتأملاتك
..الشكر واجب علينا أحنا..
باﻷضافه لصداقه جميله رقيقه..
أعتز بها وأفخر..
الشكر لك أنت باصديقى
تحياتى وصادق مودتى...خالد
د.وليد
..منورنى دائما أبدا أبا نور
..أنت فين ياراجل
..صباح ال
Independence Day
والباربكيو والبيره المتلجه..
أما أن كندا لها تاريخ..فأخوانا الكنديه يحتفلوا بمرور ٤٠٠سنه بحالهم على تأسيس كمدينه كيبك
عندما بنى الخواجه شامبلان عشه فراخ وحوط عليها بسور وحط عليها علم فرنسا
..تخيل ٤٠٠سنه
زعلوا منى لما قلت لهم بيت جدى ف شلشلمون-شرقيه عمره أكتر من ٢٠٠سنه..ويعتبر بيت حديث ف القريه!!!
غلى اليوتيوب حوالى ٥-٦ محاولات لقيادة أوركسترات مختلفه تعزف
LA FORZA DEL DESTINO منهم واحده
ملخبطه لتوسكانينى ولكنها كافيه لرؤيه أعجاز حقيقى
..بالنوسبه لكاراجان
أنا غرقان هذه اﻷيام فى التسع سيموفنيات تابعين القطب اﻷعظم بيتهوفين قياده العارف بالله كاراجان وأوركسترا برلين الفالهارمونى..العالم دى بتعمل الحاجات دى أزاى!!؟؟!!
أما مأساة يوليو وتوابعها ليومنا الحالى فحديثها دو شجون يمتد ويطول وأنا اليوم والليله مبسوط ﻷسباب لاتنشر على الملاء ولاحتى على حبل الغسيل..
وأن كنت أتفق معك بالمجمل
..تحياتى وصادق مودتى..خالد
حفصة ..
شكرا علي المجاملة الرقيقة ..
علي فكرة أنا كنت بأهزر مع خالد .. لا تحليل ولا دياولو
بالنسبة للتلعيقات فهي مغلقة لأن المدونة مغلقة إلي أجل غير مسمي
Feel free to contact me at any time
Cheers
وليد
Post a Comment