Saturday, June 14, 2008


على رأى الصديقه حفصه
هى الدنيا ضلمه كده ليه..؟!؟
النهارده كنت شغال ف صيدليه هاااديه تماما وﻷنى نسيت الروايه اللى بأقراها اليومين دول ف البيت فضلت ألف على
الشبكه العنكبوتيه مدونه تشيلنى ومدونه تحطنى
ومن البديل للمصرى اليوم للدستور للأهالى للكرامه
..ياقلبى لاتحزن
..دى مش بلد دى منطقه كوارث..أيه الضلمه دى..؟؟
************************************
وزاره الخارجيه الكنديه بتحذر المسافرات الى مصر من التورط مع أو الزواج من رجال مصريين.
!!!!!.شوف العنصريه ياأخى
شوف بيقولوا أيه
Women, particularly foreign women, are frequently subject to
unpleasant male attention, sexual harassment, and verbal abuse. This often takes the form of staring, inappropriate remarks, catcalls, and touching. The Department publishes a booklet entitled Her Own Way: A Woman’s Guide to Safe and Successful Travel. Its prime objective is to inform Canadian women and encourage them to travel safely.
هى الخيبه لما تحط بتحط بالويبه على الكل
..الصديقه أبومينتركس كاتبه عن الموضوع ده
وتذكرت أنى قرأت من فتره فى مدونه إن المصريين من أكتر الناس بحثا فى جوجول عن كلمه جنس بالعربى وسكس
باﻷنجليزى
...دعبست شويتين لفايه مالقيت التدوينه عند أحمد فى أٌحد
..حط المعلومتين كده جنب بعض
..تعرف أن فيه حاجه غلط خاااااالص
****************************
حاولت أقرا أى حاجه ماعرفتش..
شيشت وحرقت صدرى شويتين حلوين
..ورجعت لفيت شويه فى التلفزيون لقيتهم عارضين
...يااااااااااه
تنحت أمام التلفاز..أستمتع بموسيقى
...
وذكريات أفلام الويسترن القديمه
..
دى كمان حلوه آوى
وملعون أبو الدنيا

17 comments:

^ H@fSS@^ said...

يا ابو فارس احنا منكوسين
و بال أوي كمان
طول عمرنا شخصية اتكاليه
حقلك على حاجة
من بوست ابوميناتركس لبوست رامز عن ثقافة التصدير لبوست احمد اللي انت حاطه
لبوست انا كنت نزلته عن التخلف الثقافي اللي احنا فيه و كان برضو اسمه الدنيا ضلمة كده ليه
لاخر بوست عندي
كلها دلالات بتقول ان احنا مصرين على عدم رؤية مشاكلنا بمنظورها الحقيقي
و اننا نبرع في تكبير كل ما هو صغير و تصغير كل ما هو كبير
حالة خلط مش طبيعية بنتعامل بيها على جميع مستويات حياتنا و في جميع المجالات
و ازيدك من الشعر بيت
هناك حالة احباط نفسي و معنوي و فكري بيمر بيها ناس كتار
مالهاش سن معين ولا جنسية محدده
الخطير اللي فيها انها حالة احباط غير معلومة الاسباب و مش باين انها حتنتهي على خير
و مع ذلك نصر بقوة شديدة على اتباع نفس اساليب حياتنا و المضي قدما متوكلين على كلمة ربنا يفكها من عنده
فطبيعي انه كلمة سك سو جنس هما اكتر كلمتين يتم البحث عنهم
بواسطة العرب عموماو المصريين خصوصا
نحن نعيش حالة احتقان مرعبة
و ربنا يستر لو اتفتحت

Unknown said...

حفصه
على فكره أعتقد أنى لاشعوريا أخذت عنوان البوست بتاعك ﻷنه عبر عما أحسسته..بس فعلا أتغميت من اللى قريته..تحياتى

Wandering Scarab said...

خالد..

أنا معاك إن دى طريقة عنصرية من وزارة الخارجية و أنا الصراحة لما قرأت السايت حسيت بخذل عشان بلدنا مصر. انما لو بصيت لها من ناحية الكنديين هتلاقي إن هما عاملين الكتاب دة خوفاً على مواطنات كندا و لأن هما عارفين إن في مصر مفيش سيستم يساعد الكندية لو في مشكلة بالأخص لو كانت متزوجة من مصري و لها أولاد منه. بص على اللينك دة إلي كتبته مروة رخا

http://www.marwarakha.com/index.php?categoryid=22&p2_articleid=62

وانا كتبت بوست تعليق على موضوع ساندي دة

http://wanderingscarab.blogspot.com/2008/06/whos-best-equipped.html

وبعدين أنا بصراحة لما اكتشفت إن هما عاملين كتاب عشان الموضوع دة أخدتني النخوة و طلعت الجنونه و قلت أنا هسأل العالم دي هما بيقولوا كدة ليه على مصر. الرد كان يضايق جداً بس كان مقنع الحقيقة. قالوا لي إنه احنا هنا متعودين على إن و إنت ماشي في الشارع ممكن تقول هاي.. نايس دي.. نايس ويذر.. و تبتسم للناس اللي ماشية في محل أو حتى في الشارع.. انما في مصر قالوا إن الاجنبية بتبقى مش فاهمة انها لو ابتسمت لأي رجل في الشارع هيفهم غلط. و إنه كمان في مصر التحرشات والمعاكسات حاجة عادية في الشارع ولا تعتبر جريمة جنائية عكس الوضع في كندا، التحرش في الشارع يعتبر جريمة جنائية. أنا مازلت شايفة إن الاسلوب عنصري لكن للاسف كلامهم صح و أنا شفت الكلام دة بعيني في مصر.

التحرشات الجنسية في مصر بقت علناً في الشارع المصري. يعني محجبة و غير محجبة. أنا في مصر شفت واحد كان عمال يعاكس في واحدة و ماشي وراها الشارع كله و عمال تلميحات جنسية و تصفير و كلام من دة. البنت في الأخر و هي ماشية بصقت على الارض (ولو إنه أنا شايفة إنو كان ممكن تتصرف تصرف أحسن من كدة) و عينك متشوف إلا النور. إلي كان بيعاكسها قال لها انتي بتفي علي يا بنت ال... شد الحجاب من على رأسها و شدها من شعرها و نزل ضرب على وجهها. طبعاً الناس لما أخدت بالها حاشو عنها انما المفهوم هنا إن المعاكسة بقت حاجة عادية و إنه إلي بيعاكس دة من حقه إنه يعاكس و لو البنت اعترضت تبقى مصيبة.

كفاية إنه في العيد اللي فات كان في سعار جنسي في الشارع و محاولات إغتصاب عديدة والمصيبة الكبرى إن الفيدو باين و واضح إن رجل الشرطة شايف واحد بيحاول نزع ملابس واحدة من البنات و هو واقف مش بيتحرك بل بيتفرج عليها. مش عارفة بس الفكرة اللي جات في بالي هي إن لو الرجل المصري (الشرطي بالأخص) لا يحترم بنت بلده يبقى هل يعقل إنه يحترم الاجنبية الغريبة؟

و تاني فكرة جات في بالي، هي مصر ليه متعملش حاجة شبيهة بكتاب كندا دة بالنسبة لكل المصريات اللي مصممين على السفر للسعودية والكويت والخليج عموماً للعمل كخادمات في بيوت السعوديين و الكويتيين و تحذر كل واحدة من إن في عنف و تعذيب وإهانة وإغتصاب في كثير من البيوت دي و إنو الحكومة السعودية أو الكويتية لا تساعد أي مصرية في حالة إنو في مشكلة؟

Anonymous said...

لا يا ابو فارس والله ما قصدي عشان تحط لنك و لا غيره
انا قصدي ان اغلبنا حاسس و شايف المصيبة اللي احنا فيها من تردي عام و مش عارفين حنعمل ايه

اديك مثال بسيط على تخلفنا
انا من هاويات الاعمال اليدوية و الخياطة
معلش دقة قديمة
النهاردة عالنت قلت ادور على خرز للعقود و الغوايش و اشحنه بالنت
و ادور على صور لغرز اجمل بيها لبس او حاجات متفصلة مش جاهزة
لما حطيت بالانجليزي طلعلي مليون موقع و موقع يعلموني من الالف للياء و اشتري منين و احسب ازاي الطول و تصميمات لها اول مالهاش اخر
و نفس الشئ لتصميمات الملابس
وتحارة و عالم بتفكر و خدمة زي الفل

تعالى احط نفس الكلمات بالعربي
مافيش ولا حاجة
عارف بيقولوا ايه؟؟
نجيب الخرز بكمية معقولة
طيب السؤال
اجيبه منين؟؟
اشتريه بكام؟؟
اجيب قد ايه؟؟
لو عقد ححتاج قد ايه؟
لو غويشة؟؟
مافيش
كله سبهللة يا باشا
كله بالويم
و ده على سبيل المثال مش الحصر حاش الله
شفت المستوى اللي احنا فيه
انا عارفة اني برغي و زي اللي مهلوسة
بس لانك جيت في وقت يعني مش عارفة اقول عليه ايه
يمكن ناقمة على اوضاع كتيرة
ناقمة اوي


تحياتي و اسفه للاطالة

Unknown said...

abominatrix..
على فكره أنا كنت بأتريق لما قلت شوف العنصريه مش بجد..كان مفروض أقول وينك وينك..أو أحط وش بيغمز..مش قصدى أنهم عنصريين لسبب بسيط أنه فعلا اﻷجنبيات بيتعرضوا لمضايقات مالهاش نهايه..وزى ماأنت قلت لو غلطت وردت بأدب أو أبتسمت يبقى نهار أبوها مش فايت..نروح بعيد ليه..بنتى ساره ف زياره للقاهره نازله من عند خالتها ومع أبن خالتها اﻷصفر منها سنا..شويه أولاد واقفين ع الناصيه عاكسوها..مافهمتش ..العربى بتاعها مكسر ردت وقالت هاى أو ثانك يو أو حاجه..ياولداه الكام عيل فضلوا مرابطين قدام العماره بتاعة خالتها ف حر أغسطس يجى أسبوع..طب قوللى دى كانت ف النهايه نكته..لكنها فعلا مش كده مع سيدات كتير..خليجيات..أو أوربيات..كل النساء يذهبن لمصر بحثا عن فحول مصر ..بلا خيبه..التقارير والدراسات الطبيه بتقول عكس كده خالص..وبالتالى لما تحطى أن المصريين طول النهار والليل ع النت على مواقع البوءنو..نعرف أن عيه حاجه فعلا غلط..تحياتى..ومودتى..خالد

Wandering Scarab said...

خالد..

أنا اسفة مفتكرتش انك بتتريق معلش أصل أنا قبل القهوة بتاعة الصبح بيبقى مخي مقفول بالضبة والمفتاح.. مش بيفتح إلا بالاسبريسو..

إلي خلاني أقول كدة كمان إنو التعليقات في الموقع دة

http://globalvoicesonline.org/2008/06/14/beware-of-egyptian-men-said-the-canadian-embassy-and-others/

و على فكرة أنا كتبت بوست تاني النهاردة (بعد شرب القهوة طبعاً) عشان أوضح أنا كان أصدي إيه.

بعد كدة أنا هشرب القهوة الاول قبل ما اقرا أي حاجة تانية.. هما لو يعملو برشام اسبريسو يبقى أفضل.

بالنسبة المعاكسة إلي إتعرضت لها ساره، هو كويس انهم قعدوا تحت البيت و مطلعوش دة اللي كان ناقص، أنا مرة مع بنت خالتي ماشيين في الشارع وإنت عارف إزدحام والطرق الضيقة في مصر، و احنا ماشيين واحد معدي في تاكسي راح مطلع ايد برة الشباك و قرصها في جانبها قال إيه بيعاكسها.

إنت عارف يا خالد.. أنا مجال شغلي في أبحاث و إحصائيات السوق. لو أقول لك مش هتسدق.. من أكبر أرباح شركة فايزر حبوب الفياجرا في سوق السوداء بتاعة مصر. المهم إنه الابحاث اثبتت إنه معظم الرجال المصريين في مصر مش بيخدو فياجرا عشان في عطل فني انما بيخدوه عشان يطولوا المدة عشان بدل ما يبقا ساعة بيبقى عايز ساعتين و كتير منهم بياخد الفياجرا زي حبوب أسبرين للصداع، بياخدوا عمال على بطال عشان يبقا جاهز علطول في أي وقت.

هو فعلاً في مصر في سعار جنسي. هو الواحد بعد كدة المفروض لما ينزل مصر يبقى يلف نفسه في علب بلاستيك قبل ما ينزل الشارع.

husam shady said...

بعيداً عن الضلمه حبيت أمسى عليك يا دكتور خالد
ميا مسا

ابو احمد said...

والبرغم من كده لسه الواحد بيحب البلد
والعشق زى الداء على رأى
عمنا صلاح جاهين
بحبها والعن ابوها
بس لو حد فكر يهينها بناكلوا
هو ده مرض عندنا ياخالد
والا كل الشعوب كده
طمنى عليك اخبارك ايه

Iskanderani said...

صباح الفل د. خالد أبو فارس؛

تحياتي لك وماتتعبش نفسك ملعون أبو الدنيا . لما تجيء لك الفرصه سافر وزور في مصر المروسة مدينة الغردقة أو المنتجعات السياحية في نواحيها راح تعرف ليه التحذير ده من الخارجية الكندية للحريم

وملعون أبو الدنيا مرة تانية

تحيات إسكندراني في بلاد الله الواسعة

ابو احمد said...

ايه معدتش بتعدى لعل المانع خير
طمنى عليك

Unknown said...

اﻷخت
Anonymous
لى صديق عزيز
د.أسامه
القفاش..
أحد أهم المثقفين المصريين والعرب اﻷحياء حاليا..
د.أسامه بيقول أيه مصر مافيهاش حاجه جد على اﻷطلاق..من أول السياسه الخارجيه لحد زى حضرتك ماتفضلتى بيع الترتر والخرز الملون
المشكله تأتى حين المقارنه بالعالم المتقدم
زى ماكتبت مره الفلك ومشاهده السماء ليلا أحدى هواياتى المفضله
هوايه لعب تسليه لاحأكتشف مجره جديده ولا يحزنون..بأطلع فى الليالى الصافيه أحدق ف السماء بتلسكوب بدائى
ولكن حثن بحثت وجدت عشرات المواقع على النت والجمعيات والتجمعات لتشجيع هواة الفلك..وبالتالى حتى لو أنا عاوز ألعب..وجدت نفسى أصبحت جاد ومهتم .
.هو ده الفرق والهوه اللى مش قادرين نعبرها...تحياتى
ياريت تحطى أى أسم بس عشان أعرف أنا بأوجه الكلام لمين..خالد
***********
حسام ياشادى
أين أنت ياولدى..وحشتنى ياوحش..فينك أخيارك أيه..المزاج شكله مش مظبط اﻷيام اللى فاتت دى
ياولدى تعال جنبنا نتونس ببعض ف اﻷيام الخرا دى
..تحياتى وضادق مودتى
*************
تعرف يامجدى مهما حاولت مش قادر ماحبش المخروبه دى..وأخاف عليها م النسمه وأحزن كل ماشوفها ف النازل..وألعن أبو العجز والزمن..
تحياتى ياصديق العمر
**************
أسكندرانى
شفت والله وسمعت وحزنت..ﻷن لينا أصدقاء كتير من جنسيات مختلفه..ومن أواخر التمانينات صديقات بينزلوا مصر من الزن بتاعنا ويتعرضوا لمواقف فى منتهى السخافه
ياراجل ده صديقه أيرلنديه أنهرت قرص وب....وهى معايا فى الحسين
أشتكيت لصديق خفيف الظل قاللى يعنى عيال لاتحترم مقام حفيد النبى..حيحترموا مقامك بآماره أيه..تحياتى ومودتى..خالد

^ H@fSS@^ said...

يا ابو فارس
انا حفصة اللانونيموس بس مش عارفة وقتها ليه طلع التعليق كمجهولة

ما علينا
المهم حضرتك بقى صديق للدكتور اسامة القفاش بذات نفسه؟؟
يا اهلا يا اهلا
والنبي تسلم عليه و تقله حفصة المشاغبة من ورشة عمل هارباس مايو 2008 بتسلم عليك
لو افتكرني حيقلك دي كانت بت غلباوية و مش عاجبها العجب و مش بعيد ينصحك بقطع صداقتك بيا لاني كنت غتتة اوي

و لو مش فاكرني يبقى كويس
الراجل تعب مني و من مناقشاتي اوي
:D

Ossama said...

صباح الفل يا د.خالد
استأذن سعادتك بس اسلم على الاستاذة حفصة
يا استاذة حفصة سعادتك نورتي الورشة وافدتيني جدا وانا عمري ما اتضايقت من حضرتك او من اي حد
و اتمنى تكوني لقيتي قدر من الفائدة و النفع في اللي عملناه
وسعادتك بجد في البال دايما وكل من كان معنا
و انا شاكر جدا ان حضرتك لسه فاكراني
اسامة القفاش
صديق يتشرف بصداقة الدكتور خالد كف
احد الاصدقاء الذين اكتسبتهم عن طريق الانترنت واتمنى ان تدوم صداقتنا

^ H@fSS@^ said...

اهلا اهلا دكتور اسامة
فرصة سعيدة انك علقت عشان اعرف عنوان المدونة

انا و الله بهزر
فقلت ادي لابو فارس امارة عشان يفكرك بيا مش اكتر و لا اقل
و يا فندم احنا اللي استفدنا منكم و نرجو ان نكون مازعجناكمش
اصل بصراحة و مع اعتراف الجميع
شلتنا(رامز-هاني-رانده-ماريان و العبده لله)كنا اكتر ناس مناقشين نوعا ما

بس بجد يعني كانت ورشة عمل شيقة جدا و ارجو انها تتكرر كل فترة لتثبيت الفايدة منها و تطويرها

تحياتي

Unknown said...

حفصه
..تصدقى وتأمنى بالله
أنا لسه قافل الماسنجر مع د.أسامه من تلات دقايق
..كنا بنرغى كالعاده
رغم أنه ف أخر الدنيا من الناحيه دى وأنا ف طرفها اﻵخر
..وضحكت فعلا لما قريت الكومنت
..حاضر ياستى أوصل له سلامك..
تعرفى أنا مسمى د.أسامه أيه..بصى على اللينكات اللى أنا عاملها ف المدونه
..د.أسامه الموسوعى..تحياتى..خالد

واحد مصرى said...

صباح الفل و ميا مسا على أبو فارس و كندا كلها

فضيحة.....بس حقيقة ..شعب هايج متخيل انه أوتىي من الفحولة و القدرةالجنسية ما ينوء به نسوان العالم كله و هما يا ولداه الهورمونات اللي في الفراخ خلتهم في البتنجان و استخدام التوستيرون و الفياجرا عل ودنه..و بعدين الشعب مش قادر يتخلص من فكرة مغرقة في العبثية و الجهل يل قل الحمورية ان كل خواجاية هي امراة فاقدة لعذريتها نتيجة لبحثها عن الجنس طول الوقت. و لسة الشعوب الخرا اللي زينا كدة بتحلم بالحرية و التقدم بلا خيبة ملعون ابوهم على الدنيا و الكل كليلة

ميامسا يا دكتور خالد

واحد مصرى said...

http://ikhnaton2.com/whisper/node

فيه شوية كلام حلو يتقري في مدونة اخناتون