Monday, May 05, 2008

politically incorrect

اﻷنسان حيوان ضاحك...هكذا مايقولون..الضحك ظاهره أنسانيه نتفرد بها..ولكن ماذا يضحكنا..؟؟
لماذا نقهقه ونضحك ونتلوى من اﻷلم فى بعض المواقف..
من أيام شاهدت فيلم حمى الذهب لشارلى شابلن مع أبنى فارس(١١ سنه)..فارس كاد أن يختنق من الضحك على شارلى شابلن..مما جعلنى أتعجب..هذا الفيلم عمره حوالى ٧٠-٨٠ سنه ولكن شابلن لازال يستطيع أنتزاع الضحك من صبى صعير..مالسر؟؟
لاأعرف كتاب جاد تكلم عن الضحك سوى محاوله بيرجسون لفلسفه الضحك وهو كتاب دمه تقيل فعلا..
فى روايه أسم الورده لأيكو النقاش اﻷساسى فيها يدور حول سؤال محدد هل هناك فى النص المقدس مايدل تصريحا أو تلميحا على أن السيد المسيح ضحك؟؟؟
وأذا لم يكن هناك مثل هذا الدليل قهل يصح لراهب جاد مقيم فى دير أن يضحك؟؟؟
هذا التساؤل يؤدى الى سلسه من اﻷحداث المنطقيه المتتاليه..فرئيس الدير يخفى نسخه كتاب أرسطو الوحيده عن الكوميديا..بل يذهب الى درجه تسميم النسخه لقتل أى راهب مارق يحاول قرائتها..وهو مايحدث فعلا فى بدايه الروايه
فى التراث اﻷسلامى هناك أدله واضحه على تبسط الرسول مع نساؤه وضحكه مع الصحابه..
ولكن طبعا الطبعه البدويه المتجهمه هى الغالبه حاليا يكفى أن تنظر فى صور الدعاه الموجودين على الساحه حاليا من البدرى لحسان حتى تستعيذ بالله..
السيد المسيح ضحك أم لم يضحك..من سنوات حضرت محاضره هنا لأبونا شنوده بابا الكنيسه القبطيه..
أقول أبونا وأنا مسلم ﻷنى أنحياز لكنيستنا المصريه كنيسه الفلاحين وأحب تقشفها وأديرتها..
ماعلينا البابا شنوده أبن نكته مصفى..تخرج منه النكته والضحكه بتلقائيه أبن البلد وبسهوله..
المصريون مشهورين بخفه ظلهم..ودى حقيقه لمستها حين أحتكيت مع باقى العرب المتجهمين عدا اللبنانين..
ولكن نكتنا عباره عن قفشات متتاليه ومايشبه القافيه واللعب على الكلمات..معظمها غير عميق..
اﻷنجليز سخريتهم مريره..
الروس نكتهم حريفه..
اﻷلمان لايضحكون..والله فعلا لايضحكون..
الطليان واﻷسبان نكتهم سريعه ومعظم الوقت لاتدرى أن كانوا جادين أم يسخروا منك..جرب كده وأتفرج على فيلم كوميدى طليانى
نرجع للسؤال اﻷساسى مالذى يصحكنا..؟؟
الكلمه ..الحركه..القافيه..المعنى أم اﻷلقاء..؟؟ كيف يستطيع البعض أن يحعلك تصحك حتى تدمع عيناك وهو يسخر منك ومن اللى خلفوك..ويقول لك نفس الكلام الذى سيدفعك لملاكمه فى موقف مخالف..؟؟
حاجه كمان الكنديين مشهورن بتوريدهم للكوميديا لهوليود...جتى أنه هناك نكته تقول "فى هوليود حين تقول أنا كندى يبدء الناس ف الضحك
مع أنه مافيش حاجه أسمها كندى نحن خليط من كافه شعوب اﻷرض أزاى نضحك..؟؟
بنضحك على نفسنا ..على الفروقات الثقافيه والمفارقات فى الفهم المختلف لنفس الشئ..
وتحولت مثلا الزيجات المختلطه الى ماده ثريه جدا للضحك..
.مثلا نكته سمعتها من أيام
ماهى أفضل مميزات الزواج من أمرأه من الكاريبى..؟؟
أنها حين تبدء فى الصياح عليك بلهجتها المميزه تتخيل أنك فى أجازه وتبدء فى وضع كريم ضد الشمس ونضاره سوداء...ولاتهتم..
.رسل بيترز كوميديان كندى من أصل هندى شاهدته فى التليفزيون عده مرات وحضرت عرض له أمس مع زوجتى هنا فى أوتاوا
أبن ستين كلب..
مايقوله فى عرضه الكوميدى كفيل بأدخال أى أنسان السجن لمده طويله هنا بتهمه نشر الكراهيه وأزدراء اﻷخرين وحتى معاداه الساميه..نكته كلها عن الفوارق اﻵثنيه والثقافيه..ويعمل على السخريه من الأكلشيهات واﻷفكار المسبقه عن اﻷحناس المختلفه
بدء عرضه أمس بالسؤال هل يوجد عرب فى المتفرجين اليوم فصحنا وكنا كتييير فعلا
..أيوه؟؟
فأظهر أنزعاجه وقال لنا أنا ما بنكتش على العرب خالص عارفين ليه؟؟
ﻷنى عاوز أعيش لغايه ماأقبض معاش كندا..؟؟
وهى نكته مزدوجه يفهمها الكنديين..فمعاش كندا مبلغ هايف يقبضه أى كندى حين يصل لسن الخامسه والستين وهناك كلام عن رفع هذا السن اﻷن الى السبعين
بس ياعم عينك ماتشوف ألا النور ...مسكنا مسخره يمكن ربع ساعه المجانين اللى مابيخافوش م الموت واللغه الغريبه اللى عمله زى مايكون واحد عنده أمساك..وطاخ طيخ..وأحنا فعلا حانموت م الضحك
وبعدها سأل فين اليهود..؟؟
فصاح البعض هنا وبدون كلام وبتعبيرات وجهه فقط أشار للعرب بما معناه اليهود هناك أهم بسك عليهم..
وبعدها سلخ اليهود شويه حلوين
فعلا ماقاله يدخله السجن هنا ف كندا
وماسبش يعدها حد ولاجنس ولامله ...من سود ﻷسبان لصينين لهنود..حوالى الساعه ونصف ضحك متواصل على أنفسنا وختم برضك بالسخريه من العرب..
تانى أحنا بنضحك ليه..؟؟؟؟؟؟؟
وبص هنا وتابع اللينك وشوف أبن الكلب ده

18 comments:

Bella said...

هناك كتاب شيق جدا عن الضحك من تاليف الدكتور شاكر عبد الحميد وهو من سلسلة عالم المعرفة

اتيحت لي فرصة الاطلاع على الكتاب وللاسف لم اجده لاقتنيه
ولكني انصحك بقراءته
فهو كتاب مفصل جدا يتكلم عن الضحك كظاهرة مجتمعية ويتحدث عنها من الناحية اللغوية ايضا كما أنه يتحدث عن فنون الضحك المختلفة كالنكتة والكرفة وغيرها

اذا كنت مهتما بقراءة شيئ عن الفكاهة والضحك فعندي بعض الكتب المتخصصة اذا اردت اتيك ببياناتها

ولي عندك طلب

ياريت تشيل

Word Verification

اصلها مزعجة جدا صراحة

تحياتي

بنت القمر said...

ابو فارس
بعد التحيه
طب تفتكر انه صدفه انه بدأ بالعرب وختم بيهم!!يعني الامر خالي تماما من العنصريه
ده في رايك؟؟
عن الضحك قد يكون مهربا من الضغوط الحياتيه المتزايده ولا علاقه له ابدا بقدر المرح والحبور
الذي يحيا فيه الشخص
!!
او قد يكون ايضا نوع من البلاده وانعدام الاحساس وسوء تقدير للموقف
اشد المواقف اضحاكا بالنسبه لي هي المعازي
حيث تبدأ السيدات في ذكر الراحل ويا اختي كان بيعمل وكان بيسوي
ثم يتم توجيه الحوار بعد برهة الي طريقه جديده لعمل صينيه السمك
او فواتير التليفونات اللي ولعت
والعود مره اخري لنوبه بكاء جديده وتعديد لمناقب الراحل اللي مكانش حد بيعرف يشتري سمك سردين زيه
:))!!
او انه كان موظف درجه تالته في وزارة الزراعه ماسك قسم مواتير الري
ومحدش اده
وعزاه اسم الله مليان زمايله في القسم
فتتخيله زويل شخصيا
هنا فقط اكتم الضحك
حتي لايتم طردي من العزاء
_________________________
اضم صوتي الي صوت بيلا بخصوص الفريفيكيشن
تحياتي

أبوفارس said...

bella..
خطوه عزيزه...وشاكر على أسم الكتاب
سأحاول البحث عنه على النت ..وياريت تدلينى على العناوين اﻷخرى لمحاوله العثور عليها...تحياتى..خالد
***********
بنت القمر
تحليلك ﻷنواع الضحك تحليل جميل وعميق..ويضيف عمق لمقوله أن اﻷنسان حيوان ضاحك..
الشو بتاع راسل بيترز كله كان عنصرى بمعنى أنه لم يترك جنسيه أو جنس ألا وأتريق عليهم..
أنه بدء بالعرب أظن لمجرد تسخين الجو..بس هبش اليهود وبشده...ماقاله فى العرض فعلا يدخل أى واحد السجن هنا لو قاله بشكل عام...
وهو كان بينكت أساسا على صوره العرب فى اﻷعلام الغربى..وأنهاها بنصيحه للكل
don't mess with arabs
تحياتى خالد
************

سيداتى لاأستطيع رفض طلب لكم وبناء عليه رفعنا الفيرفيكيشن وحتى أشعار أخر...حضراتكو تؤمروا ...تحياتى وصادق مودتى خالد

واحد مصرى said...

بعيدا عن تحليل الية الضحك و اسبابه الراجل ده جامد جدا
Russell Peters

ايوه كدة بلا سياسة بلا بطيخ

دمت بخير يا ابو فارس انت و فارس و اسرتك جميعا

ابو احمد said...

شكرا على المدونه الجميله دى ياخالد الواحد زهق من كتر الكلام فى السياسه
عايزين شوه ضحك ورقص وتهريج
انا كان رأيى ماتردش على الأخ فى المدونه اللى فاتت ده شخص احمق وجاهل
والمسأله مش ناقصه
تحياتى ياأبوفارس ياجميل

أبوفارس said...

منور ياأيهاب..ياصديقى العزيز...
تعرف أكتر ماأدهشنى هو قدرته الخارقه على اﻷرتجال وتوليد النكته من الموقف اللى هو فيه
..يعنى غلط ف نطق كلمه طويله شويه وكأى أبن بلد حريف قافيه طلع منها يجى عشر نكت..
ويتفاعل مع الجمهور بشكل خطير..
ﻷنه يسأل أنت منين
وطبعا ف كندا ممكن تسمع حاجات غريبه جدا..
واحد ف الشو اللى حضرته قاله من جويانا..
رد عليه مباشره وقاله تعرف الفرق بينى وبينك أيه؟؟
جدى الكبير لما شاف اﻷنجليز جايين طلع يجرى..
جدك وقف يتفرج وطلع يتعشى ع المركب بتاعتهم
وفضلتم تقطعوا قصب حوالى خمس أجيال..
فى أشاره للعبيد الهنود اللى أخذهم اﻷنجليز للمستعمره
وأكمل ...ياأخوانا لما تشوفوا مركب عليها ناس لونها أبيض أأأجرواااا...وبالذات لو لونكم بيج زى حالاتى..
طبعا لما تسمعها منه وبتعبيرات وشه وحركات جسمه كنا حانموت م الضحك وبالذات أنك قاعد حواليك بيض وسود وهنود وكافه ملل اﻷرض..
...تحياتى ولازم وحتما نلتقى ف القاهره أغسطس القادم أن شاء الله..خالد

أبوفارس said...

مجدى ياصديق العمر
أما أنى زهقت م السياسه فحصل وحياة
ربنا حصل..محلك سر..وملل..وتخاريف..حصل أيه بقى ٤ مايو !!!
المهم أنت أخبارك أيه!!؟؟
أما عن صراصيرو الجبار..فعلا أنا لم أكن انوى الرد على اﻷطلاق بس كنت فاضى يوم اﻷحد قلت أتسلى عليه مش أكتر..
وطبعا لاأمل أنى أقنعه بأى شئ على اﻷطلاق دى عالم مافيش فيها أمل زى الصلصه كده تعرف ترجعها طماطم..؟؟ مش ممكن
..هم كمان مش ممكن تغيرهم
...لو الشمس طلعت ف وشهم حايقولك ضلمه..
بلا قرف...المهم الناس التانيه ماتفتكرش عشان قرفانين من الكلام معاهم أن كلامهم صح...تحياتى وصادق مودتى..خالد

بحب السيما said...

فى اعتقادى ان كل الكوميديانات اللى جم فى تاريخ السينما مدينين للعظيم شارلى شابلن .. الراجل ده فعلا اسطورة حقيقة .. فرج فارس على فيلم السيرك وادعيلى
بالنسبة لاسباب الضحك فانا شايف ان اكتر حاجة بتضحك الشخص اكتر من اى حاجة هو الكاريزما بتاعة الشخص اللى قدامه .. انا ممكن اسمع نكتة جامدة او افيه من شخص وماضحكش .. واسمع تعليق عادى جدا من واحد حابب الكاريزما بتاعته اموت من الضحك
عجبنى قوى وصفك الدقيق لجين الضحك عند الشعوب بس نسيت السودانين
السودانين لو انت بتفهم لكنتهم حتلاقى الكوميديا فى دمهم زى المصريين بالظبط ويمكن اكتر

تحياتى

Nsreen Bsunee said...

من فتره مش بعيده كنت باضحك كتير فى محاوله بائسه للتخفيف من الهم والحزن والعكننه
دلوقتى بطلت اضحك خالص

الفيديو لسه مشوفتهوش بس انشاءلله حاشوفه وحاقولك رأيي يا استاذ خالد

Bella said...

مرحب ابو فارس

كتاب الفكاهة والضحك للدكتور شاكر عبد الحميد غير موجود على النت
والحقيقة حاولت ان اجده ولم اتمكن

ولو حصلت عليه سارفعه لك على النت لتقرأه

اما الكتب الاخرى فسأكتب لك عناوينها ودور النشر التي قد تسهل عليك الحصول عليها ان شاء الله

والحقيقة لو كنت اعرف كيف اعمل نسخة الكترونية من كتاب كنت عملت لك منهم

الكتاب الاول اشتريته من فترة طويلة واسمه

السخرية السياسية العربية
من مطبوعات دار الساقي بلندن
المؤلف اسمه خالد القشطيني
صدر سنة 1988

وهو كتاب ممتاز الحقيقة يتعرض للنكتة السياسية واسباب نشؤها ويتحدث عن طبيعة الشخصية العربية التي تنتج هذه الفكاهة كما يقوم بعرض امثلة من نكت شائعة ويوضح ظروف خروجها للنور والتحريفات التي تحدث لبعض النكات كي تناسب موقف مختلف في دولة اخرى
وايضا به نماذج لبعض رسوم الكاريكاتير اللاذعة

الكتاب جميل

ولو عرفت بنعمل الكتب ازاي نسخ الكترونية ممكن ارفعه لك على النت

هناك كتاب آخر اسمه
سيكولوجية الفكاهة والضحك
المؤلف الدكتور زكريا ابراهيم
من مطبوعات مكتبة مصر

وهو كتاب غير قديم يعني ممكن الحصول عليه لو كنت في مصر
وهو يتحدث عن الفكاهة والضحك من الناحية السيكولوجية متتبعا الفكاهة عند الطفل وصولا بها للفكاهة عند الفرد والجماعة

كتاب جميل ايضا

وهناك كتاب آخر للدكتور محمد عناني اسمه
فن الكوميديا

وهو من اصدارات مكتبة الاسرة وصدر منذ عام 1998

وهي دراسة اكاديمية متخصصة نوعا ما تتحدث عن الكوميديا في المسرح

هناك كتاب متخصص آخر يتحدث عن الفكاهة في الادب

والكتاب اسمه
الفكاهة في الادب
للدكتور احمد محمد الحوفي
من مطبوعات نهضة مصر
صدر في 2001

وهو دراسة لبعض النصوص الادبية من الادب الساخر لتوضيح الدلالات اللغوية والاساليب اللغوية المستخدمة في هذا النوع من الكتابات

يعني هي دراسة متخصصة نوعا ما ولكنها تساعد من يجب التعرف على خصائص هذا النوع من الكتابة

ارجو ان تجد مايفيدك في هذه الكتب

ومعذرة على الاطالة

تحياتي

على باب الله said...

ياااه قد أيه البوست ده جه في وقته

أشكرك علي شوية الضحك الحلوين دول من قلبي

ها أروح أتفرج علي فيديو أبن الكلب ده حالاً .. و في الغلب ها أدعيلك بعد ما أشوفه

---

خالص تحياتي

أبوفارس said...

بحب السيما
منور والله العظيم منور..لفيت بسرعه ف مدونتك وأنبسطت تماما..جميله جدا..
تعرف أنا شفت الرائع جاك نيكلسون فى عش المجانين عرض أول ف القاهره من سنوات طوووويله خرجت أنا ومجموعه أصدقاء من قاعه السينما جلسنا على مقهى قرب التحرير مذهولين ثم بدأت مناقشه حاميه جدا عن دلالات الفيلم وتكنيكه علها اﻷفضل عن فيلم سينمائى ف حياتى حتى أفلام شاهين لم تحظ بهذه الحده ف النقاش ثم دخلنا السنما ثانيه لمشاهدته..وكانت مشاهده صاخبه كل شويه واحد مننا ينده على التانى ويقوله شايف مش قلت لك...أظن جيراننا ف القاعه ضجوا منا....فعلا لك حق نسيت اﻷخوه السودانيين..وهم فعلا خفيفى الظل
...تحياتى وصادق مودتى...خالد
****************
نسرين بلاش والنبى أستاذ دى والا عاوزانى أقولك أستاذه نسرين اللى حايأستذنى حاأستذه..أوكى..خالد.. أبو فارس حلوه قوى..
أنا باسعد جدا بالتواصل مع جيلكم بتدونى مد خدمه..باحس أنى لسه شباب بانفعل وأحتد وأفهم وأتعلم...فخللى البساط أحمدى
..منوره دائما أبدا
..أرجو أن اللينك ومابعدها يعجبك بأعتذر عن بعض التعبيرات الخارجه ولكن المٌجمل فعلا مضحك..لاحظى قدرته الفائقه على تقليد اللهجات المختلف لأحناس مختلفه حين تتكلم اﻷنجليزيه..دى حاجه نعيشها هنا يوميا..المصريين لهم لكنه أنجليزيه مميزه جدا ومضحكه كمان أستطيع تميزها ف ثانيه ولو ع التليفون فى حديث مع طبيب أو صيدلى مصرى لزوم الشغل..أول ماسمع
bliz
بدل
Please
أول
ziz iz
بدل
This is
أفطس على روحى مالضحك وأقول مياميسا ياهندزه..وبندء ف الكلام بالعربيه..تحياتى وصادق مودتى..خالد

أبوفارس said...

Bella
بسم الله ماشاء الله عليك سيدتى أيه الموسوعيه ف المعرفه دى..شاكر جدا جدا ع أسماء الكتب وسأحاول الحصول عليها أما من ع النت أو حين نزولى للقاهره المره القادمه فدائما ماأجئ للقاهره ومعى قائمه بالكتب التى أرغب ف أقتنائها وأدور يوم كامل ف مكتبات وسط البلد بحثا عنها ...الزياره اﻷخيره أضفت مكتبه الديوان(؟) ف مصر الجديده لقائمه تلك المكتبات...أضحكى على دى..من ضمن الكتب اللى نويت أقتنائها كان كتاب الخمسيى أحاديث التاكسى (؟) ولكن بعد أستعمالى التاكسيات ف القاهره لعده أيام متنقلا بين مصر الجديده والمعادى والهرم والضاهر والمهندسين عده مرات يوميا واﻷنغماس مع سائقى التاكسى ف أحاديث لاتنتهى تغطى كل مناحى الحياه ف القاهره من سياسه لكوره لجنس..وجدت أنى لست بحاجه لشراء الكتاب بالعكس أنا ممكن أكتب -أو أجمع- واحد...تكنولوجيا العبد لله جاهل تماما..تلاحظى أن مدونتى فقيره ف اللينكات والبانارات لجهلى المدقع التام ف موضوع تكنولوجنا المعلومات.. وخبيره المنزل أبنتى ساره ( ١٨ سنه)طبعا بتذلنى عشان تطلع فيرس أو تحمل بروجرام..فممشيها كده بالصلاه ع البنى..لكن لو عرفتى قوليلى..تحياتى وصادق مودتى..خالد

أبوفارس said...

على باب الله
..أيه الحكايه أنت تالت واحد يعلق ويقول نفس الكلام تقريبا..الحكايه نكد للدرجه دى اليومين دول..مافيش ضحك ولاتهريج..مافيش نكت جديده..غريبه فعلا..
طب أسمع دى أخر ماسمعته من نكت مصريه سياسيه
...
بيقولك واحد ماشى ف الشارع رفع أيديه للسماء وقال
الله يخرب بيتك ياسيد مش لاقيين العيش الحاف
..راح مخبر خابطه على قفاه وقالله قدامى ياأبن الكلب ع القسم وكمان مش عارف أسم الريس
...أرجو لك مشاهده ممتعه ودوام
التواصل..صادق مودتى..خالد

Bella said...

مرحبا اخي العزيز

اشكرك كثيرا

واذا كنت تريد عمل قائمة للكتب تريد شراءها عندما تنزل مصر ان شاء الله فيمكنك مراجعة بعض الموضوعات في مدونتي تتحدث عن معرض الكتاب وبها لينكات لتدوينات العديد من الاخوة المدونين وفيها اقتراحات بكتب اخرى

يمكنك بعدها عمل قائمة كبيرة للكتب

فهذا الموضوع فيه قائمة للكتب التي اشتريتها هذا العام ومحدد فيها اسماء دور النشر لتسهيل الحصول عليها فيما بعد

http://afkaar-bella.blogspot.com/2008/01/blog-post_29.html

اما هذا الموضوع فيتحدث عن معرض العام السابق على معرض هذا العام

http://afkaar-bella.blogspot.com/2008/01/blog-post_2382.html

أما بالنسبة لكتاب تاكسي الحواديت فقد قرأته وهو كتاب ظريف وخفيف ولو اني اعيب عليه بعض العبارات والالفاظ الخادشة التي لم يحاول الكاتب تنقيحها بل كتبها كما وردت على لسان قائليها وهذا مما يعيب الكاتب الحقيقة وينتقص من قدر الكتاب

ولو انه كتاب مسلي وظريف

وبالنسبة لاضافة بعض اللينكات اذا اردت اي مساعدة في هذا الامر فتحت امرك

تحياتي

بحب السيما said...

الله يرحم الايام ديه
دلوقتى مابيتعرض هنا عرض اول غير الافلام التجارية
اما الافلام المهمة فبتتعرض بعدها بشهرين او تلاتة وبتبقى فى سيتى ستارز بس .. يعنى عشان الواحد يشوف اربعة افلام بس فى الشهر عايز حسبة 150 جنيه بالميت
ربنا يخلينا بقى النت والدى فى دى

أبوفارس said...

bella
سيدتى الفاضله
..واضح أنك مثقفه من العيار ٢٤ حاجه جميله جدا..بعض الكتب اللى حضرتك ذكرتيها ف مدونتك لاأحلم حتى بقرائتها..ولكن ماتفضلت به واللينكات أعطتنى صوره بانوراميه لما يمكن أن أبحث عنه فى زيارتى القادمه للقاهره..ﻷنى باعمل نفس الغلطه كل مره أتمشى ف وسط البلد وأدخل المدبولى والشروق ودار المعارف وغيرها وأطلع محمل بكتب مختلفه تماما عما نويت شراءه من اﻷول...ولكن ﻷنى مهاجر ومستقر هنا ف أخر الدنيا..عندى أشكاليه تانيه..مفروض أتابع مايحدث فى شرقنا السعيد سياسيا وثقافيا أم أتابع مايحدث هنا فى المجتمع الذى أعيش فيه..يعنى مثلا كتاب جلال أمين "خرافة التقدم" رغم ماأحدثه من ضجه فى مصر شفتها على النت..حين وجدته ف الديوان فريته بسرعه ورجعته مكانه ﻷنه لايعنى شئ لى شخصيا..ولو عايز أقرا عن نقد أفكار عصر التنوير هناك فيلسوف معاصر أسمه "جون جراى" ليه كتابات أهم وأعمق وناوى بأذن الله أعرض بعضا مما يقول ﻷهميته الشديده...ولكنى وبصدق سعيد جدا بالتعرف عليك سيدتى..وأتمنى دوام التواصل..تحياتى وصادق مودتى..خالد

أبوفارس said...

بحب السيما
أنا كنت عضو فى جمعيه الفيلم..حاولت مع نادى السينما ولم أستطع ونجحت ف الحصول على عضويه جمعيه الفيلم ولاأدرى أن كانت مثل تلك الجمعيات موجوده ف مصر ولا حرام هى كمان..ومن خلال العروض المميزه ف الجمعيه تعرفت على كلاسيكيات السيما وشاهدت سينمات من الهند (مدرسة كلكتا) والمكسيك والبرازيل..ألخ ألخ ووجدت هنا دار سينما تجريبيه وسط البلد ف أوتاوا أسمها باى تاون..رخيصه بشكل مضحك وبسيطه بشكل جميل..ومليانه طلبه جامعه وشباب مهتم أذهب أليها كل فتره ﻷستمتع بما تعرضه وأسترد أحاسيس الشباب..تحياتى وصادق مودتى..خالد