Saturday, May 10, 2008

مشاهد كنديه

المشهد اﻷول
الصيدليه التى أعمل بها يوم الثلاثاء من كل أسبوع..وصفه طبيه جديده أراجعها لفت نظرى أسم صاحبتها "شالومات....." أن كان شالوم هى سلام بالعبريه فالمنطقى أن تكون "شالومات" معناها سلامات..لقرب العربيه والعبريه بشكل كبير..رفعت رأسى ونظرت فى المنتظرين حول الكاونتر..وأستطعت تميزها فى لحظه ملامحها شرق أوسطيه جدا..شعر قصير يغلب عليه البياض ربما تكون فى أوائل اﻷربعينات من عمرها..عيون سوداء واسعه..وحواجب سوداء ثقيله..أمرأه جميله فى المجمل..لفت نظرى أكثر ماترتديه ملابس خفيفه صيفيه أنيقه ولكن تعطيك أحساس بعفويه أو غجريه صاحبتها..واﻷهم كم الخواتم والسلاسل الفضيه التى تلبسها.. وأنا أعطيها المضاد الحيوى ماعرفتش أمسك لسانى..كالعاده...فبدأت
أنا كده أتلخبطت... اﻷسم يهودى جدا
نظرت لى بحده وقالت
أنا يهوديه جدا..
بس السلاسل الفضه اللى لابساها بتقول غير كده..
أمسكتهم بيدها وأخرجت تمثال صغير لبوذا و أحد رموز الهندوس ثم لوحت فى وجهى بثالثه
دى خميشه يهودى..
خمسه وخميسه فضيه مزخرفه..
رددت "خميشه" نسميها خميسه عندنا
عندنا فين
مصر..نرتديها للحمايه من الحسد والعين الشريره..
بالضبط عندنا كمان..
يعنى أنتوا واخدينها منا..أنا أدرك تماما خطاء هذه العباره ولكنى كنت أود معرفه كيف تفكر..
لاأظن اﻷغلب أنها سابقه علينا كلنا ودخلت كجزء من ثقافه المنطقه كلها.
حلو البنيه بتفهم
..وأنت
آه لابد أنها لمحت سلسلتى الفضيه..فأخرجتها ..سلسله ﻵيه الكرسى
هديه أعتز بها
..ماذا تقول ؟؟؟
ترجمتها لها بقدر أستطاعتى
هزت رأسها
جميله وعميق..الله لاآله ألا هو..سأحاول البحث عنها مترجمه ع النت.
ونقول أيضا...
الله نور السماوات واﻷرض...النور رمز الأله فى معظم اﻷديان
أنا مهتمه بدراسه اﻷديان
..ولكن من أين يأتى الشر..
..لاأدرى..الغريب أن بيننا أشياء كثيره مشتركه..وعشنا سويا قرون فى شمال أفريقيا وأسيانيا..واﻷن
وأشاره يائسه من يدها
..كله من اﻷمبرياليه اﻷول اﻷمبرياليه اﻷنجليزيه واﻷن اﻷمبرياليه اﻷمريكيه..
أمبرياليه..!!؟؟ الله دى منين بالظبط
فسألتها
راكاح*..؟؟
أتسعت عيناها
ﻷ ميريتز**..
أشرت بكلتا يدي أشاره نص نص يعنى.
فأحتدت تانى.
.ميريت أقرب للروح اليهوديه من راكاح
..ولكنهم موافقين على اﻷيديولوجيه الصهيونيه..مش كده؟؟
ولذلك هم اﻷقرب للروح اليهوديه من راكاح
...لم أرد الدخول فى نقاش قد يشتعل والموقف كله لايتحمل..أشاره أخرى بيدى بمعنى لنتوقف هنا
..حدقت فيا بعيونها السوداء الواسعه
هممم ..ربما فرصه أخرى.
أى زمان وأى مكان
..أنت هنا على طول
..الثلاثاء فقط.
..ربما أتى ثلاثاء أخر لنتكلم..
مرحبا
..شالوم
وعليكم السلام ورحمه الله وبركاته
أبتسامه جميله ومشت..ظللت أراقبها للحظات حتى أستدارت ثانيه.. أبتسامه أخرى.. وهزه من رأسى

*****************************

راكاح* هو الحزب الشيوعى اﻷسرائيلى..وكان يضم معظم الناشطين والمثقفين العرب فى أسرائيل مثل توفيق زياد ,محمود درويش وأميل حبيبى صاحب روايه سعيد أبا النحس المتشائل..واحده من أفضل الروايات العربيه..والحزب يرفض اﻷيديولوجيه الصهيونيه مع قبوله بدولة أسرائيل...
http://en.wikipedia.org/wiki/Communist_Party_of_Israel
ميريتز**تجمع يسارى صهيونى يضم عدد من الشخصيات والحركات اليساريه برنامجه خليط من اﻷشتراكيه الديموقراطيه و دعوات الحفاظ على البيئه..الخضر

http://en.wikipedia.org/wiki/Meretz-Yachad#Ideology

**********************************

المشهد التانى

ساره أبنتى -١٨ سنه- أنهت سنتها اﻷولى فى الجامعه درجاتها فوق التمانين ف الميه بشويتين يعنى تقدير جيد جدا..وهو مالم أحصل عليه شخصيا ف أعدادى صيدله جامعه القاهره زماااان أوى..تريد الذهاب للقاهره هذا الصيف والبقاء هناك لمده ٥- ٦ أسابيع مع أختها المقيمه وتعمل بالقاهره وعمتها وبنت عمتها ألخ ألخ...أشترطت عليها أن تدفع على اﻷقل نصف تمن تذكره الطائره ومعظم مصاريفها ف القاهره..ﻷنها أصبحت مستقله اﻷن وعليها أن تعتمد على نفسها..طبعا كلام من ورا القلب ولكنى أحاول أعدادها للحياه هنا ف المجتمع الكندى..وتحمل المسئوليه

ساره تعمل وتدرس ف نفس الوقت..أثناء الدراسه تعمل ف الويك أند وربما مره واحده أو أثنتان وسط اﻷسبوع فى محل لانجيرى ملك سيده مصريه هى وزوجها أصحاب أعمال ناجحين جدا هنا

..وبصراحه تستجدع جدا مع ساره..فهى مصريه ف النهايه ولديها أولاد أكبر شويتين من ساره والدراسه هى نمره واحد لدينا جميعا..

أعطتها أسبوعين أجازه وطلبت منها التفرغ التام للمذاكره واﻷمتحانات وأخذتها للعشاء حين علمت بتقديرها هذا العام...

المهم ساره بعتتنى بعته محترمه من كام يوم

..جاءت لى ومعها بعض اﻷوراق الخاصه بالجامعه وطلبت مشورتى..طبعا أتنفخت مسحت النضاره وبدأت القراءه فى كورسات العام المقبل..البنيه تنوى دراسه طب..وبالتالى تحتاج كورسات محدده..بيولوجى وكيمياء حيويه وخلافه وهى كورسات مرهقه ومتعبه.

.فقالت لى برقه أيه رأيك يابابى لو أخدت كورس خفيف كده ف الصيف عشان أخفف الحمل عليا السنه الجايه..؟؟!! والله كلام معقول وماله ياحبيبتى ..ده أنا اللى بأقول

عندنا كورس أحصاء ممكن أخده ف الصيف يومين ف اﻷسبوع لمده ٦ أسابيع

حلو... ده برضه أنا اللى بأقول

يعنى أسجل

على بركه الله يابنتى

آه على فكره معنى كده أنى مش حاأقدر أشتغل فول تايم ف الصيف بارت تايم بس عشان الكورس والمذاكره

وماله يابنتى الدراسه أهم

أنا لسه مش واخد بالى من الفخ المنصوب

طب كده مش حاأقدر أدفع نص التذكره للقاهره زى ماأتفقنا!!!.

.بص لو ماتقدرش تدفع أنا ممكن أطنش الكورس وأشتغل وربنا يسهل السنه الجايه أقدر ألاحق على الكورسات الصعبه آوى آوى دى..بس ماأقدرش أوعدك حاجيب فوق التمانين زى السنه دى

...يابنت الذينا..أنا كده أتبعت تماما..وهى تدرك تماما ماذا سيكون ردى..

الدراسه هى نمره واحد ياساره ولا يهمك أنا حأدفع تمن التذكره كله المهم تشدى حيلك ف الكليه

...هئ هئ ربنا يخليك ليا ياأحسن بابى ف الدنيا

وماله كسبنا صلاة النبى

*****************************************************

المشهد التالت


..الخميس أعمل فى الطرف اﻵخر من المدينه..أنهى عملى عاده الساعه الخامسه وشويتين..الهاى واى مختنق فى ساعه الذروه..لسبب لاأعلمه قررت أن أعود للمنزل من طريق أخر يلف حول المدينه وأطول بكتير ولكنه على اﻷقل منساب..أكره ساعات الذروه حين تتحرك السيارات كالسلحفاه وأختنق داخل علبه الصفيح المسماه سياره..السرعه القصوى على هذا الطريق الدائرى ٦٠ كيلو ف الساعه..و٦٠ يعنى ٦٠ وألا الغرامه ياحلو..
ولذلك أخدت وقتى
..أنجعصت فى المقعد ولعت سيجار رفيع مكسيكى أول مره أدخن سيجار مكسيكى..حطيت سى دى
..كوكتيل من بينك فلويد لبوب مارلى مرورا بفيل كولينز وأجاثا فرانكلين..أى دوشه وخلاص..وأتكلت على الحى القيوم
الطريق ملفات..بعضها حاد يحتاج وعى ف القياده...فجاءه العربيات اللى قدامى بتهدى ثم توقفت..حادث مرورى طازه يادوب من تلات أربع دقائق..وقفنا كذا عربيه..وأتجهنا للسياره..أنحرفت عن الطريق ونزلت فى هوه محترمه على الجانب..أتنين تلاته شباب نزلوا جرى من سيارتهم وأتجهوا للسياره الساقطه على بعد عده أمتار ومقدمتها غارسه فى اﻷرض..
صحت عليهم
..ماتحركوش حد..بالذات السائق
..أسوء اﻷحتمالات اﻷن أصابه رأس وعنق وتحريك المصاب ممكن يبوظ الدنيا
..كلموهم بس لو فايقين عشان مايروحوش ف أغماء
..نظروا ألى..السن والصلعه واللهجه الواثقه فرملتهم..هزوا رؤوسهم..
وصاح واحد منهم
سيده واحده فقط هى السائقه
..فايقه والا مغمى عليها..
فايقه
كلمها أسألها أسمها أيه وأذا كانت وحدها فى السياره والا كان معاها حد
..فى تلك اﻷثناء كان أتنين تلاته أتصلوا بالطوارئ (١١٩) دقايق يامواطن وسمعت العوووعو بتاعه اﻷسعاف والمطافى وعربيتين شرطه..قفز أولا رجال المطافئ لتأمين السياره وطلبوا من الشباب الطلوع
..وهم طالعين كان رجال اﻷسعاف بيخرجوا عدتهم
وسألوهم
..كام واحد
واحده فقط
حركتوها
ﻷ هو قال ماتلمسوش حد بالذات السائق
وأشاروا ألى
..كويس كده صح
..نظره أمتنان من الشباب
..رجل الشرطه سأل أن كان حد شاهد الحادث مباشره هز معظم الواقفين رؤوسهم ﻷ..ماعدا واحد فقط قال أنا كنت وراها مباشره
..طب ياجماعه شكرا أتفضلوا أنتم..وللسائق اللى شاف الحادث خليك دقايق أخد أقوالك
..تحركنا كل لسيارته وبدأنا نخللى الطريق الذى كان متوقفا ربما ١٥-٢٠ دقيقه كل الموضوع
..أنجعصت تانى فى مقعدى..أخرست السى دى..وقدت السياره بشكل آلى
..وفجاءه جائتنى فكره غريبه جدا
..دى يمكن تانى أو تالت مره أخد الطريق ده..لو كنت دقيقتين تلاته مبكرا ربما كنت أنا المصاب فى هذا الحادث..ولو كنت دقيقتين تلاته متأخرا ربما كانوا الشباب أخدتهم الحميه وحركوا السيده محاولين أخراجها من السياره وتسببوا فى أصابتها بشلل أو شئ آخر
...همممم...سبحان الله



18 comments:

بنت القمر said...

ابو فارس
بخصوص الخميسه المصري
رجاء الاطلاع علي الرابط التالي
***************
http://zolnoonelmasry.blogspot.com/2008/04/blog-post.html
*********************
وبخصوص ابنتك سارة ربنا يديك العمر والصحه وتصرف عليها
:))
خالي مهاجر مقيم بتورنتو وعنده ابنه تستعد لدخول طب الاسنان... متابع لمدونتك جدا ولبقيه المدونات المصريه تقريبا نفس قصه ابنتك ونفس المتاعب
تحياتي

أبوفارس said...

سيدتى بنت القمر..شاكر على اللينك..قرأته قبلا وكان مدخلى فى سؤالى لها..أجابتها كانت معقوله جدا..التراث اليهودى فى مجمله خليط من معتقدات وتراث الشرق اﻷوسط كله..تمثيل طريف سمعته من فتره أنهم يجمعوا تراث من حولهم ويعيدوا صياغته..زى الصايغ اللى يعيد صياغه الدهب المكسور ..أعرف أننا نحاول نفى أى صفه أيجابيه عن اليهود واليهوديه عموما وهو موقف سياسى غير موضوعى..اليهود واليهوديه فى النهايه جزء هام من مجمل تراث الشرق اﻷوسط
...
طب أسنان ياعينى ياولد عمى..أهى
دى اللى مكلفه فعلا..بس شفتى بناتنا رافعين راسنا ف المهجر أزاى بجد وصدق بأفرح أوى أوى لما أسمع عن نجاح بنت من بناتنا..تحياتى سيدتى وصادق مودتى..خالد

boshra mohamed said...

خدتنى المشاهد يادكتور وخصوصا مشهد الحادثة

عايزين كل فترة بوست من النوعية ديه

بنت القمر said...

ابو فارس
*****
اعترف اني قريت قراءة سريعه المرة الاولي ولكن
__________________
لاأظن اﻷغلب أنها سابقه علينا كلنا ودخلت كجزء من ثقافه المنطقه كلها
______________________
افهم من كده لو كنت تقصد انها فرعونيه انهي تنفي كده وبترجعها اثقافه اسبق من الفرعونيه؟؟
طب الله يخليك بس عشان انا دراستي كانت التاريخ واحب اتنور برضه تسألها لو جت التلات الجاي انهي ثقافه تحديدا اللي هما خدوها منهم؟
تقطه تانيه اتفق مع حضرتك ان اليهود احد الثقافت والشعوب اللي سكنت المنطقه لكن مش ككيان واحد وحضارة قائمه بذاتها زي الفراعنه او زي حضارات بين الرافدين لا من حيث الاثر التاريخي ولا القوة
يعني مقدرش اقول ان حارة اليهود او المعبد اليهودي ده دليل علي حضارة يهوديه ممكن تأثر علي ثقافه الاخرين المحيطين!
وده ملوش اي دعوة خاااالص بالموقف السياسي
ولا باحترامي للدين اليهودي زي بقيه الاديان الابراهيميه
وان كنت بحترم فيهم رغبتهم في التسلق علي اي كيان اخر وزي حضرتك ما وصفت اعاده صياغه حضارة خاصه بيهم وده مش معناه انها متأصله ابدا
زي نكته ان العبيد اليهود بنوا الهرم
كون انهم عاوزين يعملو نسيج وهويه خاصه شيئ وانهم يسرقوا ابداع الاخرين شيئ تاني
وارجع اقولك ملوش دعوة بالموقف السياسي من الصهيونيه
معلش انا رغايه لو تستحملني
:))
حكايه بقا الامبرياليه الانجليزيه والامريكيه دي نكته بجد
اما حكايه انها ميريتس
فبرضه الحزب وان كان ليبرالي التوجه وبيؤيد تحقيق سلام مع الفلسطيني فهو برضه ليه موقف صهيوني متزمت من قضيه القدس
طبعا القضيه الفلسطينيه مش هدف البوست خالص لكن افكار اتفتحت في دماغي وانابقرا ما كتبته حضرتك ويمكن تناقشه معاها لما ترجع تاني وبرضه الخميسه خميستنا
وان كانت لا تجدي أي شيئ في ما تمر بيه مصر هذه الايام
يبدو ان عين الحسود أقوي من أي خميسه
:(
اعترف ان اجاباتك معها ذكيه الموقف مش مستحمل اكتر مكن كده لان محدش بيغير قناعات حد وهو واقف يشتري علبه دوا
**************
اهديت خالي لينك مدونتك ومدونه اخري لمصري في كندا
وهو سعيد جدا بها هو في سن حضرتك تقريبا وبنته قد سارة وان كان اسمها باسانت
الجزء الاخير من تدوينتك عن الحادث
سبحان الله
والحمدالله ايضا
ربنا نجاك عشان سارة واخواتها
تحياتي

The Z. said...

صباح الفل،
انا ايضا كان عندي موقف مشابه لما حدث لك مع بنت عمنا الأخت شالومات، من مدة كنت في زيارة إلى روتردام و هناك زرت مطعما تديره سيدة يهودية يمنية و يقدم وجبات عربية...المهم لفت انتباه احد الجالسين جنبي انني طلبت اكلة مغربية فاذا به يتطفل (و هي عادة عربية عبرية اصيلة) و يحاول ان يشرح لي باستفاضة ان هذه الأكلة يهودية بامتياز...لم افلت منه إلا بعد ان حولت الحديث إلى السياسة هناك فقط توقف عن ازعاجي و تحول المسكين إلى الشكوى و الآه من الحرب و سنينها و اسرائيل و من يحكمها، قطع قلبي بشكواه خصوصا انه جريح حرب قديم في الجولان، و الذي حز في قلبه كما قال انه وقع جريحا بيد المغاربة ، هناك فقط كدت انفجر ضحكا لولا انني استعذت بالله و كتمت ضحكتي و خفت ان اقول ان نائب قائد الكتيبة اياها كان عمي! صدف غريبة و الله!!!!
الله يوفق سارة في دراستها و تكون المرة القادمة احسن من ثمانين بالمائة ان شاء الله.

تحياتي لك و لكل العائلة
زكرياء

أبوفارس said...

بنت القمر ياعزيزتى
..أنت فعلا رغايه بس رغى محبب ويفتح أبواب عديده للنقاش..دى تحيه سريعه ولى عوده ﻷنى نازل الشغل دلوقت
.................
زيكو يابطل
.عمك هو أحد أبطال كتيبه الحرس الملكى العظيمه التى أوقفت اﻷسرائيلين فى قريه سعسع على مشارف دمشق...؟؟؟!!!؟؟؟والنبى سايق عليك النبى ياشيخ لو لسه عايش بوس أيده وقول دى من مصرى عاشق لك ولرجالك اﻷبطال..هذه الكتيبه ياشباب أنقذت دمشق ف معركه من أشرس معارك حرب ٧٣ عندما أوقفوا لواء الجولانى وماأدراك مالواء الجولانى..فى معركه بالسلاح اﻷبيض..الجنود المغاربه من الريافه أو بربر المغرب -صحح لى معلوماتى يازكرياء- وقفوا كما اﻷسود بالسيوف أى والله بالسيوف أمام الجنود اﻷسرائيلين...لازلت أذكر صوره لهم وهم يتسلموا أنواط الشجاعه من حافظ اﻷسد..رجال ولا كل الرجال...تحياتى يابطل وصادق مودتى..خالد

ابو احمد said...

حبيبى الجميل ابو فارس
انت مش هتبطل غير لما نايله تعكشك
اكيد البنت كانت حلوه مش عاوز تعجز والا على رأى طارق انت بتسجل ريكورد سلم لى على ساره وقلها برافو على
ال80%
وبرافةعلي دبيسك
تحياتى ياجميل

أبوفارس said...

سيدتى بنت القمر..
أنا فهمت وممكن أكون غلطان أنها تقصد الخميسه تسبق الثقافتان اليهوديه واﻷسلاميه..أنها فرعونيه ١٠٠% وبلا جدال كدا دخلنا فى تخمينات وترجيحات قد تصح أو لا..وبصراحه ماتفرقش معايا شخصيا ﻷنى وبصراحه منفوخ من حكايه الفراعنه عملوا ماأعرفش أيه قبل العالم كله ..وأحفادهم اللى هو أحنا مش عارفين نأكل نفسنا عيش حاف..!! أنجاز اليهود اﻷساسى أنهم لموا شظايا وأجزاء مختلفه من ثقافات الشرق اﻷوسط وصبوها فى شكل متناسق لحد كبير نطلق عليه الديانه اليهوديه..ودى تأثيرها مستمر حتى يومنا هذا..التوحيد من مصر ف اﻷغلب اﻷعم..سفر التكوين وقصه الخلق تم ضمها للتوراه بعد اﻷسر البابلى وبها أثر واضح من ثقافه الرافدين ملحمه جلجامش وقصه الطوفان ..فكره المعركه اﻷخيره بين الخير والشر (ارمجاندون) أول من قال بها هو زرادشت ووجدت طريقها لليهوديه المتأخره ممثله فى مخطوطات البحر الميت..القيامه والحساب هى جزء أساسى من ديانات الخصب التى كانت منتشره فى سوريا..وهكذا..من كل فيلم أغنيه..وأصبحت تلك السبيكه الثقافيه جزء أساسى من المسيحيه ووجدت طريقها للأسلام أيضا سواء فى المقدس نفسه أو ما يسمى باﻷسرائيليات..وهى تشكل اﻷساس للحضاره الغربيه السائده اﻷن وحتى أشعار آخر..حين تزيحها حضاره الشرق اﻷقصى بمركبها الثقافى المختلف..وهذا أنجاز كبير..يضاهى متون اﻷهرام وملاحم الرافدين.. معلهش مافهمتش أيه النكته لما يهوديه يساريه تقول أن اﻷمبرياليه اﻷنجليزيه أولا ثم اﻷمريكيه حاليا هم السبب ف صراع الشرق اﻷوسط..وأنهم يستعملوا اليهود ضد العرب..أنا شخصيا شايف أن ده موقف متقدم ومحترم يمكن البناء عليه وأفضل بكتيييير من مقوله الرب أعطانا تلك اﻷرض..ﻷن دى مالهاش رد منطقى..أقوله أيه الرب ضحك عليكوا وباع لكم أرض بايعها لمستأجرين غيركوا..!!والا أقوله الرب بتاعى أنا أجدع م الرب بتاعكم وهو اللى أدانى اﻷرض دى..!!بصى ياسيدتى أنا أعتقد أن المشروع الصهيونى فشل..وأن مايمد فى عمره البترول والمصالح المركبه المرتبطه به وأنظمتنا التى تستعمله لكبت أى محاوله حقيقيه للخروج من حاله التخلف الفاضحه التى نعيش فيها بدعوى لاصوت يعلو فوق صوت المعركه..الحل أيه!!؟؟ عمليه تسويه تاريخيه حقيقيه يقدم فيها الجميع تنازلات حقيقيه أهمها القبول باﻵخر..أو البديل دم وخراب وأحتمال محرقه نوويه...أنا لاأدخل نقاشات للأستعراض ولا ﻷفحام أو أخراس من أتناقش معه..ولاأحب الفوز ف مناقشات بالقاضيه ولالمس اﻷكتاف..أنا أدخل أى نقاش ﻷتعلم وﻷبحث عن نقاط أتفاق..أو على اﻷقل لخلخله أيمان مطلق أرى أنه خاطئ وأترك الطرف اﻵخر يعيد التفكير فى مسلماته...حاشوفها تانى أو ﻷ ماأعرفش ومش مهم أنا زاد فهمى ﻷشياء من خلال النقاش السريع ده الذى لم يتجاوز الدقائق...تحياتى وصادق مودتى...خالد

أبوفارس said...

أبو أحمد ياصديق العمر..أهو الأر والنق بتاعكوا ده هو اللى حاينشف المواضيع..أيوه ياسيدى ست حلوه..تنفع تكون تركيه أو أيرانيه أو لبنانيه جميله...وبعدين أستنى هنا..أتجروء على التشكيك فى منطلقاتى الوطنيه ودفاعى المستميت عن قضيه العروبه المركزيه ومنافحتى عن شعبنا العربى البطل فى اﻷرض المحتله ويحك يافتى..والله بعقد الهاء ﻷزعل منك..مساء العندليب المتمكن من شدو ألحانه...تحياتى وصادق مودتى..خالد

على باب الله said...

أتفق مع بحب السيما .. أسمتمعت بالمشاهد جداً

و فعلاً سبحان الله .. أنت كنت الرجل المناسب في الوقت المناسب

---

أبوفارس said...

أصدقائى
باحب السما
وعلى باب الله
..أشكركم على المرور الكريم والتعليق..
***********
ولكن هناك نقطه عدت ع الكل فى مشهد الحادث وهى سرعه وصول المطافى واﻷسعاف والشرطه...الحكايه كلها كانت دقائق فعلا بين أتصال البعض بنمرة الطوارئ وهى بالمناسبه -ولكنى لم أستطع كتابتها صح بالعربى-وبين وصولهم لمكان الحادث وجديتهم الشديده وكفائتهم العاليه...طبعا من تحصيل الحاصل القول لوحصلت مثل تلك الحادثه على الطريق الزراعى المنظر كان حايكون أزاى...؟؟ وهو ماجعلنى أطلب من الجميع اﻷنتظار..لو الحكايه دى ف مصر كنت أتكلت ع الله وحطيت السائقه فى سيارتى وحاولت الوصول بها ﻷقرب مستشفى وهى وحظها بقى..
تحياتى أصدقائى وخالص مودتى..خالد

Anonymous said...

ربنا يحفظك لابنتك - ويحفظها ليك

حسيت بحميمية جميلة- او يمكن تمنى الاشياء يدفعنا لتخيلها


تحياتي

أبوفارس said...

سيدى أنونمس
..فعلا علاقتى بأولادى بعد سن معينه هى علاقه صداقه...أشد وأشجط وأعمل أب لغايه سن ١٥-١٦ بعد كده أصحاب..هكذا ربانى أبى رحمه الله..وأصحاب يعنى أصحاب..يعنى ممكن جدا الكلام ف أدق الخصوصيات..أو الخروج سوا كأننا أصدقاء مراهقين..بعد السن ده لاأتدخل بدون داعى..أسمع وأدى نصيحه لو مطلوبه وفقط..وأترك لهم كامل الحريه للتجربه والخطاء وهم يعلموا أنى موجود للدعم والنصيحه...سواء مع أبنتى الكبرى وهى فى مصر حاليا أو ساره..لسه فارس ١١ سنه ماوصلناش المرحله دى...ناس كتير بتخاف م المجتمع الكندى أنا شخصيا شايف غير كده بالعكس..المجتمعات المفتوحه تتيح لك رؤيه أفضل وتعرف ماذا تتوقع وماذا تتجنب..عكس مجتمعات الواحد مابقاش شايف فيها موضع قدمه من الكذب والدجل والتدليس على كافه المستويات..شرفتنى وكنت أتمنى التعارف ولو بأسم النت..تحياتى..خالد

واحد مصرى said...

الله يا ابو فارس..ايه الحلاوة دي....يوميات جميلة...سبحان الله انتا ازاي بتخليني كل م اقرأ لك احس ان انا شايفك ..أو ساكن بجوارك ..أو واقف جنبك في اشارة مرور طويلة و فاتحين شبابيك العربيات و نازلي كلام و نقاش ممتع غير قابل للانتهاء

برافو على سارة عرفت تضحك عليك يا دكتور مجدي بمزاجك و كامل ارادتك...ربنا يبارك لك فيها هي و اختها و الاستاذ فارس

تحياتي و خالص مودتي

و تحياتي للاخ زكريا و عمه البطل

أبوفارس said...

الله يخليك ياصديقى العزيز..كلماتك أسعدتنى..وأنا منتظر فعلا رد من زكرياء حول عمه البطل والكتيبه المغربيه ﻷنى عاشق للحكاوى الشخصيه التى تنير أحداث التاريخ..فلو زيكو بيقرا الكلام ده ياريت يجد الوقت لقس ماسمعه من عمه...تحياتى وصادق مودتى..خالد

The Z. said...

مساء الفل ،
اشكرك على الإطراء و لو اني لا ناقة لي و لا جمل للأسف في تلك الأحداث العظيمة التي تمثل فعلا مفخرة لكل عربي كافح في سبيل كل هذا الوطن المظلوم...الحكاية و ما فيها يا سيدي إن عمي الشاب آنذاك كان جاي طازج من بعثة دراسية من فرنسا و بعدها امريكا، يعني الولد معلق نقيب جديد و فرحان بنفسه، لكن المسكين بمجرد ما التحق بوحدته، و كانت وحدة مظليين كما اعتقد، حتى جاء امر بتشكيل القواة التي ستشارك في الحرب. فتم اختياره ليكون في كتيبة تتجه إلى سوريا. اتجهت الكتيبة إلى سوريا و من ثم اتخذت مواقعها ثم بدأت الحرب...المعركة الأولى التي شاركوا فيها كانت صد اول هجوم معاكس للاسرائيليين في جبل الشيخ، يحكي لي عمي انه و برغم كل ماسيشاهده بعد ذلك في حرب الصحراء، لم يرى معركة بهذه الدموية و هذه السرعة، ربع ساعة تكفلت بان يموت اكثر من ثلاثين اسرائيليا و يجرح اكثر من ضعفهم و يأسر عدد آخر تم تسليمه إلى السوريين...قال لي ان عددا من جنوده اصابتهم الهستيريا عندما بدأ الهتاف و التكبير أثناء المعركة فخرجوا من حفرهم و التحموا بالسلاح الأبيض مع الإسرائيليين و ان عددا من الضباط الصغار كذلك انطلقوا كما المجانين و بعضهم اصيب و لم يحس إلى ان انتهت المعركة، و لا زال يتذكر كيف ان الطائرات الإسرائيلية حاولت ان تضرب مواقعهم لتحمي المهاجمين لكن الدفاعات الجوية السورية كانت تسقطها كما حبات الزيتون من الشجرة، لا زال إلى الآن يثني عليهم و على حرفيتهم...كما لا زال يتذكر قائد احدى المجموعات الذي استمر في القتال وحده و رفض ان ينسحب حتى يغطي انسحاب مجموعته فلما عادوا ليجبروه على الإنسحاب معهم لم يجدو غير قدمه و باقي جسده قد تمزق كليا ... اما عن سعسع فيقول انها كانت حمام دم، و عندما يقولها واحد طوله تقريبا متران معه كتيبة من جنود اشبه بالوحوش، فأكيد انها كانت بشعة، استعملت فيها كل الأسلحة الممكنة من السكاكين و السيوف إلى اللكمات...لكنه كان دائما يحكي بنوع من الأسف عن التنسيق السيء بين بعض القوات الشيء الذي ضيع عددا من الفرص لتحرير مساحات اوسع على الأرض...لكن في المرة القادمة عندما ازوره سأسأله اكثر ، هذا وعد مني..

تحياتي

أبوفارس said...

تحياتى يازكرياء..وشاكر على هذه الكلمات القليله عن معركه فعلا كانت حاسمه فى وقف تقدم القوات اﻷسرائيليه بأتجاه دمشق..وكما قلت لك قبلا حين تقابله سلام حار منا جميعا...مساءك ورد وياسمين..خالد

بنت القمر said...

صباح الخير أو مساء النور
:)
ابوفارس العزيز
بعمل استطلاع رأي في المدونه عندي بمناسبه 60 سنه نكبه
قاربت علي رصد النتائج اتشرف لو رغبت انك تشاركني وتجاوب برأيك علي الاستطلاع وأكون شاكرة
تحياتي