Sunday, March 11, 2007

لماذا كوبا اﻷن...؟؟

ذهبت لكوبا أو باﻷدق لهافانا..كسياحه طبعا وهربا من برد كندا اللاأنسانى..
ذهبت أنا ونائله -حرمنا المصون- وحدنا وﻷول مره من سنين طويله بدون ساره وفارس..تركناهم فى رعايه خالهم وعائلته وعائله أصدقاء لبنانيين مقربين..
طبعا من ضمن أهداف أن نسافر وحدنا هو تجديد العلاقه الزوجيه..وأعاده أحياء صداقه حقيقيه تربطنى بزوجتى..بعيد عن الواد عامل أيه ف المدرسه والبت عاوزه تخرج مع أصحابها الويك أند ده رايك أيه..؟؟!!؟؟
أنا ونائله أصدقاء..بمعنى أننا نتكلم ونتحاور ..نختلف ونتفق..على خلفيه من حب طبعا..نائله أنسانه مثقفه وحساسه..وياأخى عندها رأى ف كل حاجه..وعمرها ماقالت لى "اللى تشوفه ياسى السيد..!!"ولذلك لم أجد أفضل منها كرفيق لزياره هافانا..
طب ليه دلوقـت..ﻷن كاسترو حايموت..وبالتجربه التاريخيه..الدنيا حاتتغير هناك..قلنا نلحق نشوفها قبل ماتتغير
وخاصه أن كل التقارير الدوليه تثنى على التجربه الكوبيه..مثلا..
كوبا قضت على اﻷميه..
التعليم فى كوبا أجبارى ومجانى -مجانى بجد-حتى نهايه الثانوى..
الخدمات الصحيه فى كوبا هى اﻷفضل على اﻷطلاق فى دول العالم الثالث..
معدلات وفيات اﻷطفال فى كوبا هى اﻷقل فى أمريكا اللاتينيه وذلك من عام1977
صدق أو لاتصدق معدلات وفيات اﻷطفال السنه اﻷولى من أعمارهم فى هافانا العاصمه أقل منها -تقول فين- فى واشنطن دى سى العاصمه اﻷمريكيه وماحولها..ودى سمعتها من طبيب أطفال أمريكى كان ينتقد نظام التأمين الصحى اﻷمريكى فى السى أن أن..!!!
ولكن هناك تمن مدفوع لاشك..منظمه العفو الدوليه بتقول هناك معتقلين سياسين فى كوبا..أكيد فيه..بس الرقم اللى أعرفه ولو حد عنده معلومات أخرى يصحح لى معلوماتى..الرقم هو ٣٠٠ معتقل سياسى..أيوه ثلاثمائه فقط لاغير..مانسيتش صفر والا أتنين..
هناك دائما كوبيين يحاولون الهرب من كوبا ﻷمريكا ولو ماسك فى بلاص جناوى يعدى به ال١٥٠-١٦٠ ميل الفاصله بين
طرف كوبا الغربى وفلوريدا
يبقى فيه حاجه غلط ماهو ماحدش يهرب م الجنه معلق فى بطيخه أو فرده كاوتش....
ولذلك أهتممت بأن أرى مثلا مؤسسات علاجيه..
دخلت مستشفى للنساء والولاده فى هافانا القديمه..منطقه كده زى الحسين..حد دخل مستشفى الحسين الجامعى..!!بلاش أحسن..المستشفى فى منتهى النظافه..النظام هائل..عدد الممرضات واﻷطباء مناسب جدا..لم أر زحام بالمره..ولمده ساعه تسكعت فى أنحاء المستشفى لم أحس بتزاحم أو أحس أن النساء الحوامل زهقانين ﻷنهم قاعدين ٣-٤ ساعات مستنين..تانى تلك أنطباعات أنا لاأتحدث اﻷسبانيه ومعملتش فيها مفيد فوزى ماسك مكرفون واغلس على خلق ربنا..
ودخلت عياده مجمعه فى هافانا سنتر منطقه كده وكأنها العتبه فى القاهره أو المنشيه فى اﻷسكندريه..
نفس الملاحظات الهدوء النظام النظافه..عدد العاملين مناسب وتخيل بيشتغلوا..صحيح ليست كمستشفيات كندا مثلا ولكنها وبالتأكيد أفضل من كافه مستشفيات مصر العامه والتأمين الصحى..سيبك من مراكز العلاج الخاصه الفايف ستارز ده موضوع تانى
دخلت صيدليه بالقرب من العياده المجمعه الرفوف فعلا فاضيه ولكن بها اﻷساسى..مضادات حيويه..كبسولات وأشربه..أدويه كحه..وأسهال..أنواع قليله ولكنها اﻷساسيه..وكلها تصنيع محلى..سألت عن اﻷسعار للكوبيين..لقيتها رخيصه جدا حتى بالبيزوس المحلى..
بس ماشفتش فياجرا..ولا بروزاك ولا أدويه تساقط الشعر..أدويه الضغط قديمه ولايوجد أدويه للكلسترول مثلا..وعلى فكره أنا شخصيا مش مقتنع خالص بأدويه الكلسترول وﻷسباب علميه..
تسكعت داخل صيدليه علاج باﻷعشاب..ورغم أنى نسيت كورسات البوتانى واﻷقربازين..ألا أن الصيدليه نضيفه جدا..وزحمه والعاملين واضح أنهم بيفهموا فيها..سألت باﻷشاره والفرنساوى واﻷنجليزى..عن حاجه لألام الركبه اللى عندى..فأدانى الصيدلى دهان يشبه تقريبا
Taiger Palm
الشرقى ولكن رائحته قويه ولم أستعمله وكان تمنه ٥ بيزوس قابله للتحويل..
شاهدت المبنى اللى عالج فيه اﻷطباء الكوبيون أطفال شيرنوبل من التسمم اﻷشعاعى..المبنى مغلق حاليا طبعا..ولكنى ومنذ سنوات شاهدت فى "التى فى سنك "الفرنسيه تقرير جميل جدا عن مش بس النجاحات الطبيه فى العلاج واﻷساليب الجديده اللى أبتكرها اﻷطباء الكوريين ولكن اﻷهتمام السيكولوجى باﻷطفال وأعاده تأهيلهم نفسيا..
معهد طب المناطق الحاره فى كوبا هو اﻷفضل فى العالم..يأتى للدراسه فيه أطباء خريجى أوربا وكندا وحتى أمريكا..للأسف لم أجد الوقت للذهاب هناك رغم أهتمامى بذلك عشان خاطر ساره بنتى عاوزه تدرس طب وطالع فى دماغها تخصص مناطق حاره ..
على فكره ساره أتقبلت فعلا فى جامعه أوتاوا لدراسه علوم صحه -بيولوجى وخلافه تمهيدا للألتحاق بكليه الطب أو اﻷسنان أو الصيدله
النظام الصحى هناك مجانى..يبدء بطبيب العائله أو الممارس العام ثم يمكن التحويل ﻷخصائى لو أستدعى اﻷمر..فتره اﻷنتظار لاتزيد عن أسبوع حتى ترى اﻷخصائى..
كاد الرجل الكوبى اللى كنت بأرغى معاه يغمى عليه لما قلت له أن فتره اﻷنتظار للتحويل ﻷخصائى فى كندا مابين السته أشهر وفى بعض التخصصات سنه..
وقال كده العيان ممكن يموت..
قلت بتحصل والله ياحاج خوزيه..
يعنى النظام عندنا هنا ف كوبا أجدع من عندكم ف كندا..؟؟
تصدق بالله..يظهر كده برضك
ضرب كف على كف..وأكيد بيحكى الكلام ده ﻷصحابه الليله دى على قهوه موراليس اللى على قمه شارع الثوره المتفرع من طريق راؤول سالم ...
فى الطائره عائدا من كوبا جاءت جلستى بجوار راجل كندى محترم موظف جكومه متقاعد يذهب لكوبا كل عام السنوات اﻷربع السابقه ..ويادوبك زار هافانا نص يوم ككل الكنديين..
أبتسم وأنا أحكى له عن النظام الصحى الكوبى بحماس..وقال لى أنه منذ سنتان أحتاجت زوجته لرؤيه طبيب وهى فى المنتجع وبعد ترد جائها طبيب أرياف من المدينه الصغيره المجاوره مش حتى م العاصمه..وكان تشخيصه وعلاجه أفضل بكثير مما توقعوا..زارها عده مرات والموضوع كل كلفهم ٧٥ دولار.
راتب الطبيب الكوبى لايزيد عن العشرون دولار شهريا
ولازال للحديث بقيه بمشيئه الله...تحياتى...خالد

10 comments:

أبوفارس said...

فى الأسابيع السابقه للسفر بصيت على السيت بتاع وزاره الصحه الكنديه..فوجدت تحذير شديد من الملاريا فى الدومينيكان..أحدى جهات السفر اﻷخرى للكنديين..وضروره أخذ أدويه مضاده للملاريا قيل السفر هناك..تحذير من ألتهاب الكبد الوبائى وضروره التطعيم ضده قيل السفر لكل من جامايكا ترينداد المكسيك..ومافيش داعى تهوب نواحى هايتى خالص..عندهم أمراض مش عارفين هى أيه..!!!
يعنى مش حاتخسر قوى لوأخدت تطعيم ضد الكبد الوبائى وأنت رايح كوبا..
البلد نضيفه..لانايله ولاأنا جالنا أسهال أو أى أعراض معويه نتيجه تلوث طعام..حاجه للأسف تحصل كل مانزور القاهره..وأحيانا حتى فى أوربا بشكل أخف..!!
عملت تجربه أنتحاريه..اليوم اﻷخير وقفت فى حى فقير من أحياء هافانا أشرب عصير قصب مثلج وزى السكر من محل عادى جدا..وسط عمال أحدى الورش القريبه..وقلت أهو لوحصل حاجه حاألحق نفسى فى أوتاوا..ولم يحدث شئ ..ونفسى فى سطل كمان...!!!

أبوفارس said...

دكتورنا الكاتب من أطلنطا..ياعم أنت تؤمر..نسافر تانى..
أما عن الفياجرا الحقيقى فدى عندما ترقص الكوبيات..عينك ماتشوف الا النور ياعزيزى..
والبنات يامحمد ياخويا والله بيرقصوا على روحهم..الموسيقى الراقصه من سلسا لريجى تزعق فى كل مطعم وبار..
تصدق كنا قاعدين نتغدى ..وترابيزه أمامنا عليها عيلتين تلاته سوا..الموسيقى شغاله غيروا اﻷغنيه وقفت بنت سماره زى القمر زاحت الكرسى شويه كده شدت الفستان الكروشيه اﻷحمر المحزق لتحت ومتع عينيك يامواطن .. هات ياهز..ع الواقف كده..وبتمكن..مستغله كل "أمكانياتها"
باقى اللى ع الترابيزه كملوا أكل وكلام ولا على بالهم..أخوك بس هو اللى ضغطه طلع حبتين..
منورنى حقيقى..تحياتى..خالد
مش باأقولك يادكتور أسامه ماأكتبه يندرج تحت بند "قله" أدب الرحلات...مياميسا

u3m said...
This comment has been removed by the author.
u3m said...

بعد قراءتى لما كتبته يا دكتور عن الوضع الصحى والعلاجى فى كوبا تذكرت حال مستشفياتنا الاميرية واللى بيحصل فيها وتذكرت التأمين الصحى اللى بيتصرفله ادوية منزوع منها المادة الفعالة او محطوطة بكمية قليلة جدا بشكل يخالف كافة دساتير الادوية المتعارف عليها علشان ايه .. علشان المادة الفعالة هى اغلى مكون فى الدواء والتأمين الصحى مديون بالملايين لشركات الادوية فبقت الشركات تعمل ادوية بلاسيبو .. العيان ياخد منها مهما ياخد ولا يخفش ابدا !!

الا صحيح يا دكتور خالد هى الهجرة صعبة الى كوبا ولا لازم اكون كولونيل سابق فى الجيش الاحمر ؟
وموضوع الجنسية الكوبية ده صعب برضه ولا هى جوازية ويخلص الموضوع ؟

لو الموضوع سهل بافكر اسافر امريكا و منها اهرب على كوبا عن طريق الكوبرى ابوعين واحدة اللى جنب محطة فلوريدا علطول

علاء السادس عشر said...

عزيزى خالد
عارف أنى غلس بس مجرد مأسمع سيرة كوبا أفكر فى كاسترو ولما أفكر فى كاسترو أفكر فى أخيه راوول اللى حيورث الحكم منه وبعد ماأفكر فيهم أفكر فى أمريكا اللى بهدلت الشعب الكوبى الغلبان يعنى بأنسى الأيجابيات وأمسك فى السلبيات والعادى أنى مش كده.والتدوينة أديتنى صورة أيجابية جميلة عن هذه البلد عوضت الصورة السلبية اللى محفورة عندى.
النقطة الوحيدة اللى أزعجتنى فى التدوينة رغم جمال وصفك أنك جبت سيرة مفيد فوزى .
تحياتى أيها الجميل وكل أجازة وأنت بخير وسعادة
تحياتى

mohamed elbanna said...

دكتور خالد
تدوينه جامده يا دكتور انا شخصيا لم اكن أعرف اى شئ عن كوبا سوى السيجار وكاسترو لكن كلامك بيخلينى افكر اهاجر لكوبا
ومبروك لسارة وبالتوفيق ان شاء الله
واستوقفنى موضوع الكوليسترول لنى بتعالج منه وعلاجه كمان مكلف جدا ليه بقى حضرتك مش مقتنع بالموضوع ده

Ossama said...

الله ينور يا عم خالد حاجة جميلة جدا
تعالى نتكلم شوية على حاجة تانية خالص عن كوبا الرياضة
كوبا بطلة الاولمبياد والعالم في البيزبول
ايوه البيزبول لعبة امريكا
و ثانية دورة الالعاب الامريكية دائما بعد الولايات لمتحدة
وافضل ملاكمين في العالم ومن افضل عشر دول رياضية في العالم
و هي المنافس الوحيد لامريكا على فكرة في دورة البان امريكان
بس حضرتك عارف ليه؟؟؟
لان كوبا ناس جد
يعني اللي بيلعب رياضة بيلعب عشان بجد مش عشان جوز خالته الكابتن حوكشة
و عشان كده في المنتخب
وطبعا ده ينطبق على اي حاجة
لان الحصار الاقتصادي المفروض على كوبا
و كذلك انتهاء المساعدات
واستمرار النظام دليل قاطع على ان التغيير مش بالبساطة اللي الناس فاكراها او متصوراها
و الجد يا دكتور لابد انه يؤدي لجد
مش تهريج و لا مؤاخذة حاجات تانية
مع اعتذاري للمواكع السكافية الكبرى اللي انطردنا منها انا ومحمد مسعد
تحياتي يا خالد يا جميل

أبوفارس said...

عزيزى ايماتيور..
شاكر على المتابعه والتعليق..
أصابنى الفزع حينما أكد لى أحد أصدقائى الصيادله فى مصر وذو علاقه ما بصناعه الدواء أن بعض اﻷدويه المصريه فعلا منزوعه الدسم..ولاتنطبق عليها المواصفات..وتفسيره "ماأنت حاترش حاترش فى الرقابه الدوائيه يبقى نوفر فى تكاليف الدواء..!!"
رغم والله أن صناعه الدواء فى مصر كان ممكن تبقى حاجه كبيره..
فى منتصف التمانينات شركه أردنيه أكتسحت الخليج وفازت بمعظم مناقصات وزارات الصحه وطردت الأدويه المصريه ولم يهتم أحد..!!
..........
د.مسعد..
كلامك صح..أحد الشباب العاملين فى الفندق أخبﻻنى أن راتبه فى الشهر أقل من عشرين دولار وسألنى أن كان هذا ماأقبضه أنا فى الساعه..؟؟طبعا ماجاوبتش هو أنا ناقص نأ..!!
أمريكا أكبر مصنع للأمل الزائف واﻷوهام..وأنا أنور مناقشه تلك النقطه وأذا كانت الحياه فى كوبا لونها بمبى بس صبرك عليا..

أبا الحاج البنا حمدالله بالسلامه..
أصبر ماتقدمش على هجره لكوبا لغايه ماأخلص البقين اللى فاضلين وبعدها نتفاهم..بالنسبه لعلاج الكوليسترول..يعتمد على ايه المشكله بالضبط زياده الترايجليسريد والا الخلل فى النسبه بين الكوليسترول الخفيف الكثافه والثقيل..عموما وبسرعه..جرب زيت بذره الكتان Flex seed oil
و
Omega 3

الموجود فى السمك وزود التوم ف اﻷكل والسلطه الخضرا وزيت الزيتون بشكل مستمر لسته أشهر وقل لى..

ياعم علاء لاغلس ولا حاجه..
فعلا آل كاسترو كابسين على نفس كوبا ..
بس الناس بتهرج عليهم علنى هناك وبالذات خطابات فيديل الماراثونيه..والحمدلله كان عيان ماخطبش فى ٨ مارس يوم المرأه العالمى..
مراتى جت لها باقه ورد من الولاد اللى
ف الفندق بالمناسبه وأنا أخدت بمبه
......
أبا يحيى ياموسوعى...
والله كنت بأجهز بوست ألمس فيه موضوع الرياضه ده وحاطه
draft
أنما أنت قلت اللى فيه الفايده..وحارجع تانى لكلامك.. ﻷنك
على نفس الموجه معايا
..
تحياتى للجميع وحقيقى ياجماعه سعيد جدا بالتواصل والصداقه الجميله المحترمه التى تنمو بيننا على بعد المسافات وسمعونا أجدع مياميسا...خالد

mohamed elbanna said...

دكتور خالد
لك عزيزى كل الشكر على اهتمامك بى
ولك كل الشكر على مداخلاتك الرائعة على مدونتى وبعدين احذف ايه يا دكتور ده كلام فى المليان وانا بتعلم منه ربنا يكرمك
ومستنى الجزء التانى من كوبا
وصباح الفل

Solo quiero caminar said...

I really thank you for these posts sir, I am planning a trip to latin America and really confused on which country sould I be visiting, Argentina was the first choice and Brasil came second now you added to my confusion with these posts about Cuba.