Tuesday, December 09, 2008

العرض مستمر..يحدث فى كندا اﻷن

أصبح الموضوع رسمى..أعلن البنك المركزى فى كندا اليوم عن توقعه ﻷن تكون اﻷزمه اﻷقتصاديه العالميه الحاليه أعمق وأخطر مما بدا من شهور قليله..وأن العالم كله يتجه إلى كساد شامل..وأن كندا بالفعل دخلت مرحلة "الكساد اﻷقتصادى

وأتبع ذلك بتخفيض آخر لسعر الفائده لتصل الى أدنى معدل لها من أيام الدولار الجبس..أقصد من الخمسينيات..وذلك فى محاوله لدفع حركه اﻷئتمان سواء على مستوى الشركات أو مستوى اﻷفراد وتشجيع اﻷستثمار والتوسع فى النشاط اﻷنتاجى من ناحيه وتشجيع اﻷفراد على اﻷستهلاك....يعنى الهروب للأمام
تانى
على الصعيد السياسى..اﻷحداث تتلاحق بسرعه خاطفه لاتتيح لواحد زى حالاتى حتى القدره على المتابعه
.قبل أن تستطيع المعارضه أسقاط الحكومه فى تصويت على الثقه اﻷتنين الماضى طلب رئيس الوزراء -زعيم حزب المحافظين اليمينى- من الحاكم العام لكندا السيده "ميشيل جان" تعليق البرلمان وأتاحه الفرصه للحكومه للتقدم بمشروع ميزانيه مفصله
..شويه توضيح
كندا لاتزال دستوريا تابعه للأمبراطوريه البريطانيه..ورأس الدوله هى الملكه إليزابيث التانيه..ينوب عنها حاكم عام..يتم أختياره من قبل رئيس الوزراء الكندى المنتخب من الشعب الكندى بالتصويت المباشر
..شفت اللفه.
.الكنديين ينتخبوا رئيس وزرائهم..وهو يقوم بأختيار الحاكم العام -وهو منصب شرفى سلطاته محدوده جدا- وهذا اﻷختيار توافق عليه ملكه أنجلترا ولاتستطيع اﻷعتراض عليه..حاجه كلها مراسيم وتقاليد وأحتفالات وملخبطه بس شكلها حلو وشيك..الحاكم العام تلك اﻷيام واحده ست وكمان سودا..قبل الدوشه بتاعة أوباما بكذا سنه..وكمان مهاجره -جاءت من هايتى- مش من مواليد كندا..وكان أختيارها مثار قبول وموافقه
الكنديين عموما..!!!! عشان كده باحب البلد دى وناسها فعلا
المهم
.تم تعليق جلسات البرلمان حتى نهايه يناير..وبشروط تم فرضها على رئيس الوزراء..أهمها عدم أتخاذ قرارات هامه وأساسيه مثل أعلان الحرب(!) أو تعينات هامه بالذات فى المحكمه الدستوريه أو أتخاذ قرارات أقتصاديه لايمكن تمريرها بدون موافقه البرلمان..ألخ ألخ يعنى تعليق جلسات البرلمان لاتعنى أطلاق يد رئيس الوزراء -المنتخب ديموقراطيا- فى حكم البلاد والعباد
دستوريا الكلام ده سليم ولم يتم خرق القانون على اﻷطلاق.
.دستوريا الحاكم العام لايستطيع رفض مثل هذا الطلب من رئيس الوزراء.
.العرف الدستورى العام يضع شروط تكبل يد رئيس الوزراء وتحد من سلطاته التنفيذيه فى فترة غياب السلطه التشريعيه
طب ليه الفيلم ده كله..؟؟ رئيس الوزراء "ستيفن هاربر" أنسان حاد الذكاء ومناور ممتاز..أدرك أنه يحتاج وقت للألتفاف حول فكرة حكومه أئتلافيه بين اليسار والوسط بتأيد من الكتله اﻷنفصاليه فى البرلمان
وبالفعل بدء حملة علاقات عامه منظمه ضد المعارضه.
.التيمه اﻷساسيه فيها.
.أن الوصول للسلطه وتشكيل حكومه يكون عبر اﻷنتخابات المياشره وليس من خلال أتفاق غرف خلفيه ومناورات سياسيه.
.ده من ناحيه.
.ومن ناحيه تانيه أنه لايمكن الوثوق فى حكومه أئتلافيه تستند على تأييد اﻷنفصاليين الساعين إلى تفكيك كندا..وأن مثل تلك الحكومه ستكون رهينه لهؤلاء اﻷنفصاليين.
.وتمت إداره الحمله بشكل ذكى جدا واضح وسهل..ولذلك خرجت أستطلاعات الرأى فى مجملها تصب فى صالح الوغد الجميل رئيس وزراء كندا اليمينى.
.وأحتاست المعارضه..وبدأت تتحرك بشكل متخبط..وتم تغيير زعيم المعارضه والمفروض أن يصبح رئيس الوزراء لو تم أسقاط الحكومه الحاليه..بأخر أكثر شعبيه..وبسرعه شديده وبشكل منضبط.
ولازال العبد لله يراقب ويلاحظ ويتابع ويشارك بشكل محدود وعلى القد كده..ولازال العبد لله معجب ومبسوط ومندهش من سرعه الحراك السياسى وتحضره وتمسك الكنديين بالعمليه الديموقراطيه وميكانيزمات الصراع السياسى فى ديموقراطيه برلمانيه بشكل سلمى.
.ومنشكح جدا من اﻷداره الذكيه لمجمل اﻷزمه رغم أختلافى اﻷيديولوجى مع توجهات رئيس الوزراء الحالى
..من ناحيه تانيه أوتاوا تحت عاصفه تلجيه مروعه أستمرت أكتر من ٢٤ ساعه وقيادة سيارتى الهوندا السيفيك الصغيره فى شوارع المدينه كانت أشبه بعمليه أنتحاريه.
..It looks something like that........
وأمس فى منتصف الليل أضرب سائقى الحافلات العامه والميكانكيين عن العمل وشلت حركه النقل العام فى المدينه حتى
أجل غير مسمى.
..ممارسيين أيضا حقهم الديموقراطى فى اﻷضراب عن العمل.

9 comments:

Anonymous said...

جايز يكون الكلام اللي بتقوله عن الحملة الدعائية اللي قادها هاربر سليم في كندا الأنجلوفونية... بس هنا في كيبيك الحملة متشافة على إنها فاشلة آخر حاجة خاصة مع حكاية لعبه بالكلام ووصفه للكيبيكيين على إنهم سياديين في الخطاب اللي قاله بالفرنساوي وعلى إنهم انفصاليين في خطابه بالإنجليزي..

وعموماً الانتخابات اللي لسة خلصانة أول امبارح في كيبيك وضحت ده كويس قوي

Anonymous said...

اللي أنا بجد بقى مش قادرة أفهمه إزاي الأزمة السياسية دي أدت بالكيبيكيين إنهم يعندوا مع المحافظين فيختاروا الليبراليين... وده كله في عز الأزمة الاقتصادية اللي هي أصلاً ناتجة عن سياسيات اقتصادية ليبرالية

لأ وإيه لما يسألوا خبرا عن تحليلهم للانتخابات الأخيرة والفوز الكبير اللي حققه الليبراليين... يقولوا اصل الكيبيكيين مديين الأولوية للناس الي هيقدروا يطلعوهم من الأزمة الاقتصادية ... أنا متلخبطة جدا بجد... الكيبيكيين معروف عنهم أصلاً إنهم أكتر انسجاماً مع الاتجاهات الاشتراكية في الاقتصاد... زيهم زي ماما فرنسا يعني مبيفرقوش كتير عنها في الحتة دي...

واحد مصرى said...

كل سنة وانت و جميع من تحب بخير يا ابو فارس

العالم مش في كارثة اقتصادية بالمعنى المفهوم و لكنها حالة تصحيح اجبارى لأسعار كل شيء بدئا بالعقارات مرورا بالبترول و انتهاء بالعملات و المعادن و ده نتيجة طبيعية لما حدث من تضخم غير عادي لأسعار كل شيء بما يوازي قيمته بعد عشر سنوات...و موضوع تخفيض سعر الفائدة ده توصل له اليابانيون و نفذوه من اوائل التسعينات عندما اعلنوا ان سعر الفائدة عندهم اصبح صفر...اتصور ان دولا كثيره في الطريق لحل مشابه..مش ملاحظ ان العالم بيرجع من تاني لعوامل الاقتصاد الرئيسية زي الزراعة و الصناعة و في الطريق الى التخلى عن بيع و شراء الهواء زي ما حصل في وول ستريت لما باعو الديون و عملوها مشتقات و بعدين باعوه و عملوا منها سندات و بعدين باعوها و عملوا ملوخية و خربوا العالم

سلامي للاسرة و حتى نلتقي مرة اخرى في مكان ما

الازهرى said...

يبدوا ان الحال فى المحروسة افضل فمع اعلان كل الدول حالة الكساد الاقتصادى تم الاعلان هنا ان الازمة لم تؤثر ينا الا بمقدار ضئيل غير ملحوظ وان كل شىء زى العسل

اما بالنسبة لرئيس الوزراء فالحركة الذكية التى قام بها تدل على انه يستحق منصبه بالفعل واحييكم على اختياره للمنصب

ولكن اسمح لى
لم افهم جملة
يعنى الهروب للأمام
تانى

تحياتى دوما

ابو احمد said...

مساء الفل ياأبو فارس
انا شخصيا أتمنى أن يكون كلام ايهاب مش مجرد أمنيات
على فكره فلرح دينا بنت شريف كان تانى يوم العيد عقبال مرام وساره
وكل سنه وإنت طيب

أبوفارس said...

amirakotb..
الله دا أحنا جيران أهو..أنا
عشت سنتان فى مونتريال وسيبتها غير آسف رغم أن الحياه -بمجملها- وصخبها هناك عجبنى..
أهل كيبك دول أجمالا كده حطوا نفسهم فى مأزق تاريخى مالوش حل
عايشين نفسيا فى حالة المهزوم والضحيه..ويجروا وراهم ميراث تاريخى يعوق حركتهم..والدليل ال"بلوك كيبكوا" دى..ولا قيمه لها ولامعنى فى البرلمان..شويه كراسى فاضيه..ماحدش بيحسبهم بجد فى الحركه السياسيه على مستوى كندا..وهاربر قادم من الغرب وهناك أحساس عميق فى الغرب الكندى أن لو كيبك عاوزه تمشى تورينا عرض كتافها..وبالتالى بيلعب معاهم ببرود أعصاب شديد..
والنتيجه أهى
برضك صوتوا لليبرالين..ﻷنهم عارفين لو وصل اﻷنفصاليين للحكم حاينطوا ويعملوا أستفتاء تالت بكل تداعياته..
أنا شفت مونتريال وهى تموت فى التسعينات.
.وبالتالى.
.تم دبح اليمين الحقيقى "أكسيون ديموكراتيك" فى اﻷنتخابات..وجابوا الليبرالز لسبب بسيط يملكوا خبره وقدره على الحكم...ويؤمنوا بالتدخل الحكومى فى الحياة اﻷقتصاديه..
.كيبك أحيانا تفكرنى بشرقنا اﻷوسط التعيس حيث لايزال الجميع بدون أستثناء يحاربوا معارك ماتت من ألف عام.
.أن كانوا أقباط ومسلمين..سنه وشيعه..عرب وفرس..خليهم..أهو العالم يحتاج أراجوزات للتسليه وسط القتامه التى نحياها..تحياتى..خالد

أبوفارس said...

كل سنه وأنت طيب يابوبز..وشاكر على التكست الطريف اللى وصلنى..تحياتى لك وللأسره..هو تصحيح صعب جدا ومؤلم وستترتب عليه هزه عالميه..المشكله -كما أتخيلها- هى وجود فوائض ماليه ضخمه فى أركان العالم..السيوله دى لابد من أستثمارها..حتى اﻷن كل شويتين تطلع فقاعه تلم القرشين ثم تتبخر..الدوت كوم من كام سنه ثم السوق العقارى..مش بس فى أمريكا فى العالم كله..ياعم أنا لما كنت فى مصر لقيت كل معارفى وأصدقائى حاجزين شقق وفيلات فى مدينتى والساحل الشمالى..ويقولك أستثمار..!!ماأراه حتى اﻷن هو محاولة للعوده الى النظام القديم..الفلو س طلعت فى أيام بالترليونات عشان البنوك وشركات التأمين..وماحدش عاوز يدفع لشركات السيارات اﻷمريكيه..!! رغم أنه معروف مثلا لو شركات السيارات اﻷمريكيه قفلت حتأثر على ٣ مليون وظيفه فى أمريكا وحدها..ولكن ده مقبول فى عرف الرأسماليه ومنطقى..عكس أنهيار النظام النقدى ومؤسساته...محاولة تنشيط الكريدت تانى بضخ مليارات فى البنوك وتخفيض الفائده كلها محاولات ﻷحياء نمط اﻷستهلاك الفاجر والدفع حين مبسره أو عدم الدفع بالمره وأهى ماشيه.....
ولذلك ياأزهرى قلت أنها محاوله للهروب الى اﻷمام
......
...اﻷقتصاد الرأسمالى المتقدم
النقطه المركزيه فيه هى اﻷستهلاك المتزايد بغض النظر عن آثار ذلك على البيئه..عدم المساواه بين البشر..تسطيح الناس وتحويلهم ألى ألات أستهلاك وفقط..أفقار الحياه الروحيه..تزايد سطوه اﻷعلان ونماذج اﻷستهلاك على حساب نماذج العمل والبداع..ألخ ألخ...النوذج الرأسمالى لم يجد تحد حقيقى له حتى اﻷن وهو المسيطر على العالم كله من أول نيويورك ودبى وطوكيو جتى قرى ونجوع مصر وزيمبابوى..ويبدو أنه لامخرج منه ألا بأنهياره بالكامل مهما كان التمن..تحياتى وصادق مودتى..خالد

أبوفارس said...

منورنى دائما ياأزهرى..ياعم مصر المحروسه وحكومتها السنيه دول أستثناء من كل وأى قاعده..أتابع التصريحات الحكوميه وبعض مقالات الجونالجيه حين أريد الضحك والتسريه عن نفسى..وطبعا لاأصدق كلمه منها ولو حلفوا بالطلاق حتى..حاولت فى التعليق السابق توضيح ماقلته عن الهروب للأمام..تحياتى ومودتى..خالد

أبوفارس said...

مجدى ياصديق العمر
كل سنه وأنت طيب..أخبارك أيه..؟؟ العيال كبرت وأحنا عجزنا والزمن بيجرى..ونفسى أقف كده وأخد نفس عميق وأبص على الدنيا واﻷيام واﻷحداث اللى عشناها يمكن أقدر أبتسم بجد أو أبكى بجد..مش قادر ياأخى..ولكن يبقى هتاف عمنا نجيب محفوظ على لسان النعلم "نونو" فى خان الخليلى.."ملعون أبو الدنيا" هو اﻷجايه العبقريه لحالة الركض واللهاث التى لاتنتهى تلك.
.تحياتى وخالص محبتى.
.خالد