Sunday, June 08, 2008

كورة قدم

فارس أبنى -١١سنه- غاوى كرة قدم..وأحنا بنشجعه..من ناحيه ﻷن الرياضه مهمه..ومن ناحيه أخرى ممكن أجادته لكره القدم تساعده على دخول كليه كويسه فى جامعه محترمه سواء هنا أو فى أمريكا..يلعب فى فريق المدينه -أورلينز - التى نسكنها وأسم فريقها الكوبرا(!!) المهم فى مجموعته السنيه ضموه للفريق التانى مش اﻷول..وده للسنه التانيه رغم أجادته للعب..أختيارهم للفريق اﻷول كان على أساس الحجم وليس أجادة لعب كرة القدم..وهنا التأثر بلعبه الهوكى واضح..ﻷن هوكى التلج يعتمد على التلاحم والضرب..وبالتالى الحجم مهم جداً..
الويك أند دى السيد فارس وفريقه من اﻷطفال ضئيلى الحجم أثبتوا خطاء تلك الفكره
..المدينه نظمت دوره توازى البطوله اﻷوربيه..ودعوا فريق كوبرا٢ (فريق فارس) كمالة عدد..كل فريق أخد أسم دوله..
والكوبرا أتنين طلعوا البرتغال
..السبت صباحا
الساعه ٨ حفل اﻷفتتاح..طابور عرض للفرق..ومشوا اﻷولاد خلف أعلام الدول التى يمثلوها..وحصر سفير سويسرا وزوجته وسفير النمسا وألقوا كلمه بالظبط زى البطوله الكبيره
..ولعبوا اﻷولاد بنفس ترتيب المجموعات
البرتغال التى يمثلها فارس وزملائه لعبت ضد تركيا التشيك وسويسرا..وكلهم فرق أولى واﻷولاد أجسامهم وأطوالهم فعلا أكبر من عيالنا..بس كرة القدم مافيهاش حجم..تعتمد على المهاره..
وقد كان
تعادلوا مع تركيا بدون أهداف..أخدوا شويه ثقه فى نفسهم هزموا التشيك ٢ /صفر..زادت الثقه سحقوا سويسرا ٥ /صفر..وسط دهشة كل منظمى الدوره ﻷن فريق الكوبرا ٢ كان فعلا كمالة عدد
تميز فى فريقهم..حارس المرمى "برادلى" ولد مدهش بارد كالتلج وتوافقه العضلى العصبى مدهش..أمسك كرات بالنسبه لسنه فعلا مش ممكن
..ومهاجم أسمه "نك" أشقر وشعره طويل يطير ورائه حين يركض كالفرس..
وواد أسمر كده شعره مفلفل بيلعب ف الوسط..غاوى ترقيص ونط من ع الكوره وتمريراته فعلا متقنه جدا بالنسبه لسنه وكانت السبب فى أحراز ٤أهداف على اﻷقل فى اليوم اﻷول.
.وأسمه "فارس"..بصراحه الواد بيلعب حلو..ولفت نظر مش بس أولياء اﻷمور وأيضا مدرب الكوبرا١..وعاوز يضمه هو وبرادلى حارس المرمى لفريقه..بس أحنا سألنا فارس وقال ﻷ عاوز يكمل مع أصحابه الصيف ده وبعدين نشوف..
الجو كان حار جدا أمس وأتلطعنا ف الشمس طول اليوم..العبد لله بيحلق بالموس زى يول براينر وسمعه..حاجه نيولوك خالص..القرعه بقت لون فانلة اﻷهلى وحاسس بصهد طالع منها..
الدوره نظمها متطوعين من اﻷلف للياء..التمويل جاء من مجلس المدينه وتبرعات اﻷعمال المحليه..شركات المقاولات..والسوبر ماركت الكبيره ومعارض السيارات ألخ ألخ..ظريف جدا تجد أولاد فى سن ١٧-١٨ سنه بينظموا المرور..ويلموا الفارغ من علب المشروبات ..ويبيعوا هوت دوج وبيبسى..وينضفوا الملاعب بعد كل مباراه..الدوره نفسها أقيمت خارج المدينه شويه فى بارك مهوله بها يجى ١٠ ملاعب كوره..وصاله مغلقه..وحمامات سباحه..كله ببلاش أو رسوم رمزيه جدا ١٠دولار أشتراك حمام السباحه طول الصيف..
اليوم اﻷحد
أوقعهم حظهم مع أفضل فريق فى أوتاوا كلها..والمرشح للبطوله..أحنا بنتكلم عن عيال ١١-١٢ سنه بس..
ولسه اﻷسبوع
الماضى فايز على فريق الكوبرا١ بسته أهداف..الولاد فعلا راحوا النهارده خايفين
قبل المباراه وقفت أتكلم مع معظمهم..وأشجعهم وحكيت لهم عن مباراة الجزائر وألمانيا..ومباراة مصر وهولندا..
وقلت لفارس ماتخافش أعمل اللى عليك..و يافارس اللاعب المحترف بيقدر يثبت نفسه أكتر أمام الفريق اﻷقوى مش اﻷضعف..ورغم أنهم أنهزموا ٢/ صفر أنما لعبوا مباراه هايله..والجحش الصغير أبنى عمل مجهود جميل..وشويه لمحات جميله..وطلعوا من البطوله بس أثبتوا أن الحجم مش مهم فى كرة القدم..أولياء اﻷمور حاجه أخر مسخره..صريخ وهتاف وتشجيع..وعارفين أسماء اﻷولاد واحد واحد..وتسمعهم بيصرخوا
Go Fares ..Go..Good Fares..what a boy!!
أفرح بيه.
.بعد المباراه..أحد اﻷباء عزمنا كلنا نروح على حمام السباحه عندهم عشان اﻷولاد يبلبطوا ف الميه..
وقد كان من الساعه ١١صباحا لحد ٣بعد الضهر الولاد هات ياصريخ وتهريج..وأولياء اﻷمور اللى جاب هوت دوج واللى جاب مشروبات..أحنا جبنا بيتزا وقلبت "بول بارتى".
.تجمع غريب..أنا مصرى وزوجتى جزائريه مفرنسه..معانا أيرانى وزوجته مغربيه..كندى فرنسى وزوجته كمبوديه..زوج كندى وأبنهم المتٌبنى من جواتيمالا..واللى ظابط ف الجيش الكندى وخدم ف الجولان والسودان وأفغانستان..واللى بيشتغل ف الخارجيه..واللى مديره فى منظمه غير حكوميه تعمل أساسا فى أفريقيا المتكلمه بالفرنسيه..وطبعا يمكن تخيل الحوارات كان شكلها أيه.
.الكنديين فعلا شعب طيب جدا ومؤدب جدا يجمعوا بين بساطة اﻷمريكان وأدب اﻷنجليز وثقافه الفرنسين خلطه جميله
على فكره كره القدم لعبه حديثه جدا فى كندا
..أنا أول ماجئت فى ١٩٩٤أقمنا فى مونتريال وأتعرفت على مجموعه مصريين وكنا نتنادى لمباريات كره القدم مع فرق من بلاد أخرى كما يتنادى العرب للحرب
..تليفون من أشرف ويصا صديقى العزيز
..خالد عندنا ماتش مع الفريق الجزايرى ماتيجى
..ياعم أن ماليش ف الكوره
..ياعنى أنا اللى ليا تعال بس أهو نضحك شويه
طبعا لالياقه ولاهباب ولاتدريب..والشيشه قاطعه نفسنا..مره نتعادل ومره نتغلب خمسه سته..ومن الملعب على مقهى أم كلثوم فى سان لوران نكمل ضحك
..النهارده..اﻷطفال اللى مسجله فى كره القدم فى مقاطعه أونتاريو عددهم زاد عن اﻷولاد المسجله هوكى وﻷول مره فى تاريخ البلد..أديهم ١٠-١٢سنه وشوف حايعملوا أيه..وبالذات البيزنس دخل فى الموضوع
..والشئ بالشئ يذكر
..مبروك الزمالك بل ريقنا أأأخيييراااا بالكاس..أحمدك يارب..بعد ماطلعنا من هدومنا..واﻷصابات بالضغط والسكر والفالج..والبرى برى أصبحت سمه كل الزمالكاويه يااااساااتر.
.بس سؤال والنبى.
. أيه العك والتعريص والتفويت اللى حصل فى أخر أسبوعين ف الدورى ده..المقاولين واﻷلمونيوم..حسبه ملخبطه كده مافهمتهاش بس واضح أنه -آسف ﻷستعمال اللفظ-التعريص كان على أشده.
.ونعم اﻷخلاق الرياضيه..بس عموما هو البلد فيها أيه عدل ياعنى..؟؟؟

12 comments:

Hypatia said...

استاذ خالد

اولا ربنا يخللي فارس ويحميه ونسمع عنه خير كمان كام سنه ونتمحك فيه بقي ونقول الواد ده مصري وحياه ربنا وزملكاوى كمان
:))

من ناحيه التقريص فا ده اكتر دوري كان فيه تقريص بصراحه الحركه اللى الاسماعيلي عملها مع المقاولون كانت واضحه وضوح الشمس
عامه هى الكوره عندنا خربانه زي كل حاجه تانيه فا مش فارقه يعني خليهم يقرصو زي ما هما عاوزين ليهم يوم كلهم

الخلطه بتاعتكم حلوه اوى وماشاءلله الجو الاجتماعي صحي جدا
مش المرض والوباء المتفشي اللى عندنا

ابو احمد said...

صباح الفل
الاول هو الواد فارس طالع قصير والا طويل لخلانه وبيلعب فين دفاع ولا فى الوسط والا هجوم اوعى يكون طلع زملكاوى زينا قوله خليك أهلاوى والا خليه ياعم يشجع هولندا عملوا ماتش هايل غلبوا ايطاليا3/0
سلامى لفارس وساره والمدام
تحياتى

أبوفارس said...

Nsreen Bsunee
والنبى بلاش أستاذ دى.. خالد أو أبوفارس حلو آوى..وألا حاأقولك أستاذه واللى يأستذنى حأستذه.
.الجو اﻷجتماعى موجود دائما المهم الواحد يعرف يدخل جواه..الكنديين فعلا شعب بسيط وطيب ومؤدب جدا..كلامهم كله ..لوسمحت ..عن أذنك ..شكرا..نهارك سعيد..أستمتع بالويك أند.
.وسهل جدا الأندماج معاهم..أو هكذا يٌخيل لى..ﻷنى بالاقى ناس هنا من سنوات طويله ومالهمش أصدقاء كنديين..أحنا يمكن العكس أصدقائنا من الكنديين أكتر بكتير من المصريين..وهم بصراحه أصدقائى أنا أقابلهم أساسا ع القهوه نشيش وندبح بعض مناقشه..
منوره المطرح ياست الكل تحياتى ومودتى..خالد
***********
مجدى ياراجل ياعجوز..أولا كل سنه وأنت طيب ٥٣ سنه !!!طبعا أحنا دفعه واحده بس أنا أصغر منك بحوالى ١٨-٢٠ سنه بس..واخد بالك.
.فارس طالع لى فى كل حاجه محٌسن شويه بس مصرى قوى ياأخى..تصدق لما أشوفه نايم كأن أبويا الله يرحمه نفس النومه..ونفس التمطيعه لما يصحى سبحان الله..
هو مش طويل زى خلانه للأسف بس حايطلع أطول منى شويه..وبيلعب سنتر هاف محترم جدا..بالنسبه لسنه..
المره اللى نزلنا ف الشتا حصلت حاجتان
.وأحنا ف المقطم لقى شويه عيال بيلعبوا كوره ف الشارع عينه كانت حاتطلع يلعب معاهم..بس اللغه طبعا مش مساعده..فأنا اللى طلبت منهم..كلهم أكبر منه وأستهزؤا بيه جدا ﻷنه مش بيتكلم عربى..ورحمه أبويا أخدهم غسيل ومكوه وسجل يجى خمس أهداف..طبعا أمه لطمت لما رجعنالها كله تراب وعفره..التانيه قلنا نزملكه وندخله سكه الندامه معانا..أخدته أنا وطارق وأولاد طارق أستاد الحربيه نتفرج على ماتش للزمالك مع مين..أخر الدورى.. أسمنت أسيوط..أول مره أسمع عن الفريق ده..بس طبعا قلت لفارس ده فريق جامد قوى..شوف الزمالك حايعمل فيه أيه..جبنا اﻷعلام والزمامير ودخلنا التالته طبعا..والمدرج كله فطس م الضحك على الخواجه اللى بيشجع باﻷنجليزى ده "جو زمالك جو..!!" وطبعا الزمالك مابلش رقنا وأتلسع ١ صفر..ولايمكن فارس يشجع الزمالك بعد كده..بس والحق يقال..أتعلم أسوء أنواع الشتائم من جمهور الكره اﻷصيل ف الدرجه التالته..أقلهم كانت
يالعيبه ياوسخه..فيه بعد
كده أمك وأبوك..أغسطس اللى فات راح مع جمال وأبنه عمرو ماتش الزمالك واﻷتحاد على ماتذكر والمره دى جبر بخاطرنا الزمالك...والله ماأنا عارف أحنا بنشجعه ليه..تحياتى ومودتى..خالد

^ H@fSS@^ said...

ربنا يفرحك بفارس سواء كان لعيب كورة و لا مش لعيب
انا اللي عجبني من سردك شوية معلومات
اولها شوف ازاي اي حاجة عندهم بتطور و في وقت بسيط
اصل من 1994 لغاية دلوقتي مش وقت طويل يعني
انهم يهتموا بالرياضة دي و يوعوا النسا بيها و تبتدي تلاقيلها سوق
ثانيا ازاي في توعية على قيمة العمل الحقيقية سواء له عائد و له مالهوش
و ازاي بيعلموا الاولاد في سن صغيرة كيفية التنظيم و ادارة مشاريع
ما هو تنظيم المباراة و كل ما تحتاجه من اكل و شرب و باركينج
دي مش سهلة
بجد
انا في قطر دلوقتي
و تعتبر تالت اغنى دولة على العالم و صدقني في شغلنا معنديش باركينج؟
تخيل؟؟
و اضطريت اني اتصل بوالدي يجيي يوصلني زي اي بنت صغيرة
و خد بالك ان التكاسي هنا لاز م اتصل قبله بيوم على الاقل
و مافيش حاجة اسمها اركب اوتوبيس
لانه مافيش
فلك ان تتخيل حجم القرف من شئ المفروض انه يبقى مفروغ منه
اللذيذ في الموضوع ان البنك قرر انه يخلينا نركن في حتة قريبة من مقر العمل و تودينا ميني اوتوبيسات من مكان الركنة للبنك
بس
اسمع المفاجاة بقى
احنا حندفع فلوس الاتوبيسات دي
و حدفع 350 ريال من لحمي الحي
طبعا المدرا الكبار لهم ركنة تحت البرج و مجانا غير المرتب اللي بيلكموه على قلوبهم اول كل شهر
اللهم لا حسد
يعني انا بدفع فلوس للشغل عشان اروح الشغل
يرضي مين ده؟
اشتكي انا هنا لمين يا ابو فارس؟؟
عارف لما قلت نعمل اضراب سلمي و نكتب عريضة عدم موافقة
اتريقو اعليا
و في الاخر بيستغربوا احنا حقوقنا ضايعة ليه
ما هو ده حق و اذا متعودناش عليه ف يحاجة صغير مش حنتعود عليه في حاجات كبيرة و كله بيجر بعضه
صح و لا لانا غلطانة؟؟
من بين 280 موظف خمسة بس اللي مقتنعين برايي بس مكسلين يعملوا حاجة
انا بجد قرفت
انا بضرب نفسي مليون صرمة لا مؤاخذة اني رجعت من امريكا
انا اللي استاهل كل اللي بيجرالي
صح و لا مش صح؟

أبوفارس said...

حفصه...
الله ينور عليك ياست الكل.هو ده
.ماأهو أنا لما باكتب عن حاجه بتحصل هنا مش من باب أنى أقول بص "أحنا" متقدمين "عنكم" أزاى..ولا من باب التفاخر..أنا بأحاول أكتب عن حاجات بسيطه ممكن نعملها لو فيه شويه جديه..
دورة كرة قدم
زمان كنا بنعمل دورات رمضانيه..ماأعرفش لسه موجوده والا ﻷ.
.تركيبه المجتمع هنا تساعد على اﻷبداع
والعمل التطوعى والجديه
وتشجع المبادره
مثلا لابد من ٢٠٠ ساعه عمل تطوعى عشان تاخدى شهادة الثانويه العامه هنا..يعنى لو جبت ١٠٥% وماعملتش ساعات العمل التطوعى ماأخدش الشهاده.
.ساره بنتى شهر يوليو كله حاتشتفل مع اﻷطفال المعاقين فى معسكر صيفى تطوعا مش حاتقبض ولامليم..ﻷنها عاوزه تدرس طب
.وشهاده بالعمل فى معسكر زى ده تساعدها لما تقدم أوراقها لكليه طب..مش بس أنها تكون جايبه نمر كويسه.
.وده بيخللى معسكرات اﻷطفال دول رخيصه جدا بالمقارنه بمعسكر رياضى مثلا.
.المجتمع بيشيل بعضه
وده اللى عاجبنى.
.وأكتر حاجه إيجابيه هنا
..مشكلتى مع مجتمعاتنا أننا
أولا غير جادين
..تانيا كلامنا كتير ع الفاضى
تسمعى ١٠٠حديث شريف و ٥٠آيه كريمه ويعدين كل واحد يروح لحاله وكوم الزباله اللى كنا عاوزين نشيله لسه زى ماهو.
.ولو حصل وعملنا حاجه جاده أحنا -الناس- نفسها هى اللى تكسر مجاديفيك.
.زى مانت قلتى
الناس بتخاف تطالب بحقوقها أبسط حقوقها..زى موضوع الباركينج بتاعكوا كده..!!عاوزه تعملى أضراب ف الدوحه يالهوى دا يقيموا عليك الحد..!!
!أما أنك رجعتى من أمريكا لشرقنا اﻷوسط التعيس فيه ناس كتير بتعمل كده..وﻷسباب متعدده..ومعظمها غير مٌقنع وفير غقلانى بس أهو كل واحد بينام ع الجنب اللى بيريحه..تحياتى وصادق مودتى..خالد

واحد مصرى said...

هذا الشبل من ذاك الاسد...بالرغم من انك زملكاوي بس بحبك برضه...قال يعني انا اللي اهلاوي قوي ..اهي قافية و حبكت و خلاص

بارك الله لك في ابو الفوارس و اخواته و والدتهم

و اخيرا ..احب اقولك الصحافة فيييين ...دمت بخير و سعادة يا د.خالد و الي لقاء قريب في المحروسة

Wandering Scarab said...

ربنا يخليلك فارس و تفرح بيه كمان و كمان..

أنا بس عاوزة أضيف نقطة على كلام خالد (لو تسمحلي أقول خالد حاف كدة). بالنسبة لنقطة إن المجتمع هنا في كندا بيشيل بعضه. مستشفى الاطفال عندنا هنا عاملة حاجة مخصوص للأهالي إلي فقدت طفل مريض أو في المستشفى. أنا لما توفت بنتي، المستشفى اتكفل بكل حاجة. مصاريف الدفن والتغسيل و كل الكلام ده المستشفى إتكلفت بيه، رغم اني كنت قادرة على الدفع. لكن هو كان مش مسألة فلوس بنسبلهم. البروجرام ده معمول مخصوص للتخفيف عن الأهالي. لم الواحد بيفقد إبن أو بنت ربنا ما يوريكو بيبقى مش عارف يفكر لا يمين ولا شمال. مش بس كدة، ده كمان الراجل المسؤول عن الدفن لما عرف إن أنا مسلمة لغا كل الكلام إلي كان كاتبه لأن عادةً هنا بيقرأ حاجات من الإنجيل و قرر إن يكتب حاجات حيادية ملهاش دعوة بالدين من غير ما أنا اطلب منه أصلاً. مش كدة و بس ده كمان المستشفى كلم أكبر داعية إسلامي هنا ساعتها و سأل ازاي يعمل غسل الميت في الاسلام عشان يعمل الحاجة مظبوطة رغم إن ساعتها والله مطلبتش منهم أي حاجة لا أنا ولا زوجي. الشعب الكندي حساس جداً. و مبلغ البروجرام ده كله جيي من تطوعات الأهالي إلي بتيجي كل سنة زائد إن إلي بيعمل الكلام ده كلهم متطوعين زي ما خالد قال. في الأخر المبلغ إلي بيدفع بيكون ثمن المكان إلي بيتم فيه الدفن بس. كل الأطراف التانية متطوعة. و كل دة بيتعمل سواءً بقى الأهل مسلمين ولا مسيحيين ولا يهود ولا بيعبدو النار مش مهم. أنا معتقدش إن في مصر حاجة زي كدة موجودة.

بالنسبة لموضوع العودة إلى الشرق الاوسط. والله أنا بلاحظ إن كل إلي أعرفهم بيرجع هناك هم شباب أو شابات لسة ماعندهمش أطفال، دايماً اللي عنده أطفال بيفكر في مستقبلهم، و باشوف إن إلي هنا و عندهم أطفال نفسهم يرجعو لكن بيفضلو هنا عشان عارفين إن فرص اولادهم هنا أحسن. أنا أختي الصغيرة غير متزوجة و بردو رجعت مصر. اشتغلت هناك كام سنة لحد ما اكتشفت إن عشان هي ست مش هتقدر تبقى مديرة في شركتها أبداً فسابت الشغل دة وحالياً هي بتشتغل في الكويت.. بتقول مرتاحة هناك بكتير أكتر من مصر انما بردو بتتعب لأن مفيش مساواه زي هنا في كندا. و دى مسألة تحمل و ظروف شخصية و زي ما خالد قال كل واحد بينام على الجانب إلي بيريحو.

أنا عن نفسي عارفة إن مكنتش لا هعمر في مصر ولا هعمر لو كنت اتجوزت واحد من مصر. ماهو واحدة زيي لما تقعد تقول رأيها فى الطالعة و فى النازلة كان زماني دلوأتي مطلقة و باخد على دماغي.

أبوفارس said...

بوب..منور.. إيه ده إنت أهلاوى..؟؟لا ياعم أنا زملكاوى من أيام حماده أمام..ومش عارف أطلع من الحوسه دى..وطبعا لسه فاكر عزومه
الكوارع..تحياتى ومودتى..خالد
************
أيوه طبعا خالد..حلو كده خللى
البساط أحمدى
أولا أنا قرأت ماكتبتيه عن فقدانك ﻷبنتك الوليده..وقلبى عندك..وأنا أدرك تماما أن كلمات الدنيا لن تساعد هنا..رحمها الله وصبرك سيدتى..تعرفى أنا أحترمت وأحببت زوجك من وصفك له بدون أن أراه أرجو أن تنقلى له ذلك.. تانيا دى بقى قتلتنى م الضحك
"
أنا عن نفسي عارفة إن مكنتش لا هعمر في مصر ولا هعمر لو كنت اتجوزت واحد من مصر. ماهو واحدة زيي لما تقعد تقول رأيها فى الطالعة و فى النازلة كان زماني دلوأتي مطلقة و باخد على دماغي"
صباحك فل..تحياتى ومودتى..خالد

Wandering Scarab said...

والله يا خالد أنا الحقيقة كل إلي يقابل زوجي أو يسمع عنه بردو يقول لي إنه قلبه طيب جداً. هو أصله بردو كلامه قليل بس بصراحة لما بيقول حاجة بتبقى متينة. عارف المثل إلي بيقولك اتقي شر الحليم إذا غضب.. أهه عندنا كدة بقى. إذا شاء ربنا و تقابلنا في يوم من الأيام أعتقد انك هتنسجم معه أوي.

أما عن موضوع التعمير دة فهو كان باين من أوله.. أصل أنا بصراحة مش بعرف أقعد ساكتة لما ألاقي حاجة متخلفة بتحصل أو لو في حاجة غلط مش عاجباني خصوصاً لو كان حاجة حلها بسيط جداً و في متناول اليد، هتبص تلاقيني فتحت بقي و رزعت كلمتين. و طبعاً الرجل المصري حالياً عايز يرجع البيت يلاقي واحدة شكلها عامل زي نانسي عجرم ورصاله المسقعة و حلة اللحمة على السفرة ومتتكلمش لا في السياسة ولا في الخيار. أنا من الستات إلي لما كان هيدخل البيت كان أولاً مش هيلقي نانسي عجرم، كان هيدخل يلاقي واحدة قاعدة على انترنت و دمها فاير عشان بند مش عارف إيه اتغير في دستور مش عارف مين. أنا متخيلة كان هيوقف لي تاكسي و يقول لي مع ألف سلامة و يكسر وراية قلة كمان.

^ H@fSS@^ said...

ميناتركس
جوزك ده يا ختي مالهوش اخ ابن ناس و محترم زيه كده او حتى واحد من معارفه
اصل عندي نفس مشكلتك كده و الرجالة هنا بيخافوا مني
و شايفين ان دي قوة شخصية و لسان طويل عالفاضي
و انتي ست مين يعرف ان قوة الشخصية في الست العربية غير مستحبة بالمرة
ابقي دوري و ردي عليا ماشي؟؟
احنا اخوات برضو
و نفس الكلام متوجه ليك يا ابو فارس
هههههههههههههههه

تحياتي

أبوفارس said...

معلهش ياسيداتى مهو لازم برضك تاخدوا بالكم من حاجه الرجل فى شرقنا التعيس بياخد على قفاه طول اليوم..من أول مايفتح عينه..سواء المواصلات مصاربف العيال مديره ف الشغل الجريده الرسميه ومؤخرا جرايد المعارضه أنضمت لطابور التنغيص على الحياه..ألخ ألخ طب نعمل أيه؟؟نعيش فى فنتازيا..ست شكل نانسى عجرم وأخلاق أمينه مرات السيد عبد الجواد..تقوله ماشى ياسى السيد..!!وياسلام لو بتعرف تطبخ وتربى العيال وتساعدهم ف المذاكره..ألخ ألخ
ﻷ بجد..
هو أصل المجتمع كله ملخبط وبالتالى مش ممكن العلاقات -أيا كانت تلك العلاقات -حاتكون سويه..ولازم اﻷطراف اﻷضعف هى اللى تدفع التمن مضاعف
...
والله ياحفصه ياست الكل أدور
وأقولك بس عايزين صوره حديثه شويه وألا أيه
...هاهاهاهاهاها
تحياتى

Wandering Scarab said...

حفصة ..

هو للاسف زوجي عندو أختين هو الولد الوحيد. و لو كان لي أخ كنت أتمناله واحدة دمها خفيف زيك واللهي.

بس تعالي هنا.. انتي عايزة تتزوجي واحد كندي عشان تتبهدلي البهدلة السودة إلي أنا بتبهدلها في مصر... انتي مش قرأتي أخر بوست أنا كتبته.. مصر أصلاً مش معترفة بجوازنا شفتي المصيبة؟ و لما بنروح أي قرية سياحية هناك أو مناطق سياحية و يشوفه إسمي عربي الناس هناك بتبوصلي نظرة وحشة جداً و كأني ست مش كويسة. لولا إن الباسبورت كندي مكنش يرضوا يدخلونا في أي حتة.

يا بنتي أنا لي مغامرات في مصر..مش بقولك سيرك.. خلي الطابق مستور أحسن .. lol.

خالد..

هو الرجل ياخد على قفاه و يجي يدي مراته على أفاهة.. دي سلسلة تمثليات مش هتخلص. أنا عرفت... عشان كدة كل ستات مصر ضاربين بوز والبوز لا يتوافق مع شكل نانسي عجرم.