١٨-١٩ يناير..تكمله

قبل أن أبدء

نقطه هامه

أنا لاأكتب من باب النوستالجيا أو الحنين الى الماضى..وأن أحنا عملنا اللى ماحدش عمله..ولاأنى بطل شوفوا عملت

أيه..ولازعيم ودى شهادتى للتاريخ

..ولا راجل عجوز يتذكر ماحدث وهو على سرير الموت

لسه شويه

ولاهى تصفيه حسابات مع أحد ﻷنى فعلا ماليش حساب أصفيه مع أى حد..بل أنى أكن كل أحترام وتقدير لكل من عرفت فى تلك اﻷيام فكلهم وكلهن -أهو بنون النسوه- بلا أستثناء واحد ناس محترمه..

على اﻷقل أيامها وهو ما يهمنى هنا

..الموضوع فعلا كان صدفه..تعليق طويل على تدوينه أخرى

وحياتى لم تتوقف عند تلك اﻷحداث

..أستطعت ببعض المجهود أن أستمر وأيامى التى تلت الجامعه كانت مليئه ومثيره باﻷفعال واﻷحداث

..ربما تكون ميزه أو سمه شخصيه ولكنى فعلا أستمتع وأحب بالحياه وأحداثها كما هى

..حتى باﻷشياء البسيطه فيها

..من أول فنجان قهوه مظبوطه لحد علاقه حب حاده

من كتاب كويس لمباراه تنس ساخنه..

من ضحكه أولادى لمنظر غروب الشمس..

الحياه فعلا حلوه

..ولازالت لدى القدره على اﻷندهاش والتعلم

..لناظم حكمت قصيده جميله يقول فيها

أن أجمل اﻷيام هى تلك التى لم نعشها بعد

وأجمل النساء هن اللاواتى لم نعشقهن بعد

وأجمل البلاد هى تلك التى لم نراها بعد

.....وأنا مؤمن بذلك تماما

**********************************************************

الفرديه -ولاأقول التفرد-التى هى سمه أساسيه من تركيبتى الشخصيه كانت المانع اﻷساسى ﻷنخراطى فى أى تنظيم يسارى أيامها

..مجموعه ٨ يناير فى صيدله القاهره قالوا عنى "لديه روح فنان.." وسابونى ف حالى

آخرين لم يكونوا بنفس الدرجه من التفهم وأتهمونى بالفرديه -وكأنها تهمه- أو أنى برجوازى صغير ودول سمعتهم كلام زى وسخ الودان كما يقولون

..وبالرغم من ذاك ظلت علاقتى بالكل جيده

كنت أتعامل مع الزملاء كأفراد وليسوا كممثلين لحزب أو تنظيم..فكانت لى علاقات صداقه مع مجموعه ٨ يناير فى صيدله ومصر الجديده..وخليه المؤتمر فى مصر الجديده..وكان منهم المسئول عن القاهره الكبرى..وأفراد من حزب العمال الشيوعى المصرى..المهوسين بالتنظيم الحديدى..والتأمين وأن كانت لهم صحيفه سريه جيده ومنتظمه

أضحك اﻷن..حين أتذكر ..كنا كلنا أصدقاء نجلس على المقاهى ونسهر أو ندخل السينما سويا..وكل منا يعرف كل شئ عن اﻵخر..ولكن الرفيق عضو العمال "زيزو"..طلب منى أن أعطى جريده حزبه السريه للزملاء أعضاء مجموعه المؤتمر..على ألا أقول لهم من أين أتيت بها

طب ماهم عارفين يارفيق

..ﻷ.. لابد من التأمين

..وطبعا غضب منى ومن أستهتارى بما قاله عن السريه واﻷمن واﻷمان

..وكانت أجابته جاهزه

..أصلك برجوازى صغير..رغم أنى والله كنت أكبره بعده شهور

لم تقتصر صداقاتى على المسيسين أو المناضلين..ولو أنى ماأعرفش مناضلين دى معناها أيه؟؟؟؟..كان لى أصدقاء لهم أهتمامات أخرى

..كرة السله مثلا..حيث كنت ألعب سله ف نادى الشمس ومع أصدقاء أرمن فى ناديهم بمصر الجديده..ميزته اﻷساسيه البيره المثلجه الممتعه بعد الماتشات

..وصديق من هندسه عين شمس -مع غيره- كنا نستمع معا للموسيقى الكلاسيك..سماع بجد..مش تهريج..فاجنر وشوستاكوفيتش وبرليوز..كان أرق من النسمه سألته مره ما هى فلسفتك فى الحياه فأجابنى فلسفه القوه لنيتشه..مما ألقانى أرضا من الضحك

..الفلسفه كنت أقرأها بشكل ممٌنهج مع عصام وألياس ووجدى..عصام كان طالب بكليه أداب عين شمس قسم فلسفه..وينجح يادوب بمقبول رغم أنه فعلا ذو عقليه فلسفيه محترمه وأنضج من معظم أساتذته..ولكنه نظام التعليم الكرنب ف مصر

..ومعا أبحرنا سويا فى الفلسفه اﻷسلاميه وعلم الكلام والفقه..وبعد أن أنتهينا ألقيناهم خلف ظهورنا ﻷنعدام الفائده..وضأله المحصول..لذلك أستغرب جدا ممن يأخذون تلك الخزعبلات مأخذ الجد

..الوجوديه بمدارسها المختلفه كانت اﻷقرب لألياس ووجدى..وياما دبحنا بعض مناقشات حولها

..لم يحدث أن توحدت مع السياسه أو أهتماماتى العامه..كان هناك دائما مجالات أخرى ممتعه ومنشطه للعقل..ولعل هذا ماأنقذنى من اﻷنهيار كما حدث لزملاء كثيرين

...ولكنى أسبق اﻷحداث كده....

المهم

فى بدايات العام الدراسى ٧٦-٧٧ كان واضح أن هناك صراع حقيقى داخل نادى الفكر اﻷشتراكى بين المنتمين للتنظيمات الشيوعيه المختلفه وأعضاء فى النادى فى نفس الوقت..وكان هناك أخرين زى حالاتى رافضين أن يكون النادى واجهه علنيه لمثل تلك التنظيمات..وأذكر مناقشه حاده جرت فى أجتماع للجنه اﻷعلام -مقررها كان طلعت رميح- حول هذا الموضوع

..بعد اﻷجتماع وقفت وتكلمت مع ليلى سويف وكانت طالبه فى كليه علوم وزميل أخر فى نفس الكليه أسمه علاء

..وحاولنا تنسيق موقف رافض لهذا التوجه..وخاصه أننا كلنا -كنادى-رفضنا محاوله ضمنا الى التجمع..حزب اليسار المعلن والشرعى أيامها...رغم تدخل خالد محيى الدين شخصيا فى الموضوع

..طبعا لم نلاحظ التناقض فى موقفنا..أننا ننظم أنفسنا لرفض سيطره تنظيمات أخرى على النادى..ولكنها قله الخبره وأندفاع الشباب..

فى الحال بدأنا فى التحضير لعمل سياسى أخر..أسبوع كامل من النشاط فى جامعه القاهره بقياده نادى الفكر اﻷشتراكى..أسميناه "أسبوع الجامعه والمجتمع"..محاضرات وندوات.. مجلات حائط..عروض سينمائيه تعقبها مناقشات..النشاط اﻷساسى كان فى الجامعه نفسها وفى هندسه القاهره..القصر العينى بكلياته المختلفه كان أهدء..لبعده عن الجامعه..وطبيعه الدراسه فيه..ولكننا بالرغم من ذلك علقنا مجلات حائط..والعبد لله أقام معرض كاريكاتور لابأس به

..نجاحات ونشاطات النادى السابقه أجتذت الزملاء الناشطين من جامعات أخرى

..أو هكذا خٌيل لى أيامها

..البعض جاء للمزايده أو لتأييد أعضاء بعينهم فى النادى ينتمون لنفس التنظيم السرى

..وكان لابد أن يحدث صدام

...أتذكر كنا نستعد ﻷقامة ندوه فى أحدى قاعات كليه حقوق..ووقفنا ننتظر..طال اﻷنتظار..وبدء

التذمر بيننا فى لحظه ماتعرفش ازاى بدء هتاف

.."لا للصمت ولا للطاعه... مؤتمرنا ف قلب القاعه

أظن الهاتف كان تيمور الملوانى..هتاف رنان جميل..والدنيا حر والناس زهقت وفعلا بدء البعض ف التحرك ﻷقتحام قاعه اﻷحتفالات الكبرى لجامعه القاهره كده خبط لزق..وبالتالى أداره الجامعه واﻷمن حاينهالوا علينا كالسيل ويبوظ باقى الأسبوع..تدارك كمال خليل الوقف وهديت النفوس شويتين لبدء الندوه

..المحاضر كان "عادل حسين"وكما قلت كانت تربطنى به علاقه ومعرفه شخصيه..وفعلا أنا كنت فى أنتظاره على باب الجامعه وقدته للمدرج..الراجل كان يادوبك أخرج -أو بصدد أخراج- كتابه الهام "اﻷقتصاد المصرى من اﻷستقلال الى التبعيه" وهو كتاب هام فعلا..وكنت أنا ضمن زملاء أخرين نقرء أجزاء منه ونناقشه فيها..فيران تجارب يعنى..يعنى عنده كلام مهم ممكن يقوله..لاأظن أنه تكلم كثيرا..وأندلعت مشاده بين أفراد عرفت بعدها أنهم ينتمون لتنظيمات مختلفه...وطالت المشاده وأفسدت الندوه..فما كان من عادل حسين ألا أنه خرج عن الموضوع تماما..وأرتجل كلمه طويله يدعو فيها للحوار والتماسك وكيف أنه وجيله ينتظرون الكثير منا ومن جيلنا...بعدها بأيام كنت عنده فى بيته بمصر الجديده وطلب منى أحكى له بالتفصيل ما يحدث هناك..وبعد ماأنتهيت قال كلمه أختفت من ذاكرتى لسنوات وخرجت على السطح من أسابيع قليله وأنا أقرء مقال فى مجله البوصله..قال"الجماعه اﻷسلاميه حتاكلكم الكام سنه اللى جايين دول"..لم أهتم بما قال..فالجماعه اﻷسلاميه أيامها لم

يكن لها فعلا ثقل حقيقى وسط الطلاب..

..أسبوع الجامعه والمجتمع كان ناجح بالرغم من ذلك

..أعداد الطلبه المشاركه فى النشاطات المختلفه كان كبير..النقاشات التى أصبحنا محترفين فيها حول مجلات الحائط أو رسوم الكاريكاتير كانت نشيطه جدا..أعداد أكتر من طلبه كليات ومعاهد وجامعات أخرى شاركت معنا..منهم أصدقاء وزملاء من مصر الجديده..كليات مثل فنون جميله الزمالك أو معهد التعاون جاء منها مشاركين..فى تلك الفتره عرفت ناس بشكل أكبر..مثل أحمد بهاء..مقرر النادى ومن أكثر الناس اللى عرفتهم فى حياتى رقه وقدره على اﻷقناع..المبتسم دائما كمال خليل..وقرينه كمال عيطه..من الناصريين..حمدين صباحى طول عمره زعيم..سيف اﻷسلام عقل منظم مرتب بشكل هايل..وغيرهم

..أخر يوم فى نشاطات اﻷسبوع..

٢٥ نوفمبر ١٩٧٦خرجنا فى مسيره لفت الحرم الجامعى..ضمت أعداد كبيره من المشاركين فى نشاطات اﻷسبوع من داخل وخارج جامعه القاهره..

ووصلنا للبوابه

..وأختلف الزملاء

..نخرج والا ﻷ..

الناصريين رفضوا تماما الخروج بالمظاهره للشارع..أحمد بهاء تردد..كمال خليل..وغيره دعوا للخروج

..من حسم الموقف أمير سالم حقوق عين شمس..بالهتاف ضد الحكومه..

لن أنسى ماحييت أخر توجيهات كمال خليل.."لو وصلنا كوبرى الجامعه حناخده جرى..لو ماوصلناش -ويبدو أن هذا كان اﻷحتمال اﻷكبر-واﻷمن المركزى زنقنا ماحدش يهوب ناحيه الكوبرى..ونرجع الجامعه..أو نزوغ فى بين السريات."..وصلنا كوبرى الجامعه وعينك ماتشوف ألا النور..طرنا حرفيا

مافيش أمن لامن ناحيه الجامعه ولا من ناحيه القصر العينى..ركضنا كما الخيول ولاد وبنات..وفى لحظه وكأننا فرقه قوات خاصه عاليه التدريب بمجرد وصولنا الناحيه التانيه من كوبرى الجامعه أنتظمنا فى صفوف..وبدء الكمالين خليل وعيطه الهتاف.

.عند وصولنا للشارع الواقع بين صيدله وطب..بدأت كريمه الحفناوى الهتاف.

.أه والله.

.ماهو أيامنا الست لاكانت عوره..ولارجس من عمل الشيطان..الست كانت زميله محترمه ف الكليه..ورفيقه ف السياسه..وأخت ..وحبيبه لو لك نصيب.

.وأنضم لنا عدد محترم من طلبه القصر.

.شارع القصر العينى وقف على رجل..الناس كانت بتهتف معانا ضد الغلاء ورئيس الوزراء..وكيلو اللحمه اللى أصبح تمنه جنيه ونص..وحزب الوسط وهز الوسط..وأبدع الكمالين ف الهتاف..

وقفت أتوبيسات النقل العام.

.فأرتجل كمال خليل.

.التأييد التام التام

لعمال النقل العام.

..ياعمال النقل العام

أضرابكم خطوه لقدام

..قبلها بشهور كان هناك أضراب شل القاهره كلها لسائقى ومحصلى هيئه النقل العام بالقاهره..وحياه سائقى اﻷتوبيسات

الواقفه على جانبى شارع القصر العينى بالزمامير والكلاكسات..

كنا كام ف المظاهره دى فعلا لاأستطيع الحكم ﻷنى كنت فى قلبها لكن أعتقد -وممكن جدا أكون مخطئا- أننا خرجنا حوالى ٣٠٠-٣٥٠ طالب من الجامعه وصلنا يمكن ٥٠٠ بعد القصر وحوالى ١٥٠٠-٢٠٠٠ أمام مجلس الشعب.

.والهتاف أستمر ضد السلطه وضد كلابها..وسيد مرعى..ماخليناش..كان يقف على سلم المجلس كل ضباط أمن القاهره..لواء ونازل.

.طلبوا نطلع وفد يقدم طلباتنا لرئيس المجلس..وأذا لم تخنى الذاكره ماكانش معانا لا عريضه ولايحزنون..وتم أرتجال واحده كتٌبت على عجل..

ودخل للمجلس وفد من الطلبه لتقديم الطلبات..

وجلسنا بره نهتف..

.القلق بدء حين بدء ضباط أمن الدوله فى الوصول..أحدهم كان يعرف زعامات الطلبه باﻷسم..أذكر أن طلعت رميح هتف هتاف خارج شويتين...فنادى عليه أحد الضباط باﻷسم "بلاش الكلام ده ياطلعت.." بصراحه شديده جدا..خفت..ولاد الكااااالب دول عارفينا باﻷسم..

وبدء الكلام عن أحتمالات أعتقال الليله دى وضروره التأمين وعدم العوده للمنزل أو البيات فيه..

.أنفضت المسيره وكل واحد زاغ على ناحيه..جلست مع زملاء مصر الجديده نلتقط أنفاسنا على مقهى قرب التحرير وركبنا الوسواس القهرى..كل واحد شكله مخبر أو مباحث..

أنا كما قلت لم أكن منظم وبالتالى الكلام عن التأمين والحاجات دى كانت لاتعنينى وغير مٌلزمه لى..

روحت بيتنا..وماليش دعوه..

ولكنى ليلتها وفى الليالى القادمه كنت لاأنام قبل الفجر..حتى لو جاؤا أكون أنا أول من يستقبلهم مش أبويا ولا أمى..

ولكنهم لم يجيئوا

..ايامها

......

برضك طالت التدوينه ولم أصل ألى ١٨-١٩ يناير..واضح أن أستحليت الكلام عن نفسى

...برجاء أعاده قراءه السطور اﻷولى..

وتانى أنا أكتب من الذاكره

..والكلام ده مر عليه فوق التلاتين عام

..أرجو التكرم بتصحيح ماأقول لو فيه أى خطاء

..أنا أذكر أسماء حقيقيه..لو حد متضايق يقول حاأشيلها فى لحظه

...وزى رسوم الكرتون

...يتبع