الوضع السياسى ﻷسرائيل كما يتفق المراقبين "كارثى"..فى حين يتمتع أقتصادها بنمو يفوق ماحققته الصين والهند فى عام ٢٠٠٧..؟؟!!أسرائيل أستطاعت خلق أقتصاد ينمو ويزدهر فى أستجابه مباشره لتصاعد العنف حولها..فلا حرب ٢٠٠٦ ضد حزب الله..ولا أختطاف حماس لغزه ..أديا لهزه فى اﻷقتصاد اﻷسرائيلى كما هو متٌوقع..بالعكس..
السر أن أسرائيل كانت أول أقتصاد متطور يتعلم أهميه الطفره فى أقتصاد اﻷمن ومحاربه اﻷرهاب..وهو ماحدث بعد ذلك بسنوات فى أقتصاديات أوربا الغربيه وأمريكا..
معهد الصادرات اﻷسرائيلى قدر عدد الشركات "الخاصه"المتخصصه فى وسائل محاربه اﻷرهاب والهوم سكيورتى ب٣٥٠ شركه تصدر منتجاتها وخبراتها ﻷنحاء العالم فى ٢٠٠٧ ..
أسرائيل اﻷن تجمع بين المتناقضان أقتصاد مزدهر نامى بمعدلات هائله..وحاله حرب مستمره مع جيرانها..فى تناقض كامل للحكمه التقليديه التى تربط السلام بالنمو اﻷقتصادى..
وهو ماكان الحافز مثلا لشيمون بيريز فى عام ١٩٩٣ أن يطالب بسلام اﻷسواق وليس بسلام السفارات واﻷعلام..
فى نفس العام وفى محاضره ألقاها "دان جيلرمان" رئيس الغرف التجاريه اﻷسرائيليه..دعا أسرائيل لتقديم أى تنازلات مطلوبه للوصول ألى سلام حقيقى مع الجيران العرب لتتحول أسرائيل ألى سنغافورة المنطقه..
ولكن وكرد فعل لعلاج الصدمه الذى هز اﻷتحاد السوفيتى السابق ونتيجه مباشره ﻷنهيار اﻷمبراطوريه السوفيتيه..تدفق حوالى مليون يهودى روسى على أسرائيل فى أكبر حركه هجره شهدتها الدوله العبريه-٥ز٤ مليون أيامها- منذ أنشائها..حوالى ١٨% من تعداد اليهو د فى أسرائيل اﻷن..
وقد أدى ذلك الى..
تصاعد قدره أسرائيل على اﻷستغناء عى العماله الفلسطينيه ..فمن المعروف أن حوالى ١٥٠الف عامل فلسطينى كانوا يعبرون الخط اﻷخضر يوميا للعمل فى أسرائيل فى ظاهره كان الواقعيون من الطرفان يعتبروها تمهيد لتكامل حقيقى بين الجانبان..تدفق العماله الروسيه على أسرائيل أعطاها القدره على أغلاق الحدود بشكل كامل وألستغناء بشكل مستديم عن تلك العماله وقطعها عن مصدر رزقها لتتدهور غزه بالذات ألى بؤره من أفقر بقاع اﻷرض..وبالذات بعد تزايد وتيره الجمات اﻷنتحاريه-اﻷستشهاديه-اﻷرهابيه "كما تحب" وفى توقيت رائع أفاد المجتمع اﻷسرائيلى ورفع عنه حرج العقوبات الجماعيه ..نحن لازلنا فى منتصف التسعينيات..وبالتحديد ٣٠ مارس ١٩٩٣ أول أغلاق تام وكامل للضفه والقطاع بعد عمليه "أستشهاديه باهره" هلل لها العرب..فاكرين النسف المزدوج ﻷتوبيسى ركاب فى تل أبيب
فى الفتره بين ١٩٩٣-٢٠٠٠ تضاعف عدد المستوطنين اﻷسرائيلين فى اﻷرض المحتله وزاد عدد وحجم المستوطنات بنسبه الربع فى أقل تقدير..أعتمادا على المهاجرين الروس..
مثلا مستعمره "آريل" فى الضفه الغربيه..ضاعفت عدد سكانها..وتحتوى اﻷن على جامعه!منتجع سياحى بملاعب جولف..واليوم يافطات المحلات وعلامات المرور بها باللغه العبريه والروسيه نتيجه التوجه مباشره ﻷجتذاب المهاجرين الروس من موسكو نفسها!!فى الفتره من منتصف التسعينيات وحتى بدايه القرن الحالى أكتسحت الشركات اﻷسرائيله عالم الهاى-تك وتحولت ضواحى تل أبيب وحيفا الى ماسمى عندها بوادى السليكون العبرى..وتم أشهار عدد من أكبر الشركات اﻷسرائيليه فى هذا المجال فى بورصه وول ستريت وتدفقت اﻷموال عليها فيما عرف أيامها بفقاعه الدوت-كوم..
مره أخرى لعب المهاجرين الروس اليهود الدور الحاسم فى هذا التطور..
وتحول هذا القطاع الى أهم وأكثر قطاعات اﻷقتصاد اﻷسرائيلى ديناميكيه ممثلا ١٥% من مجمل الناتج القومى اﻷسرائيلى وحوالى نصف قيمه الصادرات السنويه ..فى نفس الوقت ونتيجه مباشره لعمليه أغلاق الحدود مع اﻷراضى المحتله بشكل دائم..تحول ٦٠% من الفلسطينين الى عاطلين عن العمل وتدهور اﻷقتصاد الفلسطينى بنسبه ٣٣% فى عام ١٩٩٦..
وسط تزايد معدل العمليات اﻷنتحاريه-اﻷستشهاديه..
وهنا لابد لى شخصيا من تعليق
رد الفعل العربى على هذه التطورات كان مزريا
على المستوى الرسمى كان مؤتمر قمه بغداد حيث أجتمع مهرجى اﻷمه من ملوك ورؤساء للتشاور..وخرج علينا البهلول اﻷكبر القذافى بتحليله العبقرى..أنهم يجتمعون هنا حتى نقضى عليهم ونريح العالم منهم..وحين أُغلقت اﻷبواب تفرغ الزعماء لهلهله بعضهم العض..وكان غزو الكويت نتيجه مباشره لهذا المؤتمر..
رد فعل "اﻷنتلجينسيا" العربيه لم يكن أفضل..لازلت أذكر مقاله فى الحياه اللندنيه..أدعى صاحبها أن المهاجرات اليهوديات الروس هن من المومسات ولايعملن هناك ألا فى الدعاره..والدليل أنتشار بيوت الدعاره فى أنحاء أسرائيل تحت مسمى أنديه المساج..والجمال!!
!ويبدو أن اﻷفندى كان يتكلم عى شوارع القاهره..بيروت..ودبى التى أنتشرت فيها فعلا مومسات الروس وراقصات النوادى الليليه حتى ضجت منهن بنات
الليل المحليات..وأستدعى اﻷمر تدخل وزير القوى العامله المصريه لفرض تصاريح عمل عليهن..
فى أنصع دليل على اﻷستلقاء خارج
التاريخ
فى عام ٢٠٠٠ أنهارت فقاعه الدوت-كوم كما هو معروف..وأصابت اﻷقتصاد اﻷسرائيلى بأسوء كساد فى تاريخه القصير..السبب الوحيد لمنع أنهيار كامل للأقتصاد كان تدخل الحكومه اﻷسرائيليه وزياده اﻷنفاق العسكرى بنسبه ٧ز١٠% وتم تمويل هذه الزياده بالمعونه اﻷمريكيه وتخفيض برامج الرفاهيه اﻷجتماعيه..كأستجابه مباشره لتعاليم مدرسه شيكاغو فى اﻷقتصاد..ممثله فى وزير الماليه نتنياهو ومحافظ البنك المركزى ستانلى فيشر..
تم ضخ هذه الزياده مباشره فى قطاع الهاى تك..وبالتزامن مع أنتفاضه اﻷقصى..
وتحول المشهد الى مايشبه التدريب العملى على المراقبه والملاحقه الالكترونيه ثم القتل على شاشات التلفاز..وقنوات اﻷخبار العالميه..
وتماهت الحدود بين قوات الدفاع اﻷسرائيليه وشركات الهاى تك والمخابرات بأجهزتها المختلفه..
وثانيه لعب المهاجرين الروس نتاج المجمع الصناعى العسكرى السوفيتى الدور اﻷساسى فى هذا التطور..
وتم أستبدال فقاعه الوت-كوم بمركب جديد للأمن الداخلى العالى الكفاءه..
وحين وقعت الواقعه..
وهدم الشيخ بن لادن وأتباعه برجى التجاره العالمى..كان هذا القطاع هو اﻷكثر أستعدادا لمجابهه هذا الخطر..والباقى عباره عن تداعى منطقى..
أو كما قال أحد كتاب مجله "فوربس"بين عشيه وضحاها تحولت أسرائيل ألى "قاعه عرض ﻷحدث منتجات الحرب ضد اﻷرهاب
الشركات العامله فى مجال اﻷمن الداخلى بفروعه صدرت بماقيمته ٢ز١ مليار دولار فى عام ٢٠٠٦ وصادرات السلاح وصلت ٤ز٣ مليار فى نفس العام مع تفائل بزياده لاتقل عن ٢٠% لعام ٢٠٠٧...!!؟؟!
وأصبح هذا القطاع هو القطاع اﻷكثر حيويه والمهيمن على اﻷقتصاد اﻷسرائيلى ..وأختف أسطوره السلام لشرط مسبق للأنتعاش اﻷقتصادى..
أغسطس ٢٠٠٦ عندما رقص العرب أحتفالا بالنصر اﻷلهى لحزب الله رغم الدمار الشامل للبنان..ووقف اﻷسرائيليون يحاسبون حكومتهم عن التقصير فى حربها زادت البورصه اﻷسرائيليه ٨% فى شهر واحد ووصلت أسعار أسهم شركات السلاح والهاى تك الى السماء..وبالتالى لم تسقط الحكومه..وبشكل ديموقراطى تم أستبدال وزير الدفاع الهاوى بأخر أكثر حنكه وتدريبا أستعدادا للجوله القادمه.
اﻷخطر واﻷكثر ألحاحا اﻷن هو هذا التداخل الحادث بين قطاع اﻷمن اﻷسرائيلى وبين مختلف مستويات المجتمعات الغربيه عموما وأمريكا باﻷخص..الشركات اﻷسرائيليه تعمل بشكل مباشر مع شرطه نيويورك..لوس أنجلوس..قطار أنفاق لندن..مطارات واشنطن..دالاس..هيثرو..ميامى.. أمن ملاعب وأستادات معظم المدن اﻷمريكيه..سواء من خلال كاميرات مراقبه عاليه الدقه..أو تدريب رجال اﻷمن على التعرف على اﻷرهابيين من تصرفاتهم..شركات اﻷمن الخاصه اﻷسرائيليه تحرس الضواحى الراقيه فى أريزونا ونيوأورلينز..الخبراء اﻷسرائيليون هم أول من يصل ألى أى موقع لعمليه أرهابيه من بالى للندن لمدريد..ولو لاتريد التعامل مع شركه أسرائيليه هناك واجهات أمريكيه مثل "انترناشيونال سكيوريتى انستراكتور" المكونه من ضباط مخابرات وحرس حدود أسرائيلين سابقين ومركزها فيرجينيا بالولايات المتحده
الحاصل
واﻷستنتاج المباشر لكل هذا
أسرائيل لاتريد ولاتحتاج ولا ترغب فى السلام مع جيرانها..القطاع القائد واﻷكثر ربحيه وحيويه فى اﻷقتصاد اﻷسرائيلى يدفع لمزيد من المواجهه ويتغذى على الحرب ضد اﻷرهاب التى لاتنتهى..وأستطاع التمترس داخل أهم قطاعات اﻷقتصاد الرأسمالى الحديثه..وتداخل لحد التماهى مع أجهزه أمن وأستخبارات اهم الدول فى العالم..وأصبح له تواجد وأهميه تقريبا فى كل أنحاء العالم ..ليصبح التهديد بحاله حرب حقيقه أو توتر دائم تمتص أى أمل فى التنميه خطر حقيقى وأكثر ألحاحا..
.ويبقى السؤال الخالد..
"مالعمل..؟؟"
بلا أجابه واضحه
.
26 comments:
معظم معلومات البوست جاءت من كتاب
Naomi Klein
"The Shock Doctrine..."
فى فصل بنفس العنوان..
وقراءات أخرى ومتابعه ﻷخبار اﻷعمال فى البى بى سى..
مساء الخير د. خالد ، أبو فارس؛
كل سنة وحضرتك طيب وبالف خير
عام جديد سعيد عليك وعلى كل احبائك
تحيات إسكندراني في بلاد الله الواسعة
أنا للأسف مشغول جدا اليومين دول ومع ذلك مقدرتش أقاوم رغبة يداي في أن تكتب لك أي شئ يعبر عن "استمخاخي" الكبير بمقالك.. ليَّ كتير مشاركات حابب أكتبها على المقال ده وهعمل ده فور توفر الوقت ان شاء الله.. بس أول ما يرد على ذهني يا سيدي هو لماذا نعاني من نقص شديد الحدة في عدد "الانتلجنتسيا" المعاصرة للزمن حول صانع القرار.. أنا اعرف كتير حوالين النقطة دي.. أفضل المحيطين توقف نموه الفكري زمان أوي يا سيدي أبو فارس.. الدكتور الباز مثلا عقل شديد اللماعية ولا شك عندي شخصيا في ذلك ولكن منظوره مش لاقط تطورات العش سنين الأخيرة.. أنا بذكر الباز لانه الوحيد اللي مش أمني حوالين صانع القرار المصري.. الباقيين منظورهم أمني معادي للاقتصاد السياسي الدولي بكل صوره غير الأمنية! اللي حوالين صانع القرار التاني في مصر للأسف "مُأدلَجين" بما هو أكثر من اللازم.. متابعين الدنيا صحيح بس من جانب واحد .. مش شايفين تجارب التنمية غير الغربية كويس.. يا دوب ابتدوا يبصوا عليها مؤخرا بزيارة محي الدين للمكسيك
للأسف لازم أنهي الآن بس وعد بالعودة
أشكرك بلا حدود على الاستفادة الشخصية التي تتسبب فيها لي ولغيري
..
تحياتي واحترامي
مساء الفل ياأسكندرانى..وكل سنه وأنت واﻷسره الكريمه بألف خير..خالد
****************
egy anatomist....
الله عليك ياصديقى العزيز..نقطه هامه
جدا..مجموعه صنع القرار من بيروقراطيه اﻷمن -بمفهومه الواسع طبعا-وتسيطر عليهم أفكار وأيديولوجيا تسربت لهم من تيارات الدجل السياسى سواء قومجيه أو أسلامويه..حتى وزاره الخاجيه المصريه العتيده والتى أنجبت د.صلاح الدين -وزير خارجيه حكومه الوفد اﻷخيره- وفوزى والزيات وفهمى..وحتى عمرو موسى..تحولت ألى ملحق لجهاز اﻷستخبارات..وتحول وزير الخارجيه المصرى لعسكرى مراسله لمدير المخابرات..وتقلص دورها الى التوسط بين حماس وفتح أو فتح وفتح..وكان الله ستار حليم..قرأه متأنيه فى التعديلات الدستوريه اﻷخيره رغم عيوبها..يمكن أعتبارها ترجمه لمحاوله تقليص صلاحيات الجناح اﻷمنى فى تركيبه صنع القرار لصالح "رجال اﻷعمال الكبار" وهذا -من وجهه نظرى- خطوه صغيره للأمام..انتظر تعليقك وباقى مدونتك ..تحياتى وأحترامى..خالد
كلام مهم بس للى عاوز يعرف او
لى مصالحه مش مرتبطه باسرائيل وامريكا مش عارف اناس اللى عملت الكويزيهمها تعرف الكلام ده اذا مكانتش عارفاه ويهمها ان الشعب يفضل عايش فى غيبوبه
دينيه او كرويه متفرقش
تحياتى وكل سنه وانت طيب والى القاء
كل سنه وإنتا طيب وحر يا د. خالد
عزيزي الدكتور خالد ابو فارس
كل عام وانتم بخير ايها الشخص الجميل
ولو اني لا احب ان اتكلم في السياسة يا باشا زي نجيب سرور ما قال
قالوا لي ليه بطلت تكتب في السياسة
فانا و اعوذ بالله من قولة انا احب اعلق على الموضوع المطروح لانه يبدو ظاهريا تحليلا و كلاما عمليا لكنه يحتوي على مغالطات كثيرة و ليس الامر متعلقا بك يا دكتور لكن مشكلة المحلل الراديكالي الامريكي هي انه لا يتعامل مع ما يقدم من معلومات بحرص
هو امريكي اكثر منه راديكالي
بداية موضوع اليهود السوفييت و تأثيرهم على الاقتصاد الاسرائيلي ليس فقط مغالاة شديدة في الاثر الحقيقي ولكن ايضا في ارقام الهجرة او الاعداد
وهنا يمكننا الرجوع مثلا لكتاب الدكتور عبد الوهاب المسيري و الذي يحتوي على احصائيات كثيرة صادرة من وزارات الهجرة والاسكان الاسرائيلية
بخصوص الاعداد الحقيقية والمتوقعة الخ
كان المتوقع ان يتجه اليهود السوفييت الى اسرائيل ولكن الفعلي ان الوجهة الاساسية لهم كانت الولايات لمتحدة و محاولة اسرائيل لجذب اليهود او الهجرة اليها فشلت بالرغم من مزايا المهاجر الخمس نجوم التي كانت تقدم
النقطة التانية هي فكرة شركات الامن وتطويرها و الخ بالرغم من وجاهة الموضوع اسرائيل لا تقدم حقا جديدا في هذا الصدد و المورد الرئيسي للسلاح في العالم هو الاتحاد الروسي و مافيا البلقان و التي يشاركها الكثير ممن يدعون انهم رجال اعمال من المصريين و العرب على اختلاف جنسيات هؤلاء
لكن رغم هذا يشهد الاقتصاد الاسرائيلي نموا كبيرا يعتمد اساسا على المعونات
والاهم على الدور الذي يؤديه الاقتصاد في الدولة العضوية
بمعناها العام هنا
بمعنى اقتصاد اسرائيل اقتصاد حرب مستمر
بالرغم من ان الحرب تؤدي الى شله لانها تتضمن استخدام العمالة الماهرة باقصى درجة في الدور العسكري الا انه على مستوى آخر تؤدي الحروب القصيرة والمستمرة الى انعاش الاقتصاد عبر تدفق المعونات وزيادة الاستثمارات من الشركات الامريكية في مجال الانفاق العسكري
يعني من دقنه وافتل له
بالنسبة للعمالة العربية
كان العامل الاساسي لتقليل العمالة العربيةرغم ان اعدادها مازالت كبيرة جدا و هي التعنصر الاساسي في خدمات كثيرة جدا يرفض الاسرائيليين الذين ينظرون لانفسهم على انهم اوروبيين اداءها
هو استيراد عمالة من رومانيا ودول جنوب شرق آسيا بل والصين مؤخرا)النقطة الاهم هنا هي افقار غزة الذي نتج اولا عن ان اقتصاد القطاع كان قائما على الكازينو و على دخول الاسرائيليين للعب القمار هناك وهو ما اوقفته الحالة الامنية المتردية
النقطة الثانية هي تحول القطاع الى مصدر ازعاج امني مستمر وتكلفة استمرار الاحتلال فاقت الفوائد القادمة منه ومن ثم الاغلاق
وهو ما تأكد ايضا على ايدي قيادات حماس التي تبحث عن السلطة و ليذهب الشعب الى الجحيم
بمعنى ان التحول الذي طرء على اهتمام العالم بالحرب على الارهاب الخ لا يؤدي الى ازدهار اقتصاد اي شيء
والحقيقي ان الصناعات الاكثر ربحية حاليا هي صناعات التعدين و الموارد الاولية التي ارتفعت اسعارها بشكل كبير كما كان الجميع يتوقعون عدا خبراء الاقتصاد المصريين والعرب الذين يعيشون في غيبوبة البلاهة المستمرة و يتكلمون دائما بالفاظ مكرورة عن الهاي تك الخ
لننظر لميتال الهندي او تاتا او شركات التعدين في استراليا و جنوب افريقيا و بوتسوانا
يعني الاقتصاد اللي بجد يا عم خالد
طيب ايه معنى الكلام الفارغ اللي انا قلته؟
معناه ببساطة ان فيه حل وان الاتجاه نحو هذا الحل لابد وان يحدث
ازاي نفهم ضرورة الحل وايه هو الحل ده موضوع لمقال مطول
والاهم اني بحضر تدوينة في هذا الموضوع هي ترجمة وتعليق على قمال لجيمس بتراس وهو استاذ علم اجتماع ماركسي امريكي
يعني استنى شوية وحتلاقي مايسرك
وارجو انك متزعلش
و الاهم اني مكونش طولت عليك
يا راجل خلتني ارجع اكتب في السياسة
كل سنه وأنت بألف خير ياحسام..دائما متفائل..تحياتى..خالد
يادى الهنا يادى الهنا د.أسامه عندنا..حللت أهلا ونزلت سهلا..أما بعد..لاأظن أنه الواجب على كاتبه راديكاليه كنديه مثل "ناعومى كلين" أو الرفيق "جيمس بتراس" أنهم يقدموا حلول لمشاكلنا..المفروض أحنا اللى نبدع تلك الحلول.."كلين" فى كتابها الموجه أساسا للقارئ اﻷمريكى تحاول رصد تطور أهم قطاعات الرأسماليه الحديثه وأكثرها ديناميكيه..بعد كتابها المهم
No Logo
وفى حوالى ١٠-١٢ صفحه من أصل ٦٠٠ وشويه بتقول لمواطنها فى أمريكا الشماليه خللى بالك لنبقى زى أسرائي
أوم أيه؟؟
العبد لله لقى معلومات تستحق أعرضها يمكن نخرج من أدبيات تيارات الدجل السياسى سواء قومجيه أو أسلامويه..الفكره ببساطه أن أسرائيل بناء على تطور مجتمعها الديناميكى الداخلى مش محتاجه ولا عاوزه سلام مع جيرانها اللى هما أحنا..وأن أحنا ساهمنا بشكل واضح فى التطور ده..
معلهش لو سمحت لى د.المسيرى بيقول اليهود الروس اللى وصلوا أسرائيل كام.."كلين" بتقول حوالى المليون..وده يساوى ١٨% من تعداد اليهود فى أسرائيل اﻷن..أو مايساوى تقريبا عدد العرب اﻷسرائيلين..المسيرى بيقول هم كام..نص مليون ..ربع..خمس..يعنى ١٠%
"فقط" دوله ٤,٥ مليون تستطيع أستيعاب هذا العدد فى سنوات قليله أليس هذا دليل على ديناميكيه المجتمع..؟؟ومعلهش برضك أزاى مالهومش أثر ع المجتمع اﻷسرائيلى..اﻷنتخابات اﻷخيره اليهود الروس دبحوا اليمين التقليدى اﻷسرائيلى..خامس كتله فى الكنيست (١١ نائب) هم يهود روس لزم..حزب "أسرائيل بيتنا" حزب يمينى علمانى روسى رفض المشاركه مع حزب شاس الدينى ف الحكومه..وغير ديناميكيه العمليه السياسيه فى أسرائيل..الوب سيت بتاعه بالروسى..وحسب تقديرات المراقبين صوت له حوالى نصف اليهود الروس..يعنى ١١ نائب من أصل ١٢٠ ف الكنيست صوت لهم نصف اليهود الروس يبقى بعمليه حيسابيه بسيطه اليهود الروس حوالى ١٨-٢٠% من اللى صوتوا فى تلك اﻷنتخابات..العرب حوالى ٢٠% لهم كام عضو .."أتنان" وحد يصحح لى معلوماتى لو غلط..برامج ميكروسوفت ٣٠% منها تم تطويره فى أسرائيل بص ع السيت ده http://www.science.co.il/SoftwareCo.asp
هذا هو الجزء العلنى..
التعدين وميتال وألكو لاأظن أنه اﻷقتصاد اللى بجد يادكتور..ماأحنا عندنا أهم ماده خام ف العالم البترول ضرب حاجز المائه دولار اليوم..فين بقى اﻷقتصاد اللى عندنا..حتى هذه اللحظه لو عطست أمريكا أصيب العالم كله بالبرد..وأزمه الأئتمان العقارى اﻷخيره أكبر مثال..
اليهود الروس اللى أتخذوا اسرائيل مجرد منط للوصول ألى أمريكا وكندا لازالت لهم علاقات قويه بأسرائيل..تصدق يادكتور أسامه أنه فى الدائره الضيقه جدا المحيطه بى أعرف شخصيا أتنان يهود من أصول أوربيه..واحد روسى واﻷخر بولندى ..يعملان فى أهم مراكز الهاى تك..رجل هنا ورجل ف أمريكا..وكل كام شهر ف أسرائيل..ولاأظن أنهم هناك للفسحه..!!!!الطريف أن النت مليانه دعوات ﻷعدام وخصى وعلى اﻷقل سحب الجنسيه المصريه-بلا وكسه- من العشرين ألف بائس مصرى بيلموا الزباله ف أسرائيل أحسن دول بيدعموا أسرائيل و بيهددوا أمن اﻷمه..يالله..حد واخد منها حاجه..المهم أنت أزى مزاجك..تحياتى..خالد
والنى عشان خاطرى حط
egyptian hi tech companies
كده على جوجول..وشوف حايطلعلك أيه..!!؟؟
يا عم خالد انت باين عليك زعلت
يا دكتور الموضوع مش محتاج زعل
ببساطة كلام سعادتك بيأكد اللي بقوله
يعني سعادتك البترول اللي هو اقتصاد بجد زيه زي التعدين والموارد الخ
هو السبب في موضوع الازمة بتاعتنا
يعني سعادتك احنا
في ارضنا في بترول
بس احنا معندناش سيطرة على البترول ده
ببساطة شديدة
كل الكلام اللي بيتقال عن شرب بتورل العرب كلام فارغ ومن زمان بيقولوا لنا حنعمل كده
لا شربناه و لا يحزنون
ومش بس كده
احتلوا العراق عشان بترول العراق
يعني ببساطة مش عشان الهاي تك
مش كده ولا ايه
ولا عشان السيكيوريتي
ولا عشان الديمقراطية ولا البدنجان
لا اقتصاد بجد
يعني مواد حقيقية
مش هوا
بالنسبة لموضوع الامن والميديا والهايتك
فالمشكلة مش عندنا كام شركة ولا معندناش
يا دكتور
المشكلة ببساطة ان الموضوع من اساسه هجايص
يعني ببساطة الصين بتضرب كل اللي بيطلعوه في امريكا م الهايتك
ومحدش قادر يقول لها تلت التلاتة كام
لكن لما الصين لقيت ان في مشاكل في الفوسفات في لهند وهي دايما مهتمية بضرب الهند
راحت موقفة التصدير
لان الفوسفات محدش يقدر يضربه يا ابو فارس
زيه زي البترزول والتعدين
حاجة بجد!!اما عن الحل فمش من عند بتراس يا عمنا
بتراس بيقدم رؤية مهمة لموضوع اليهود وتأثيرهم في امريكا
يعني الحل برضه بتاعنا
محدش قال غير كده
الزعل بيخللي الواحد ميشوفش المكتوب يا دكتور
نرجع بقى لموضوع ليهود الروس
محدش اختلف على ديناميكية المجتمع الاسرائيلي بالعكس جزء من عضوية الدولة في اسرائيل هي قدرتها على الاستيعاب السريع
بس جزء اهم من استقرار المجتمع هناك هو المشاكل اللي بيعاني منها
يعني العوامل كلها موجودة يا دكتور
مشكلة برضه اخوانا الراديكاليين بتوع برة هي انهم بيشوفوا العالم من عندهم وبس
طيب يعني عمنا تشومسكي يروح لبنان يأيد حزب الله واحتفاظه بسلاحه
يا راجل هو شايف الموضوع من عنده
مش شايف التداخل بين سوريا و ايران ومشاكل المنطقة متعددة الطبقات
المشاكل مش المنطقة طبعا
المهم
مفيش زعل يا عم خالد
بخصوص اليهود لروس محدش قلل من تأثيرهم بس برضه محدش ضخم منه
يعني نحطهم في حجمهم
وده يخللي الصورة تطلع ادق برضه
على فكرة هما بيأثروا جدا في عملية الاستقرار الاجتماعي داخل اسرائيل بالمعنى المجتمعي
يعني زي ما هما عامل ايجابي في تطار البعد الديموجرافي
هما عامل سلبي في البعد المجتمعي بيزيدوا من المشاكل مع اليهود الشرقيين و بيوضحوا الجانب العنصري الرهيب في بنية المجتمع
وجزء من اتجاه اسرائيل الى ايجاد حل
يرجع الى هذه النقطة تحديدا اي المشاكل الداخلية بتاعتها
وده واضح في تصريحات اولمرت الاخيرة
ودي النقطة اللي اختلف مع سعادتك فيها
لا اسرائيل عايزة تحل الموضوع
بس ازاي مشكلتها
وده الموضوع اللي بنتكلم فيه الآن
ماشي يا عم
بس ارجوك من غير زعل
يا باشا
اسامة
د.أسامه زعلت أيه بس ياراجل هو أحنا بنتكلم ف الأهلى والزمالك,,زائد أنى طلقت اﻷيديولوجيات من زمان..الموضوع بالنسبه لى بقى معلومات محدده وفهم تلك المعلومات بمنهج علمى واضح..مافيش لازعل ولايحزنون..أدى أحنا بنتكلم..بص هو صحيح كل شئ مرتبط ولكن لابد من فصل الخطاب حين الخطاب عشان مانتوهش..واضح أن سعادتك بتقول أن اﻷقتصاد الحقيقى هو الصناعات التعدينيه والتحويليه واﻷستهلاكيه..وأنا بأقول أن القطاع اﻷكثر حيويه وربحيه وقدره على التطور هو اﻷقتصاد الحديث
virtual economy
وجزء منه العامل اﻷساسى فى اﻷقتصاد الرأسمالى الحديث هذه اللحظه وحتى أشعار أخى هى الشركات المتعدده الجنسيه..أن أحذيه نايكى وتليفزيونات سونى تصنع ف الصين لايعنى ألا ذلك وبالذات أن اﻷسواق اﻷساسيه هى الغرب وأمريكا..أندفاع الصين وبعض دول العالم النامى للتصيع كثيف العماله هو مارفع من قيمه المواد الخام..سواء ف بتسوانا لاند أو سهوب كندا..الفرق يادكتور..أن بتسوانا والكونغو لازال أهلهم بياكلوا دود ف حين أن روسيا -معتمده على تدفق موارد نتيجه أرتفاع أسعار نفس المواد الخام-أستعادت مكانتها كدوله كبرى وقدرت تدافع عن مجالها الحيوى وتهش أمريكا من وسط أسيا..وﻷن اﻷمبراطوريه اﻷمريكيه لديها فائض قوه لابد من أستعماله فانقضت على المناطق ذات الفراغ اﻷستراتيجى زى البلقان لحد ما والشرق اﻷوسط بالتحديد..وﻷجبار العالم على اﻷستمرار فى أستعمال الدولار كمستودع قيمه وبالتالى اﻷستمرار فى تمويل العجز المحاسبى الرهيب للأمبراطوريه..الصين اليوم هى أكبر داعم للدولار اﻷمريكى..ترفع اليوان تشترى بترول أغلى ..تدفع دولارات أكتر..تزداد ربحيه شركات البترول (أيكسون أرباحها سنه ٢٠٠٦ كانت ٦٠مليار دولار..أرباح وليس حجم تعامل)غزو العراق تفصيله ف الهلمه دى كلها وأنت سيد العارفين..أسرائيل برضك تفصيله صغننه ف الهلمه دى برضك..أحنا اللى شايلينها على راسنا وزاعقين..أسرائيل -تانى- ولأنها نجتمع ديناميكى أستطاعت الوصول ألى معادلة.. توتر وحرب مستمره ونمو أقتصادى فى نفس الوقت..ده كل اللى عايز أقوله..وأحنا لاعارفين نهزمهم ف حرب ولانعمل معاهم سلام..أسرائيل فى هذه اللحظه تستطيع فرض شروطها والحصول على نوعيه السلام اللى على مزاجها..فأن لم يكن فالسيف واﻷف ١٦ بيننا..وخلينا أحنا مستنين الشجر ينطق أو جموع الشعب العربى تزحف..بامناسبه شكرا على السيت بتاع اﻷفلام..قشطه يادكتره..تحياتى..خالد
عزيزي الدكتور خالد.. أولا أنا مستمتع بقراءة نقاشك مع الدكتور أسامة وسعيد بتعرفي على مدونته أو قل صومعته الفكرية المرموقة
ثانيا أنا موافقك في النقاط التالية واسمحلي الخصها لمزيد من التوضيح وتأكيد الفهم المتبادل
أولا
الكارثة العربية أو المصرية الكبرى هي في عدم وجود أي رؤية مختصرة واضحة حول احنا عايزين ايه.. عايزين نبقى ايه لما نكبر!! ظابط ولا دكتور ولا مهندس ولا حرامي ولا إيه.. احنا زي الهوا يا حبيبي.. يوم عايزين نبقى ثوار أو ظباط ويوم عايزين نبقى مهندسي وعلماء ويوم نبقى مهلباتية وبطيخ بالجبنه.. أي حاجة والسلام.. وطبعا أسباب ده واضحة.. الجهل مش الخيانة.. الجهل.. الجهل بكل محتوياته وآثاره.. الجهل اللي هو أخطر من الخيانة والغباء وكل شئ.. الجهل يعني عدم الواقعية أو حتى قراءة الواقع.. عدم تقبل فكرة ان نفس الشئ ليه كذا منظور.. وهكذا
ثانيا
اسرائيل بلا شك صانعة رؤى متجددة.. للأسف.. ظروف نشأتها وضعف تماسك مجتمعها يجعله حتميا أن تبدع في صناعة الاستراتيجيات التي تضمن البقاء والتماسك.. وهذا أراه متجددا وحيويا وديناميكيا
ثالثا
الاقتصاد الحقيقي في رأيي هو أيضا الاقتصاد الجديد أو الفيرتشوال ايكونومي.. لا يعني هذا أن التصنيع مش مهم! أو أن السلع الحقيقية الملموسة باتت بلا قيمة.. ففي النهاية ينتهي اقتصاد المعلومات الافتراضي بالوصول لمنتج مادي.. لكن المرحلة الحالية من الرأسمالية المعولمة بدأت عندما انتقلت معدلات الربحية العالية من الصناعات المتقدمة إلى صناعة التكنولوجيا.. الآن لا قيمة لما تنتجه الصين من منتجات صناعية حديثة إذا لم يشترها أحد! ولا قيمة لها إذا لم يمارس الاقتصاد الفيرتشوال عمله بكفاءة ومزيد من الكفاءة.. هي دوامة سريعة خطيرة في رأيي لكنها واقع لا أعلم لمتى سنتجاهله
رابعا أو ثالثا
أنا شايف إن مصر السنتين اللي فاتوا لأول مرة فيه تجانس في الحكم.. مش كامل طبعا.. لسه العادلي مش راكب مع رشيد.. لسه جمال مش مصدق وجود كائن حي زي الشاذلي.. لسه الريس نفسه مش فاهم الواد الصغير درويش بتاع التنمية الادارية والهيومان ريسورسز ده.. لسه المجتمع المدني مش مصدق نفسه.. لسه الطبقة الوسطى بتمارس هوايتها التاريخية في الصراخ حتى انقطاع الصوت وانتاج المرثيات والملاحم البطولية.. لسه تيارات الدجل السياسي على رأيك ماسكة الساحة كويس.. شفت حضرتك الدكتور زويل والسير مجدي يعقوب.. في مصالحة حقيقية مع المثقف بتحصل.. مش عارف ازاي.. بس عارف ان زويل اللي رفض استقطاب المعارضة ليه مش هيشترك في تمثيليات حكومية.. السير يعقوب مش هيبقى بارافاه لنظيف.. ناقص ان الناس تتحرك شوية عشان تخلي الحكومة تكمل غصب عنها.. ولو كانت بتمثل نقلبالهم جد.. بغض النظر عن صعوبة تطبيق شيكاغو في مصر.. أراها أقرب شئ للواقع.. مش موافق عليها انا راجل بتاع سوشال ديموكراسي.. وفي ناس زيي أنا عارف بيحاولوا يلجموا النيوليبرالز المصريين شوية.. بس المهم ان باقي اعمدة المجتمع تتحرك شوية.. تفهم الاوضاع الجديدة وتدفع في الاتجاه الصح بدل تشتيت الجهود اللي مش بيفيد غير الظلاميين بكل أنواعهم
يا دكتور انا سعيد بشكل مطلق للتعرف على عقلك وآرائك
..
تحياتي واحترامي
صباح الفل يا دكتور خالد يا حبيبي
بس اوعى تكون زعلان ده اولا
ثانيا مش ممكن نتكلم في موضوع الاهلي والزمالك لسبب لان احنا الاتنين زمالكاوية
يعني من الناس اللي تحب تعذيب نفسها بتشجيع النادي الصعب ده
يالا مكتوب على رأي عمنا باولو كويلو
نرجع بقى للكلام الابيح يا جميل
انا جيت اتكلم لقيت الاستاذ
egy anatomist
كاتب رد مهم
يعني لازم الواحد يرد على الاتنين
لان الحوار شيق
طب انا حبتدي اولا بتوضيح نقاط الخلاف بيني وبين سعادتك وبين الاستاذ
egy anatomist
اولا
انا اعتقد ان اسرائيل تسعى الى الحل السلمي لامور عديدة منها التكلفة الاجتماعية ومنها الكلفة الاقتصادية ايضا ومنها الضغوط الخارجية الامريكية تحديدا
ومنها ان العرب غيروا بعض الشيء من اساليبهم و استطاعوا تكوين شيء ضاغط بشكل ما
ومنها ايضا تزايد الخطر الايراني وهو امر ادى لتزايد الاسباب السابقة و تفاقم تأثيرها
كل سبب من دول عايز كلام كتير
لكن ببساطة التكلفة الاقتصادية لانها نقطة قد تكون غائمة غامضة
التكلفة الاقتصادية لحالة التوتر المستمرة عالية جدا بالرغم من معدلات النمو المرتفعة العائدة الى مزيد من المعونات و التبرعات الخ
اكثر من عودتها الى اقتصاد انتاجي حقيقي في اي مجال
تؤدي الى تآكل معدلات النمو في انفاق امني مرعب
بمعنى ان الاستثمارات التي تصرف في مجال التشييد معظمها يذهب الى الامن
ناهيك عن تكلفة الحواجز الامنية و التعطيل والعنصر البشري الذي يصاب باحباطات متزايدة تؤدي الى انخفاض مستمر في الانتاجية الخ
هنا يطرح التساؤل نفسه
كيف يمكن الحصول على افضل وضع تفاوضي مع اسرائيل وما هي حدود او سقف الحد الاقصى او الحد الادنى كارضية؟؟
هنا نخرج من عملية التحليل الى اعتبارات لوجستية تنفيذية
لا تعنينا في هذا المقام
بمعنى لسنا في مجال تقديم حلول او افكار تنفيذية لان هذا ليس مجالنا ولاني اعتقد ايضا ان هذا من آفات الثقافة العربية وهي تقديم الحلول التبسيطية دون تحليل ولا بحث ولا اي شيء
بطيخ بالجبنة على رأي
الباشا
egy anatomist
نقطة الخلاف الثانية هي في تقديري
مسألة الاقتصاد الحقيقي و الهاي تك او الاقتصاد المعلوماتي
الاقتصاد المعلوماتي او الفرتشوال او الافتراضي
مشكلته الاساسية انه بمرور الوقت بينكشف
يعني بيقع
انتهاء البابل بتاعة الدوت كوم اكبر دليل
نشوف مثلا ياهو دلوقتي وجوجل
بل ومايكروسوفت نفسها عندهم بورتفوليو مختلف تماما عن السابق
وده كان جزء اساسي في انقاذهم من الانهيار الذي كان سيحدث حتما
المواد الخام ارتفعت اسعارها اساسا لان ده الطبيعي
محاولات تحجيم الاعتماد عليها فشلت فشلا ذريعا
و الموارد في النهاية محدودة
وكل الكلام بتاع اقتصاد مدرسة شيكاغو مع احترامي لكل من يراها صح
ثبت فشله حتى في امريكا وابسط دليل على كده اجراءات الحماية التي اتخذتها الادارة الامريكية في مجال الحديد
وطبعا الدعم المستمر الخ
اتكلم في الموضوع ده باستفاضة تشومسكي وهرمان و بتراس وحتى فردريك جيمسون
طبعا انا باستعين بنقاد راديكاليين على اختلاف تصنيفهم لكن ما باليد حيلة مبحبش النيولبرالز وفي تقديري انهم فاشست و عنصريين
نرجع لموضوع الاقتصاد الحقيقي
لانه اساس في فهم نقاط القوة ونقاط الضعف سواء عندنا او عند اسرائيل
التعدين بمافي ذلك البترول اصبلح صناعة رائجة جدا وتتحرك بسرعة في سلم الصناعات الاكثر ربحية
الدهب في مصر مثلا هناك اكثر من شركة تبحث عن الاستثمار في هذا المجال
وهناك شركتين على الاقل ووفقا لآخر المعلومات اللي تحت ايدي بدءتا في الانتاج
واحدة كندية والتانية استرالية
استخدام التطور التقني ادى الى ان الخام لا يحتاج الى تركيز كبير لكي يكون مربحا وايضا ارتفاع اسعار المواد الخام بشكل مذهل ومطرد
وده على كل المستويات وفي كل انواع المعادن
والمثال المضروب سابقا في مجال الفوسفات ممكن ايضا استخدامه حيث وصل طن الفوسفات مؤخرا الى 70 دولار بتركيز اقل من تركيز المغرب
بينما في بداية العام كان تركيز المغرب (32%)تقريبا
يباع بسعر 35دولار للطن
والهند بتشتري فوسفات من اي حتة
عندك كمان الاسمنت و المنجنيز الخ
وطبعا البترول مثال صارخ
انا لا اقل من صناعة الامن و لامن الانفوميشن
بس بلاش نديها اكبر من حجمها لاسباب عديدة اولها في تصوري ان الموضوع مش مستاهل واهل مكة ادرى بشعابها
تانيها هي ان الاستثمار فيها غير مأمون و غير ممكن الوصول الى معدلات الصين في التقليد او الهند او باكستان مثلا
النقطة الخلافية التالتة
هي في تقديري مسألة مصر و المشكلة
اعتقد ان مشكلة مصر تكمن في ان هناك هوة او مسافة مرعبة بين ما يقال ويفعل وبين واقع الامر
يعني بالبلدي مفيش حاجة جد
و قضية عبد المالك الاخرانية في قطاع الصناعة توضح الموضوع ده
وكمان الافلام وليه بتتعمل و البرامج الخ
يعني مفيش حاجة بجد
حتى المستثمرين مش بجد
يعني غسيل اموال و تدوير وعمولات الخ
تحت اسم الاستثمار والرياضة والفن وكل حاجة في النسق ده
انا كده طولت قوي
معلش وارجو محدش يزعل
ادينا بنفضفض
د.أسامه ياملك..أهو كده قول ياعم..أظبط إيقاع الكلام..على فكره تانى أحنا مش مختلفين كتير..أولا ماحدش هنا بيعز النيوليبرالز أو أتباع مدرسه شيكاغو المشكله أنهم هم اللى مسيطرين وهم اللى بينظروا للحركه اﻷقتصاديه..ونحن ننتقدهم من خلال الفهم الصحيح لما يقولوه..اﻷقتصاد الرأسمالى مر بهزتين محترمتين فى السنوات اللى فاتت..سنه ٢٠٠٠أنفقعت الدوت كوم ببل..وكان فيه ناس كتير متوقعه كده والشطار هم اللى سحبوا فلوسهم ف اللحظه المناسبه..فى حين والله أعرف شخصيا ناس هنا لسه محتفظه بأسهم زى "نورتل" من أيام ماكانت ١٢٠دولار واليوم تمنها حوالى ٣ فقط تخيل..زائد بطاله وخراب ديار بالعبيط..الهزه التانيه نعيشها هذه اﻷيام المباركه..وهى أزمه اﻷئتمان العقارى فى أمريكا..طلع أنه مافيش بنك ولا مؤسسه ماليه ولامحفظه أستثمار الا ومستثمره فى سوق العقار اﻷمريكى..وحاليا هناك أزمه أئتمان مستعره ف العالم كله..أمريكا سابت الدولار يقع والبترول يطلع وأستطاعت تصدير اﻷزمه لكافه أنحاء العالم..ماعملتش زى اليابان لما نفس الموقف حصل عندها واﻷقتصاد اليابانى بجلاله قدره تقلص لسنوات متتاليه..أمريكا لازالت حتى اﻷن هى ضابط أيقاع الحركه اﻷقتصاديه ف العالم..فى داخل اﻷقتصاد اﻷمريكى القطاع القائد اﻷهم اﻷكثر ربحيه هو مانسميه بأقتصاد المعلومات..الصين تعمل عجل ولعب أطفال..الهند ملابس..بنجلاديش مشابك غسيل..كل ده مش مهم..ألا فى وجود مشترى..وهو أمريكا والغرب..اﻷداره الأمريكيه أقتطعت من برامج الرفاه اﻷجتماعى وحولت الفلوس للأمن والهوم سكيوريتى وقطاع الهاى تك..اﻷرقام بتقول ٦٠٠ مليار دولار من ٢٠٠٢-٢٠٠٦ فقط..حط عليهم السلاح دخلنا بالراحه ف الترليون..هو ده مربط الفرس..أيه يعنى الفوسفات تمنه يزيد والا الحديد..ماهو تمنه لازم يندفع بالدولار..يبقى الهند لازم تدفع ﻷمريكا فى النهايه تمن الفوسفات اللى بتشتريه فى شكل أستثمار أو سلع عينيه حتى تستطيع الحصول على الدولار..ومش حاتاخد ورق بنكنوت ف شنط..كله ع الورق يادكتور..كله ف الفضاء التخيلى..كله ع النت..هو ده أقتصاد اليوم..نقطه أخيره وأقوم أروح الشغل..الملكيه اليوم أصبحت وهميه..الصين تشترى شركات التعدين اﻷستراليه والكنديه يعنى أسه..ولا حاجه..تحويل فلوس وهميه من الفائض التجارى لحساب فى بنوك أمريكيه لشراء شركه كنديه..اﻷداره زى ماهى..والحكومه السينيه اﻷشتراكيه أشترت نيابه عن الشعب الصينى شركم ب٣مليار دولار..المدير التنفيذى لسه أسمه جون وعمر ماحيبقى وانج..بالعكس عم جون دلوقت أصبح عنده حريه حركه محترمه عايش زى الملك طياره خاصه وماساج وقراراته مابتعديش حتى على المساهمين ﻷنهم أصبحوا بنوك وحكومات وصناديق أدخار وكله ع النت وكله ف الهوا...الحوار معك ومع أناتومست منشط ومجرى للدم..ومافيش زعل ياأبا يحى..ياحبيب قلبى يازملكاوى زى حالاتى..أحنا لسه بنحاول نفهم عالم بيتغير كل ثانيه وعمر حوار موضوعى مع أنسان واعى محترم زى حضرتك يزعل أبدا..نهارك قشطه بلدى وعسل نحل مصفى..خالد
egy anatomist
هناك نقاط أتفاق كثيره بيننا..والحوار معك هنا أو فى مدونتك المحترمه مثير ومنشط للعقل..شاكر على كلماتك الرقيقه..وأتطلع ﻷستمرار الحوار..
د.أسامه القفاش أولا وقبل كل شئ صديق عزيز جدا..ومثقف موسوعى..وأنسان جاد جدا فى كل مايفعل..حط على كده خفه دم أبن بلد أسكندرانى مجدع توصل لخلطه نادره..وهو أهم من ظفرت بصداقتهم من خلال التدوين..والنقاش بيننا لاينتهى مثل الغناء فى دار أبن أبى ربيغه..سواء ع النت أو مباشره..وهو كما علمت زملكاوى زى حالاتى من حمله شعار يابخت من بات مغلوب ولابات غالب..تحياتى وصادق مودتى..خالد
بما إني لسه مقريتش كويس كلام الدكاترة المحترمين خالد وأسامة.. وبما إني لسه في الشغل وقدامي ساعات كتير على ماقرا واكتب.. لكن عيني وقعت على كلمة الزمالك.. فقلت يا دي الحظ الاسود.. هوه هيلاقيها منين يا ربي ولا منين.. يعني الأهلى اسرائيل ونيولبرالز وشيكاجو وتعدين وهاي تك و.... زمالك؟! هل ده قدره أم قدر عشاقه اللاعقلانيين من أمثالنا.. وبعدين أنا دايما بقول لو عايزين البلد دي تتقدم الأهلي لازم يحكمها.. سياسيا مش رياضيا.. هوه فيه حد في الدنيا ناجح زي الأهلي؟ والله ولا يفرق معاه نيو ايكونومي ولا فيرتشوال ولا إسرائيل ولا جي فور ولا جي إيت ولا الجن الأزرق حتى:)) ده حسن حمدي ده يقدر يحكم الكون كله بقوة السلاحف أقصد قوة الأهلي العالمي الخارقة O
على كل حال
انا كمان من الفئة الباغية على نفسها
..
تحياتي واحترامي حتى نلتقي قريبا
اسمح لى من منظورى المتقعر والمنبطح طبقيا أقول رأيي
شكراااا" يا عزيزى
حل المعضلة دى يتلخص فى كلمتين من وجهة نظرى
اعطاء كل ذى حق حقه
أو
قطع ايد السارق والتعامل العادل مع رأس المال و احترامه وابعاده عن جيوب المهلباتية
علشان نلاقى اقتصاد قوى
لازم اولا نحترم الانسان اللى بيصنع و بيجيب المال ، ونعلمه يحترم حق الدولة فيما تقتطعه منه من ضرائب
وتوظيف الضرائب فى اماكنها الحقيقية ببلداننا بعيدا عن الطرق الخلفية لجيوب الملتصقين بالحكم ومن والاهم
ونضع كل واحد فى مكانه الحقيقى
ونستغل مواردنا البشرية بكل السبل
مش طفشها برة البلد و بلدان برة تستفيد على قفا عمالتنا؟؟؟
يعنى الليلة دى محتاجة انسان أولا يديرها
مش حراميــــــــة
هاتلى وزير او رئيس وزرا برة فى بلدان العالم الآخر واتهرب ولو يوم واحد من ضرائبه
أو حتى لعب فى اقراراته الضريبية
بيعتبروها عار فى حقهم
لأنهم اتعلموا يحترمواالبلد اللى بتحترمهم
وبالتالى كله بقا يعمل لأجل الوطن
ثم لأجلهم هم انفسهم
دة رأيي من منظورى الطبقى البحت
كل سنة وانت طيب
وميرى كريسماس
:) :) :)
..........
ماشية معاكم يا سيدى انت و أناتوميست
بقيتوا صديقى العزيز ورفيقى الغالى
اللهم لا حسد
نيااهااهاااا
بأهزر بس
تفاريح و غلاسة لزوم السنة الجديدة
تحياتى
استدراك
قطع يد السارق دى مش معناها قطع قطع بالمعنى الحرفى
دة تعبير بلاغى ليس الا وان كان قاسى
فقسوته بمقدار قسوة الفعل
وسرقة حقوق المحتاجين وخلق أجيال معوزة وفقيرة ومعقدة كما هوحالنا الآن لا يضاهيه قسوة
مية مسا يا ابو فارس
كل سنة وأنت واسرتك بخير مع كل التمنيات بعام جميل
بخصوص اللقاء في القاهرة ستجد على مدونتي عنواني الإلكتروني يمكننا التواصل والاتفاق على طريقة ومكان اللقاء
على مدونتي الأن تجربة شارفت على اكتمال خطوتها الاولى، ادعوك للمشاركه فيها
تحياتي
مساء الخير يابوفارس
كان نفسى اشارك فى الحوار الجميل
بس التركيز اليومين دول مش قد كدة
عامه الايام ايه بس احنا فى مصر لاسف الى ملح اوى اليوميين دول اننا نعيد صياغه شكل ادوله تبقى بلد بشكل حقيقى تبقى وطن قابل للحياه
مش بلد طارد لاهله الناس نتهرب منه بيهربوا من موت محقق الى موت محتمل فى رحلات جماعيه
او بيهربوا لاسرائيل
الحوار مع احترامى وتقديرى لمحتواه اا انه بالنسبه لنا هنا هو رفاهيه لانستطيعها مع تحياتى وتقديرى لكل المشاركين فيه
وكل سنه وانت طيب ياصديقى والى اللقاء
صباح الفل يا د.خالد يا
جميل يا حبيب قلبي و مفتاحه
يا ابو فارس انت عارف من زمان ان الواحد بطل يكتب في ام السياسة وخصوصا ان الثورة مستمرة يا جماهيرنا يا حرة والكلام يا اما ثورة حتى النسر او ندال ندال ندال
طب فين الجد هنا؟؟
لكن الحوار مهم وشيق
و اتساع الدائرة المعارفية من المعارف او الصداقات لا يحدث الا عبر الحوار
و يؤدي بدوره الى اتساع الافق المعرفي وهو امر ضروري للفهم والتفسير الذي هو خطوة اولى لفعل التغيير
نرجع للكلام الابيح
في نقطتين في مداخلة سعادتك يابك مهمين جدا في تقديري في الحوار ده
اولهم ظاهرة والثانية مضمرة
يعني واحدة نايمة وواحدة قايمة على رأي عم جحا
طب الظاهرة ايه والنايمة ايه؟؟
الظاهرة هي التركيز على الهاي تك و اعتباره الاقتصاد الاساس
طب نشوف كده
شركات امريكا العملاقة الاساسية؟؟
هاليبرتون..اكسون...جنرال موتورز الخ
حتى عملاق الهاي تك حتلاقيه سعادتك بجد
يعني منتج مش سوفت وير لا كمبيوتر وده اي بي ام
على فكرة ده مش كلامي برضه ده كلام الحاج بيل جيتس نفسه لما الانتي تراست حاصره
طب الانتي تراست حاصره ليه؟؟
هنا مربط الفرس
الايبي ام وشركاتها الحلوين اللي زي هناء وشيرين
طماعين وبيشتغلوا بمبدء البحر يحب الزيادة
الحاج جيتس اخضر ميعرفش الالاعيب حاسس بروحه ومصدق انه مش عارف ايه
حبة من التأديب تصلح المعدة
هو نفسه قال
اي بي ام بتجري ورايا
ده احنا ولا قطرة في محيطها
طبعا الراجل مقالش كده بالضبط لانه ميعرفش عربي ومش ابن بلد
لكن الدكتور صالح الشهابي الصديق الجميل كتب عن الموضوع ده بتفاصيل جميلة جدا في جريدة القاهرة لما كنت ماسك القسم الخارجي هناك
طب ايه الغرض من كل الكلام ده؟؟
الغرض التفرقة بين الاقتصاد الحقيقي الذي يؤدي لتراكم رأسمالي حقيقي بمعنى سلع و موارد الخ وبين اقتصاد فيرتشوال على الورق بس
وفي الهوا
وكله الاعيب مالية و فرد عضلات و فردة على الدول زي ما سعادتك تفضلت
يعني امريكا زي ما قال تشومسكي معندهاش الا الدراع و زي ما قال يان ميردال حرب الخليج التانية كانت موجهة ضد المانيا و اليابان
يعني امؤيكا قالت للشباب دول ادفعوا يا وحشين زي ما طلعتم على قفايا بسبب حرب فيتنام
فدفعوا صاغرين
مش عشان وحشين لكن عشان مؤدبين وشافوا مجانص الامريكان تستعرض
و هما الاتنين تعلموا الادب من زمان ودفعوا تمن العلام غالي
النقطة المضمرة بقى
هي قبول ضمني بفكرة ان اسرائيل تقبل الحل وتبحث عنه
ودي على فكرة نقطة اساسية في تقديري في اي محاولة للتفاعل مع اسرائيل خارج نطاق الحرب الكلامية و الاساطير الفعلجية على رأي ياسين الحاج صالح
وده موضوع يحتاج لوقت طويل وانا طولت عليك يا جميل
وانت مقولتش امانة عليك ياليل طول
وهات العمر م الاول
السادة الكرام
أنا قلت ميصحش آجي برضه وإيدي فاضية.. قمت جايب معايا دراسة قديمة شوية (2004) عن تأثير الحالة الأمنية على اقتصاد المدعوقة إسرائيل.. اسمها
How is Israel's Economy Affected
by the Security Situation?
http://www.jcpa.org/brief/brief004-11.htm
فيها شوية بيانات مش بطالة عن هيكل الصادرات التكنولوجية الاسرائيلية عبر الخمسين سنة الأخيرة (1950-2000).. والشيفت اللي اتعملت في التسعينات ناحية الهاي تك ونسبة الهاي تك للميديام تك والـ لووْ تك في صادرات اسرائيل من الحاجات دي كلها
ما علينا
..
انا شايف كذا موضوع آت هاند عندنا هنا
فيه حكاية تعريف الاقتصاد الحقيقي في المرحلة الحالية من العولمة.. هل اقتصاد المعلومات وللا اقتصاد التصنيع.. من وجهة نظري أنا ناقصلي أفهم احنا قصدنا ايه بالاقتصاد الحقيقي؟ يعني الاكثر ربحية؟ وللا اللي مفروض احنا كناس بنبدأ من أول السطر نستفتح بيه؟ وللا الأهم بما له مثلا من آثار فوقية اجتماعية وثقافية وده برضه احنا محتاجينه للتعامل مع واقع ثقافاتنا المنغلقة الأساطيرية؟ وللا ايه تحديدا قصدنا بالاقتصاد الحقيقي؟ انا بفتكر ان احنا دلوقتي بناء على توجيهات القيادة السياسية العليا في العالم (القوى الرأسمالية العظمى القائدة) ماشيين في سكة خلق مزيد من الطلب الوهمي على نفس السلعة الصناعية بتنويعات مختلفة.. تشابك مذهل في تعقيده وسرعة انتشاره بين اقتصادات العالم، تقسيم العمل الدولي بيتغير.. التصنيع الحقيقي بقى في البحث العلمي والآر آند دي في كل مجال.. سباق رهيب محتاج موارد وفلوس وقدرات ميخلقهاش إلا الاقتصاد الفيرتشوال.. دُوَل الأطراف لو لعبنا شوية ماركسيزم هنلاقي ان مكانهم اتغير واتنقلوا آسيا لكنهم شكلهم راجعيين تاني لاتين أميريكا.. انا شايف ان نمط الحياة الاقتصادية اتغير هيكليا.. بغض النظر عن ده حلو او لأ وفي مصلحتنا أو لا.. الانتاج اكيد متغيرش بس علاقاته بتتغير أهو.. لسه أكيد في الآخر بناكل رز وسمك وفراخ ومكرونة وبنركب عربية وطيارة ونتفرج على تي في ونبني بيوتنا بمعدات وآلات عملاقة.. لكن كل ده مش مهم أوي دلوقتي من حيث قيادة قاطرة الاقتصاد العالمي.. من حيث تركيز الاستثمارات .. من حيث الربحية.. السر مبقاش هناك من وجهة نظري.. السر اتنقل للستارة الخلفية اللي بتتحكم في "تطوير وتوزيع وإدارة هذه العملية".. مش معنى كده بأي صورة إن التصنيع والاقتصاد الحقيقي بمعنى السلعي اتهمشوا في الواقع المعاش.. اتهمشوا بالنسبة للمرحلة المتعولمة اللي احنا فيها واللي عمل ده تطور التكنولوجي وسياسات القوى العظمى.. احنا اصلا فين من ده ومن ده؟ شرق آسيا عملوا وقفتهم الحلوة بالتدريج ومن تحت.. انا مش عارف بصراحة هل احنا المفروض نعدي على سلم التطور الاقتصادي ده سلمة سلمة ولا نحاول نتشعلق عليطول في الهاي تك وهل نقدر؟ في النهاية كل آرائي مش عقائد عندي هي مجرد تفكير بصوت عالي
تاني نقطة شايفها بتحوم في الصفحة الممتعة دي هي العلاقة مع إسرائيل وتفحص نواياها السياسية تجاه العرب أو تجاه الدول المحيطة، وده في الحقيقة شايفه موضوع شوية مش بس متحكم فيه الاقتصاد مهما اتغير نمطه وهيكله. انا من اكتر المؤمنين بمحورية دور الاقتصاد في كل حاجة تانية في الدنيا.. لكن موضوع اسرائيل بالذات شايفه شوية مختلف.. يعني احنا بنتكلم على أي سلام؟ مع فلسطين نقصد ولا المنطقة كلها؟ مصر دورها ايه؟ بمعنى هل طرح إن مصلحة اسرائيل قد تكون في استمرار الصراع من أجل تحقيق مصالح اقتصادية ممتد لمصر كمان؟ يعني هل مصلحة اسرائيل تجر شكل مصر بأي طريقة؟ هل مصلحتها ترجع لستيت اوف وور معاها؟ انا شايف بوومينج مذهل في اسرائيل بعد كامب ديفيد. شايف معدل انفاق عسكري اتغير بشكل مذهل وتطور خرافي في التعليم العالي وجودته. يعني معتقدش اوي ان اسرائيل مش عايزة انا شايفها اكتر مش قادرة لاسباب كتير.. وده برضه موضوع يحتاج لكلام كتير وانا رغيت كتير
لو تسمحلي سعادة الدكتور اعلق على العزيزة الغالية جدا على قلبي شهروزة هانم
عزيزتي الغالية.. كل كلامك صحيح مية في المية ومش منبطح طبقيا ولا حاجة بالعكس ده مفيش أعلى منه طبقيا وفكريا وأخلاقيا.. هو في رأيي ناقصه فقط عنصر مهم أوي وهو كيفية التطبيق.. يعني انتي قلتي الحل اللي بنحلم نوصل له بس مقلتيش ازاي؟؟ نبقى كده ازاي؟؟ ماهي دي مشكلة التنمية يا ست الهوانم.. احنا آندرديفيلوبد فعشان كده عندنا مفيش ضمير ووفيه مسؤولين تنحين وكل الكلام ده.. مش العكس.. يعني مش عشان عندنا فساد وتناحة حكومية فحنا متخلفين. لا غلط.. احنا مشكلتنا مش في الضمير يا أستاذتي.. المشكلة في معالي سيادة القانون.. مفيش حاجة اسمها مسؤول عنده دم ومسؤول معندوش.. فيه قانون ذو سيادة وقانون ذو زينب وفاطمة وشهروزة :)) سيادة القانون تيجي منين؟ مبتجيش برضه لوحدها ولا من قائد ملهم ولا بتاع.. تيجي من وجود مجتمع عنده وفرة اقتصادية يخاف عليها ومفيهوش مطحونين بالهبل يقوم المجتمع ده يلاقي ان احسنله ينظم حياته بالتزام وحسم وقسوة على أساس دستوري وقانوي عشان يحافظ علي اللي عنده.. تيجي منين الوفرة الاقتصادية بقى يا شهروزة هانم؟ نمشي في أي طريق اقتصادي؟ نحل مشاكلنا الاستراتيجية والاقليمية ازاي؟ بلاش نحلها ازاي؟ نبصلها من آي منظور؟ اهو ده اللي بنفضفض فيه هنا.. وميفعش نقول (اصل مفيش حل طول ما الفاسدين قاعدين)).. هم كانوا مشيوا إمتى؟ وبعدين قبلهم كان حال مصر إيه؟ متصدقيش والنبي اللي يقوللك احنا اغنى دولة في العالم بس منهوبة.. كل موارد مصر باللي فيها باللي عليها متكفيش تأكل عشرة مليون بمستوى كويس.. الموضوع صعب يا ست الستات ومصر طول عمرها عندها كارثة أكل وتنمية وفقر.. حتى في الوضع الحالي.. تعالي أقولك مين الدول الأكثر فسادا من مصر.. حسب الترانسبيرنسي انترناشونال 2006.. خدي عندك يا قمر: أوكرانيا- فيتنام-إيران- ليبيا- نيبال-الفلبين - اليمن - إندونيسيا -روسيا -بيلاروسيا -الإكوادور - فنزويلا وطبعا كل دول أفريقيا جنوب الصحراء. هل معنى كلامي ان الحياة قشطة بالعسل ((اللي واحشاني أوي)) ومصر مفيش زيها ولا أروع ولا أحلى ولا أطهر؟؟ أكيد انتي عارفة كويس ان كلامي مغزاه فقط ان نحاول نعرف أهم أسباب نكبتنا بحيث منضيعش وقتنا في محاربة وهمية مع الفساد وبعدين نجيب ناس تانية نلاقيهم فاسدين أيضا ونفضل برضه نقول مفيش ضمير ومتنسيش ان الاخوة الإسلامجية بيلعبوا حلو على الوتر ده وبيقولوا ان الفساد سببه ضعف الدين، مع ان هما لو مسكوا البلد هنشوف الفساد المؤسسي اللي بجد
..
أنا آسف أوي يا دكتور على كل الكلام ده يا رب مكونش تقلت على حد
..
نموت نموت ويحيا الزمالك قاهر كهرباء الإسماعيلية : )
..
تحياتي واحترامي
د.أسامه
على فكره من كام شهر شفت أحد خبراء اﻷقتصاد والبورصه بيشد شعره ف التلفاز هنا ﻷن أسهم شركه "بروكتار اند كيمبل" وهى من أكبر شركات المواد اﻷستهلاكيه ف العالم زى لوكس صابون الجمال وسيجنال علامه الصحه..حتى أنهم قالوا نصف المعروض فى أى سوبرماركت كبير شويتين من أنتاج اﻷخوين بروكتار وكيمبل..المهم أسهم الشركه العملاقه دى أنضربت بعد ماطلعت نتائج أرباح السنه بتاعتها وطلعت ماحققتش المتوقع م اﻷرباح يعنى كسبوا برضك ماخسروش بس أقل شويه مما كان متوقع..فى حين شركات دوت كوم أسهمها ف الطالع على طول حتى لو ماأبتدش تعمل أرباح..الفوائض الماليه بتضخ ف الدوت كوم وأخواتها..والتسويق والهوم سكيوريتى وخلافه..هل هى ببل تانيه وحاتطق ماأعرفش أنا..بس هو ده اللى شايفه..اﻷقتصاد الجديد وماحوله واضح أنه هنا ليبقى لفتره تطول أو تقصر رغم أنفنا ورغم المنطق السليم..ده القايمه..النايمه اللى سعادتك أشرت لها عن السلام مع أسرائيل..ياريت..طبعا الناس العاديه حدانا أو حداهم عايزه سلام..المشكله أنه تكون هناك مصالح عملاقه لاتحتاجه بل على العكس مصلحتها أستمرار التوتر..وده لب ماقالته الكاتبه..وأنا شايف أنه منطقى ويوضح تطورات كتيره فى المنطقه..دورنا أحنا أيه -أحنا هنا مش أنا وأنت واناتوميست أقصد شعوب ودول المنطقه- تعظيم تكلفه الوضع الحالى..ووضع جزره أمام أختيار السلام..حتى لو معنى ذلك تطبيع علاقات مع أسرائيل بجد..يعنى يصبح هناك قطاعات أخرى من اﻷقتصاد اﻷسرائيلى وكتله سكانيه محترمه لها مصالح معانا..ياأبايحى العالم كله مصالح..وأنت سيد العارفين..وحتى تكون تلك القطاعات معتمده علينا ف مواد خام مايضرش..عماله مايخسرش..تصدير وأستيراد وماله..ونبطل الفوبيا بتاعه حاياكلونا دى..مهو لو ٥-٦ مليون ياكلوا ١٠٠-١٥٠مليون يبقى أحنا اللى نستاهل..والا أيه..شفت ياعم اﻷهلى صيف بدرى..بدرى..
egy anatomist
طلعت زملكاوى..
قشطه عليك..
كلنا ف الهوا سوا حتى أبوأحمد صديق العمر معانا عنبر واحد..
بس سؤال والنبى أخوك مهاجر بقاله شويتين..
أيه كهربه أسماعيليه دى كمان..أنا أوعى على بلديه المحله وبتروجيت وأنبى..
وحتى أسمنت أسيوط اللى شكنا ١-صفر ف ماتش حضرته مع أبنى الواد فارس عشان أزملكه..طلع يهتف مع جمهور الدرجه التالته حيث جلسنا..فريق سٌكه..!!وبيشجع مانشيستر يونيتد من يومها..تعليم أجنبى تقول أيه..
المهم..
نقطه أثارت أنتباهى فى تعليقك المحترم..طور المفكرين الماركسين ومنهم د.سمير أمين فى كتابه المرهق "النمو اللامتكافئ" مفهوم المركز والمحيط..اﻷن فى هذه اللحظه أين المركز وأين المحيط..هل يمكن أعتبار الهند مثلا مركز وأنجلترا محيط وقد تساوى تقريبا ف النتاج المحلى..بل أن بعض قطاعات اﻷقتصاد الهندى أكثر تطورا من معظم قطاعات الأقتصاد اﻷنجليزى أو اﻷيرلندى..حجم اﻷقتصاد الصينى تفوق على ألمانيا..فهل تبدلت المواقع..أم أن الأقتصادات البازغه ف الصين والهند والبرازيل ستظل محيطيه أعتمادها على اﻷسواق ف المركز..والتدفق المالى من المركز..باﻷضافه ألى معظم "البراك ثرو" فى أبحاث الوراثه واﻷتصالات والكمبيوتر..ألخ
وهل بناء على ذلك هناك نمو متكافئ اﻷن أم شكل أخر من أشكال التبعيه والنمو غير المتكافئ..؟؟
والله الواحد دماغه بتلف عندما يحدق فى حجم و علاقات اﻷقتصاد المعاصر..شاكر على المتابعه والمشاركه..ومنتظر باقى مقالاتك..خالد
عزيزي الدكتور خالد
..................
والله يا سيدي يقال ان كهربة اسماعيلية ده نادي كورة مبيطلعش إلا في مسابقة كاس الملك فاروق ملك مصر والسودان.. ونادي الزمالك العجيب قابله من اسبوع كده وهزمه بثلاثية بيضاء.. وخرجت صحف العالم تشيد بالقمة الكروية الممتعة اللي أنا شخصيا ما شفتشهاش برضه.. لكن عجبني أوي عبقرية أسماء الأندية في مصر:)
بخصوص دكتور سمير أمين.. فأنا يا باشا قلتلك ((لو لعبنا شوية ماركسيزم)) قبل ماضرب حتة المركز والاطراف.. هو كان كمان ممكن أقول ((نيو ماركسيزم)) تبقى أنسب لسمير باشا أمين اللي أنا شخصيا بحبه وقابلته شخصيا ((مش في داكار)) :).. فأنا قصدت بس أشير لروية للقصة من منظور محترم ((أحترم الفكر الماركسي بشدة وأختلف مع أدواه التحليلية كثيرا رغم جاذبيتها الرهيبة)).. مركز مين يا باشا وأطراف فين.. ده كان نمط وخلاص السلامو عليكو من زمان.. مفيش في رأيي الأمور دي من زمان.. مشكلة التحليل الماركسي في رأيي المتواضع هي في التنميط الأحادي لكل مشكلة في الكون مهما كانت خارج سياق الرؤية الماركسية أصلا
الاجابة على سؤالك من وجهة نظري هي: لا.. مش هيفضلوا محيط أو أطراف أو غيره وهم مش كده أصلا الآن.. يا سيدي.. الأسرار انفضت خلاص واتعرفت.. الفلوس والتدفقات والأسواق وكل ده مش حكر على الغرب.. بكره تلاقيه في المناطق الأخرى في العالم اللي هتقدر تحقق المعادلة دي: تماسك سياسي قوي + قوة عسكرية قادرة على الحماية+ ثقافة ديناميكية إيجابية مواتية+ نشاط اقتصادي فائق (بما يتضمنه من بحث علمي وغيره).. الغرب معاه تراكم معرفي على عسكري على اقتصادي مديله اسبقية.. الباقيين محتاجين مجهود مضاعف عشان يحصلوا ويسبقوا وده اللي ابتدا يعمله بعض الدول اللي حضرتك اتفضلت بذكرها
..
تسعدني دائما مناقشتك
..
تحياتي واحترامي
Post a Comment