Sunday, October 28, 2007

CHILDREN'S CANCER HOSPITAL..

مساء أمس السبت حضرت عشاء خيرى أو كما يقول الفرنجه
FUNDRAISING DINNER
لصالح مستشفى اﻷطفال الخيرى المتخصصه فى علاج السرطان بالقاهره
CHILDREN'S CANCER HOSPITAL
وحضره عدد كبير من أبناء الجاليه المصريه هنا..بالمناسبه الجاليه المصريه واحده من أنحج الجاليات هنا فى كندا..ربما ﻷنها تتكون أساسا من مصريين ذوى تعليم وقدرات مهنيه عاليه
طوال السهره وأنا أحيى أطباء وصيادله ورجال أعمال ناجحين وأساتذه جامعه..حاجه تفرح..
والسهره كانت طريفه تقاسمنا المائده مع أصدقاء أعزاء..موسيقى..وغناء.. ورقص..وعشاء طبعا..
ومزاد علنى لصالح المستشفى
منهم تذكره واحده للذهاب للقاهره..حسبتها فى دماغى وقررت اﻷشتراك فى المزايده حتى أصل ألى سعرها الطبيعى فى السوق..وبالفعل..فى النهايه وقف المزاد على العبدلله وطبيب معرفه..فأنحاز الصيادله لى واﻷطباء له..وهو يعلى وأنا أعلى..حتى فزت بها وسط هيصه وضحك وقفشات..
بعدها لوحه زيتيه..قصتها طريفه جدا..
اللوحه مهداه من كنيستنا القيطيه المصريه هنا فى أوتاوا..رسمها بأقتدار فنان مصرى قبطى..لمنظر حاره مصريه بها سبيل وميضه ومسجد..بمآذنه جميله..
اللوحه عجبت المدام وتمشى مع أثاث منزلنا الخليط بين اﻷرابيسك المصرى والمغربى..وأتفقنا على حد أعلى لها ٣٠٠دولار ..وبدء المزاد..ولكن فاز بها بمبلغ ٤٠٠ دولار أحد رجال اﻷعمال هنا..أعرفه وأعرف معظم عائلته..ناس فى منتهى الأحترام.. وبمنتهى اﻷريحيه ومجدعه أبن البلد السكندرى..كتب الشيك وأعطاه لمنظمه اللقاء وهى صديقه صيدلانيه أيضا..وطلب منها أعاده المزايده عليها..وطلعت من نصيب المدام تلك المره..فأخذتها وتوجهت لمائدته ﻷعادتها له..وطبعا محصلش..ورجعنا البيت باللوحه..التى أسميتها لوحه ..الوحده الوطنيه اللى بجد

14 comments:

سـردية said...

على قدر سعادتي بالأجواء التي سردتها .. بقدر ما شعرت بالتعاسة لافتقادي لمثل هذه الحالة هنا في ألمانيا ربما ده راجع لقلة المصريين
وتشرزمهم جغرافيا

....
المهم ممكن نشوف اللوحة

Unknown said...

ما احلى ان يجتمع ابناء البلد الواحد فى الغربة من اجل بلدهم بعيدا عن اى صراعات
تحياتى
ومبروك على اللوحة

واحد مصرى said...

يا سلام يا د. خالد
الله على الجمال و الشياكة.....هي دي التصرفات المتحضرة و هما دول الناس اللي ممكن يغيروا يوما ما...دمت بخير و دايما كدة تحكيلنا عن الناس و المواقف المتحضرة

ابو احمد said...

طول عمرك شيك ومتحضر ياابوفارس
مش جديده عليك
تحياتى

husam shady said...

مبروك التذكره وهتنور مصر
ومبروك اللوحه
بس المستشفى دى بيتجمع لها تبرعات من مليون سنه دى نصبايه يا دكتور
اخر اخبارها إن مصاريف حاجه زى الكافتيريا معديه النص مليون جنيه
بس مبروك برضه

اسامة يس said...

مبرووووك الف مبرررررررووووك يا دكتور...
حسيت اني جوه الحدث من وصفك ليه...
يارب تستمتع باقامتك في مصر...
وممبروووك لوحة الوحدة الوطنية...
دمت بكل ود..
خالص تحياتي

مدحت محمد said...

عايزينكم تشرفونا فى كندا

Ossama said...

مبروك على اللوحة والرحلة
يا عم داعيلك
تحياتي يا ابو فارس

The Z. said...

مبروك اللوحة و التذكرة، وكما قال أ. شريف اشعر انا ايضا بضيق لغياب مذل هذه الأجواء هنا...و يا ريت يكون عندنا وحدة عربية هنا و مناسبات نجتمع فيها بعيدا عن الأعلام و الرايات التي كثر عددها و زادت الوانها...
مساءك فل و ماتنساش تصورلنا للوحة

علاء السادس عشر said...

مبروك على الرحلة يا د/خالد أنا فى مصر أيضاً بعد أسبوعين.لو كنت هناك فى نفس الوقت يبقى لازم نشوف بعض.
علاء

Iskanderani said...

مساءالخير د. خالد؛
مبروك اللوحة وكله بثوابة فحصيلة الحفل الخيري ترجع في النهاية لعمل خيري للاطفال المرضي. وتعيش وتعمل كل الخير

وكل عمل خير وحضرتك طيب

تحيات إسكندراني في بلاد الله الواسعة

أبوفارس said...

أصدقائى شاكر تشريفكم كلكم وسعيد بالتعليقات والتمنيات الطيبه..
أستاذ شريف
والله حاأحاول أحط الصوره ولكنى جاهل وبشده فى مواضيع التكنولوجيا..

أيويه..
خطوه عزيزه أرجو أن تتكرر
التجمع كان فرصه ﻷبناء الجاليه المصريه لفعل شئ ايجابى ولو بسيط ..وكان موجود معنا عدد من الكنديين المهتمين سواء بالعمل الخيرى أو لهم علاقه بعلاج السرطان من خلال جمعيات أهليه تقدم المعونه الماديه أو العون المعنوى لضحايا السرطان..

واحد مصرى
شاكر على المجامله الرقيقه..المصريون حين يريدون وحين تسمح الظروف من أكثر الناس تحضرا..منور ياأبن عمى..

أبو أحمد..
كلك زوق يازٌمل ..الشياكه لاتمنع برضك أكل كشرى عند نور الصباح والتشيش على مقاهى نزله السمان ولا لعب كونكان للصبح مع عم "فانوس" فاكر..دمت ودامت الصداقه..

حسام..
لاأشك لحظه أن فيه لهف ولهط تمام فى المشروع ده..لكن برضك بيوصل شئ للأطفال..واﻷداره كنديه على فكره وده اللى طمنى شويه مش ﻷن الكنديين ملأئكه ولايحزنون..بس ﻷن عندهم أجهزه رقابه لاترحم لاكبير ولاصغير..عقبلنا يارب..تحياتى

أبوفارس said...
This comment has been removed by the author.
أبوفارس said...

osama
الله يبارك فيك..شاكر على تمنياتك
الطيبه..تحياتى ومودتى..
doha
والله لو تشوف المصريين هنا فعلا تفرح بيهم..مش بس جاليه ناجحه ولكن أيضا قليله المشاكل جدا مقارنه باللبط اللبنانين مثلا..شرفنى حضورك

د.أسامه..
مافيش خطط للنزول لمصر يمكن نقدى نتقابل فى يناير مثلا..؟؟!!

زيكو
يابتاع دروس التشريح يانمس ..أحاول أحط الصوره والله ربنا يسهل..منور دائما وأبدا

صديقى العزيز علاء..
فينك ياعم مشغول والا أيه..للأسف لاأستطيع النزول قبل يناير ﻷرتباطات العمل..لكنى أنتظر منك تدوينه جامده عن أحوال البلاد والعباد فى المحروسه بعد عودتك..تحياتى وخالص مودتى

أسكندرانى
حبيبى ومنقذى من الهامبورجر أدعيلك كل مأتحف العيال وأمهم بأكله كبده أسكندرانى معتبره..يارب الفلوس اللى جمعناها توصل لمستحقيها يارب..عشمى كبير..شاكر تشريفك ودعواتك..تحياتى ومودتى