Saturday, June 23, 2007

من تمنطق فقد تزندق

أثارت فتوي الشيخ صالح الفوزان، عضو هيئة كبار العلماء، عضو اللجنة الدائمة للبحوث العلمية والإفتاء بالسعودية
بتكفير الليبرالين
جدلاً واسعاً بين علماء وشيوخ الأزهر، الذين انقسموا بين مؤيدين ومعارضين للفتوي.
وانتقد الدكتور منيع عبدالحليم محمود، عميد كلية أصول الدين سابقاً، أستاذ التفسير وعلوم القرآن بجامعة الأزهر، فتوي الفوزان بشدة، وقال: هذا الهجوم الدائم والدائب من علماء السعودية، علي جميع الاتجاهات الفكرية، سواء كانت ليبرالية أو صوفية أو غيرهما من المذاهب الفكرية، هو نتاج «الفكر البدوي»، الذي يتمثل في الوهابية القديمة السلفية الجهادية، والوهابية الحديثة التي تشمل المضمون نفسه، ولكنها تغلف نفسها بغلاف يحاول اجتذاب الشباب.
أما الدكتور محمد رأفت عثمان، أستاذ الفقه المقارن بجامعة الأزهر، عضو مجمع البحوث الإسلامية،
فقال: إن القاعدة في مثل هذه الأمور أن كل من ينكر صلاحية الشريعة، لتنظيم حياة الناس في جميع أنواع سلوكهم وأنشطتهم، سواء في مجال العلاقات الأسرية أو النشاط الاقتصادي أو السياسي أو الثقافي فإنه يكون منكراً للإسلام.
ووصف الشيخ علي أبوالحسن، مستشار شيخ الأزهر للفتوي المسلمين الذين يتبعون الليبرالية المعاصرة ويقلدونها باعتبارها نوعاً
من التقدم، ولكنهم لا يتبعون أفكارها بأنهم مسلمون مخدوعون لم يخرجوا عن الملة.
نص الخبر من جريدة "المصرى اليوم
......
كده أنا شخصيا رحت ف ستين داهيه..يسارى..علمانى..أرتدى الجينز..أشرب الجعه -البيره يعنى وياسلام لو ألمانى
عضو ف جمعيه محبى نانسى عجرم..غاوى شطرنج..وبألعب كوره مرتديا "شورت".. عاشق لفيروز..وأسمع كافه أنواع الموسيقى..محب للجمال..أسعد لرؤيه فتاه جميله ..وزملكاوى..واحده بس كافيه ﻷخراجى من المله والضرب بالصرم..حطهم على بعض أستحق الموت شنقا من صباع رجلى الصغير.
......
يأخى ملعون أبوكم واحد واحد من الفوزان للجربان لعديم اﻷسنان..فقهاء الفته والثريد وبوس أقدام الحكام..
.
.

28 comments:

mohamed elbanna said...

صباح الفل يا دكترة
شوف يا دكتور انا ممكن اقبل منك أى حاجه
الإ
انك تكون زملكاوى
حرام عليك أنت كده احبطنى
زملكاوى يا دكتور طيب ليه ومن امتى
لا اله الا الله

The Z. said...

و الله عندك ألف حق...خليتني يا أخي خايف ما جانيش نوم، أنا يعني و الحمد لله مؤمن باللبرالية وعني الحرية و الكلام الفارغ دا و لا مؤاخذة، و أدرس في ألمانيا يعني كافر و نازي ابن نازي، و اموت مثلك يعني في جمال بنات الألمان، إِلى جانب إني أعرف كل أجناس الدنيا، يعني موالي الكفرة و لا مؤاخذة و بعيد عن السامعين...رحنا في الكازوزة يا أخويا يا د. خالد...طز فيهم مشايخ عرة و نفاق، ولا واحد فيهم سمعناه يوما قال الحق في وجه حاكم و هي أساسا أهم من الإفتاء و السفسطة اللي فجعوا قلوبنا بيها كل يوم، و لا يوم قام واحد فيهم و قال أن الناس تموت جوعا و قهرا...طز فيهم علماء آخر زمن...
زكرياء

Aardvark EF-111B said...

أقسم بالله العظيم أنا سعيد جدا بكوني كافر من وجهة نظره, فلو واحد زيه يدخل الجنه فأنا مش عاوزها

!!!!!!

ومن رمى أخاه بالكفر فقد باء بها أحدهما, و أنت و ذمتك

aboyehia said...

يا عم ابو فارس كبر مخك يا باشا
الموضوع جزء
من الصراع السياسي الدائر في السعودية الآن
يعني وراه مصالح كبيرة قوي
اما المصريين فدول بيجروا ورا اللقمة
بس مش عارفين ان السكة اللي مشيوا فيها خلاص اجدبت و معدتش تدي
يعني ارض بور
تعبانين معلش
لو عندهم مخ كانوا
مبقوش
كده

أبوفارس said...

"بنا" حبيبى وحبيب الملايين..
أيوه زملكاوى..
على وزن "أيوه خدامه" بتاعه لبنى عبد العزيز..فاكر..
والعلاج مش نافع معايا..
طب أسمع دى..
فى زياره للقاهره من سنتان..قلت أزملك الواد فارس أبنى..أخده ماتش للزمالك وأفرجه ع الفن والهندسه وﻷنى عارف مقالب الزمالك أخدته ف ماتش ضد أسمنت أسيوط أخير الدورى أيامها..
هوب ياعم أتلسعنا واحد صفر..طب أعمل أيه الواد فارس لحد دلوقت بيقوللى الزمالك ده فريق سٌكه..بس برضك زملكاوى
"ويابخت من بات مظلوم ولابات ظالم"...
تحياتى..ودعواتك بالشفاء..خالد

أبوفارس said...

بص يازكرياء ياأخويا
كله ماشى تدرس ف ألمانيا..توالى الكفره ..لعمل اللى أنت عايزه
أنما تعجبك البنات اﻷلمان مش الغلمان ..
كده تبقى خرجت عن أجماع اﻷمه وهذا لايجوز..صباحك قشطه تحياتى..خالد

Aardvark EF-111B
مرحبا بك فى سكشن الليبرالين سنه ثالثه جهنم ..كده القعده أحلوت..
صباح الفل..خالد

أبوفارس said...

د.أسامه..
أتابع صراع القوى ف المملكه..ولكن هناك الكثيرين ممن يأخذوا تلك الفتاوى face value
كما يقولون..
فاكر حضرتك الحوار
الثكافى ف المنتدى اثكافى اللى دلنا عليه شريف نجيب عن الربراريه..أو بص ع الشابه المثكفه دى بتقول أيه واﻷهم التعليقات..
http://shlapia.blogspot.com/2007/06/blog-post_24.html
باﻷضافه طبعا لفرح حماس بتحرير قطاع غزه من الكفر والعهر والعلمانيين ..
صباح الفراوله..تحياتى..خالد

husam shady said...

هيا الناس دى لسه عايشه
دول يا دكتور بيكلموا نفسهم والعالم أساساً لا يعلم بوجودهم
المشكله يا أبو فارس إنك بتتكلم من بره المنطقه المظلمه
نعمل إيه إحنا بقا
كفره وفجره وزاندقه وإشتراكيين وعلمانين وعايشن قريب من سكاكينهم
بس طظ فيهم
أنا بغظهم وأحبطهم
وأقلهم هم وأتباعهم الكثيرون أنهم هما إللى كفره كفروا بعقلهم وإنسانيتهم

ahmad said...

لسة قاري عن مضايقات سببوها الناس في مطعم لولد و بنت ، لإنها كانت بتعدلة الكرافاته
تقوللي علمانية ، الناس بقت ع الشعرة ، الشارع بيغلي ، و الاسلاميين حينفجرو في أي لحظة منغير حزام ناسف حتى

أسفي البالغ
و مودتي

طبيب نفسي said...

أبو فارس أحلي صباح ومسا أول وتاني وتالت ..

ـ تحذير: هذا التعليق يحتوي علي لغة حادة .. بذاءات يعني علشان لا نخدش خفر العذاري البداري المحصنات وغير المحصنات. ـ

أخي المسلم .. ألا تعلم أن لحوم العلماء مسمومة أو بمعني أصح سامة لوجود سموم التخلف والعته والبلاهة في أمخاخهم وأبدانهم وقلوبهم ومؤخراتهم. . لذلك يجب علي كل مسلم الابتعاد عن نقدهم أو دحض أطروحاتهم والا الويل والثبور وعظائم الامور والكستور والدمور.

مين صالح خريان ده ؟؟ ابن أخت ابن عثيمين أم الولد غير الشرعي لابن باز ؟؟
ده مش إفتاء ده فساء ومن النوع الحامض كمان .. فسا بيض فاسد.
يا أخي العالم دي طلعت دين الناس ..
ابن باز أو إبن جاز ماتفرقش قال الارض مسطحة
وابن عثيمين ـ مش عثمان واحد .. الظاهر انها كانت جمعية ـ قال الارض علي شكل تمرة .. والغنا وااموسيقي والفن حرام
والشيخ الشعراوي التلفزيوني قال نقل الاعضاء حرام
والقرضاوي القرداوي قال بجهاد المسلم ضد الامريكان وابنه بيدرس في أمريكا .. بيكلم معيز بروح أمه
وعمك الغزالي الوسطي المعتدل كفر فرج فودة .. ده معتدل بشكل عمنا الاخوانجي المعمم ده
وعمارة بتاع الاسلام الماركسي والماركسية والاسلام والشطارة في العطارة والنجارة في التجارة شغال فضائيات شوية ببدلة وشوية بعباية حسب يوم الغسيل
وهويدي بيتكلم فارسي .. حسب منطق الطير اللي حافظ رقم حسابه وبيحول الفلوس من طهران الي سويسرا البلد.
واراجوزات العهد الجديد عمرو قلة وخالد بعرة والا عمر عبدالكافي .. يعني فريق الكتكوت المفترس.
كل العرصات دول تخيل انهم قلبوا مصر خلوها بطرحة وجلباب قصير ..
وتبرع يا مؤمن تبرعي يامؤمنة.

تخيل دولة جربانة مقشفة زي السعودية تحتل الصدارة في الافتاء الفسائي تليها مصر طبعا.
حضرتك كده تقول ياسحلوب يا دحلوب في المشكلة تلاقي الاسلاميين في الصدارة ..

خربت خلاص ياعم خالد .. كان الله في عون اللي عايشين في مصر.


ليبرالين مين .. دول ناس بهايم مالهمش الا في الحجاب والغضب والعنف

صباحك قشطة بالبراندي

Aardvark EF-111B said...

تعليق إبن 60 وسخه يا طبيب و هأنشره عندي سواء سمحت أم لم تسمح

أبوفارس said...

any and every one reads English take a look here veryyyyyyyyyyyyyyyyy intresting
..http://hunterprice.blogspot.com/
miamessa...khaled

Anonymous said...

لن نترك العالم للجهلاء
أنا يسارية علمانية ولا أعادي التدين فهو شأن خاص لكني أرفض وبكل إيمان خلط الدين بالسياسة حتى لا نهين الدين ولا نفسد السياسة

علاء السادس عشر said...

عزيزى خالد
أولاً أتمنى لك الشفاء بسرعة وأعتذر لعدم التواصل الفترة الأخيرة لظروف مختلفة ,باستثناء أنى والحمد لله لست زملكاوى فأنا تنطبق على كل المعطيات السابقة وعلاوة على ذلك ساعات بأدخن سجائر .
الموضوع تحول وكأننا نعيش فى عالم يحكمه مجموعة من أطفال الروضة القادمين من عصور ماقبل التاريخ.
على راى الدكتور وليد خربت خلاص
تحياتى ومحبتى
علاء

Egypt Rose said...

بعض الحقائق عن السعودية

السجناء السياسون:يتعرض منتقدي الحكومة للاحتجاز بدون تهمة أو محاكمة
حقوق المرأة: العنف في محيط الأسرة منتشر على نطاق واسع، يتم اعتقال النشطات النسائيات بين الحين والحين وافترات قصيرة للترهيب .. حظر مفروض على قيادة النساء للسيارات

العمال الاجانب: تعرض بعض العمال الاجانب لانتهاكات على ايدي السلطات الحكومية واصحاب الاعمال الخاصة من بينها سوء المعاملة بدنياً ونفسياً وعدم دفع الاجور وجلد اى سيدة تتعرض للانتهاك من قبل مأجورها اذا صرحت بذلك

التعذيب : لاتزال عقوبة الجلد وهي عقوبة قاسية ولا انسانية ومهينة وتعد نوع من التعذيب ولا يثتثني من ذلك الاطفال ووجود هيئة عجيبة جداً"هيئة الأمر بالمعروف والنهي عن المنكر"غير خاضعة للقضاء السعودي

يتم الحكم على العديد من الاشخاص بالاعدام ولا تفصح الحكومة عن الاعداد والغريب ان الدولة تقوم بتنفيذ هذا الحكم على الاطفال

مصر صدرت للسعودية المعلمين و الاطباء ونهضة وحتى كسوة الكعبة وفي المقابل صدرت لنا السعودية كل التخلف الذي نحيا فيه الان من زى وافكار مسممة وعادات حقيرة و تخلف ومسخ الشخصية المصرية وانحطاط المرأة المصرية الغلبانة والتى كان في الامكان ان تسير على خطى نبوية موسي أو درية شفيق وطه حسين وكل الرواد العظماء ولكانت اكثر نساء العالم تحضراً لولي ذهابها الى السعودية والعودة منها مغيبة تماماً وعدوى كل المحيطات

انا بحب مصر وبحبها جداً ومش عنصرية .. بس لما السعودية تستمتع بكل ما هو جميل في مصر و تتبهدل مصر بكل ما هو حقير في السعودية .. انا شايفة ان ده مش عدل ..وعلى راي الشعب اللبناني الذي احبه من كل قلبي لانه يقف في وجة الرجعية امام حزب التخلف ويقول .. حلو عنا بدنا نعيش احنا مش انتو تعيشوا عنا .. حلو عنا

يا ريت تنتخبني و تعلق على برنامجي الانتخابي

حبيت مصر النهاردة

أبوفارس said...

husam
للأسف أنهم لسه عايشين وقارفينا
وماتفتكرش أنهم حلوا عن سمانا حتى هنا ف كندا..
خد عندك..
فى أنتخابات مقاطعه كيبك اﻷخيره أخوانا البعدا طلبوا من اللجنه المشرفه على اﻷنتخابات السماح للمنقبات بالتصويت وهن مرتديات النقاب..
وهنا ف أونتاريو طلع لنا طقم منهم وطالبوا الحكومه اﻷقليميه بأنشاء محاكم أسره أسلاميه موازيه للمحاكم التقليديه..
أنا شخصيا ف الحالات اللى زى دى أبدء بواحده أسكندرانى طووووويله يعقبها اللى مش عاجبه يروح باكستان...
تحياتى

ahmed
قرأت الحكايه المنيله..
واﻷهم التعليقات فى أيلاف واللينك لتعليق أحدى المدونات عن "فظاعه العلمانين اللى مش بيحبوا اﻷسلام"..
أفهم حاله الغضب واﻷحساس بالمهانه مالاأفهمه هو توجيه الغضب وبشكل مبالغ فيه ضد أبناء الوطن..

أبوفارس said...

د.وليد..
أتفق معك وبشده..
الحكايه تحولت الى أسترزاق من وسع..فضائيات وكتب وجرايد..
بس بصراحه الناس اللى تستاهل ياعزيزى فيه واحده -أو واحد الله أعلم -طلب فتوى
"أحلال أم حرام أن تخلع أمراءه ملابسها أمام الكلب..؟؟"
العالم دى واضح بتتفرج على اردء افلام البورنو ولاتفعل غير ذلك..
صباح اﻷيرش كافى..خالد

أبوفارس said...

حنين
منوره المطرح ومرحبا بك فى أى وقت..
مدونتك ميه ميه..
أسف على مقلب مكتبه الشرق ياعزيزتى..
حصلت فى العبدلله -من سنوات- يوم أشتريت "شخصيه مصر" بكل اللى كان معايا ﻷخر الشهر ومشيتها شاى وبقسماط لحين ميسره..تحياتى ومودتى..خالد

أبوفارس said...

حبيبى ياسادس عشر..
شاكر على الديسك يابطل من يد مانعدمها ويجعله عامر..
نسيت أنا موضوع التدخين ده..
فأنا مدخن قرارى..
من معسل زغلول لسيجار الكاهوبا حين يتوفر..وكده كملت أركان القضيه..
بس تعالى هنا أنت أهلاوى..طب ماتتزملك حتى نكون سويا فى نفس السكشن تالته جهنم..
منور دائما وشاكر على جميل التمنيات...خالد

أبوفارس said...

egypt rose
خطوه عزيزه..
السعوديه أعرفها من الداخل فقد عملت بها لسنوات ولفتها من فوق لتحت ومن الشمال لليمين..
وشاهدت العالم السفلى فيها ياعزيزتى وبحكم المهنه عرفت أشياء والله ماشاهدتها لافى أزربا ولاأمريكا
يعنى بالبلدى "من بره هالله هالله ومن جوه يعلم الله"وخرجت منها لاعنا ساخطا وبيجيللى شلل رعاش لما حد يتكلم عنها كمثل يجب أن نحتذيه بأماره أيه ياغجر..
كما قلت فى مدونتك طمعان ف وزاره الصحه ولك صوتى بالثٌلثٌ..
تحياتى..خالد

ابو احمد said...

عليك نورواللة ياابو فارس
بس ياريت نفك النحس ونغلب فى الكاس واغيظ الواد احمد ابنى

ايمان said...

iدكتور خالد كلامك موجع لأنه حقيقي و يومي
حزن مقيم و هم لا يغادرنا
يسلب منا أعز المحيطين: تخيل أنك تضطر للبعد عن اصدقاء قدامي و أقارب و اخوة و احيانا امك لمجرد أن بداية النقاش كبداية القصيدة: كفر، سيكفرونك من أول كلمة تنطق بها لو ابديت اعتراضا أو نقدا لنبي هذا الزمان و فلتة العصر و الأوان عمرو خالد، ذلك المستفز بادعائه و صوته المتباكي المقزز
سيرمونك بكل ما هو جارح فقط لأنك لا تري و لن تري أن الله سبحانه و تعلي يمكن أن يكون عنصريا، و لا يهتم بشيء قدر اهتمامه بعدد شعرات النساء المتعرضة للنور و ضوء الشمس، أو أن يكون أقصي غايات الدين منع النساء من غواية الرجال، الذين هم يا حرام كائنات لا حول لها و لا قوة لا تعرف رأسها من رجلها و تنتابها حالة من السعار المحموم اذا ما رأت تنتوفة شعر امرأة أو سنتيمتر واحد من الجلد النسائي أيعقل هذا؟ أتكون كل مشكلة الرب منع النساء من غواية الرجال و منع الكل من التفكير و إلا التكفير؟

The Z. said...

إيمان،
أشاطرك الحزن و الألم و للأسف بنفس السبب-الشخص...هذا العمرو خالد، الذي أردت يوما أن أقول أنه ليس على علم و لا مؤهلا لهكذا أشياء، و أنه مجرد صوت بكائي جديد بملامح وديعة تتكسب من بيع الأحلام...فكان الجواب حادا و جادا و أسرع مما كنت أتوقع.."أين أنت منه؟ الظاهر أنك على طريق الكفر! ملايين يحبونه!..." فسكت، لأني لا أريد لهذا الشيء-الشخص أن يفسد علاقة أسرية...
أما عن النساء، فأنا لا أجد أجمل و لا أرق مما قاله النبي ص، عندما قال في وصيته قبل مماته "استوصوا بالنساء خيرا، إنهن القوارير" إذا كان الأصل بهذه الطيبة و الجمال، لم نعود إلى هذه الأشياء-الأشخاص إذا...
زكرياء

Anonymous said...

محمد رأفت عثمان، أستاذ الفقه المقارن بجامعة الأزهر، عضو مجمع البحوث الإسلامية،فقال: إن القاعدة في مثل هذه الأمور أن كل من ينكر صلاحية الشريعة، لتنظيم حياة الناس في جميع أنواع سلوكهم


بما أنه قال القــــــاعدة
يبقا بيتكلم صح
ومية مية
وكل كلمة بيقولها تبقا حلالا بلالا سائغة للشاربين

================



مش عارفة أنا ليا فترة بأدور على الكتالوج بتاع الناس دول
قالولى انه كتالوج بس اصدار الشرق الأوسط
بوكالة جزر البهاما



طيب واللى زى حالاتى عامل كوكتيل فى أفكاره ومعتقداته من كل دول؟؟
يبقا تصنيفه اية؟؟
من أهل اليمين ولا أهل اليسار ولآ أهل الخطوة؟؟
ولاّيكونش من أهل الكهف؟؟؟


ولا لسة مش اخترعوا لنا ملّة ولا نوع من أنواع الجحيم؟؟؟؟؟؟

ازيك كدة؟؟
أكيد حنتقابل فى جهنم
الدور التالت قسم شطرنج وفيروز

(وش بيغمز)

Anonymous said...

معلش كلمةللأخت ايمان

welcome to the club

(وش مفروس من الدنيا واللى فيها)

أبوفارس said...

د.ايمان منوره المطرح..
حكايه التكفير دى عمال على بطال أصبحت لاتعنى شئ على اﻷطلاق بالنسبه لى شخصيا بل دليل على ضعف حجه ومنطق المتحدث..
أما أخونا المرتعش الصوت دامع العيون زى المطرب العاطفى الخيبان..
عمرو خالد..
والحجم اللى وصل أليه فهذا نتاج مجتمع مش عارف راسه من رجليه..
وأختفاء أى نوع من القدوه فى أى مجال..
وأهى أرزاق..
سعيد بتشريفك ..تحياتى

عزيزتى شهروزه..
العالم دى ماشيه مغمضه عينيها وده مش مشكلتى..
المشكله أنهم يقودونا شئنا أم أبينا للهاويه والخروج من التاريخ..
أما الكوكتيل اللى ف دماغك ودماغى ده فده أشمه "أنسانيه وتفتح"..

عن أذنك ألحق كلمتين فى سكشن الموسيقى تالته جهنم..
المعيد أصله رزل وبياخد غياب..
منوره دائما أبدا..تحياتى..خالد

واحد مصرى said...

العزيز د. خالد

يا راجل يا طيب هل عندك أي شك أن الفوزان أو البتنجان ده يعرف يعني ايه ليبرالية؟تلاقيه افتكرها نوع ويسكي و الا عطر جديد فيه نسبة كحول مرتفعة من النوع اللي بيهربوه معاهم و هم راجعين على بلادهم بعد اجازة الصيف علشان يشربوه بدل الويسكي يا راجل سيبك من العالم السكة دي
دمت بخير يا ابو فارس

Iskanderani said...

مساء الخير عزيزي د. خالد ؛

فكرتني والله بحادث عابر كاد ان يختفي من ذاكرتي لانه وقع في بداية الثمانينات وكن وقتها مع زوجتي -المانية الجنسية وفوق ده كله كاثوليكية- في الاسكندرية لقيت واحد غريب -لايعرفنا لا من قريب ولا من بعيد- في الاقصر يقول لي :"لا تنكحوهم الا مُُسلمات" فقررت عدم الترجمة رحمة بزوجتي ولكننا غادرنا قبل الموعد المتفق عليه الاقصر ورحلنا لقرفنا من كل شئ ولاننا لم نرغب ان ندع انسانيتنا او تواضعنا جانباً والاستعلاء علي القوم مهما وصلت درجة الجهل عندهم ولاحظنا منذ هذا الزمان التغيير في المعاملة مع مرور السنوات والتحجر الفكري والتصحر حتي عند البعض اللي المفروض انهم بلغوا من التعليم قدراً وافيا ولكننا اكتشفنا عمق التصحر الفكري عندهم.

بعد إذنك إحنا خارجين لسكشن موسيقي
JAZZ
ونتقابل وفقا لآخر فتوايهم في الرابع قبلي لانني متزوج من واحدة كتابية - لا هي بتعرف تكتب وتقراء كمان لكن لغة تانية غير اللغة العربية - بس انت عارف انها اسمها من "أهل الكتاب " وانا كمان زوجها ومافيش عندنا وصي او كفيل غير ربنا ودمتم بعافية وصحة دائما

تحيات إسكندراني في بلاد الله الواسعة
ممدوح