Saturday, February 03, 2007

...منوعات نهايه اﻷسبوع

الخامسه لبيتهوفن كانت الملمح اﻷساسى لحفل أوركسترا المركز القومى للفنون بقياده مايسترو زائر من فنزويللا
Gustavo Dudamel
مواليد ١٩٨١ "بس..!!" قصير نحيف ديناميكى ﻷقصى حد ملتهب كشمس بلاده وملئ باﻷنفعالات قاد اﻷوكسترا بدون نوته من الذاكره..يقفز ويميل مع موسيقى بيتهوفن الصاخبه
١٩٩ عام تمر هذه اﻷيام على عزفها فى فيينا للمره اﻷولى ولعلها أشهر المقطوعات الموسيقيه وأكثرهم شعبيه لاتخطئها أذن..
اللحن اﻷساسى "تا-تا-تا-تاااه" يبدء الحركه اﻷولى وهى عباره عن
One savage onslaught of rhythm
ولايوجد بها ميلودى واحد.
.يظهر الميلودى فى الحركه الثانيه عندما ينوع بيتهوفن على مجموعتان من اﻷلحان..الثالثه تفضى للرابعه مستعيده ال "تا-تا-تا-تااااه" ويظل بيتهوفن يتلاعب بالنغمه أيما تلاعب ..كلما ظننت أنه أنتهى منها ولامجال لزياده يفاجئك بتنويعه جديده..من الكمان للفيوله للأبوا..للأيقاع الصاخب ..وحين تنتهى تجد نفسك تففز كالمجنون تصفق وتصرخ برااااافو
المايسترو كان رائع..وديناميكى ﻷقصى حد..
لعل خامسه بيتهوفن هى أول عمل موسيقى كلاسيكى أسمعه..مع شهرزاد كورساكوف وبعض أعمال موتسارت..من خلال البرنامج الموسيقى على جهاز راديو عتيق مؤشره بفتله أشتراه أبى من العتبه بأتنين جنيه..ثم سمعت شرح وتحليل لها فى البرنامج التانى مع عمنا وتاج راسنا د."حسين فوزى" وقد أسماها "مجريه الدم" ونعتها "أجمل عمل موسيقى فى التاريخ"
..شاهدتها أداء حى فى قاعه سيد درويش بالهرم -قبل اﻷوبرا الجديده -تعزفها أوركسترا القاهره بقياده"...السيسى"..
وفى قاعه بجامعه أستندهال بجرونوبل- فرنسا... تعزفها أوركسترا الطلبه وبعض اﻷساتذه هناك.. حين هربت من الخليج العربى فى أواسط التمانينات أثر تدهور قواى العقليه من معاشره بدو الخليج ولو ركبوا المرسيدس ...
طفشت على فرنسا "أدرس" اللغه الفرنسيه ..واﻷهم أمضمض دماغى من رايش البداوه البتروليه وأعيش كطالب جامعى
ولو لشهور..حضرت اﻷداء مع مجموعه أصدقاء ومعارف من كافه أنحاء العالم أهمهم "أيميكو نيشوادا" اليابانيه
الجميله...التى أبتسم بأسترخاء كلما تذكرتها لسبب ما..
ثم فى لندن ثم هنا فى مونتريال وفى أوتاوا أمس...ولازالت قادره على اثاره أعجابى وتقديرى لعظمه اﻷبداع اﻷنسانى...
ع الهامش...حضر عدد كبير من أبناء فنزويللا الكونسير بعضهم يحمل العلم..وكأننا فى ماتش كوره قدم..أما الفنزويلايات فحدث ولاحرج
لعلهن أجمل نساء اﻷرض..معظم ملكات جمال العالم السنوات الماضيه من عندهم..وكان هناك عينه بينه منهن أمس ...ولله اﻷمر..!!
***
***
***
***..
أهمنى تعليق هيثم جار القمر على ماكتبت

Haisam(jarelkamar) said.
.. يا دكتور خالد انا اسف ع اللي حاقوله بس انا جالي احباط مرير بعد قراية البوست ده .. احنا وصلنا هنا لحاله اسوأ مما يمكن تحمله .. كل يوم بيزيد اقتناعي ان البلد اللي بتحترم ادميتك هي البلد اللي تستحق ان تسمى وطنا ..بوست جميل قوي

فأنا كنت أقارن فى البوست بين المعامله فى مكتب مرور هنا فى كندا ومثيله فى مصر الجديده القاهره -بعيد عنك...
أذا صدقنا تقارير اﻷمم المتحده والمنظمات الدوليه الشبيهه..مثل العفو الدوليه ومراسلين بلا حدود وغيرها.. فنحن - مصر يعنى- فى ديل شعوب اﻷرض على كافه المستويات.. الصحه والتعليم اﻷداء اﻷقتصادى وحقوق المرأه ...ألخ واﻷوائل فى اﻷميه والفساد والحجر على تدفق المعلومات ..وحالتنا تشبه السقوط الحر بلا براشوت..
وكلما مر عام نقول عسى العام المقبل يكون أفضل ﻷن اللى فات ده كان زفت ولانتخيل القادم يكون أسوء..ولكن خيبتنا بلا قعر فننزل درجه أو درجات ومش عارفين نفرمل ولا حتى نخبط فى حيطه لمنع التدهور..
ولكن وبجد من أين نبدء..؟؟!!؟؟
ناس تقولك أبتدى بنفسك..لو كل واحد بقى كويس المجموع حايكون كويس..وكويس هنا من الناحيه الدينيه..الكلام يأتى من متدينين -مسلمين أو مسيحين- وكلما زرت مصر وجدت مظاهر التدين فى كل مكان اﻷغلبيه الساحقه من البنات والنساء محجبات ونسبه لابأس بها منقبات ..الصلاه أصبحت حدث متكرر طوال اليوم مش الجمعه وخلاص..ﻷ كل وقت أى شركه أو مكان دراسه أى تجمع..واحد بيدن وناس بتصلى..كل ماتكلم حد يرد عليك بحديث أو آيه قرأنيه..كل البلد بقت فقهاء ...كتب وأشرطه وفضائيات كلها مكرسه للدين اﻷسلامى -ولكن الشواهد تدل علة أن موجه الدروشه طالت أقباط مصر أيضا وأنكمشوا فى كنائسهم- وغيره وغيره..
ولكن الناتج ولاحاجه..
الفساد ..الرشوه.. الفقر.. المحسوبيه.. البطاله.. العنوسه.. المخدرات..عشرات العلل اﻷجتماعيه تتفشى فى المجتمع رغم أنف كل المصلين والصائمين..وكأن الشعب كله مصاب بشيزوفرانيا..نصلى ونصوم ثم نتكل على الحى الذى لايموت وناخد رشوه..أو نزوغ م الشغل ونحن نبسمل..
السؤال هو أين ينتهى النظام وتبدء الدوله وأين تنتهى الدوله ويبدء الشعب ..وهل الشعب كتله واحده أم تكتلات سميها
طبقات سميها فئات مش مهم
جهاز الدوله المترهل مكون من أفراد الشعب والنظام المتمفصل على جهاز الدوله برضك من الناس ..مش مستوردين من المريخ..
لو الوعظ والدوشه دى غيرت اﻷفراد كان لازم يتغير أداء الدوله حتى..الشواهد لاتدل على ذلك..
ليه عندى أحساس أن قوانين المجتمع أى مجتمع تيجى عندنا وتوقف وكأننا
Black Hole Or a Singularity
حيث تنكسر قوانين الفيزياء ...
عندما بدأت هجره المصريين لدول الخليج للعمل تفائل البعض خيرا..المصريين أخيرا خرجوا من الوادى وهاجروا وقل أو أنتهى حتى أعتمادهم على الدوله العتيده ...وسينتهى نمط اﻷنتاح اﻷسيوى الذى تسيطر فيه الدوله على كل شئ..كلام حلو... شايفينه اليوم فى الصين وفيتنام مثلا ولكنه لم يحدث فى مصر..
الطبقه المتوسطه الجديده النيو- تكنوقراط وبواسطه تكنولوجيا الأتصالات والكمبيوتر هى أمل مصر ..فشنك برضك..
نفس الطبقه تشد الهند وتركيا والبرازيل للقرن الواحد والعشرين ونحن للقرن العاشر وبلا فخر ..
.فيه حاجه غلط وأنا مش عارفها
أو
أحنا اﻷستثناء من القاعده..... أحتمال
أم أن تطور قوى اﻷنتاج عندنا فى مصر لايترجم الى تطور فى اﻷبنيه الفوقيه..الصين حضارتها تمتد مثلنا فى الزمان ولكن منذ مايزيد عن قرن تتميز بحركيه شديده..رغم أرتفاع التكلفه البشريه.. لها هاهى تطرق القرن الواحد وعشرين بثقه..حتى أن البعض يقول أنه قرنهم..
أو
أن هناك مرحله تاريخيه كامله لم نمر بها.. وهى الحروب الدينيه..زى حروب الكاتوليك والبروتستانت فى أوربا..فهل بدأت عندنا بحكايه سنه وشيعه اللى مش نازله لى من زور دى..يليها موجه عقلانيه من نقد الدين -اﻷسلامى هنا كما حدث فى الطبعه اﻷوربيه للمسيحيه- وتحجيمه
هل هو أستحقاق تاريخى واجب الدفع ولامفر منه..؟؟
هل هو الدين..؟؟ أم هى جرعه التدين..؟؟ أم فهمنا للدين..؟؟أم عدم فهمنا له..؟؟
هل مقوله" صالح لكل زمان ولكل مكان "دى وهم.. صنعناه بأنفسنا ونعيشه حتى أخرجنا من الزمان والمكان معا؟؟
لو كان الدين هو السبب هل نستطيع أنتقاده اﻷن ..؟؟
أم أن الظروف التاريخيه لهذا النقد لم تنضج بعد..؟؟
هل لدينا وقت لنمر بنفس المراحل التاريخيه كأوروبا وحتى أمريكا اللاتينيه مثلا..؟؟
هل تفشى ظاهره الخطاب اﻷنتحارى سبب أم نتيجه للخطاب الدينى المعاصر..؟؟
ولماذا لاننتج مايشبه لاهوت التحرير الذى أفرزته الكنيسه فى أمريكا اللاتينيه
والى أن أفهم أو تتغير اﻷمور -آسف ياهيثم-
حاأفضل أحكى وأقارن... وتصعب عليا نفسى
****
*****
******
BBC WORLD SERVICE .....
برنامح يضم نخبه من الخبراء -بجد مش كده وكده- يتناقشوا حول موضوع صعود الصين..
أحدهم أستاذ أنثروبولوجى تخصص الصين وعاش هناك منذ بعد الثوره الثقافيه..قال أن القياده والنخبه الصينيه تتميز بحس تاريخى عالى وتنظر للمستقبل عكس النخب اﻷسلاميه التى تنظر للخلف وفى حين تنطلق الصين للأمام..يحاول
المسلمون العوده لعصر ذهبى متوهم وهم -المسلمون- ليسوا بتهديد للغرب هم فقط
NUISANCE......
حاجه كده زى رزاله...؟؟وقد وافق باقى المتحاورين باﻷبتسام وهز الرأس..أحسن فيه ناس فاكراهم فى الغرب لايناموا
خوفا من المد اﻷسلامى

6 comments:

طبيب نفسي said...

د.خالد ..

بيتهوفن منبع لا ينضب للخيال الموسيقي .. أخر مرة سمعت السيمفونية الخامسة ومجموعة من أعماله كان سنة 2003 بقيادة القدير دينيس رسل دايفز .. وفي معرض للنحت في ابريل الجاي في المتروبوليتان معمول علي توافقيات الكتلة ومؤلفات بيتهوفن .. حاجة نيو آج كده اللهم احفظنا.

أما عن مصر .. والله حالة الانهيار واخدة مومنتم زي المذنبات.
الدين والسياسة وشكل الدولة نوع من فانتازيا الدمار .. والخلل النفسي للشعب.. حدث و لا حرج.

عايزين نبقي نتبادل المعلومات الجغرافية من شرق البحر الميت حتي جنوب أمريكا اللاتينية .. المهم مانعديش علي شمال أفريقيا وبلاد أطلس لضمان السلامة علشان الناس دي مشهورة بالمقاومة.
ياللاه .. كله يهون في سبيل دخول محراب "العلم"

تحياتي

Haisam(jarelkamar) said...

شكرا يا دكتور على اهتمامك بالرد
..
تعرف .. كان عندنا في الكليه دكتور - ربنا يمسيه بالخير - اسمه دكتور صبحي
الكفافي .. رئيس قسم الفسيولوجي .. تلاقي دكتور و ليد و دكتور اسامه يعرفوه .. كنت باحب الراجل ده و كان بيعرض علينا ساعات نقعد نتكلم معاه في مكتبه على اي حاجه .. و في يوم ساله واحد صاحجبنا عن سبب علمي للتخلف في منطقتنا باكملها رغم توافر كل الموارد
..
رد عليه و قاله ان درجة الحراره العاليه في الجنوب بتؤثر على الهيبوثالامس .. و بتسبب وخم و ضعف انتاج و قلة ذكاء و ابداعيه عكس الدول الشماليه البارده
!!
..
من يوميها عرفت ان ماحدش عارف سبب المصيبه .. اللي يقول قلة ايمان و اللي يقول عشان مافيش وحده و اللي يقول ان مافيش حريه و اللي يقول مافيش ضمير و اللي يقول درجة الحراره
..
انا يا ابا فارس في معضله كبيره ..و اعتقد انها تواجه الكثير من جيلي .. كل الاحباط المتزايد و الفساد و امتهان الكرامه و الحريات يدفعني دفعا لترك البلد .. و الصوره الورديه على الجانب الاخر ( سواء كان خليجيا او اوروبيا او امريكيا او استراليا ) تجذبني لها
..
لكن ارتباطي العاطفي بمكان تربيتي .. و باماكن اتعودت عيها و عادات و نشاطات و بهجات صغيره .. و اصدقاء بحبهم وو وجوه مألوفه بيقعدني .. بس ارجع و اقول ماكل اللي بحبهم عايزين يسافرزا هم كمان
..
اليوم اللي قررت فيه اهاجر يا دكتور .. بممعني اني اختار وطن جديد مش مهم يكون ايه .. كان يوم ماتسرق تليفوني المحمول و رحت ابلغ عنه في القسم و الظابط قعد يشخط و ينطر و يشتم و يزعق و يهزا فيا كأن انا الحرامي مش الضحيه .. و انا ماقدرتش افتح بقى لاني كنت شايف اللي بيتكلم بيتسحب ع الحجز .. تخيل !!
يومها قررت ان الوضع هنا مش حايتصلح في حياتي و لا حياة ولادي كمان .. و كل يوم اسمع عن تعذيب واحد او اشوف الراجل العادي بيذل في واحد محتاج منه خدمه .. او اقف في طابور عشان اخد ورق حكومي لمجرد ان الموظف يفطر و لا اتوقف تحري و يطلبوا بطاقتي في الشارع .. او اشوف واحد زي كريم بيتحبس عشان القاضي بيحكم بدينه .. كل يوم بجد بيزيد قناعتي ان الوطن هو المكان اللي بيحترمك .. و ان كل الشعارات بتاعت مصر ام الدنيا و الهجص ده كلام فارغ .. بس برضه كل مايعدي وقت .. كل مايزيد ارتباطي بهنا
..

حلقه جهنميه
..
انا اسف ع الاسترسال يا دكتور خالد .. بس انت نكات جرحا مؤلما
..
تحياتي و شكرا لصبرك

أبوفارس said...
This comment has been removed by the author.
أبوفارس said...

د.وليد..شاكر على المرور الكريم..صعبه شويتين حكايه نحت وموسيقى بيتهوفن دى.. موافق على التبادل المعلوماتى فى عصر يداخل الثقافات..تقول أنت اﻷول والا أقول أنا..وربك يستر ويحمينا من ورثه "كاهينه" هازمه جيوش المسلمين...تحياتى...حالد

Malek said...

يعني يا دكتور خالد قاعد تتبادل المعلومات مع طوب الارض وانا صاحبك اللي عبيت لك الشركس في قزازة بتبخل عليا؟؟
طيب اديني رايح لهم يا سيدي
و بناقص ياعم معلوماتكم
الخامسة لبيتهوفن يا ابا فارس ولو عزفتها البي جيز في ساترداي نايت فيفر تظل رائعة من الروائع ومعاها رقصة السيوف في جايانيه لخاتشادوريان وكل شهرزاد المتوالية السيمفونية الجميلة الرائعة التي تربينا عليها وعلى صوت زوزو نبيل الساحر في قصص الف ليلة بتاعة طاهر ابو فاشا
سيبك من الكلام في مصر و بلاد العرب و التخلف
مرة اخرى الكلام عن كون الدين هو سبب الخطاب الانتحاري
يجعل من الدين بناءا تحتيا متجاوزا للبنية التحتية
الخطاب الانتحاري يتمظهر بقوة في الدين لانه من الابنية الفوقية المغلقة التي تريد النخبة المستفيدة المهيمنة ان تكرس عبرها هذا الخطاب الانتحاري
الخطاب الانتحاري
سببه او اصوله ترجع الى هشاشة التركيبة الاقتصادية المصرية و ركاكتها و ضعف البنية الانتاجية وانهيار
التصنيع و الزراعة و هذا نتيجة تكلس جهاز الدولة و تيبس المجتمع ككل مما ادى لهذا الخطاب الانشائي المفرغ المفرغ الفارغ
حالة اليأس العامة من اعراض ومظاهر الخطاب الانتحاري دون شك
هل من الممكن احداث تغييرلا وطرح خطاب بديل و تطوير قنوات تجعل من الممكن تفعيل خطاب بنائي يفترض ان تحمله طبقة النيو تقنوقراط؟؟
ربما كان كتاب بيرلمان الشهير ثورة المديرين الذي صدر في الستينات من القرن الماضي والذي تنبأ بظهور و تطور هذه الشريحة الخاصة من الطبقة المتوسطة مهما في هذا الصدد
بمعنى سؤالي هنا هل تتواجد هذه الشريحة حقا في مصر وبدرجة تجعلها قادرة على انتاج خطابها الثقافي الخاص وليس استهلاك خطاب مهترء ممزق قديم؟؟
ام ان هذه الشريحة لا تمثل بعد قوة اقتصادية حقيقية داخل بنية اقتصاد هيكلي او واجهة فقط؟؟؟
اتصور ان كل هذه الاسئلة مشروعة وتستحق المناقشة وميا مسا يا ورد

أبوفارس said...

أبا يحى أنت الخير والبركه..المناقشه كانت أخر حلاوه عن دور الشركس فى تاريخ الشرق اﻷوسط..وعدينا على سيره الظاهر بيبرس على كام حكايه عن فكرى أباظه ورشدى أباظه..وكله والله لتوطيد العلاقات..ولو أن أخوك محتاس فى الجبهه الشرقيه حوالين منسك وكورسك..حاجه تبغبغ اللخبطان..
أما عن حقيقه وجود طبقه النيو-تكنوقراط..أعتقد الفساد السرطانى فى مصر قضى على أمكانيه تطورها الى طبقه أو جماعه مستقله..الفساد بأشكاله المختلفه يادكتور يقوم بعمليه تجريف حقيقيه ﻷى تراكم تستطيع هذه الطبقه من خلاله التأثير فى المجتمع...أسمع دى...أحد أقاربنا..العائله من أجيال تعمل فى صناعه الورق..بمعناها الواسع ولهم حتى منفذ فى "الفجاله " شارع المكتبات والمطابع ودور النشر القديمه.. الشخص ده ديناميكى عمل مصنع ورق تغليف وخلافه وكلفه تمام سواء بالسلف أو من التراكم العائلى لاأدرى ومشيت معاه..عربيه محترمه ومكتب ..وللحمايه دخل الحزب الوطنى... وبدء فى أنشاء مصنع تانى هوب الرقايه اﻷداريه أو نيابه اﻷموال حاجه زى كده كبست عليه!!..شهر وزياده يأباشا مرمى عندهم للتحقيق فى مخالفاته الماليه..!! وصلته الرساله زى مابيقولوا.. يقال دفع اللى فيه الفايده ويقال أتخذ شريكا..الله أعلم..ولًم نفسه..!!عندى من الحكاوى دى يادكتور أسامه نصف دسته..فهى طبقه مهيضه الجناح..ودى بيعقد المسائل..بس مش حاتستمر كتير..العنف العراقى بدء ينسكب فى المنطقه عشان كده لما سألنى هيثم جار القمر عن الهجره قلت له طير..
أقرء وﻷول مره لكاتب يابانى أسمه
Haruki Murakami
روايه
The Wind-Up Bird Chronicle
جائتنى هديه من صديق(ه) روسي(ه) الروايه جميله ولفت نظرى اﻷهتمام بالحسى والجنسى مما يتطابق مع تجربتى الشخصيه والله بدون مبالغه ولا نخع ولعل لنا عوده لذلك...الروايه يعنى..نهاره حليب وفشده..تحياتى..ومودتى الصادقه..خالد