Saturday, October 18, 2008

...أما بعد

الثابت الوحيد هو التغير
دى نعرفها وفاهمينها..ولكن سرعه التغيرات وإيقاعها يصيب بالدوار والدوخه..عناوين الصحف ونشرات اﻷخبار تلهث وراء تطورات اﻷزمه الماليه-اﻷقتصاديه الحاليه
..الواضح شيئان أساسيان
أننا لم نصل الى القاع بعد..وأن اﻷزمه لاتزال فى أولها..اﻷرقام والمؤشرات تقول أننا نتجه وبخطى واثقه من كساد عالمى..وأن أزمه السيوله الماليه ستضرب اﻷقتصاد الحقيقى اﻷنتاجى فى ظرف ٣-٦ أشهر..الصين وكوريا الهند وكل اﻷقتصاديات المعتمده على التصدير ستتأثر وبشده..وبالتالى أسعار المواد الخام..والمواد نصف المصنعه..فى سلسله منطقيه أو مايسمى تداعيات تأثير الدومينو..وستمتد تلك اﻷزمه حتى نهايه ٢٠٠٩ فى أفضل تقدير أو أطول فى تقديرات أخرى
.النقطه اﻷخرى الواضحه أن العالم لن يعود كما كان..بعد الخروج من نفق الكساد ستتغير أشياء كثيره.
أمريكا لم تعد القطب اﻷوحد فى العالم..هناك تغيرات جيو-بولوتيكيه تأخذ أشكالها اﻷن..أوربا..روسيا..الصين(؟) ربما.
الدوله عادت وبقوه للتأثير فى الحياه اﻷقتصاديه..كينز يبعث من قبره..أنتهت مدرسه شيكاغو والريجانيه وطبعتها البريطانيه التاتشريه كما يقول الخواجه فوكوياما
ولاأظنها مجرد صدفه أن الحائز على نوبل فى اﻷقتصاد هذا العام كينزى جديد
أشتراكيه..؟!؟لاأظن ولكن رأسماليه مقننه..أهم شروط اﻷشتراكيه وعى الجماهير بمصلحتها الطبقيه..وهذا لاأراه حتى اﻷن
*************
أما شرقنا اﻷوسط التعيس فالتصريحات القادمه منه تبعث على اﻷبتسام.
الدول البتروليه كلها تصرح أن اﻷمور زى الفل ومافيش أى حاجه..ودى مش فاهمها..البترول نزل سعره من ١٤٠دولار الى ٧٥ فقط يعنى النص..والله ولا بيهمنا
..ماشى
كل اﻷستثمارات العربيه سواء الحكوميه او للأفراد فى أوربا وأمريكا..التقديرات تقول أنها حوالى تريليون ونصف أو أتنان تريليون دولار..بقدره قادر لم تتأثر..رغم اﻷنهيار الكامل فى البورصات العالميه..فى أفضل تقدير خسرت ربما الربع..زيها زى غيرها ولاهى محجبه..!!! مصر والتصريحات المصريه دمها أخف.."مافيش أى حاجه..ولالينا دعوه بالموضوع ياباشا.." وأن كان أحدهم يظن أن الفقر حشمه وأيش تاخد الريح م البلاط..أعتقد الشهور القليله القادمه ستجيب على هذا المنحى ف التفكير بقسوه
******************
على المستوى الشخصى أنا مندهش من سرعه أنهيار اﻷمبراطوريه اﻷمريكيه..من سنوات قليله كانت ملئ السمع واﻷبصار ..واليوم..حالتها تصعب ع الكافر.
.عسكريا ..روسيا أوضحت من شهور بدبابات الحرب العالميه التانيه الصدئه أن اﻷمبراطوريه اﻷمريكيه وصلت آخرها عسكريا..وجائت الضربه اﻷقتصاديه لتضع نقطه نهايه السطر فى جمله قصيره جدا
!!!.ياعنى الخواجه بوش ورجالته جابوا اﻷمبراطوريه لمس أكتاف فى ٨ سنوات..معقول.
وفى جيل واحد- الجيل الذى أنتمى أليه- نشهد العالم يتحول من قطبين ألى قطب واحد الى أقطاب متعدده بكل مايعنيه هذا من توترات وحروب وأنهيارات..مش كتير شويه..دا أحنا يادوبك حانشم نفسنا بعد تداعيات أنهيار اﻷتحاد السوفيتى.
عموما على المستوى الشخصى برضك..أستطيع القول أنى عشت فى زمن شديد الحيويه ديناميكى مثير وثابته الوحيد هو التغير

1 comment:

ابو احمد said...

ابو فارس
عندك حق جيلنا ده كويس انه لسه متجننش التغيرات اللى شهدناها كتير فاكر كتاب السيطره الصامته اللى كنت نوهت عنه فى تدوينه سابقه اللى بيتكلم عن سيطره الشركات وانعدام دور الجكومات وكنت بقول للإخوان خلاص الناس اتحجبت وإتنقبت سيبكوا من الكلام ده وقلولنا رأيكم فى الكلام ده
بس برضه على كافه الأحوال العالم بقطب واحد كان شكله وحش يمكن يكون أحسن فى اللى جاى
الواحد نفسه يتفائل
إنت مبتسألش ليه
تحياتى