Sunday, May 20, 2007

هوامش


العقليه الفقهيه تنطلق أساسا من النص..
النص المقدس الخالد العابر للزمان والمكان
وعمليه التفكير الفقهيه هى القياس أو هى رد الفروع الى اﻷصول ..من خلال عمليه ذهنيه هى السبر والتقسيم..وبالتالى فالعالم كما تراه تلك العقليه الفقهيه هو عالم محكوم بنص..
والنص -أى نص- محدود باللغه والظرف التاريخى وحتى الحجم..وميكانيزم التفكير الفقهى هو المقاربه وليست المطابقه..
وبمرور الوقت وتعدد القضايا يتحول العالم الى عالم أفتراضى موازى ومقارب للعالم الحقيقى يشقيه اﻷجتماعى والمادى..وأظن هذه هى المشكله التى أدت الى أنفجار العقليه الأسلاميه وليس فقط أغلاق باب الأجتهاد...
المنطق الشكلى -منطق أرسطو- كان أخر أضافه للعقل العربى ولكن الغزالى كمدشن لموت العقل العربى فككه من منظومه متكامله الى أداه قياس بسيطه وهو منهج تفكير عتيق اﻷن وبخاصه بعد التطورات العلميه الحديثه..
وحتى المنهج الجدلى..رغم تماسكه أصبح غير كافى لفهم العالم اﻷن..عالم النسبيه ونظريه الكم التى تعتمد على داله اﻷحتمالات...وهكذا أعتقد أن العقل العربى بتركيبته الفقهيه خارج نطاق الزمن والعصر مهما حاولنا وبالتالى كل هذا المجهود هو عبث وأضاعه للطاقه والوقت..ونظل ندور فى حلقات وحوارات دائريه ولانواجه العالم كما هو توطئه للخروج منه ربما قرب نهايه هذا القرن ولكن تلك قصه أخرى
تركب حكايه النص دى على حوار مدونه عمرو عزت الماراثونى ..
وعلى حوار بن عبد العزيز حول صحه البيعه العمريه
وتركب أيضا على حوار الصديق خفيف الظل واحد مصرى مع الكمودينو بتاعه..حول أرضاع الكبير
http://wahidmasry.blogspot.com/2007/05/blog-post_18.html
...
وسأحاول جاهدا أن أقمع نفسى وأبلع كميه التنكيت واﻷفيهات اللى جت على بالى لما قريت التدوينه
وعشان تحلو أحد اﻷصدقاء دلنى على لينك برنامج تليفزيونى يناقش الموضوع..
النص صحيح لاشك بمقياس أهل الحديث ولكن حتى صحه النص لاتكفى ﻷعماله ﻷن الوضع تغير..
محاوله سجن الواقع فى لحظه يحكمها نص مهما كان مقدس لاتصلح والتمسك بها -اللحظه والنص المرافق- هى وصفه أكيده للخروج من التاريخ..
وأظن هذا هو الحادث لدينا..ولازلت ألح أمامنا مهام هرقليه على كافه المستويات أما أن نكون أهلا لهذا التجدى أو الفناء..والعداد بيعد..سرعه رتم الحياه وسرعه التغير اﻷن على كافه المستويات تعطينا ربما ﻷواخر هذا القرن لاأكثر...وبعدها...نأجرها مفروشه... ...

5 comments:

Anonymous said...

اتفق معك
وموضوع ارضاع الكبير ده مثير للضحك وبيفضح فعلا العقلية اللي بيفكر بيها الفقهاء، رغم تسليمهم بصحة الحديث إلا انهم مش موافقين على تطبيقه بدعوى اختلاف الظروف وان النص ده ذكر في واقعة معينة، رغم اصرارهم العنيد على تطبيق نصوص اخرى كثيرة ارى ان تغير الظروف ايضا يوجب ايقاف العمل بها

Aardvark EF-111B said...

قلبك أبيض, لسه هتأجر؟؟
أنا ملكتها من زمان, أضمن

طبيب نفسي said...

إزيك يا د.خالد ..

بالرغم من أهمية ما كتبته .. سيبقي الوضع سجال بين طرفي معادلة لغوية كل منهم يحاول إثبات تأويله .. يعني النص سجن إختياري ، ومساجين من غير سجن يرحوا فين.
ربط الدين بالسياسة جزء من منظومة العقل العربي .. حتي يصل الخلاف الي بحور من الدم كافية لأقامة هدنة مؤقتة وهكذا.
يعني ببساطة لو سئلت جميع الاطراف المختلفة حول القضية سؤال افتراضي:
طب ايه رأيكم يا أشاوس لو ان فيه نص صريح في القرأن بقتل المرتد ... مثلا مثلا يعني .
الكل هيقول طبعا نقتل اللي جابوه .. بغض النظر أن فعل كهذا مخالف لكل الاعراف الاجتماعية المتداولة وحقوق الانسان وحرية الاعتقاد وكل الكلام الفللي ده. يعني أكثرهم انفتاحا لن يجد غضاضة في قتل نفس وسيشعر بالزهو والفخار لكونه يد الله التي أنزلت القصاص علي المرتد العبيط ده .. هو دخول الحمام زي خروجه.
معلهش موضوع البيعة العمرية ده كوميدي شويه .. عمر قال والا ماقلش؟ طب والناس دي مالها ومال سيدنا عمر ؟ طب نمشيها قرضاوي والا العوا والا عمرو خالص مالص والا ابن تيمية ؟
طب الناس اساسا بتسأل الاسئلة دي ليه ؟ وهل لها ارتباط بمشكلة المجاري أو ارتفاع نسبة حدوث السرطان بسوهاج 400%

فقه جديد .. فقه قديم .. فقه استعمال طبيب .. كله سوف يقع في محظور التأويل ودوامة من الصح ومن الصحيح.

المهم ان انت بخير
والرابط ده علشان تتضحك شوية مع فكاهيات عمرو أفندي بصل
http://www.almasry-alyoum.com/article.aspx?ArticleID=61530

طبيب نفسي said...

خالد ..

أخر ماوصل إليه العلم الحديث
http://alwatanvoice.com/arabic/news.php?go=show&id=88613
توثيق مسألة إرضاع الكبير في أوراق رسمية تامة الثبوت .. يعني نكتب إن الآنسة ربة الصون والعفاف/ الباتعة علي صمدية قامت بإرضاع الأستاذ/ الكاني علي الكاني ـ بتشديد الياء وكسرها ـ خمس رضعات كاملة من اليمين للشمال ولم يعرف مصدر اللبن .
والله الدكتوك عطية مش غلطان .. الراجل بيولد فتوي تبعا للسابقين الصالحين والمصدر واحد .. الناس هي اللي بتختار اللي مزاجها.
وفتاوي قوم عند قوم فوائد ..
وبيقولك خلف الله خلف خلاف عضو مجلس الشعب عن كتلة الاخوان المسلمين قال أن ولاد اللذين اللي بيهزروا عايزين ينشروا الفاحشة .. عرف منين ابن الاروبة المريوحة ده ... يعني انت مراقب .. خد بالك.
الشيخ السيد عسكر الوكيل الأسبق لمجمع البحوث الإسلامية، قال ده كلام فشوش في الشاكوش .. وهيسهم في نشر الرذيلة بين المسلمين .. ياللا إنشالله خير.
المضحك لحد الاسهال ان بعض أو كثير من مواطني الدولة السعودية ـ بالذمة فيه بلد في الدنيا اسمها علي اسم عائلة ـ مش عجباهم الفتوي .. طبعا علي اساس ان فتوي ابن باز ابو عيون ازاز علي ان الارض مسطحة فتوي صحيحة .. والله الناس دي معيز.

ياللا .. خلينا نضحك .. حلو الموضوع ده

أبوفارس said...

ماهم دول اللى ينطبق عليهم المثل القائل "أدينى عقلك وأمشى حافى".. والنبى خللينى ساكت يادكتور وليد أحسن لو فتحت حيرجمونى بالبلغ ف ميدان "ساعه لقلبك" ..
بس مش قادر..
ألا قول لى ياشيخ هل يصح أن نستبدل لبن الثدى هنا بلبن نيدو أو نستله بمهعى بدل مالجحش من دول مايمصمص ف ثدى زميلته ف الشغل لو جابت له رضعه ف ببرونه تنفع ولا لايصير....
ورقصنى ياجدع...
تحياتى وفول حراتى...خالد