Thursday, May 24, 2007

ورانا أيه...وراااانا أيه

ICE HOCKEY
هو اللعبه اﻷكثر شعبيه هنا فى كندا فهى أختراع كندى صرف لعبها أهل البلد اﻷصليين من قرون ومن كندا أنتشرت لباقى أنحاء العالم.. لعبه
سريعه.. عنيفه اﻷلتحام الجسدى فيها يصل لحد العراك..
لاأتابعها عاده ولكن هذا العام وصل فريق مدينه أوتاوا حيث أسكن الى نهائى كأس ستانلى وهو اﻷهم فى أمريكا الشماليه والعالم بالتالى..فريقنا المحلى أسمه "السيناتورز" فأوتاوا هى العاصمه الفيدراليه لكندا و مدينه البرلمان بمجلسيه والحكومه..وبالتبعيه فاﻷسم مناسب جدا للفريق..وصول السيناتورز للنهائى أشعل المدينه حماسا ووجدت نفسى أنضم للجماهير..
شاهدت المباره اﻷخيره والتى أوصلتهم للنهائى فى أحد البارات الرياضيه مع مجموعه من الزملاء..
وكانت أضافتى للقعده هى قياده التشجيع على الطريقه المصريه فى مباريات كره القدم من "هيلا هوبه" الى صقفه اﻷهلى الشهيره "تك تك تك تت تتك" مما أثار حماس الشباب وعجبتهم حكايه الصقفه أم رتم دى..وميت تأكيد أنى
أرجع أتابع النهائيات معاهم
ومن الهوكى للضرائب
يجعل كلامنا خفيف عليهم ...هذا العام أعمل كصيدلى حر.. بمعنى أنى لاأدفع ضرائب من المنبع بل فى نهايه السنه بعد خصم مصاريفى منها... وهذا -نظريا على اﻷقل- يضمن لى دخل أعلى من العمل كموظف فى أحدى الصيدليات التابعه لشركه عملاقه
فأنا أتنقل بين عده صيدليات ومراكز طبيه ولاتوجد لى وظيفه ثابته..
الحاصل مفروض أدفع شقله فلوس ضرائب ...وكانت نصيحه المحاسبه التى قامت بأعداد اﻷقرار الضريبى أن أدفع دفعات تحت الحساب حتى لاتأتينى غرامه واضطر لدفع الضرائب باﻷضافه للفوائد..
وﻷنى لأزالت أعانى من شئ شبيه بالصدمه العصبيه التى أصابتنى حين سعيت ﻷغلاق الملف الضريبى للوالد بعد وفاته رحمه الله وأضطريت أتعامل مع مصلحه الضرائب المصريه ..
وقبلها مع وزاره الشئون اﻷجتماعيه قبيل هجرتى النهائيه من مصر...
فالموضوع أحتاج أستعداد نفسى وأستشاره مجانيه من صديقى د.وليد "طبيب نفسى" ع التليفون..
أستعنت بالحى الذى لايموت وقريت سوره الرحمن وماتيسر من قصار السور..وطلعت على أحد مكاتب مصلحه الضرائب الكنديه حاملا كفنى على يدى..
وبدون دخول فى التفاصيل اللى مش فاكرها قوى ﻷنى كنت شبه مسطول م الخوف..
فى خمس دقائق والله العظيم وبرخصه القياده والرقم القومى فقط دفعت دفعه تحت الحساب وتم أعداد جدول لدفع الباقى مباشره من حسابى ف البنك مجدوله على أقل من مهلى...
وقالت لى الموظفه المبتسمه ..!!
كان ممكن تعمل كل ده أون لين ومافيش داعى تتعب نفسك وتيجى ..!!
حد والنبى يلحقنى بطاسه الخضه...
لمزيد من المعلومات برجاء قراءه ماكتبه صديقى واحد مصري بخفه دمه المعهوده حول ملحمه أستخراج شهاده ميلاد
أبنته ربنا يخليهاله
.......
العيال المراهقين هنا فى كندا زيهم زى كل المراهقين فى أوربا وأمريكا حاجه أخر بوظان مافيش أخلاق ولاتربيه ياأخى...
كلام أسمعه من من بعض الناس وبالذات المهاجرين الجدد ساكنى الجيتو من عرب ومسلمين..
تجربتى الشخصيه تتناقض تماما مع اﻷكلشيه ده... أعمل مع بنات وأولاد فى الثانوى أو الجامعه... وأراقب عن قرب أبنتى وأصدقائها فى تعاملاتهم اليوميه وتصرفاتهم... ووجدت أنهم على قدر عالى من الجديه والمسئوليه...
ساره مثلا تعمل منذ شهور بعد أن أتمت السادسه عشر فى الويك أند كل سبت وأحد فى محل لبيع الملابس وكل زملائها وأصدقائها أيضا يعملون.. فى مطاعم.. محطات بنزين.. أو سوبرماركت
وكلما دخلت أحد تلك اﻷماكن أجد واحد أو واحده من زملائها أو أبناء الجيران يقوم بخدمتى أو يحمل مشترياتى للسياره...
فى أخر أحصائيه خرجت هنا عن المراهقين -من ١٥ حتى ١٩ سنه-أن حوالى ٧٥% منهم يعمل لبعض الوقت وأن متوسط ساعات العمل اليومى للمراهقين فى كندا هى اﻷعلى فى الدول الصناعيه...
ست ساعات ونصف مدرسه يوميا ...ساعتين تقريبا دراسه وواجب منزلى... ساعه ونصف عمل بأجر... نصف ساعه عمل بدون أجر سواء عمل تطوعى فى المجتمع المحلى أو أعمال منزليه ..بمجموع فى المتوسط عشر ساعات وشويه يوميا ويقولك بايظين وأخلاقهم نص لبه
تحياتى لكل شباب الوطن الجالسين على المقاهى ممسكين بمبسم الشيشه
...
ع الصبح كده وأنا بأوصل الواد "فارس" للمدرسه لقيت نفسى عايز أسمع
Dark Side of The Moon
للبينك فلويد...
أدور على سى دى مافيش.. بأقلب قى الراديو لقيت محطه أف أم فى برنامجها الصباحى والعاده يكون خفيف وفرايحى كده لتنشيط الناس اللى رايحه الشغل وبناء على طلب أحد المستمعين بتلعب
Dark side
ياخبر أسود منقط ف أسود ...ده مين أبن الكئيبه زى حالاتى كده ع الصبح ...وياترى أحتمال أنك تفكر فى أغنيه من كام مليون أغنيه تطلع لك من الراديو أول ماتلمسه كام ف الميه
.....
مايفقعنيش ياأخى ألا اﻷستنطاع واﻷحكام المطلقه بلا أى سند ولا تدقيق ولاتمحيص.
.مناقشه مع أحد المعارف هنا عن العك اللى شغال حدانا.. وحد الحرابه.. وأرضاع الكبير.. والبيعه العمريه وأخيرا
بمناسبه القتال فى معسكر نهر البارد فى لبنان
فتوى ماأعرفش مين طلع بيها أسمها التمترس..قالك أيه أن المقاتلين يمكنهم التمترس -يعنى يعملول دروع بشريه- بالمدنيين ولو أدى ذلك "ﻷستشهاد" مدنين فى حرب ضد الكفار... كذا
وتدحرج الحوار ﻷهميه الدين..
وبثقه شديده قال لى
أن المجتمعات المتدينه أكثر تحضرا من غير المتدينه..؟؟!!
قلت له أثبت
أحتاس
قلت له أثبت لك أنا العكس..؟
؟قاللى قول
مافيناش من زعل.
.ياعم قول..
هناك دولتان فقط فى العالم أساسهم دينى أسرائيل كدوله يهوديه وباكستان كدوله مسلمه ..أسرائيل مش محتاجه كلام دوله فاشيه عنصريه ونهايتها زفت
باكستان بها اﻷن حرب أهليه مكتومه وستنفجر قريبا..
.أمريكا بها أعلى نسبه جرائم فى الدول المتقدمه من قتل ﻷغتصاب لسرقه باﻷكراه رغم أن ٧٠% من اﻷمريكان يقولون أنهم مؤمنين وبها أعلى نسبه من المترددين على الكنائس فى العالم الغربى كله..فى حين أن ٨٠% من
اليابانين ملحدين أو لاينتموا ﻷى ديانه بها أقل نسبه عنف فى الدول المتقدمه واعلى نسبه أنتحار..
الصين أكبر دوله فى العالم وأسرع أقتصاد فى النمو دوله بلا دين كما نعرفه نحن
الدول التى على رأس قائمه اﻷمم المتحده فى التنميه البشريه كلها دول علمانيه لادينيه..
.أكمل ولاكفايه كده أخش ع الدول اﻷسلاميه والا نخللى الطابق مستور كما يقال.
قٌصدك أننا مفروض نتخلص م الدين..
ماقلتش كده..أنت قلت فرضيه بدون دليل أنا بأرد عليها كده ممكن يكون هناك معنى للحوار أنما المطلقات دى مالهاش معنى وهناك عوامل عده لتقدم المجتمع أنا- وغيرى كثيرين- يروا أن الدين- أى دين- ليس أحدها ..
ولاأظن أنه سيأتى لبيتنا فى جلسه الشواء القادمه...

9 comments:

أبوفارس said...

بعد ماحطيت البوست ده وقريته حسيت أن دمى تقيل وزى ماأكون زعلان وبافش غلى..
وبصراحه أيوه ..
متابعه المدونات واﻷخبار فى الفتره اﻷخيره رفعت الضغط والكلسترول والسكر وكافه شئ عندى..
وبدل ماأسب لحد قلت أكتب حاجه خفيفه فطلع منى الغضب ده
عموما دى مدونه شخصيه من حقى أقول فيها اللى أنا عاوزه واللى مش عاجبه يروح يقرا فتاوى بن باز أو يتملا فى طلعه عمرو أفندى خالد أو يتعلم كلمتين من اللواء الطبيب الحلوجى زغلول النجار.....ومن غير تحياتى

che husam said...

على فكره البوست مش دمه تقيل ولا حاجه
هوا بإختصار حوار جميل
بتبسط فيه كلام كتير عن مسلمات أو حجريات داخل عقول الكثيرين وبترد عليها
بس جميل قوى الحوار الأخير مع السيد الذى لن يأتى لحفل شوائكم القادم
على فكره أحسن إنه معتش يجى معرفة العقليات الحجريه بتخسر أكتر ما بتكسب
تحياتى حسام

Ossama said...

والله بعقد الهاء يا د.خالد تستاهل اللي يحصلك
ما انت بتروح برجليك تقرالي البيعة العمرية والبيعةالسنية وفوق البيعة
يا راجل بذمتك الغلط من ناس فاضية وقاعدة تلعب في صوابع رجليها ولا ناس تروح تقول لدول عيب كده؟؟
صاحبك بتاع الدين ده المفروض سعادتك مش تثبت له ان الدين احسن انما ببساطة ما يروح يقعد في دولة متحضرة ايه اللي مقعد سعادته في دولة متخلفة وفوضى زي كندا؟؟؟
مش الواحد يقعد احسن في الدول المتحضرة الجميلة؟؟؟
ولا ايه؟؟
موضوع الضرايب بقى
انا السنة دي الضرايب رجعت لي مبلغ وقدره
ودفعت اون لاين و وكل الوصولات اللي قدمتها اتقبلت فورا
بلاد فوضى يا عم
وانا بحب الفوضى والتخلف
وحقعد في اوروبا
ياعم تحياتي

Ossama said...

اما عن الحاج زغلول النجار فده مالوش حل يا جدع كذاب صريح وبدون خجل
يقف يقول لك كام الف واحد من الجيش الامريكي اسلموا على يده و عدد المسلمين في الجيش الامريكي اقل عشر مرات من اللي بيقوله و لما تقول له كده يرد في بجاحة مالهاش نظير هما بيخفوا اسلامهم خايفين من الاضطهاد
شيء لايصدقه عكل على رأي شويكار
وجتها نيلة اللي عايزة خلف

أبوفارس said...

http://news.yahoo.com/s/space/20070529/sc_space/28newexoplanetsdiscovered
خبر عن أكتشاف كواكب جديده خارج المجموعه الشمسيه..نهايه القرن الحالى الفرق بين أبناء العالم الثالث والعالم المتقدم مش بعيد يكون كالفرق بين اﻷنسان "الهوموسيبيان" والقرده العليا...يالله وأحنا مالنا

Aardvark EF-111B said...

عزيزي الدكتور أسامه

والله بما إنك جبت في سيرته, بهلول الحمار ده تحفه, ظاهره قائمه بذاتها و تستاهل الدراسه, أحيانا باشتري كتاباته عشان أهلك من الضحك

تحياتي للجميع

علاء السادس عشر said...

عزيزى د/خالد
لم يصلنى أى مايل من حضرتك حتى الآن ,ربما كان هناك خطأ فى العنوان البريدى ,سأكتب العنوان مرة أخرى
تحياتى
ِhoutos5@web.de

أبوفارس said...

This is very intresting....
Things are realy getting ...??!!
http://www.almasry-alyoum.com/article.aspx?ArticleID=62685

أبوفارس said...

عزيزى علاء ياسادس عشر....
أرسلت لك العنوان اليوم أسف على التأخير وشاكر على الكرم المصرى اﻷصيل ربنا يديم اﻷخوه...
تحياتى وخالص مودتى...خالد