Sunday, May 13, 2007

حوار دائرى أخر

حوار دائرى أخر....
تخش من مطرح ماطلعت على رأى أراجوز الليله الكبيره..
تلك المره عن حد الرده..
مفهوم الأله الغاضب الكاره للبشر أحد منطلقات هذ الحوار...
المنطلق الثانى أكثر فكاهيه وهو أن اﻷسلام فيه شبه من المافيا أو التنظيمات السريه... لاتستطيع الخروج منه لو ولدت مسلما... أو هفك عقلك وأسلمت ثم غيرت رأيك فالحكم جاهز وهو القتل..
ورغم شياكه بعض المداخلات حتى تظن أن هناك كلام بجد.. وحوار بجد.. ألا أن حصيله كل تلك الحوارات الدائريه صفر كبير..ولاحتى أبتسامه كانت تأتينى حين يسعدنى حظى واتكبعل فى أحد تلك الحوارات لم تأتى تلك المره..
ربما ﻷنها زادت أو ﻷنى أصبحت أكثر تجهما..
ومادام الفضاء السيبرى اﻷفتراضى أتاح للجميع التنظير فقد قررت أن أدلى بدلوى..
ياسلام شوف البلاغه كل واحد يسحب جردل عشان حانفكر..لغه حسيه صحراويه بدويه عميقه..
تفكر بالعقل وهو ماتربط به الناقه ...
وتبحث عن اﻷسباب جمع سبب وهو الحبل الذى يربط به الدلو أياه لأنزاله فى البئر...
والتفسير هو فحص بول اﻷبل فى الضوء لمعرفه مرضها...
قالك ماينفعش مسلم يطلع من دين اﻷسلام..
رغم أنى أظن أننا فى تلك اللحظه التاريخيه لابد من أن نشجع الناس على ترك اﻷسلام ولو من باب الحفاظ على المظاهر ...!!!!
ليه ﻷن المسلمين حوالى ٢٠% من مجمل سكان اﻷرض...ولكن ٥٠% من فقراء العالم -حسب تعريف اﻷمم المتحده للفقر- من المسلمين..
.بس كده المشكله معقده سيبك م العالم اﻷسلامى خلينا فى العالم العربى الممتد من المحيط الهادر الى الخليج الثائر..او بلغه أكثر موضوعيه وأقل حماسه من المحيط اﻷطلسى الى الخليج الفارسى..
مساحه تزيد قليلا عن الولايات المتحده...وعدد سكان تجاوز ٣٠٠ مليون نفس...اﻷرض الزراعيه أو القابله للزراعه حدانا تفوق تلك فى أمريكا ...وفى حين تطعم أمريكا نفسها ونصف العالم يستورد العرب نصف غذائهم من الخارج..
يمكن عندنا صناعه..!!؟؟
قالك الصادرات الصناعيه -ماعدا البترول- لمجمل أقطار الوطن العربى تتساوى مع الصادرات الصناعيه لفنلندا عدد الفنلندين ٤ مليون فقط لاغير..أو مساويا لحجم تعاملت شركه نوكيا للأتصالات ..
.حط الناتج القومى لكافه الدول العربيه ومن ضمنها النفطيه على بعضه يساوى تقريبا الناتج القومى لدوله أوربيه متوسطه مثل أسبانيا أو نصف ناتج ولايه كاليفورنيا اﻷمريكيه ..
ناتج مصر القومى بعمالها وفلاحيها وجيشها ورئيسها والهلمه دى كلها فى السنه يساوى مجمل ناتج شركه مثل ميتسوبيشى اليابانيه..أخر مره راجعت اﻷرقام كان يعمل بها ٣٥ ألف موظف فقط لاغير...
على لائحه الجامعات الخمسمائه اﻷفضل فى العالم لايوجد أسم جامعه عربيه واحده من أول جامعه القاهره العريقه حتى جامعات الخليج الرخاميه الشيك..
اليونان تترجم أربعه أضعاف عدد الترجمات فى مجمل العالم العربى..اللغه اليونانيه يتحدثها ١٠ ملايين فقط...
عدد اﻷبحاث المنشوره لعلماء أسرائيل يساوى ضعف مجمل أبحاث علماء العرب مجتمعين..
ومعهد حاييم وايزمان للفيزياء المتقدمه أحد أهم عشر مراكز أبحاث فى العالم..
ميزانيه اﻷبحاث والتطوير لشركه جلاسكو للأدويه تزيد عن مجمل ميزانيات التعليم ﻷكبر عشره دول عربيه مجتمعه...
الفلوس مش كل حاجه المهم راحه البال.
.٧٠% من سكان العالم العربى تحت سن الثلاثين..ونصفهم تحت سن الخمستاشر سنه..
متوسط العنوسه فى العالم العربى يصل الى ٢٥% ...بنات وصلن ٢٦ سنه ولم يتزوجن يصل الرقم الى ٣٥% فى السعوديه و٣٠% تقريبا فى مصر والجزائر..
أكمل ولا كفايه حرقه دم..
أيه بقى علاقه الهم ده بحد الرده...
ولا حاجه هم حرقوا دمى باﻷستنطاع قلت أحرق دمهم باﻷرقام ....
ويجعله عامر...."

13 comments:

Ossama said...

عارف يا خالد اهه انت اللي قال فيك الشاعر
والله تستاهل
يعني الاصل انك تبعد عن العبط ده
يا عمي ناس تريد الانتحار
و كأن العالم فاضيلهم
هما شوية الجاز اللي في المنطقة اللي مخليين لها قيمة
بس العرب يصدق فيهم قول بيرم
جيت والتقتنا
قلاشوة بالجاروف ننباع لا المشتري في التمن ماكس ولا البياع
ومين في سوق الدلالة يشتري الصياع
الا لمسح الجزم ويدحرجوا البراميل
ومين
حيقرا كلامك يا حاج عشان يتحرق دمه
ميت مسا
تعالى يا عم في نهاوند وشوف لك غنوة تسمعها تنسيك همومك

طبيب نفسي said...

ياعم خالد ..

إزيك .. عامل إيه؟ أين أنت ؟
الرابط لموضوع الردة فيه مايربو علي 100 تعليق .. كلها بتدور في دايرة مغلقة .. عمرو شخص مهذب وله وجهة نظر عايز يناقشها .. الصارم لحاسم القاطع المانع البتار .. جه علشان يقطع رجلين المعقلقين
مثل الخيار .. ياشيخ سيبك بلاش هزار.
أنا رأيي من زمان ان النقاش مع ممثلي الاسلام المتأسلمين هو نوع من العبث ... طب ليه ؟
لأن رأسهم وألف صفيحة جاز يكون النص هو أصل المرجعية .. يعني هوا مرجعيته ألهية والتانيين وضعية. وطبعا تأويله للنص هو الصح والباقي ركش ..
طبعا أنا لم أقرأ كل تعليقات سيف الله صارم .. لانها لاتخرج عن اجترار لنفس الكلام ونفس التأويل لنفس النصوص... يعني فقي ترب.
القضية من بابها عاملة زي صلاحية وضوء حامل قربة الفساء .. ردة أو حجاب أو عمل المرأة ، كلها قضايا عقول ميتة.
الظريف في الموضوع هو بعض منظري التأسلم اللي بقولوا أن رؤيتهم " مابعد حداثية" والعياذ بالله نتيجة لفشل المشروع الحداثي الغربي الصليبي الساسكفوني .. طب ياعم المرحوم مش تبقي حداثي منتج بنائي الاول وبعدين تبقي بعد حداثي .. والا عايز تتحول من راعي غنم أو راعي بير بترول الي تكوين ثقافي لم تتضح ملامحه بعد في دماغ المعيز اللي مربيهم ايش حال دماغ أسير الردة والحجاب.
وبعدين لو قلتلهم عقل ومنطق يقولك النص .. طب تأويل تاني يقولك بدعة .. يعني في الاخر هتطلع يازنديق ، يا كافر ، يا ضال ...
الصارخ الخاسر بيمثل بالضبط قطاع ضخم من الشعب المصري ..
سيبك من مثقفين وسط البلد .. الصارم هو الاغلبية.
علشان كده احنا نسمع مزيكا .. وناكل بلاك ترفل .. ونقرا ونتعلم .. وخليهم يقعدوا يتناقشوا في الردة والحرابة ومشاكل الخرابة.

عقول ميتة ..

مساء الايس واين

علاء السادس عشر said...

عزيزى د/ خالد
تابعت أنا أيضاً تدوينة عمرو عزت الذى أكن له الكثير من الأحترام .
للأسف لغة الأرقام التى تطرحها حضرتك تزيد ألمنا وتعجبنا نحن ولكن لن تؤثر على طريقة تفكير البعض الذى أصبح غاية النقاش أن يضعك فى ركن والحائط وراءك والسكين على عنقك وإذا لم تقتنع فأنت مفقود.
عموماً الأرقام مفيدة لنا ومفيدة جداً لى شخصياً وأشكرك على مجهود التجميع والمقارنة.
تأخرت فى التعليق على التدوينة السابقة لبعض المشاغل ولكنى تركت تعليق الآن أتمنى أن تقراءه
تحياتى وتقديرى
علاء

أبوفارس said...

رغم حرق الدم يادكتور أسامه ألا أنى أتفق مع د.وليد لانحن ولا مثقفى الجريون ووسط البلد نمثل مصر اﻷن..أمثال عم جرانديزر -الخارق الحارق- دول بحواراتهم الدائريه اﻷنتحاريه أمتلكوا الشارع ومن فيه..وهاهم أشاوس المسلمين هاجموا اﻷقباط ف العياط..والله أعلم حصل أيه فعلا..
وأنا أتابع مدونه عمرو عزت ﻷنه شخص محترم حتى لو أختلفت مع مرجعيته..وأنا أختلف معها كما تعلم..لكنه قابل للحوار والقراءه..
أخوانا البعدا هما اللى مشكله..خطاب بسيط دائرى يبدء بسؤال لايمكن اﻷجابه عليه تؤمن بالله حاتقول أيه..؟؟
"ﻷ"..!!؟
وتجد أنك لابد أن توافق على حد الحرابه والرده والحجاب وختان البنات وبلاوى زرقا..
وكما قال علاء..تجد نفسك ف كورنر ضهرك للحائط والسكين على رقبتك..
ألف سأل سؤال طريف جدا..ماهو نوع الحوار بين أتنين واحد منهم بيقول للتانى ياتوافق على كلامى ياأقتلك وكله بالشريعه...!!!

أبوفارس said...

د.أسامه أنا أعتذر عن عدم أستطاعتى الحوار على الماسنجر اﻷحد الماضى..
د.وليد كان فى بالى والله أتصل بك تليفونيا الويك أند الماضى برضك..

ولكن فوجئنا بوفاه أخو مراتى "جمال سى العربى" المثقف الجزائرى المحترم.. وكان يقيم بالقاهره منذ ١٣ عام هربا من الذبح على الطريقه اﻷسلامو-دمويه حيث أن أسمه كان التانى على لائحه المطلوبين وبعد أغتيال صديق عمره الكاتب والمخرج المسرحى "عبدالقادر علوله" والذى أتاح لى الحظ أن القاه وأتعرف عليه قبل أغتياله..
وطبعا يمكنك تصور حاله "نائله" هذه اﻷيام..وحالتى أنا أيضا "جمال" كان من أعز أصدقائى وأقربهم
ربما أستطيع الكتابه عنه بعدين ولكن وحتى هذه اللحظه لاأستطيع سوى البكاء.....خالد

Ossama said...

البقاء لله يا دكتور خالد
رحمه الله رحمة واسعة
ضحية جديدة من ضحايا الاسلاموية الانتحارية الدموية الضالة المضلة

طبيب نفسي said...

أخي د.خالد

البقاء لله وحده
أحزنني فقدكم لصديقك الغالي .. أعانك الله وألهمك الصبر والسلوان

عمرو said...

البقاء لله


تحياتي لك و للدكتور اسامه و الدكتور وليد

Aardvark EF-111B said...

البقاء لله

________________________

الإشتباك الكلامي الممل ل 3أسابيع و 190 تعليق و النتيجه, صفر مغري

إحدى أسخف و أعقم المناقشات إللي شفتها إطلاقا

جميع الأطراف مهووسة بصوابية آراءها بغض النظر الحق مع مين

كإن عقم و عبثية الموضوع مش كفايه

الواضح إننا شعب خولان جدا و متخلف عقليا عن جداره

لإن الموضوع ده بقاله تلات أسابيع بيتناقش بأكثر من 180 تعليق

و طبعا ولا واحد إتزحزح من مكانه

رغم إن الموضوع بسيط جدا, ليه نقول على ناس إنهم يا مسلمين يا مسيحيين رغم إنهم مش الإثنين و لا عمرهم ما كانو

كون الحكومه بتتمنيك و مش عايزه تصطدم بالإخوان في قضيه رأي عام

فده مش غريب عليها

علاء السادس عشر said...

د/ خالد
البقاء لله وتعزياتى ياد كتور خالد
أسف جداً لهذا الخبر
علاء

أبوفارس said...

شاكر لكل اﻷصدقاء الذين تفضلوا بتقديم العزاء..
وأوصلت تعاريكم ومشاعركم النبيله لنائله زوجتى وأخت المرحوم..
لاأراكم الله مكروها......خالد

واحد مصرى said...

البقاء لله.... غفر الله لفقيدكم و عظم أجركم...

لغة الأرقام التي تغطي عل كل قول ممتعة صريحة و موجعة و لا عزاء لنا
و لما يبقى لسة فيه ناس بيفتوا بجواز رضاع الكبير مستندين لأحاديث البخاري 4000 و 5088 و مسلم 1453...يبقى عليه العوض و لا عزاء لمن اتبع الوهابيين كهنة العصر

أبوفارس said...

شكرا يامصرى وعظم الله أجركم...
فيه كومنت عندك...
تحياتى..وصادق مودتى...خالد