Canadian Experience...

***

لابد من تجديد لوحه السياره هنا كل عام وهو نوع من الضرائب طبعا..عباره عن" ستيكر" ألزقه على لوحه السياره المعدنيه الخلفيه..يصلنى كل عام فى يناير أخطار بالبريد..وأقوم بالعمليه كلها أما بالتليفون أو فى أى مول أو شوبنج سينتر ..أقف أمام شاشه كمبيوتر ضخمه وباللمس على الشاشه أدفع الخمسين دولار وخلاص..نفس الشاشه أدفع من خلالها غرامات المرور البسيطه..تغيير العنوان على رخصه القياده أو كارت الصحه الذى يتيح لى كمواطن كندى التمتع بالرعايه الصحيه هنا بالمجان..وهى تبداء من الزياره الروتينيه لطبيب العائله-وهى صديقه مصريه أسكندرانيه دمها شربات وأخر مجدعه- حتى عمليات نقل القلب والكبد والعلاج من الأيدز حتى وبرضك كله بلوشى..

المهم السنه دى ماجاش اﻷخطار السنوى وكان لابد أروح مكتب المرور بنفسى لتجديد اللوحه وألا غرامه محترمه لو قفشنى عسكرى مرور..

أمبارح وصلت الواد فارس الصبح المدرسه ورجعت على مكتب المرور..اللوحه ع الباب بتقول أنهم بيبتدوا الساعه٩ صباحا لحد ٥مساء..انا كنت هناك ٩ ألا عشره قلت أقف أمام الباب الحق الدور..درجه الحراره يامواطن ١٢ تحت الصفر..توكلت على الحى القيوم ووقفت أمام الباب لمحتنى موظفه من جوه..شاورت بأيديها أدخل..زقيت الباب فتح..دخلت ..

٤ شبابيك مفتوحين وراهم موظفات مبتسمات زى القمر كلهم ..رحت للى شاورت لى..أديتها رخصه السياره والقياده..تك تك تك ع الكيبورد..تك تك طلع الستيكر..

مش أسكت وأمشى لأ اللماضه المصرى

ألا هو اﻷخطار ماوصلش السنه دى بالبريد ليه..؟؟

معقول..يمكن ضاع ف البريد..!!؟؟

هو فيه حاجه بتضيع فى البريد الكندى..؟؟

أخدتها الوطنيه والكنديين أهمه..

وتك تك تك ع الكيبورد تانى طلع أن عنوانى فيه غلطه..ياخبر أسود..راسها وألف قبقاب أنزلاق ع التلج تصلحه..

ياستى مش مهم

أبدا ورحمه جاك كارتييه لازم أصلحه

يادى العطله ياربى..دمغه بقى وختم الدب القطبى وتوقيع البيه المأمور ..ضاع اليوم ياولدى

تك تك تك تالت ع الكيبورد

..خلاص..

هو أيه اللى خلاص

صلحت لك العنوان

مش عاوزه أى أثبات بالعنوان فاتوره كهربا شهاده من أتنين موظفين مرتبهم فوق الميت دولار..حاجه زى كده

بصت لى ومافهمتش

ﻷ خلاص

وطبعا ده كله وسط سيل من ثانك يو وبليز ومرسى وويلكم -بدون شده-أحنا مش ف حصه دين.!!

كل الهرتله دى أخدت أقل من عشر دقايق وأنا خارج كانت الناس أبتدت تهل ووقفوا طابور زى العساكر..كله مبتسم كله

مستحمى وريحته حلوه..

أغسطس الماضى كنت فى القاهره..

أحد اﻷيام الحر جلست ع قهوه بره ع الرصيف أخد نفسى طلبت قهوتى الساده وكبايه الليمون الساده بدون سكر ولاتلج وحجرين معسل..

القهوه دى ياما جلست عليها .. وياما اتلميت فيها فى ليالى الشتاء الجميله مع أصدقاء ندبح بعض مناقشه فى ميدان الجامع لزم أمام أداره مرور مصرالجديده

أنا والعذاب وأداره المرور..

عالم تانى خالص..

خناق وسب دين وناس واخده اليوم أجازه عرضه وعالم بقالها ساعتين ف الشمس مستنيه بصمه الموتور ومشهلتيه وناس قاعده ع القهوه بتكلم نفسها ياولداه م اللى حصل لهم وعرق ورائحه بول حصان وكشرى وعيال خنافس جايه معاها عسكرى مراسله البيه اللواء عشان يشيل المخالفات ويرميها ف ملف واحد مالوش ضهر وناس خارجه مبتسمه جدد

الرخصه وكأنه أخد صك الغفران وضمن مكان ف الجنه وعالم حزينه طالعه ع الدراسه ملفهم هناك

...............

وتقوللى أكسبها

****

الخريف أجمل فصول السنه هنا..تتغير ألوان أوراق الشجر بشكل خرافى وتتحول الى لوحات فنيه شديده الجمال ..وتخيل معى أميال من الغابات وقد أشتعلت كلها بدرجات اللون اﻷحمر واﻷصفر والبنى كلها متعانقه وملتفه.

.كل عام نذهب أنا والعيال وأم العيال وأحيانا بعض اﻷصدقاء ﻷحدى الحدائق العامه لنستمتع بهذه السيمفونيه اللونيه الجميله وجو الخريف الرائع..

أثناء سيرنا فى المتنزه هذا العام فى أحد الدروب المؤديه الى بحيره صغيره نادانى أحدهم

تسمح أحتاج مساعده

رجل فى الستين تقريبا من ملامحه وملابسه أدركت أنه من أهل البلد اﻷصليين -هنود حمر ..اسكيمو.. زى ماتقول-ومعه ولدين صغيران فى عمر فاؤس أبنى أحفاده فى الغالب

أيوه أى خدمه

ساعدنى بس نمسك الطائر ده

طائر.. وأنا مالى ياعم شايفنى طالع رحله سفارى..طبعا قلت الكلام ده فى بالى ...وطائر أيه ده..؟؟ مش عصفوره ولافرخه..حاجه كده شكل البجعه بمنقار محترم ماشى على مهله وسط اﻷشجار

مش ممنوع الصيد هنا..ده أنا اللى بأقول

ﻷ أحنا حناخده البحيره ﻷنه مايقدرش يطير ألا لما يجرى شويه ع الميه عشان وزنه تقيل ولو سيبناه للمساء اﻷغلب حايموت.

.طب وأيه اللى دخله وسط الشجر أبن الهبله ده..ماعلينا..نظره واحده لفارس وساره واﻷثاره ولمعه عينيهم عرفت أنى لازم أساعد عمنا الهندى اﻷحمر ده..

ماشى ياحاج أتكل ع الله

خلع الجاكت وف لمحه ألقاها ع "البجعه"أو الوزه -معلهش قاهرى ماعنديش أى فكره عن طيور كندا- وهوب رفعها م اﻷرض

وصاح عليا أمسك المنقار بس

ياسلام...بس كده..البتاع ده كأنه فارس ساموراى عمال يلوش شمال ويمين..

لكن أنا المصرى ..أول من دهن الهوا دوكو..بقفزه واحده وبغباء شديد أصبحت أمام البتاع ده وجها لوجه.. وقيل مايفقع غينى أو يطير

مناخيرى قفشت منقاره بأيديا اﻷتنين وكأنى مسكت قرن طور

ومشينا للبحيره حوالى ١٢-١٢ دقيقه هو شايل الطائر ملفوف ف الجاكت وأنا قتيل على منفاره بأيديا اﻷتنين وماشى بضهرى كل كام خطوه اتكعبل فى طوبه والا فرع شجره والعيال عاملين زفه حوالينا ..وشويه ولقيت ناس تانيه بتتفرج يادى الفضيحه

اللى لفت نظرى فعلا هو هدوء هذا الرجل الهندى الأحمر التام... كان يتمتم بالأنحليزيه والفرنسيه للبجعه حتى هدأت وبطلت مصارعه معنا ..على مين.. أنا قتيل المنقار ده ..

وصلنا البحيره خضنا فى الماء بضعه خطوات وضعها على الماء تركت منقارها وفى قفزه واحده خرجت على الشط تمشت بهدوء ثم أسرع ثم أسرع فردت أجنحه ملائكيه ضربت الماء بأقدامها وطارت بجلال وجمال

نظر ﻷحفاده وقال

لو دارت وطارت فوقنا فهى تشكرنا..

وقد كان... دوره كبيره ..أنخفضت قليلا... رفرفت فوق رؤوسنا ..وأتجهت جنوبا وسط صياح وصريخ اﻷولاد

نظر لى بهدوء ..هز رأسه ..أعطانى ظهره مقتادا أحفاده ومشى.. أختفى فى أحد دروب المنتزه..

وانا أرتعش

خيبه بالويبه

والويبه أحد المقاييس المصريه المنقرضه لاأدرى مقدارها بالضبط ولكن يبدو أنه كبير..فأصبح فى القول الشعبى مقياسا للخيبه..وعنوان لعام منصرم..راقبت أحداثه من بعيد..واليوم حين جلست ﻷتأملها هالنى ماتذكرت..

بدايه سيئه بأى مقياس عشرات القتلى من اللأجيئين السودانيين فى شوارع القاهره جريمه أقترفها نظام مجرم لاخلاف..الكارثه كانت تأييد عامه المصريين لما حدث..وكشفت عن عنصريه كامنه وغطاء كذب عن كرم الضيافه والود..ظاهره أنا شخصيا كنت اشك فى وجودها ولم أدرك مدى تغلغلها فى نفسيه المصريين العاديين..وأظن سيكون لها دور كبير فى القادم من اﻷحداث..

كانت معركه رسوم الكاريكاتير الدنماركيه لاتزال طازجه ..وبالنسبه لى أثبتت بعٌد عموم المسلمين و"مثقفيهم" عن فهم أبسط مبادئ الحريه الغربيه..النكته فى الموضوع كانت المقوله الشهيره"أشمعنى اليهود..؟؟"

وماأن جلس المسلمون حتى قاموا..أحتجاجا على بابا الكاثوليك هذه المره..لملاحظه لامحل لها من اﻷعراب..ثم قاموا تانى..احتجاجا على

ملاحظه وزير الخارجيه البريطانى السابق عن النساء المنقبات.

ووصل الموضوع الى أبعاد هزليه فى موجه اﻷحتجاج التى تلت تصريحات فاروق حسنى المطبوخه عن الحجاب تانى.. .

موضوع الحجاب والنقاب أخذ وقت وجهد لابأس بهم هذا العام وأكتشفت مع غيرى من عامه المسلمين ركن سادس للأسلام..ربنا يزيد

لمسنى عنف العراق بشكل شخصى حين ذهبت مرتان هذا العام للعزاء فى منازل أصدقاء عراقيين..المره اﻷولى فى عزاء أبن عم أحد أصدقائى العراقيين شيعى من البصره.. المتوفى كان أستاذ أدب ولغه عربيه فى جامعه البصره وعضو فى حزب البعث..عن أقتناع أو كأحدى مسوغات التعيين الله أعلم المهم أنه خطف و قتل بعد تعذيبه..المره الثانيه سنى من بعقوبه..أخو أحدى الصديقات العراقيات..مات أثر أزمه قلبيه ولم يستطع أهله نقله الى مستشفى فى بغداد نتيجه لأغلاق الطرق أثر عمليات للمقاومه..

من بعيد أرى الدوله المصريه تتحلل..تصادم قطارات..غرق عبارات..فساد مابعده فساد..سمعت قصص ماأنزل

لها الله من سلطان عن الفساد أثناء زيارتى للقاهره هذا الصيف

التوتر الطائفى انفجر عده مرات ولازال يهدد باﻷنفجار وسط تجاهل غريب من الحميع ماعدا المكرر السخيف عن الوحده الوطنيه والنسيح الواحد

رحم الله سيدنا ومولانا نجيب محفوظ أول من أثرى روحى وعقلى..أول قرأتى الجاده كانت الثلاثيه..ربما كنت أيامها فى الثانيه

عشر..ولازالت صور ومقاطع كامله منطبعه فى ذهنى..

."فهزت رأسها فى حيره وقالت:

-أختك تقول أنهم قبضوا على عبد المنعم ﻷنه من اﻷخوان المسلمين.لماذا يقبضون على المسلمين؟-

الحكومه تظنهم يعملون ضدها..

ـوأحمد؟!قالت أنه..نسيت الكلمه يابنى!.

-شيوعى ؟الشيوعيون كاﻷخوان فى ظن الحكومه!

-الشيوعيون؟!أشياع سيدنا على

؟فدارى كمال أبتسامه وقال:

-الشيوعيون لا الشيعه هم حزب ضد الحكومه واﻷنجليز !"

حوار بين "امينه" الأم و"كمال عبد الجواد" الصفحات اﻷخيره من "السكريه..

وقصص أمى عن مصرع الحسين وهى تبكى.. ليالى رمضان فى رحاب مسجده ..وحكاوى أكبر خالاتى سنا -رحمها الله- عن مجلس اﻷولياء وعلى رأسه أم العواجز السيده زينب..يقضى بين المسلمين..تراث حب آل البيت..قرأتى للتاريخ وتحيزى اﻷجتماعى للفقراء والشيعه ضد الخلفاء اﻷغنياء كل هذا لم يجهزنى للوضع السوريالى الحالى ...

**أواخر هذا الصيف الساخن الدامى كان على أن أرقص برشاقه قافزا مع غيرى بين المواقف السياسيه..نؤيد حزب الله الشيعى فى مواجهته مع أسرائيل..ونلعن شيعه العراق لقتلهم سنته

نهتف للأسد الصغير-وارث ابوه- ونلعن مبارك الصغير-المرشح لوراثه أبوه أيضا-..نصرخ تأييدا لحكومه حماس المنتخبه ديموقراطيا..ونطالب بأسفاط حكومه السنيوره المنتخبه ديموقراطيا أيضا..مع أيران وبرنامجها النووى..وضد أيران والمد الشيعى..وغيره.. وعيره

من معطيات العام الماضى لاأظن العام الحالى سيكون أفضل وربك يستر

٣-العالم من حولنا

عمليه تسعير البترول عمليه فنيه معقده تخضع لعوامل عده بعضها سياسى والاخرأقتصادى صرف وطبيعى...

فالبترول الخام الخارج من الارض يختلف فى نوعيته وجودته بحسب مكوناته المختلفه من قار ثقيل وكبريت ولذلك كان لابد من استحداث مؤشرات

markers

لتسهيل عمليه تسعير كل نوع مما نطلق عليه اسم جمعى وهو البترول ..اﻷن يوحد ثلاث من هذه المؤشرات..خام تكساس.. وخام برنت النرويجى .. وخام دبى الخفيف .. وبناء على سعرهذه المؤشرات الثلاث يتم تسعير باقى "البترولات" فسعر خام خليج السويس المصرى مثلا يختلف عن سعر بترول فنزويلا اونيجيريا ..

تتم عمليه التقيم تلك فى لندن

London International Petrlium Exchange (IPE)

ونيويورك

NewYork Mercantile Exchange (NYMEX)

ماتحاول ايران ان تفعله هو خلق بورصه عالميه يتم فيها تقيم مؤشر رابع باليورو مباشره بدلا من الدولار...ولوحدث هذا ستستطيع اى دوله منتجه للبترول بيع منتجها باليورو مباشره دون الوقوع فى فخ سعر صرف اليورو والدولار والتلاعب به وهو ما تتقنه امريكا...ومن ناحيه اقتصاديه بحته التحول الى اليورو هو خطوه منطقيه فاوربا تستورد من بترول الشرق الاوسط اضعاف ماتفعل امريكا وصادرات اوربا تمثل حوالى نصف واردات المنطقه ...وأحد مؤشرات الخام الثلاث وهو خام برنت النرويجى يخرج من دوله تقع فى منطقه اليورو وهو ايضا المؤشر الاساسى الذى تم على اساسه تسعير معظم البترول السعودى والايرانى ....ان نجاح ايران فى خلق مؤشر رابع باليورو يعد ضربه قاصمه للاحتكا ر الذى تمارسه بورصتى لندن ونيويورك وسيعمل على فك قبضه الدولارامريكى عن عنق الاقتصاد العالمى وهو ماتستعمله امريكا لمصلحتها وذلك بالتلاعب بسعر الفائده والصرف وحجم المطروح منه...مما يعد ضربه -قويه للاقتصاد الامريكى والذى تحكمه أزمه هيكليه حاده... وخاصه ان البنوك المركزيه فى الصين وتايوان وغيرها بداءت فعلا فى تكديس اليورو كعمله حاويه للقيمه واستعدادا لاستعماله فى شراء البترول....

اعلنت ايران عن عزمها على انشاء تلك البورصه منذ عام ٢٠٠٣ وكان المفروض بدء العمل بها فى ابريل العام الماضى ٢٠٠٥ ثم تأجل الى بدايات هذا العام ٢٠٠٦..ولكن لم يتم حتى الان اما لاسباب فنيه او نتيجه التوتر الحالى على خلفيه البرنامج النووى الايرانى وهو الاغلب.. فحرب اﻷعصاب القائمه حاليا والتى وصلت لحد تسريب اخبار عن استعداد امريكا لاستعمال رؤوس نوويه تكتيكيه ضد ايران اثر على الاقتصاد الايرانى المهزوز اساسا

أو أن أيران قررت عدم مناسبه الوقت وخاصه أنها تشتبك مع اﻷداره اﻷمريكيه وأسرائيل فى مواجهه شبه علنيه

تمتد من اﻷهواز والبصره حتى مستعمرات الجليل وحيفا

وعل هذا التوجه اﻷيرانى يفسر أسباب تحالف يبدو غير منطقى بين شافيز اليسارى الشعبوى و آيات الله

لو صح هذا الطرح فهو يخلق مصاعب مضاعفه لكافه القوى السباسبه فى المشرق العربى..ويخلق حاله

بلبله وتوهان فى صفوفها بدأنا نراه بوضوح فى العام الماضى

مثلا العداء ﻷيران يصب فى المصالح اﻷمريكيه وحلفائها فى المنطقه..لتجد نفسك تقف فى خندق واحد مع أنظمه السعوديه ومصر وحتى أسرائيل..

أو لو قررت أن العدو اﻷساسى هو أمريكا والنظام الأقتصادى الدولى القائم على محوريه الدولار اﻷمريكى فأنت تتحالف مع نظام ثيوقراطى غير ودى فى أقل تقدير للسنه فى العراق وجلب كميه خراب محترمه للبنان ويسعى لمد نفوذه على مناطق أخرى فى مصر وغبرها من خلال التشيع السياسى ...كما أسماه د.وليد مثلا

يحدث هذا على خلفيه ميلودراميه

تتمثل فى أنهيار النظام اﻷقليمى العربى والقائم أساسا على أتفاقيات سايكس-بيكو..وهو ماكان يجب أن يحدث بشكل محكوم أكثر..ولكن عجز النخب العربيه عن التصدى لتلك المهمه..والقمع غير المبرر لقطاعات كامله من المجتمعات العربيه..باﻷضافه-وفقط باﻷضافه- لتدخل مصالح أجنبيه..أدى الى أنفجار تناقضات وصراعات تم تجميدها لعقود..وهو ماسيتم دفع تمنه باﻷضافه للفوائد.

مشكله منطقتنا العزيزه هو تواجد التاريخ بشكل كثيف يمنع أحيانا من رؤيه الحاضر..يتداخل مع ذلك المقدس والدينى..وأظن أننا سنرى هذا الصراع اﻷستراتيجى وقد تحول الى صراع دينى أو صراع بين أصوليتان أسلاميتان أحداهما ذات مرجعيه سنيه واﻷخرى ذات مرجعيه شيعيه..تختفى ورائهما المصالح اﻷقتصاديه الفجه الواضحه...

دائما أقول التاريخ جميل أن نقرأه...

قاس أن نعيشه....