Wednesday, November 01, 2006

!!!!مصر ف قلب الدنيا

من أغرب المسلمات او اﻷوهام اللى لسه متمكنه من عقول الناس ف مصر هو أهميه مصر.... وماحدش مصدق أو عاوز يعترف بتدهور أو أضمحلال دور أو الوزن النوعى لمصر ...لسه الناس عايشه ف مقولات مركزيه مصر وأهميه مصر وموقع مصر الجغرافى المتحكم... والعالم يتغير بمعدلات فائقه السرعه حتى جغرافيا ....أو باﻷصح من الناحيه الجيوبولوتيكاليه -الحغرافيا السياسيه يعنى- مش بس على مستوى اﻷقليم اللى أحنا فيه الشرق اﻷوسط بمعناه الواسع ﻷ ده حتى على مستوى العالم فاكر الكلام الفارغ بتاع منهج الخغرافيا ف تانيه أعدادى معبر القارات وملتقى الحضارات ومفصل العالم ...أنسى مش مصدق أمسك نموذج للكره اﻷرضيه كده لفها شويه.. بس ..أمريكا الشماليه فى النص على ايدك اليمين الكتله اﻷوربيه وعلى أيدل الشمال الكتله اﻷسيويه ...حركه التجاره الدوليه -مقياس المركزيه- ٨٥% منها بين الكتل التلاته دى... أحنا فين بقى بالصلاه ع النبى هناك ف ديل النجمه تحت شويه ...خد عندك الطقطوقه دى كمان... فاكر دروس الجغرافيا لما فلقونا بأهميه قناه السويس أهم شريان تجارى فى العالم... كل سنه وأنت طيب ...خليك ماسك نموذج الكره اﻷرضيه وحط صباعك كده ع اليابان ...وتخيل معايا مركب طالعه من "يوكوهاما" شايله -فضله خيرك -عربيات "تويوتا" ورايحه لميناء "روتردام" -ف "هولندا"- تطلع فى "المحيط الهادى" لفوق ..كمان لفوق ..حبه كمان لفوق ..وصلنا "اﻻسكا "تحود من فوقها على "المحيط المتجمد الشمالى" عندها ممران واحد يمر فى المياه اﻷقليميه "الروسيه" واﻷخر يمر فى المياه اﻷقليميه "الكنديه"... تخلص تطلع المركب على شمال "اﻷطلسى "وتنزل لزم على ''روتردام ''اللى هى فين ..فى "هولنده"... فين بقى قناه السويس تحت هناك أولادنا وأحفادنا بيطلعوا ساعه العصارى يصطادوا فيها سمك ... اضغاث أحلام... ابدا ورب الكعبه الممر الروسى شغال الله ينور ودراسات الجدوى وتجارب التشغيل زى الفل ع الممر الكندى ....الطريق ده يوفر ٣٠% من تكاليف النقل بدلا من رأس الرجاء الصالح والكنال... شفت بقى ياعم أن انا اللى ف قلب الدنيا... وأحتمال الواد" فارس" أبنى يكبر ويطلع بمبوطى وأدخن سكاير مكنه ببلاش...

3 comments:

Ossama said...

حقيقي مصر ام الدنيا
وجوها احسن جو
وميتها احسن مية
والنيل رواه والخير جواه
وتلفزيون الريادة

ورعاية الامومة والطفولة
الجهل العظيم-الكتابة
التجهيلية الانشائية
الثورة حتى النصر وتحطيم الاعداء ويالا يالا

مفيش فايدة من هذا الشيء الرسمي
تحياتي يا جميل

أبوفارس said...

ياسلام ياوﻻد....د.اسامه أول من يعلق على تخاريف العبد لله...ده فعلا شرف عظيم...أشكرك من اﻷعماق نورت البلوج يادكتره

Malek said...

منور بصحابه ياباشا
كتر الف خيرك
تخاريف حضرتك زي مابتسميها في الجون
وموثقة وواضحة جدا
ويار يت توصل لناس كتير ياباشا
الف شكر على تعليقات حضرتك الثرية المثرية
اسامة القفاش
على فكرة مالك ابني وعنده 9 شهور حضرتك وحتى لو كان طفل معجزة وبيعرف يقرا ويكتب مش حيبقى بالعربي لانه مولود في كرواتيا
ومدونته فنية ادبية يار يت تبقى حضرتك تشرفها