..أستر يارب

الخبر ده أصابنى بالفزع..رغم توقعى من فتره لشئ من هذا القبيل..نتيجه أستقراء اﻷحداث ومساراتها..وليس من باب التنباء أو أنه مكشوف عنى الحجاب.. أسلحه كاتمه للصوت وهجوم فى منتصف النهار فى فى منطقه مزدحمه مثل شارع نصوح بالزيتون والذى أعرفه تمام المعرفه يفتح الباب أمام أحتمالات مرعبه..أستر يارب

مشاهد ملخبطه

مشهد كندى

يوم الخميس أول خروج لى من المنزل..متؤكاً على عصاى نزلت وسط البلد قاصدا المكتبه المركزيه لوجود قسم عربى بها لايأس به على اﻷطلاق..طبعا الركن بالسياره مشكله..وجدت مركن مخصص للمعاقين..ولكن النظام هنا يحتم أن يكون معك تصريح رسمى للسماح لك بالركن..وأنا ممعايش طبعا..بالصدفه وجدت أحد رجال المرور..نزلت م السياره توجهت إليه وشرحت له أنه لايوجد معى تصريح ولكن لاأستطيع الركن بعيد..وخاصه أنى أتؤكاْ كما ترى على عصا بعد جراحه الركبه..ببساطه شديده سألنى حتغيب مده طويله..أبدا يمكن نصف ساعه..أخرج ستكير أصفر من جيبه وقال لى مبتسما ساعه ولايهمك خد راحتك ولطعه على زجاج السياره اﻷمامى..وأنا داخل المكتبه كانت تسبقنى فتاه فى عمر أبنتى..فتحت الباب وهى تدخل لمحتنى خلفها ظلت ممسكه به حتى دلفت منه شكرتها مبتسما..أجابتنى

You are most wellcome

..ببطء وصلت القسم العربى..وجدت سيده بشعر قصير ونظاره طبيه تدعبس ف الكتب..لسه منشكح من الموقفين اللى فاتوا أبتسمت لها هازاُ رأسى راحت لاويه بوزها وبصت للناحيه التانيه..أفتكرت أنا ف القسم العربى.

*****************

مشهد سوريالى

اﻷخوه اللبناينين أتصلحوا على بعض..وفين ف الدوحه على بعد مرمى حجر من مركز القياده الرئيسى للقوات اﻷمريكيه ف

المنتأه كلها..وكله رجع متحين ومحمل دولارات ودراهم وريالات..والتعلب فات فات..هع..هع..هع

*****************

مشهد منزلى

يوم الجمعه مرابط بالمنزل ألتهمت رواية "قصه حب مجوسيه" لعبد الرحمن منيف..أحدى الكتب التى أستعرتها..فى ساعات قليله..ولكنها لم تدخل مزاجى على اﻷطلاق..مع أن للكاتب روايتان عظمه.."اﻷشجار وأغتيال مرزوق"و"شرق المتوسط"..وأنا أكن أحترام شديد لمنيف..فهو مثال المثقف العربى الذى يدفع تمن أرائه نفيا ومطارده..

وفجأه قفزت برشاقه الفيل وسرعه السلحفاه..وبدأت النبش فى صناديق الكتب المخزنه فى غرفه الكرار بالمنزل..كنت أنبش كالمحموم حتى وجدتها..

. "البيضاء" لعمنا يوسف أدريس..

أجمل قصه حب قرأتها على اﻷطلاق..ربما ﻷنى قرأتها ﻷول مره و أنا أعيش قصه حب الجامعه..وأعيش فى جو السياسه..ربما لقدرة أدريس الفذه على وصف المشاعر..وأعطائها صوت وكلمات..ربما ﻷن نقد أدريس لليسار المصرى يتطابق مع رؤيتى.

.ربما.

ولكنى أحتضنتها وببطء وكأنى أرتشفها أعدت قراءتها للمره لاأدرى الكام بقيه الجمعه

*************************************

مشهد مالوش معنى

..وطبعا لازم يكون من المحروسه..أتحاد المدونين المصريين..من مدونه المشاغب المحترف باشمهندز رامز..ساعتان يامواطن وأنا أطلع من لينك أدخل على لينك..وأقراء وأطس وشى بشويه ميه ساقعه..وحبه أضحك وحبه أعيط..وحتى وقتنا هذا مش عارف الموضوع جد والا هزار..بس أحتمال كبير أنها سبوبه رزق.. ليه..؟؟ اﻷمريكان ناويين يرشوا رشه جريئه على المدونين..وبالتالى اللى حايلحق يقفل له دكان ويلطع عليها يافطه حاياخد السبوبه الدولاريه دى..وأهو رزق الهبل على المجانين

.................

.ولكن و بصراحه أنا لاأفترض حسن النيه عادة.

.وأظن سوء الظن من حسن الفطن دائما.

.واللى أتلسع من الشوربه ينفخ ف اﻷيس كريم.

.فياخوفى ياصاحبى لتكون دى تمهيد لما يشبه "أدارة عموم الزير"..وعشان ماتدون وتفش خلقك بكلمتين زى دول ماحدش يقراهم..تحتاج ترخيص م الشئون اﻷجتماعيه ووزاره البيئه وهيئه اﻷثار ولابد من موافقه الكنيسه على البوست لو مسلم واﻷزهر عليها لو مسيحى ولا هى بالعكس..مش مهم!!

وكده وبدون عنف ولاوجع دماغ وجمعيات حقوق أنسان ومراسلين بلا حدود نسك عل الموضوع تماما

نسك على موضوع التدوين وصداعه..واللى جاى من ورا المدونين.

.وأحتمال تطلع فتوى بتحريمه كما أفتوا بتحريم اﻷضراب..

هو مش برضك الستات لزمن يدخلوا النت ومعهاهم محرم..والا أنا غلطان

واللى مزنوق ف

كلمتين واقفين ف حلقه يفك عن نفسه ف الحمام.

.وأهو الكلام يبقى ع الريحه حتى

*******************************

المشهد اﻷخير

BLINDNESS

أو "العمى" الروايه التى أهدتها لى ساره أبنتى..أنهيتها من ساعات..ولازال أثرها باقى فى دماغى..

تتحدث عن اﻷنسان حين يواجه وضع مستحيل..

مرض غريب يضرب مدينه فى مكان ما ليصيب أهلها الواحد بعد اﻵخر بالعمى..أنهيار النسيج الأجتماعى..والقيم اﻷنسانيه"..من تعاطف وتراحم..روايه مرهقه للنفس"

التكنيك فيها عالى جدا ويضيف لصعوبتها..الكاتب مثلا لايستعمل أسماء..مجرد وصف..الطبيب, زوجه الطبيب,لص السيارات..ألخ..والجمل طويله لدرجه اﻷرهاق..بعضها يتجاوز النصف صفحه..ولايوجد حوار بالشكل التقليدى الجمل الحواريه متداخله مع النص..وتدخل فى النص أيضا جمل الحوار المتداعى ..وتذوب الفواصل بين النفس والعالم الخارجى..وعدم تحديد المكان ولحد ما الزمان يحولها ألى حاله عامه..ويعطى القارئ -أنا على اﻷقل- أحساس أن الكاتب يعمم على البشريه جمعاء

الطريف أنى بعد صفحات قليله وجدت الفقره اﻵتيه

The moral conscience that so many thoughtless people have offended aganist and many more have rejected, is something that exists and has always existed,it was not an invention of the philosophers of the quaternary,when the soul was little more than a muddled proposition.With the passing of time,as will as the social evoloution and genetic exchange,we ended up putting our conscience in the coulour of blood and in the salt of tears,and,as if that were not enough,we made our eyes into a kind of mirror turned inwaards,with the result that they show

without reserve what we are verbally trying to deny.

لفتت نظرى بشده وأحسيت أنها هى مفتاح الروايه كلها..وثبت لى ذلك بعد اﻷنتهاء منها

..اﻷهم..أن تلك السطور جعلتنى

أتسأل عن توجهات خوزيه ساراماجو السياسيه والفكريه..اللينك اللى كان عندى رغم أنه هو اللى كاتبه لايتكلم بوضوح عن أنتمائه السياسى..هنا وجدت أنه عضو فى الحزب الشيوعى البرتغالى من ١٩٦٩ يعنى من أيام الحكم الديكتاتورى فى البرتغال..

.أأأأأأأهلااااااااا.

.أهو كده ياراجل الكبير كبير..الجواب بيبان من عنوانه

والنبى بالمره يعنى لو حد دخل على اللينك يشوف ويقرا بيقول أيه عن أسرائيل

مش صح برضك الكبير كبير

.بعدها ألتقطت الروايه بعنايه ومحبه أكتر

القداس اﻷسود..كماله

كتابه التاريخ -وبالذات تاريخ اﻷفكار- هى عمليه نقد مستمر أو هكذا يجب أن تكون..وليست ترتيب أحداث وأنتقاء بعضها..حدانا الموقف مختلف..لاأظن أنه تمت عمليه كتابه لتاريخنا بهذه الكيفيه منذ زمن طويل..بالتحديد من منتصف القرن الماضى..كتابه جديده بدأت بأصول المسأله المصريه لصبحى وحيده..ثم قام عدد من الماركسيين المصريين بمحاولة صياغه فهم مادى للتاريخ المصرى كما بدت فى كتابات شهدى وفوزى جرجس وصادق سعد..محاوله لم تلبث أن تحولت ألى أيقونات ديماجوجيه..بعدها حالة موت للتاريخ..لم تكسرها سوى محاولة د.خالد فهمى فى( كل رجال الباشا ) بأستعماله المنهج اﻷمبريقى (!)المهم عمنا جراى فى كتابه هذا والذى سبقه يقوم بنقد حاد لمفاهيم أنحدرت لنا من مغامرة عصر التنوير العقليه..مفاهيم مثل التقدم..والقدره على تغيير الحاله اﻷنسانيه بمعناها الواسع..ويرى أن تلك المفاهيم مجدوله بالرؤيه شبه الدينيه لنهايه العالم أو نهاية التاريخ كان لها آثار وخيمه على مجمل تاريخ القرن العشرين..التجربه الشيوعيه-الستالينيه..والنازيه مثلها..ولكنه يضم لها محاولات الصين وكوبا وغيرها من المجتمعات لقهر شعوبها تحت دعوى التقدم..والتمن الباهظ الذى دفعته تلك الشعوب فى خضم تلك التجارب العدميه..أخر تلك التجارب هو مايسميه "اﻷمبرياليه الليبراليه"..والتى تؤمن أن التقدم اﻷجتماعى لابد وبالتعريف وأن يؤدى الى شكل واحد من التنظيم اﻷجتماعى هى الشكل الليبرالى للمجتمع..وفى طبعه أكثر فجاجه هى الطبعه اﻷمريكيه للديموقراطيه الغربيه..هذا بالرغم من أن التاريخ غير غائى..مثله مثل التطور الطبيعى للأجناس كما أوضح داروين..عدم غائيه التاريخ تفتح الباب للقبول بأشكال مختلفه من الحكومات والتنظيمات اﻷجتماعيه غير المتشابهه..فى اللحظه الحاليه هناك..

China as a mix of nationalism and state capitalism..Iran is a popular theocracy..Russia Ultar- modern authoritarian state..Europe as amix of social democracy and neo-libral economy..USA free market with protectionism and corny capitalism..

تلك اﻷشكال المختلفه للحكم تؤدى وظيفه الدوله والتى يحددها بشكل واضح..الحكومه يجب وأن

Gard against anarchy,conquest by other states,an acceptable level of subsistence for the MAJORITY and a prospect of rising prosperity;institutions that Respect and Reflect the identities of those who are ruled...This is a minimum for a Good Government and to posses legitimacy in modern times..

الديوقراطيه الليبراليه هى أقرب تلك اﻷنظمه فى الحكم لتحقيق تلك المهام..ولكن هذا لايعنى أنتفاء الشرعيه ولاالكفاءه عن باقى أشكال الحكم..التى عددها صاحبنا بما فيها نظام الحكم اﻷيرانى..والذى يبدو وأنه سيكون الطبعه التى ستنتشر فى شرقنا اﻷوسط..

وهذا ينقلنى لنقطه أخرى..تحتاج وقفه مطوله

الكتاب كما قلت موجهه للمثقف الغربى..وكان على البحث بملقاط عما يهمنى شخصيا..

أظن أنه لايخفى على أحد التشابه لحد التطابق بين الخطاب الجهادى اﻷسلامى وبين خطاب اﻷداره اﻷمريكيه واليمين الجديد فى أمريكا..هذا التطابق ليس وليد صدفه..

فاﻷسلام السياسى الراديكالى مثله مثل كل الديانات السياسيه الحديثه (اليعقوبيه..البيشفيه..النازيه..واليمين المسيحى اﻷمريكى) هم جميعا نتاج خلطه بدأت بأفكار عصر التنوير..خلطه بها أفكار نهايه العالم الميثولوجيه بعد أنتزاعها من سياقها الدينى وتحويلها ألى برنامج سياسى..وفكره المدينه الفاضله التى تأتى فى أخر الزمان سواء كانت اﻷنسان الشيوعى الجديد أو اﻵرى..أو الديموقراطى على الطريقه اﻷمريكيه..وبمجرد أدراك ذلك التشابه يمكن على الفور القول بثقه أن اﻷسلام السياسى الراديكالى هو أحد نتاجات عصر التنوير اﻷوربى..

مفاجأه مش كده..أبدا..اﻷب الروحى للأسلام الراديكالى هو سيد قطب..قراءه متأنيه فى كتابات قطب تحيلك مباشره الى عدميه نيتشه التى أنتهى أليها فى كتاباته عما بعد الخير والشر..

وتلك نقطه فلسفيه هامه..تواجه ديانات التوحيد أشكالية تفسير الشر..زرادشت قفز فوقها حين أكد وجود قوى للشر بجانب الخير وتخيل المعركه اﻷخيره والتى لابد وأن تنتهى بأنتصار الخير للأبد(!) نبى أيرانى أخر هو مانى دعا الى ثنائيه العالم وهى رؤيه تقول بها عدة ديانات وفلسفات أخرى فى العالم..تسربت تلك الثنائيه الى المسيحيه الغربيه من خلال القديس أوغسطين الذى أكد على أنفصال مدينه اﻷنسان الناقصه ومدينه الرب الكامله..ربما بتأثير الفكر المانوى المنتشر أيامها عليه..

الفكر اﻷسلامى سواء الفلسفى أو اللاهوتى موقفه غير واضح هنا..رغم كتابات الجاحظ..وأقصى ماوصل له بالذات فى الطبعه الشعبيه المنتشره حاليا..أن الشر يأتى من عدم الطاعه..طاعه الله والرسول وأولى اﻷمر..

الطاعه هنا تنسحب على كافة مناحى الحياة..كيف تأكل ماذا تلبس كيف تضحك..المطلوب هو الطاعه الكامله العمياء..حتى لما يخالف العقل..تذكر فتوى أرضاع الكبير مثلا..

اﻷسلام السياسى الراديكالى يحمل تصور محدد جدا للمجتمع الفاضل..يتراوح بين مجتمع المدينه البدائى وخليط من أفكار الفارابى وأبن سينا فى طبعتهم الشعبيه..ويعتمد أعتماد كلى على العنف فى توجهه لتحقيق تلك الرؤيه..العنف المادى الجماعى..ضد الدوله الحديثه ورموزها من مدارس وتجمعات مدنيه..عنف

يتجللى حتى فى تخريب أشكال المجتمع المدنى الحديثه كما يفعل مثلا اﻷخوان فى النقابات المهنيه فى مصر

ورغم كل الطلاء اﻷسلامى من آيات وأحاديث منزوعه من سياقها التاريخى وحتى فهما اللغوى..فلا يمكن رد اﻷسلام الراديكالى المعاصر الى التقاليد اﻷسلاميه التاريخيه ..حتى فرق مثل الخوارج أو طائفة الحشاشين لم ينزعوا الى تحقيق المدينه الفاضله فى الدنيا..أقصى مافعلوه عقاب الحاكم الظالم سواء بالخروج عليه (الخوارج) أو بأغتياله (فدائى الحشاشين)..وظلوا مخلصين لفكره أن الفرد مسئول عن دخوله الجنه أو سقوطه فى جهنم..

خلق مجتمع فاضل هى فكره أوربيه تطورت عبر قرون..ووصلت ألينا وتبنتها بعض القوى الأجتماعيه-السياسيه ربما للتعبير عن حنقها عما يحدث اﻷن وفراغ صبرها..وبالذات من جراء الهجمه اﻷخيره للأمبرياليه الليبراليه...

القداس اﻷسود

Black Mass

By: John Gray

Professor of European Thought at THE London School of Economics....

Black Mass, df. a sacrilegious ritual in which the Christian Mass is performed backwards

قارئ تاريخ مدمن زى حالاتى لايستطيع إلا المقارنه بين أحداث ومسارات التاريخ..وهناك فكره محدده تطفو على سطح دماغى كل فتره ولاأستطيع حسمها

..وهى ببساطه أننا يجب أن نمر بمراحل تطور أوربا فى خروجها من القرون الوسطى للأن..

بمعنى أننا يجب أن نمر بفتره أصلاح دينى ثم فتره تنوير يتم فيها التخلص من قبضه الفكر الدينى والتوجه الى التفكير العقلى ثم ننطلق فى طريقنا

..وهى عمليه كانت شاقه جدا دمويه ومكلفه فى تاريخ أوربا..فهل كٌتب علينا دفع نفس اﻷستحقاق التاريخى؟؟!!.

.تلك الفكره كل فتره تجد مايبررها

..من أسابيع كنت أقرء روايه أسم الورده للكاتب والمؤرخ اﻷيطالى أمبرتو إيكو..وعززت مناقشات الروايه اللاهوتيه تلك الفكره أننا يجب أن نمر بنفس المسار التاريخى ﻷوروبا..

وقبلها ملاحظه وجدتها فى مدونه الدكتور ضياء الجاده

على لسان جونتر جراس اﻷديب اﻷلمانى "لقد كان من حسن حظنا أننا عايشنا عصري النهضة والتنوير، وعشنا معهما عملية مؤلمة، جلبت لنا طائفة من الحريات لا تزال إلي الآن عرضة للخطر. أما العالم الإسلامي فلم يعش مثل هذه العملية، فهو يمر الآن بمرحلة تطور مختلفة، وعلينا أن نحترم هذا"!!!!

أظن مافيش يعد كده مفكر فى حجم جراس يقول تقريبا نفس الفكره

..مش أسكت.

.ﻷ..لابد من أعاده فحص الفكره.

.وبالذات أنها تصطدم بملاحظه عميقه لكارل ماركس

"التاريخ لايعيد نفسه..وأن فعل فى المره اﻷولى تكون مأساه وفى الثانيه كوميديا.".

التاريخ عمليه معقده جدا شديد الديناميكيه..مرور أوربا بلحظه تاريخيه محدده يغير من معطيات اللحظه التاليه لها تماما وبالتالى لايمكن توقع نفس النتائج حتى لو تشابهت المعطيات

..علوم الفيزياء والرياضيات الحديثه تؤيد ملاحظه ماركس العبقريه..أشياء مثل نظريه الفوضى أو تأثير الفراشه..حيث تؤدى تغيرات بسيطه فى المعادله الى نتائج شديده اﻷختلاف.

. هنا يأتى كتاب القداس اﻷسود لتنفجر فى عقلى تلك اﻷشكاليه..كانت دماغى تغلى بها وقررت أن أؤجلها حتى أجلس وأفكر فيها على رواقه وقدمى ملفوفه وممده أمامى..
والسطور التاليه هى مجرد تفكير بصوت عالى

..الكتاب صعب مركز وموجه للمثقف اﻷوربى فوق العادى..بمعنى أنه يفترض فى قارئه ألمام كامل باﻷحداث التاريخيه فى أوربا وبتاريخ اﻷفكار أيضا

..المهم.

.فكره المدينه الفاضله أو مملكه السماء هى أساسا أفكار دينيه وجدت طريقها الى التقاليد اليهود-مسيحيه من خلال تأثيرات ديانات الشرق اﻷوسط..

فكره نهايه الزمان أول من نادى بها النبى اﻷيرانى زرادشت ووجدت طريقها الى اليهوديه المتأخره فى مخطوطات البحر الميت..ومنها الى المسيحيه..المعركه اﻷخيره بين قوى الشر وقوى الخير..تنتهى بأنتصار قوى الخير..الرب اﻷله..ثم سنوات طويله من السلام تعيشها اﻷنسانيه

كارن أرمسترونج تقدم عرض خلاب لتلك الفكره فى كتابها الممتع

The Great Transformation

..المسيحين اﻷوائل كانوا جميعا يعيشوا تحت تأثير فكرة اننا نحيا آخر الزمان وعودة المسيح قريبه جدا..وبالتالى فمملكه السماء والسلام النهائى فى متناول اليد....فى نهايات القرون الوسطى هزت أوربا حركات تمرد مسلحه كان يقودها قديسين ومتنبأين صادقين لهذا الحد أو ذاك كانت تلك الحركات تحمل خليط من أفكار نهايه الزمان "اﻷلفيه" وقرب موعد مملكة السماء أو المدينه الفاضله..

تلك الحركات الدينيه تميزت بالعنف الشديد..وأستدعت عنف أشد لقمعها سواء من قبل الكنيسه الكاثولوكيه أو من قبل السلطه الزمانيه ممثله فى اﻷمبراطور ..

غرقت أوربا فى الدم عقود طويله..حركات دينيه تدعو للفقر وترك الدنيا وأخرى تأخذ الموضوع خطوه منطقيه أخرى بقتلها للأغنياء..وحرقها المدن الثريه..جيوش تدافع عن المدن وتحرق القرى..

تلتها الحروب الدينيه بين الكاتوليك والبروتستانت..والتى راح ضحيتها مثلا تلت سكان ألمانيا..

حتى مل الجميع..وتزامن ذلك مع بدايات عصر التنوير...ورغم اﻷعتقاد السائد أن التنويريون فى معظمهم كانوا ملحدين وتركوا الدين ورائهم تماما ألا أن العديد من أفكار نهايات القرون الوسطى وجدت طريقها بشكل جديد متحول لأفكار التنوير..تم أستبدال مفهوم ميتافيزيقى هو اﻷله بمفهوم آخر ينعته "جراى" بالميتافيزيقيه هو اﻷخر وهو العقل.

.العقل تحول الى أله جديد غيور بل أشد غيره من يهوه..لايقبل شريك..مملكة السماء نزلت الى اﻷرض..الغرور الذى صاحب صعود مفهوم العقل فى الفكر اﻷوربى أستدعى فكره أخرى شديدة الخطوره

..يمكننا خلق المدينه الفاضله هنا على هذه اﻷرض..يمكننا تغير البشر وتحويلهم ألى كائنات أفضل.

.فكره نهايه الزمان هى اﻷخرى تحولت الى أيقونه فكريه تطل برأسها كل حقبه بشكل جديد.

.أول من حول تلك اﻷفكار الى برنامج سياسى وحركه سياسيه هم اليعاقبه أثناء الثوره الفرنسيه الرغبه فى تغير الناس الى "اﻷفضل" أستعمال العنف واﻷرهاب المنظم كوسيله لهذا التغير أول من مارسها هم اليعاقبه..وجلهم من مثقفى التنوير.

.بعدها كان البلاشفه هم من طور فكرة أستعمال اﻷرهاب المنظم لخلق اﻷنسان الشيوعى السوبر الجديد كما عبر عنه بوضوح ليون تروتسكى..النازى وفكرتهم عن الجنس النقى حامل أفضل مافى البشريه ونفيى صفه البشر عن اﻷجناس "اﻷقل"..الرايخ التالت الذى سيبقى ﻷلف عام هى تعبير حديث عن فكره نهايه العالم اﻷلفيه.

.دخول أوربا العصر الحديث كان فعل عقلى منظم ولكنه عنيف جدا وتمنه وتكلفته البشريه عاليه..

حتى تلك اللحظه لازال الغرب يدور فى فلك نفس اﻷفكار..نهايه العالم أو نهايه التاريخ كما عبر عنها فوكوياما..

محاوله تغير العالم ونشر الديموقراطيه ولو بالعنف واﻷرهاب المنظم -كما هو حادث اﻷن فى العراق-.وتحويله إلى عالم أفضل..بناء عن تصور مسبق هو خليط من أفكار عصر التنوير والمسيحيه الجديده والنيوليبراليزم

.الكاتب يتنباء بهزيمه الدفعه اﻷخيره ﻷوربا والفكر اﻷوربى فى هذا اﻷتجاه فى شوارع بغداد والفالوجا..

يتبع

عملية الغضروف تانى

عملية الغضروف تانى..السنه الماضيه الركبه اليمنى ومن أيام الركبه اليسرى..أزك ف المنزل على العكاز وكأنى "قناوى" ف "باب الحديد"..السن والوزن وطبيعه العمل ..كان لابد من محاولة التخلص من آلام الركبه المستمره..نفس المستشفى..نفس اﻷطباء..نفس الروتين..تحويل من طبيبه العائله الصديقه السكندريه لنفس اﻷخصائى فطلب أشعه مقطعيه وعدة تحاليل..ثم تقرير طبى شامل من طبيبه العائله..لم أستطع الحصول عليه ﻷنها فى مصر..فأتصلت بصديق آخر..طبيب مصرى ..شاب نابغه أقل من أربعين عاما وأستشارى قلب هنا فى أوتاوا وأيضا فى أمريكا..طبعا تقرير هايف مثل هذا أقل بكتير من مستواه ولكنه صديق فأستقبلنى فى عيادته ساعه الغداء وأعطاه لى..أزوه كل عدة أشهر فى العياده للأطمئنان على القلب والضغط..سكرتيرته تضعنى أخر المواعيد..ﻷننا لانكف عن الكلام والنقاش بعد الكشف..وحتى لاأعطل لها جدولها..أسميها ماما سميحه لزياده وزنها وأبتسامتها الدائمه ولكنها تدير العياده بقبضه من حديد..لاحظ بيدى كتاب

Naguib Mahfouz at Sidi Gaber

فهز رأسه بأسى وقال لى فى زيارته اﻷخيره للقاهره لم يجد سوى كتب عن عذاب القبر وليله الدخله..وترحمنا سويا على فرشه باعه الصحف على محطات مترو مصرالجديده حيث كنا نشترى كتب عالم المعرفه وأصدارت مختلفه..

المهم العمليه تمت بنجاح والحمدلله..نفس العنايه ونفس اﻷهتمام.
.فى طريق العوده للمنزل قالت لى زوجتى وهى تحدق فى الطريق أمامها..العمليه دى كلفتنا ٤ دولارات* بحالهم هو المبلغ المدفوع فى جراج اﻷنتظار تحت المستشفى

*******************************

العلاج* الطبى مجانا تماما فى كندا..زيارات اﻷطباء..اﻷشعه التحاليل..ألخ كله مجانا..التأمين الصحى الكندى -رغم شكاوى الكنديين- واحد من أفضل أنظمه التامين الصحى فى العالم

*****************************

أبنتى ساره أشترت لى رواية أسمها العمى

BLINDNESS

للكاتب البرتغالى خوزيه ساراماجو الحائز على جائزة نوبل ف اﻷداب لعام 1998ﻷتسلى وأنا حبيس المنزل..الروايه تحولت أيضا الى فيلم كندى أٌفتتح به مهرجان كان لهذا العام...لما نشوف..يادوبك بنقول ياهادى..

********************************

**********************************

من باب التسليه أيضا شاهدنا سويا -ماعدا فارس- فيلم

RENDITION

وبصراحه كان أختيار مش ولابد..ظللت طوال الليل أحلم بمشاهد التعذيب وتدور فى عقلى حوارات الفيلم وبالذات أنى كنت لسه تحت تأثير المخدر ومسكنات اﻷلام النصف مخدره..

صباح السبت سألت زوجتى أن كان أصابها هى اﻷخرى نفس اﻷرق فقالت نعم

..أسترحت..

ودفعنى هذا لمشاهده الفيلم مره ثانيه

..مواطن أمريكى من أصل مصرى تشتبه المخابرات المركزيه أن له علاقه بخليه أرهابيه فى الشرق اﻷوسط فيتم ترحيله ﻷحدى الدول العربيه..المناظر الخرجيه أظنها ف المغرب..حيث يتم أستجوابه على الطريقه العربيه الفعاله..!!!

.أستطعت ف المره الثانيه أن أرى الفيلم بعقل أبرد

..وهو فيلم متوازن لحد كبير..الفقر..مناظر الفقر فى المدينه العربيه متعمده جدا..تفاوت الثروات..الفارق بين قصر وزير الداخليه ومساكن فقراء المدينه لاتفوت على مشاهد..واليد الثقيله للنظام البوليسى..مشاهد التعذيب وضرب المظاهره السلميه شديده القسوه..كل هذا هو سبب "اﻷرهاب

أعجبنى جدا الفرق الواضح بين الألوان المستعمله فى تصوير مشاهد واشنطن وهى ألوان حاده واضحه ومحدده يغلب عليها اللون اﻷزرق..وبين الألوان اﻷكثر شاعريه التى أستخدمها المخرج فى مشاهد المدينه العربيه..البرتقالى واﻷصفر ..الفيلم به ممثلين محترمين ولكن لفت نظرى وبشده من المشهد اﻷول الممثل الوغد

Yigal Naor

أظنه أسرائيلى ولكنه وبصراحه ممثل فائق الجوده..يتكلم العربيه بلكنه خليط من الفصحى

واللهجه المصريه

ماعدا النهايه الهوليوديه الفاقعه الفيلم جيد جدا ومنشط للعقل ولكنه غير صالح للمشاهده بعد ساعات من جراحه ف الركبه

مشاهد كنديه

المشهد اﻷول

الصيدليه التى أعمل بها يوم الثلاثاء من كل أسبوع..وصفه طبيه جديده أراجعها لفت نظرى أسم صاحبتها "شالومات....." أن كان شالوم هى سلام بالعبريه فالمنطقى أن تكون "شالومات" معناها سلامات..لقرب العربيه والعبريه بشكل كبير..رفعت رأسى ونظرت فى المنتظرين حول الكاونتر..وأستطعت تميزها فى لحظه ملامحها شرق أوسطيه جدا..شعر قصير يغلب عليه البياض ربما تكون فى أوائل اﻷربعينات من عمرها..عيون سوداء واسعه..وحواجب سوداء ثقيله..أمرأه جميله فى المجمل..لفت نظرى أكثر ماترتديه ملابس خفيفه صيفيه أنيقه ولكن تعطيك أحساس بعفويه أو غجريه صاحبتها..واﻷهم كم الخواتم والسلاسل الفضيه التى تلبسها.. وأنا أعطيها المضاد الحيوى ماعرفتش أمسك لسانى..كالعاده...فبدأت

أنا كده أتلخبطت... اﻷسم يهودى جدا

نظرت لى بحده وقالت

أنا يهوديه جدا..

بس السلاسل الفضه اللى لابساها بتقول غير كده..

أمسكتهم بيدها وأخرجت تمثال صغير لبوذا و أحد رموز الهندوس ثم لوحت فى وجهى بثالثه

دى خميشه يهودى..

خمسه وخميسه فضيه مزخرفه..

رددت "خميشه" نسميها خميسه عندنا

عندنا فين

مصر..نرتديها للحمايه من الحسد والعين الشريره..

بالضبط عندنا كمان..

يعنى أنتوا واخدينها منا..أنا أدرك تماما خطاء هذه العباره ولكنى كنت أود معرفه كيف تفكر..

لاأظن اﻷغلب أنها سابقه علينا كلنا ودخلت كجزء من ثقافه المنطقه كلها.

حلو البنيه بتفهم
..وأنت

آه لابد أنها لمحت سلسلتى الفضيه..فأخرجتها ..سلسله ﻵيه الكرسى

هديه أعتز بها
..ماذا تقول ؟؟؟

ترجمتها لها بقدر أستطاعتى
هزت رأسها

جميله وعميق..الله لاآله ألا هو..سأحاول البحث عنها مترجمه ع النت.

ونقول أيضا...

الله نور السماوات واﻷرض...النور رمز الأله فى معظم اﻷديان

أنا مهتمه بدراسه اﻷديان

..ولكن من أين يأتى الشر..
..لاأدرى..الغريب أن بيننا أشياء كثيره مشتركه..وعشنا سويا قرون فى شمال أفريقيا وأسيانيا..واﻷن

وأشاره يائسه من يدها

..كله من اﻷمبرياليه اﻷول اﻷمبرياليه اﻷنجليزيه واﻷن اﻷمبرياليه اﻷمريكيه..

أمبرياليه..!!؟؟ الله دى منين بالظبط

فسألتها

راكاح*..؟؟

أتسعت عيناها

ﻷ ميريتز**..

أشرت بكلتا يدي أشاره نص نص يعنى.

فأحتدت تانى.

.ميريت أقرب للروح اليهوديه من راكاح

..ولكنهم موافقين على اﻷيديولوجيه الصهيونيه..مش كده؟؟

ولذلك هم اﻷقرب للروح اليهوديه من راكاح

...لم أرد الدخول فى نقاش قد يشتعل والموقف كله لايتحمل..أشاره أخرى بيدى بمعنى لنتوقف هنا

..حدقت فيا بعيونها السوداء الواسعه

هممم ..ربما فرصه أخرى.

أى زمان وأى مكان

..أنت هنا على طول

..الثلاثاء فقط.

..ربما أتى ثلاثاء أخر لنتكلم..

مرحبا

..شالوم

وعليكم السلام ورحمه الله وبركاته

أبتسامه جميله ومشت..ظللت أراقبها للحظات حتى أستدارت ثانيه.. أبتسامه أخرى.. وهزه من رأسى

*****************************

راكاح* هو الحزب الشيوعى اﻷسرائيلى..وكان يضم معظم الناشطين والمثقفين العرب فى أسرائيل مثل توفيق زياد ,محمود درويش وأميل حبيبى صاحب روايه سعيد أبا النحس المتشائل..واحده من أفضل الروايات العربيه..والحزب يرفض اﻷيديولوجيه الصهيونيه مع قبوله بدولة أسرائيل...
http://en.wikipedia.org/wiki/Communist_Party_of_Israel
ميريتز**تجمع يسارى صهيونى يضم عدد من الشخصيات والحركات اليساريه برنامجه خليط من اﻷشتراكيه الديموقراطيه و دعوات الحفاظ على البيئه..الخضر

http://en.wikipedia.org/wiki/Meretz-Yachad#Ideology

**********************************

المشهد التانى

ساره أبنتى -١٨ سنه- أنهت سنتها اﻷولى فى الجامعه درجاتها فوق التمانين ف الميه بشويتين يعنى تقدير جيد جدا..وهو مالم أحصل عليه شخصيا ف أعدادى صيدله جامعه القاهره زماااان أوى..تريد الذهاب للقاهره هذا الصيف والبقاء هناك لمده ٥- ٦ أسابيع مع أختها المقيمه وتعمل بالقاهره وعمتها وبنت عمتها ألخ ألخ...أشترطت عليها أن تدفع على اﻷقل نصف تمن تذكره الطائره ومعظم مصاريفها ف القاهره..ﻷنها أصبحت مستقله اﻷن وعليها أن تعتمد على نفسها..طبعا كلام من ورا القلب ولكنى أحاول أعدادها للحياه هنا ف المجتمع الكندى..وتحمل المسئوليه

ساره تعمل وتدرس ف نفس الوقت..أثناء الدراسه تعمل ف الويك أند وربما مره واحده أو أثنتان وسط اﻷسبوع فى محل لانجيرى ملك سيده مصريه هى وزوجها أصحاب أعمال ناجحين جدا هنا

..وبصراحه تستجدع جدا مع ساره..فهى مصريه ف النهايه ولديها أولاد أكبر شويتين من ساره والدراسه هى نمره واحد لدينا جميعا..

أعطتها أسبوعين أجازه وطلبت منها التفرغ التام للمذاكره واﻷمتحانات وأخذتها للعشاء حين علمت بتقديرها هذا العام...

المهم ساره بعتتنى بعته محترمه من كام يوم

..جاءت لى ومعها بعض اﻷوراق الخاصه بالجامعه وطلبت مشورتى..طبعا أتنفخت مسحت النضاره وبدأت القراءه فى كورسات العام المقبل..البنيه تنوى دراسه طب..وبالتالى تحتاج كورسات محدده..بيولوجى وكيمياء حيويه وخلافه وهى كورسات مرهقه ومتعبه.

.فقالت لى برقه أيه رأيك يابابى لو أخدت كورس خفيف كده ف الصيف عشان أخفف الحمل عليا السنه الجايه..؟؟!! والله كلام معقول وماله ياحبيبتى ..ده أنا اللى بأقول

عندنا كورس أحصاء ممكن أخده ف الصيف يومين ف اﻷسبوع لمده ٦ أسابيع

حلو... ده برضه أنا اللى بأقول

يعنى أسجل

على بركه الله يابنتى

آه على فكره معنى كده أنى مش حاأقدر أشتغل فول تايم ف الصيف بارت تايم بس عشان الكورس والمذاكره

وماله يابنتى الدراسه أهم

أنا لسه مش واخد بالى من الفخ المنصوب

طب كده مش حاأقدر أدفع نص التذكره للقاهره زى ماأتفقنا!!!.

.بص لو ماتقدرش تدفع أنا ممكن أطنش الكورس وأشتغل وربنا يسهل السنه الجايه أقدر ألاحق على الكورسات الصعبه آوى آوى دى..بس ماأقدرش أوعدك حاجيب فوق التمانين زى السنه دى

...يابنت الذينا..أنا كده أتبعت تماما..وهى تدرك تماما ماذا سيكون ردى..

الدراسه هى نمره واحد ياساره ولا يهمك أنا حأدفع تمن التذكره كله المهم تشدى حيلك ف الكليه

...هئ هئ ربنا يخليك ليا ياأحسن بابى ف الدنيا

وماله كسبنا صلاة النبى

*****************************************************

المشهد التالت

..الخميس أعمل فى الطرف اﻵخر من المدينه..أنهى عملى عاده الساعه الخامسه وشويتين..الهاى واى مختنق فى ساعه الذروه..لسبب لاأعلمه قررت أن أعود للمنزل من طريق أخر يلف حول المدينه وأطول بكتير ولكنه على اﻷقل منساب..أكره ساعات الذروه حين تتحرك السيارات كالسلحفاه وأختنق داخل علبه الصفيح المسماه سياره..السرعه القصوى على هذا الطريق الدائرى ٦٠ كيلو ف الساعه..و٦٠ يعنى ٦٠ وألا الغرامه ياحلو..

ولذلك أخدت وقتى

..أنجعصت فى المقعد ولعت سيجار رفيع مكسيكى أول مره أدخن سيجار مكسيكى..حطيت سى دى

..كوكتيل من بينك فلويد لبوب مارلى مرورا بفيل كولينز وأجاثا فرانكلين..أى دوشه وخلاص..وأتكلت على الحى القيوم

الطريق ملفات..بعضها حاد يحتاج وعى ف القياده...فجاءه العربيات اللى قدامى بتهدى ثم توقفت..حادث مرورى طازه يادوب من تلات أربع دقائق..وقفنا كذا عربيه..وأتجهنا للسياره..أنحرفت عن الطريق ونزلت فى هوه محترمه على الجانب..أتنين تلاته شباب نزلوا جرى من سيارتهم وأتجهوا للسياره الساقطه على بعد عده أمتار ومقدمتها غارسه فى اﻷرض..

صحت عليهم

..ماتحركوش حد..بالذات السائق

..أسوء اﻷحتمالات اﻷن أصابه رأس وعنق وتحريك المصاب ممكن يبوظ الدنيا

..كلموهم بس لو فايقين عشان مايروحوش ف أغماء
..نظروا ألى..السن والصلعه واللهجه الواثقه فرملتهم..هزوا رؤوسهم..

وصاح واحد منهم

سيده واحده فقط هى السائقه

..فايقه والا مغمى عليها..

فايقه

كلمها أسألها أسمها أيه وأذا كانت وحدها فى السياره والا كان معاها حد

..فى تلك اﻷثناء كان أتنين تلاته أتصلوا بالطوارئ (١١٩) دقايق يامواطن وسمعت العوووعو بتاعه اﻷسعاف والمطافى وعربيتين شرطه..قفز أولا رجال المطافئ لتأمين السياره وطلبوا من الشباب الطلوع

..وهم طالعين كان رجال اﻷسعاف بيخرجوا عدتهم

وسألوهم

..كام واحد

واحده فقط

حركتوها

ﻷ هو قال ماتلمسوش حد بالذات السائق

وأشاروا ألى

..كويس كده صح

..نظره أمتنان من الشباب

..رجل الشرطه سأل أن كان حد شاهد الحادث مباشره هز معظم الواقفين رؤوسهم ﻷ..ماعدا واحد فقط قال أنا كنت وراها مباشره

..طب ياجماعه شكرا أتفضلوا أنتم..وللسائق اللى شاف الحادث خليك دقايق أخد أقوالك

..تحركنا كل لسيارته وبدأنا نخللى الطريق الذى كان متوقفا ربما ١٥-٢٠ دقيقه كل الموضوع

..أنجعصت تانى فى مقعدى..أخرست السى دى..وقدت السياره بشكل آلى

..وفجاءه جائتنى فكره غريبه جدا

..دى يمكن تانى أو تالت مره أخد الطريق ده..لو كنت دقيقتين تلاته مبكرا ربما كنت أنا المصاب فى هذا الحادث..ولو كنت دقيقتين تلاته متأخرا ربما كانوا الشباب أخدتهم الحميه وحركوا السيده محاولين أخراجها من السياره وتسببوا فى أصابتها بشلل أو شئ آخر

...همممم...سبحان الله

politically incorrect

اﻷنسان حيوان ضاحك...هكذا مايقولون..الضحك ظاهره أنسانيه نتفرد بها..ولكن ماذا يضحكنا..؟؟

لماذا نقهقه ونضحك ونتلوى من اﻷلم فى بعض المواقف..

من أيام شاهدت فيلم حمى الذهب لشارلى شابلن مع أبنى فارس(١١ سنه)..فارس كاد أن يختنق من الضحك على شارلى شابلن..مما جعلنى أتعجب..هذا الفيلم عمره حوالى ٧٠-٨٠ سنه ولكن شابلن لازال يستطيع أنتزاع الضحك من صبى صعير..مالسر؟؟

لاأعرف كتاب جاد تكلم عن الضحك سوى محاوله بيرجسون لفلسفه الضحك وهو كتاب دمه تقيل فعلا..

فى روايه أسم الورده لأيكو النقاش اﻷساسى فيها يدور حول سؤال محدد هل هناك فى النص المقدس مايدل تصريحا أو تلميحا على أن السيد المسيح ضحك؟؟؟

وأذا لم يكن هناك مثل هذا الدليل قهل يصح لراهب جاد مقيم فى دير أن يضحك؟؟؟

هذا التساؤل يؤدى الى سلسه من اﻷحداث المنطقيه المتتاليه..فرئيس الدير يخفى نسخه كتاب أرسطو الوحيده عن الكوميديا..بل يذهب الى درجه تسميم النسخه لقتل أى راهب مارق يحاول قرائتها..وهو مايحدث فعلا فى بدايه الروايه

فى التراث اﻷسلامى هناك أدله واضحه على تبسط الرسول مع نساؤه وضحكه مع الصحابه..

ولكن طبعا الطبعه البدويه المتجهمه هى الغالبه حاليا يكفى أن تنظر فى صور الدعاه الموجودين على الساحه حاليا من البدرى لحسان حتى تستعيذ بالله..

السيد المسيح ضحك أم لم يضحك..من سنوات حضرت محاضره هنا لأبونا شنوده بابا الكنيسه القبطيه..

أقول أبونا وأنا مسلم ﻷنى أنحياز لكنيستنا المصريه كنيسه الفلاحين وأحب تقشفها وأديرتها..

ماعلينا البابا شنوده أبن نكته مصفى..تخرج منه النكته والضحكه بتلقائيه أبن البلد وبسهوله..

المصريون مشهورين بخفه ظلهم..ودى حقيقه لمستها حين أحتكيت مع باقى العرب المتجهمين عدا اللبنانين..

ولكن نكتنا عباره عن قفشات متتاليه ومايشبه القافيه واللعب على الكلمات..معظمها غير عميق..

اﻷنجليز سخريتهم مريره..

الروس نكتهم حريفه..

اﻷلمان لايضحكون..والله فعلا لايضحكون..

الطليان واﻷسبان نكتهم سريعه ومعظم الوقت لاتدرى أن كانوا جادين أم يسخروا منك..جرب كده وأتفرج على فيلم كوميدى طليانى

نرجع للسؤال اﻷساسى مالذى يصحكنا..؟؟

الكلمه ..الحركه..القافيه..المعنى أم اﻷلقاء..؟؟ كيف يستطيع البعض أن يحعلك تصحك حتى تدمع عيناك وهو يسخر منك ومن اللى خلفوك..ويقول لك نفس الكلام الذى سيدفعك لملاكمه فى موقف مخالف..؟؟

حاجه كمان الكنديين مشهورن بتوريدهم للكوميديا لهوليود...جتى أنه هناك نكته تقول "فى هوليود حين تقول أنا كندى يبدء الناس ف الضحك

مع أنه مافيش حاجه أسمها كندى نحن خليط من كافه شعوب اﻷرض أزاى نضحك..؟؟

بنضحك على نفسنا ..على الفروقات الثقافيه والمفارقات فى الفهم المختلف لنفس الشئ..

وتحولت مثلا الزيجات المختلطه الى ماده ثريه جدا للضحك..

.مثلا نكته سمعتها من أيام

ماهى أفضل مميزات الزواج من أمرأه من الكاريبى..؟؟

أنها حين تبدء فى الصياح عليك بلهجتها المميزه تتخيل أنك فى أجازه وتبدء فى وضع كريم ضد الشمس ونضاره سوداء...ولاتهتم..

.رسل بيترز كوميديان كندى من أصل هندى شاهدته فى التليفزيون عده مرات وحضرت عرض له أمس مع زوجتى هنا فى أوتاوا

أبن ستين كلب..

مايقوله فى عرضه الكوميدى كفيل بأدخال أى أنسان السجن لمده طويله هنا بتهمه نشر الكراهيه وأزدراء اﻷخرين وحتى معاداه الساميه..نكته كلها عن الفوارق اﻵثنيه والثقافيه..ويعمل على السخريه من الأكلشيهات واﻷفكار المسبقه عن اﻷحناس المختلفه

بدء عرضه أمس بالسؤال هل يوجد عرب فى المتفرجين اليوم فصحنا وكنا كتييير فعلا

..أيوه؟؟

فأظهر أنزعاجه وقال لنا أنا ما بنكتش على العرب خالص عارفين ليه؟؟

ﻷنى عاوز أعيش لغايه ماأقبض معاش كندا..؟؟

وهى نكته مزدوجه يفهمها الكنديين..فمعاش كندا مبلغ هايف يقبضه أى كندى حين يصل لسن الخامسه والستين وهناك كلام عن رفع هذا السن اﻷن الى السبعين

بس ياعم عينك ماتشوف ألا النور ...مسكنا مسخره يمكن ربع ساعه المجانين اللى مابيخافوش م الموت واللغه الغريبه اللى عمله زى مايكون واحد عنده أمساك..وطاخ طيخ..وأحنا فعلا حانموت م الضحك

وبعدها سأل فين اليهود..؟؟

فصاح البعض هنا وبدون كلام وبتعبيرات وجهه فقط أشار للعرب بما معناه اليهود هناك أهم بسك عليهم..

وبعدها سلخ اليهود شويه حلوين

فعلا ماقاله يدخله السجن هنا ف كندا

وماسبش يعدها حد ولاجنس ولامله ...من سود ﻷسبان لصينين لهنود..حوالى الساعه ونصف ضحك متواصل على أنفسنا وختم برضك بالسخريه من العرب..

تانى أحنا بنضحك ليه..؟؟؟؟؟؟؟

وبص هنا وتابع اللينك وشوف أبن الكلب ده

http://www.youtube.com/watch?v=AxbrXD0kgrQ&feature=related